JAHECHAUKÁKENA JASERVIHA JEHOVÁPE

Peteĩ mbaʼe ipyahúva ñane rreunión éntre semanaguápe

Enero 2018 guive pe rreunión de éntre semánape ojepurúta umi nóta de estúdio, imáhen ha vidéo oĩva pe Traducción del Nuevo Mundo edisión de estúdiope (nwtsty). Ko edisión jatopa Internétpe ha jepe neʼĩra oĩ ñane idiómape, umi informasión oĩva pype ñanepytyvõta jajeprepara porãve hag̃ua rreunionrã. Ha iñimportanteveha, ñanepytyvõta ñañemoag̃uive hag̃ua Jehováre, ñande Túa ñanderayhuetéva.

UMI NÓTA DE ESTÚDIO

Koʼãva omyesakã mbaʼépa heʼise heta palávra bíblica ha omeʼẽ heta detálle umi lugár oñemensionávagui la Bíbliape.

Mateo 12:20

Lámpara oguepotáva: Yma umi ogaháre ojepuru vaʼekue peteĩ lampĩu joguaha ojejapóva ñaiʼũgui ha oñemyenyhẽva aséite de olívape. Pe lámpara oreko peteĩ mécha oipytéva aséite pono ogue pe tata. Pe fráse griega ojetradusíva “lámpara oguepotáva” ikatu hína heʼise peteĩ mécha hendyʼíva gueteri térã peteĩ oguetémava péro hatatĩʼíva gueteri. Isaías 42:3-pe ojeprofetisa vaʼekue Jesús oiporiahuverekotaha umi iñumílde ha oiko asývape ha núnka ndoipeʼamoʼãiha chuguikuéra iñesperánsa, jepe ojogua peteĩ lámpara rendy oguepotámavape.

Mateo 26:13

Añetehápe: Griégope ojeʼe amén ojeʼehaichaite avei hebréope. Ko palávra heʼise “taupéicha” térã “añetehápe”. Jesús pyʼỹi oipuru vaʼekue ko palávra heʼi mboyve peteĩ enseñánsa, promésa térã profesía ha péicha ohechauka ikatuha jajerovia upe heʼívare. Ojeʼe Jesús añoite oipuru hague péicha ko palávra ha upévare ndajatopamoʼãi ótro hendápe la Bíbliape ni ótro lívro rrelihiósope. Sapyʼánte avei Jesús orrepeti vaʼekue dos vése voi pe palávra amén heʼi mboyve álgo, ojekuaaháicha lívro de Juan pukukuépe, péicha koʼýte orresalta upe heʼíva siertoha ha katuete oñekumplitaha.

IMÁHEN HA VIDÉO

Ko pártepe oĩ heta fóto, divúho ha vidéo ohechauka ha omyesakãva heta detálle oñemombeʼúva la Bíbliape.

Betfagué, Sérro Olivoty ha Jerusalén

Ko vidéo mbykýva ohechauka mbaʼéichapa ikatu ñag̃uahẽ At-Tur guive Jerusalén peve ésteguio ládo. At-Tur opyta pe Sérro Olivoty ruʼãme lénto ha ojekalkula upéva haʼeha pe puévlo la Bíbliape oñehenóiva Betfagué. Javaheáramo éste gotyo ládo Betfaguégui pe Sérro Olivotýre jatopa siuda de Betania. Ko siudápe Jesús ha idisipulokuéra ojepokuaámi vaʼekue opyta pyharekue Lázaro rógape oviaha jave hikuái Jerusalénpe (Mt 21:17; Mr 11:11; Lu 21:37; Jn 11:1). Betania ningo oĩ vaʼekue pe lugár koʼág̃a héravape Al-Éizariya, ko siuda réra árabepe heʼise “Lázaro oĩ hague”. Pe vidéope ojekuaa peteĩ tape ikatu hag̃uáicha ñag̃uahẽ Jerusalénpe, ha Jesús osẽvo Lázaro rógagui oime vaʼerã oho raʼe upérupi lénto og̃uahẽ hag̃ua Jerusalénpe. Pe 9 de nisán áño 33-pe, oime vaʼerã Jesús oho raʼe avei upe tapérupi osẽvo Betfaguégui ha okrusa pe Sérro Olivoty peteĩ vúrro ári oho hag̃ua Jerusalénpe.

Pe tape ohóva Betania guive Betfagué peve
Betfagué
Sérro Olivoty
Cedrón Ñu
Oĩ haguépe pe Témplo

Klávo oikéva peteĩ pyta kanguére

Áño 1968-pe ojetopa vaʼekue nórte gotyo Jerusaléngui peteĩ pyta kanguekue oikéva hese peteĩ klávo de 11 sentímetro imédio ha haʼéva umi romano épokape guare. Ojejapo vaʼekue peteĩ kópia chugui ha kóva haʼe peteĩ fóto oñenohẽ vaʼekue pe kópiape. Upéva ohechauka upe tiémpope ojepurúne hague klávo oñemosaingo hag̃ua yvyráre peteĩ persónape. Oiméne umi romano oipuru raʼe peichagua klávo omosaingo hag̃ua Jesúspe pe yvyráre. Ko kangue pedáso ojetopa vaʼekue peteĩ osáriope, haʼéva peteĩ káha ojejapóva itágui oñemoĩháme umi omanóva kanguekue. Upéva ohechauka peteĩ ojejukáva pe yvyráre ikatúnte hague avei oñeñotỹ (Mt 27:35).