Rreferénsia ojepurútava rreunionhápe Mbaʼéichapa Jaiko ha Japredika vaʼerã
4-10 DE JULIO
TESÓRO OĨVA ÑANDEJÁRA ÑEʼẼME | 2 SAMUEL 18, 19
“Barzilái orrekonose vaʼekue la ndaikatuvéimava ojapo”
Peẽ ermáno ijedáva: Jehová omombaʼeterei pendefiél haguére
Mbohapy kuimbaʼe uperupigua ipojera hendivekuéra. Upévare omeʼẽ David ha iñirũnguérape tupa, tembiʼu ha umi tembipuru oikotevẽva. Barzilai haʼe vaʼekue peteĩva umi kuimbaʼe (2 Sam. 17:27-29). Tiémpo rire, opa kuri pe rrevelión Absalón omoñepyrũ vaʼekue. Upévare David oho jey Jerusalénpe, ha Barzilai oakompaña chupe rrío Jordán peve. David ojerure chupe oho hag̃ua hendive Jerusalénpe. Pe rréi heʼi ndofaltamoʼãiha chupe tembiʼu, péro Barzilai ningo “ipláta heta” voi ha noikotevẽi oñemeʼẽ chupe tembiʼu (2 Sam. 19:31-33). David ojapo upéva pórke oapresiaiterei ohechávo mbaʼéichapa imbaʼeporã ko kuimbaʼe. Avei oikuaa oipytyvõitereitaha chupe oimeraẽ suherénsia ko kuimbaʼe omeʼẽva chupe. David oofreséva tuicha mbaʼe kuri, pórke Barzilai ikatúta oiko ha ombaʼapo pe rréi ykére.
Peẽ ermáno ijedáva: Jehová omombaʼeterei pendefiél haguére
Barzilai ningo iñumílde ha ohechakuaa mbaʼe situasiónpepa oĩ orekóma rupi 80 áño. Upévare haʼe heʼi ijehe: “Ndapillavéima mbaʼépa iporã ha mbaʼépa ivai” ¿Mbaʼe piko la heʼiséva? Ndeʼiséi ndaikatumoʼãiha omeʼẽ konsého porã, pórke katuete omoarandúne chupe umi mbaʼe ohasámava hekove pukukue. Haʼe ikatúta kuri oipytyvõ peteĩ rréipe, ojapo haguéicha upe rire umi kuimbaʼe ijedáva rréi Rehoboam tiémpope (1 Rey. 12:6, 7; Sal. 92:12-14; Prov. 16:31). Barzilai heʼírõ guare ndopillaveimaha iporãva ni ivaíva oiméne ohechaukánte raʼe ndaikatuveimaha ojapo heta mbaʼe ijedáma rupi. Haʼe omombeʼu voi umi mbaʼe hoʼúva jepe ndaheveimaha chupe ha nohenduporãveimaha (Ecl. 12:4, 5). Upémarõ Barzilai ojerure Davídpe oraha hag̃ua hendive peteĩ kuimbaʼe imitãvape hérava Kimham. Posívlemente ko kuimbaʼe haʼe vaʼekue Barzilai raʼy (2 Sam. 19:35-40).
Jasegíkena ñaneumílde sapyʼánte ijetuʼúramo jepe
6 ¿Mbaʼérepa Barzilai ndoaseptái kuri pe invitasión? ¿Ndoipotáintepa raʼe rresponsavilida, térã oikosénte trankílo? Nahániri, Barzilai iñumílde. Haʼe orrekonose okambiamaha isituasión ha ndaikatuveimaha ojapo heta mbaʼe ijedáma rupi (elee Gálatas 6:4, 5). Ñande avei ñaneumílde vaʼerã. Upévare jaiko rangue ñapensaiterei ñandejehénte térã ñañekompara ótrore, ñañehaʼã vaʼerã ñameʼẽ Jehovápe la iporãvéva. Añetehápe, upéva iñimportanteve hína oimehaichagua asignasióngui (Gál. 5:26). Ñaneumílderamo, ñambaʼapóta ñane ermanokuérandi ñambotuicha hag̃ua Jehovápe ha ñaipytyvõ hag̃ua ñande rapichakuérape (1 Cor. 10:31).
Óro kuʼi oĩva la Bíbliape
Jadiparákena pe karréra ñamohuʼã meve
19 Oiméramo nde nderasykatu ha reñandu avave nontendeiha ne situasión, ikatu nemokyreʼỹ hína Mefibóset ehémplo (2 Sam. 4:4). Haʼe ningo heta osufri vaʼekue ndaikatúi rupi oguata porã, ha hiʼarive rréi David opensa vai hese ha ndaihústoi hendive. Koʼã mbaʼe ningo ndahaʼéi ikáusare la oikóva. Upéicharõ jepe, haʼe ndohejái umi mbaʼe vai oamarga chupe, síno ohechakuaa ha oagradese umi mbaʼe porã oikóva hese. Por ehémplo, haʼe omombaʼeterei vaʼekue David ymave imbaʼeporã haguére hendive (2 Sam. 9:6-10). Upévare David opensa vaírõ guare hese, Mefibóset odesidi ndaipochymoʼãiha ni ndopytamoʼãiha ipyʼaro. David ojavýramo jepe, Mefibóset ndohejái upéva oamarga chupe, ha ndokulpái avei Jehovápe umi mbaʼe vai David ojapo vaʼekuére. Mefibóset ojesareko umi mbaʼe ikatúvare ojapo oapoja hag̃ua pe rréi Jehová oiporavo vaʼekuépe (2 Sam. 16:1-4; 19:24-30). Jehová oheja ñandéve la Bíbliape Mefibóset ehémplo porãite ikatu hag̃uáicha ñaaprende chugui (Rom. 15:4).
11-17 DE JULIO
TESÓRO OĨVA ÑANDEJÁRA ÑEʼẼME | 2 SAMUEL 20, 21
“Jehová siémpre ihústo”
Oñeporandúva jepi
Upe kompromíso osegi gueteri vaʼekue Saúl tiémpo peve. Péro Saúl nopenái hese, ha haʼe ha ifamília ojuka umi gabaonítape (2 Sam. 21:1). Tiémpo rire Davídgui oiko rréi ha umi gabaonita ojesalva vaʼekue oho omombeʼu chupe la Saúl ojapo vaʼekue. Upévare David oporandu chupekuéra mbaʼépa haʼe ikatu ojapo umi gabaonita operdona hag̃ua umi israelítape ha Jehová ovendesi jey hag̃ua chupekuéra. Umi gabaonita ndojeruréi pláta, upéva rangue haʼekuéra oipota oñentrega chupekuéra 7 Saúl familiare ojuka hag̃ua chupekuéra (Núm. 35:30, 31). Ha David oasepta upéva (2 Sam. 21:2-6).
Jehová léi ningo heʼi porã: “Tuakuérape ndojejukái vaʼerã itaʼýra pekadokuére” (Deut. 24:16). ¿Mbaʼérepa upéicharõ Jehová opermiti vaʼekue oiko upéva? Ikatu ñaĩ segúro Jehová nopermitimoʼãi hague kuri ojejapo upéva, umi mokõi Saúl raʼy ha umi 5 iniéto haʼérire inosénte. Pórke pe léi heʼi avei: “Peteĩ persónape ojejuka vaʼerã ipekádore añoite”. Posívlemente koʼã 7 Saúl familiare oipytyvõne raʼe chupe ojukapa lénto hag̃ua umi gabaonítape. Ha oimérire upéicha, haʼekuéra kulpávle avei kuri ha omerese voi omano la ojapo vaʼekuére.
Óro kuʼi oĩva la Bíbliape
Ansianokuéra ‘ombaʼapo ñande ykére javyʼa hag̃ua’
14 Ñande testígo de Jehová japredika meme ko Yvy tuichakuére, jepe Satanás ha umi omoirũva chupe ñandejokose. Katuete oĩ ñande apytépe ohasámava umi provléma tuichaitereíva, David ohasa haguéicha ombohováivo Goliátpe. Péro jajerovia rupi Jehováre ñande pyʼaite guive, jagueropuʼaka opa koʼã mbaʼe. Upéicharamo jepe, ko múndo akóinte ñandejopy ha sapyʼánte ñanekaneʼõ ha jaju ñanekangy. Ñañeñandu jave upéicha, umi provléma jepive ñambohovái porãva jepe ikatu ñandereity. Péro umi ansiáno ñanepytyvõkuaa javyʼa ha ñanembarete jey hag̃ua. Peteĩ prekursóra orekóva 65 áño rupi heʼi: “Ndaʼareguasúi, nachekyreʼỹvéi ha chemokaneʼõiterei pe predikasión. Peteĩ ansiáno ohechakuaa upéva ha oñemboja cherendápe. Roñemongeta peteĩ téxto oĩvare la Bíbliape ha chekyreʼỹ jey apytávo. Asegi umi konsého omeʼẽvaʼekue chéve ha asẽ porã. ¡Aagradesete ningo pe ermáno ohechakuaa haguére mbaʼépa ojehu chéve ha chepytyvõ rupi!”. Ajépa javyʼaite jaikuaávo umi ansiáno oñangarekoha ñanderehe ha oĩha ñanepytyvõ hag̃uáicha, ojapo haguéicha Abisai David rehe.
18-24 DE JULIO
TESÓRO OĨVA ÑANDEJÁRA ÑEʼẼME | 2 SAMUEL 22
“Ani jaduda Jehová ñanepytyvõtaha”
Ñandejára ningo Todopoderóso, péro imbaʼerechakuaa
13 (Elee Éxodo 14:19-22). Eñeimahinamína reimeha umi israelita apytépe ha ndaikatuiha peho moõve. Pe ehérsito egipcio oĩ pende kupépe ha pe mar Rojo katu oĩ pene renondépe. Péro peichaháguinte Ñandejára penepytyvõ. Pe arai oĩ vaʼekue pene renondépe koʼág̃a ojeguerova pende kupépe ha pendesepara umi egípciogui. Pe arai ohesape peẽ peĩha gotyo, péro omoypytũ umi egipciokuéra oĩha gotyo. Upéi pehecha sapyʼa Moisés oipysoha ipo pe mar ári, ha peteĩ yvytu atã oipejúva ésteguio oavri peteĩ tape ohóva pe ótra orílla peve. Upévare nde, ne família, ne rymbakuéra ha umi ótro israelita ikatu pehasa pe mar ojavri haguérupi. Katuete peñesorprendeterei pórke pe tape ndaitujúi ni naisỹiri, síno iséko asy ha trankílamente ikatu pehasa upérupi. Umi oguata mbeguéva jepe ikatu sin provléma okrusa pe ótra orílla peve.
14 (Elee Éxodo 14:23, 26-30). Upe aja, pe faraón oñemombaʼeguasu ha oñemohatãitéva ijidéape oñepyrũ pendepersegi ijehérsito reheve. Peg̃uahẽmba rire pe oríllape, Moisés oipyso jey ipo pe mar ári ha pe y opyta vaʼekue múroicha oñepyrũ ou jey hendaguépe. Pe mar ohundiete faraón ha ijehérsitope. ¡Ni peteĩ ndojesalvái ijapytepekuéra! (Éx. 15:8-10).
15 Ko rreláto ñanemboʼe avei ótra kósa Jehovágui. Haʼe ningo ojapo opa mbaʼe hendaitépe, ha upéva ñanepytyvõ ñañeñandu hag̃ua protehído ha segúro (1 Cor. 14:33). Peteĩ ovecha rerekua ningo ohayhu ha oñangareko ijovechakuérare. Péicha avei Jehová okuida porãiterei ipuévlore. Por ehémplo osalva ha oprotehe chupekuéra umi iñenemígogui. Upéva tuicha ñanembopyʼaguapy, koʼýte koʼág̃a jaikuaágui koʼẽrõitéma oñehunditaha ko múndo aña (Prov. 1:33).
Haʼe ndohejaichéne umi hese ojeroviávape
Ñahesaʼỹijomiéna ko versíkulo. Pe párte heʼíva “ndepyʼaporã”, ikatu avei ojetradusi “nembaʼeporã reporohayhu rupi”. Ha umi oporohayhu añetéva arakaʼeve ndohejareíri hapichápe. Upévare jajeroviakuaa Jehová ni mbaʼevéicharõ ndohejamoʼãiha umi hese ojeroviávape. Mbaʼérepa? Ohayhuetereígui chupekuéra.
Oĩve ambue mbaʼe ñanemanduʼavaʼerã: ñandepyʼaporãramo ojekuaavaʼerã ñane rembiapóre. Upévare pe versíkulo heʼívo Ñandejára ‘ipyʼaporãha’, ohechauka haʼe ojapoha heta mbaʼe ñanderehehápe. Ha David oikuaa porã vaʼekue upéva añeteha. Mbaʼérepa? Pe ijetuʼuve jave Jehová oĩ ijykére, oñangareko hese ha ohekomboʼe chupe. ‘Oipeʼa chupe umi hese ijaʼeʼỹva poguýgui’ ha David omombaʼeterei upéva (2 Samuel 22:1).
Ikatúpa avei jaguerovia oñekumplitaha ñanderehe 2 Samuel 22:26? Ñanemanduʼákena Jehová nokambiaiha (Santiago 1:17). Haʼe ni mbaʼeveichavérõ nopyrũi iñeʼẽre. David ohaivaʼekue peteĩ mbaʼe Jehová oprometéva: ‘Ñandejára ndohejareichéne umi hese ojeroviávape’ (Salmo 37:28).
Óro kuʼi oĩva la Bíbliape
Jaikókena ‘pe oñemomichĩvévaicha’
7 David ohechakuaa Jehová hekomirĩha ha omombaʼeterei upéva. Upéicha rupi opurahéi: “Remeʼẽ avei chéve [nde eskúdo] chesalva hag̃ua, ha [nderekomirĩ rupi] chembotuicha” (2 Sam. 22:36, ÑÑB). David orrekonose Jehová iñumildeha ohendu ha oipytyvõ haguére chupe ohupyty hag̃ua umi mbaʼe tuicháva Israélpe (Sal. 113:5-7). Upéicha avei Jehová ñanepytyvõ koʼág̃a peve. Haʼe rupínte ñandekatupyry, jahupyty umi priviléhio ha jahechauka heta mbaʼe porã jaiko lájare (1 Cor. 4:7.) Upéicharõ, ¿mbaʼérepa ‘tuichave’ peteĩ oikóva ‘pe oñemomichĩvévaicha’? Jehová ikatu rupi oiporu porãve chupe (Luc. 9:48, nóta). Jahechamína mbaʼérepa jaʼe upéva.
25-31 DE JULIO
TESÓRO OĨVA ÑANDEJÁRA ÑEʼẼME | 2 SAMUEL 23, 24
“¿Ndépa rejesakrifika hína Jehová rehehápe?”
it-1-S 174
Arauna
Jahechaháicha Arauna ndokovraséi kuri mbaʼeve ha orregalasénte kuri pe lugár, umi animál ha la jepeʼa oñekotevẽtava pe sakrifisiorã, péro David oinsisti opaga hag̃ua umívare. Asegún 2 Samuel 24:24 David ojogua pe lugár oñemopotĩháme semílla ha umi tóro 50 siclo de plátare (110 dólar), péro asegún 1 Crónicas 21:25 David opaga pe yvýre 600 siclo de óro (77.000 dólar). Segundo de Samuel sólamente omombeʼu ojejogua hague pe lugár ojejapotahápe la sakrifísio ha umi materiál oñekotevẽtava upearã, upévare omombeʼu mboýpa ohupyty umívante. Péro 1 Crónicas omombeʼu upe yvýpe oñemopuʼãtaha Jehová témplo tiémpo rire. Upévare oñeʼẽvo pe vénta ojejapo vaʼekuére oñeʼẽ avei pe konstruksiónre (1Cr 22:1-6; 2Cr 3:1). Ñanemanduʼa pe témplo korapy tuichaiterei hague, upévare provávlemente pe 600 siclo de óro ojepaga pe yvy kompletoitére ha ndahaʼéi pe lugár David oikotevẽ vaʼekuérente omopuʼã hag̃ua pe altár.
Mbaʼépa ñanemboʼe umi Léi
8 Sapyʼánte umi isrraelíta ombaʼekuaveʼẽmi ojapose rupi, umichagua sakrifísiope oñehenói “sakrifísio voluntário”. Mbaʼerãpa ojapo hikuái upéva? Oiméne oagradese hag̃ua Jehovápe térã oipotágui oguerohory chupekuéra, oikoháicha jepi ohapýrõ peteĩ mymba chupe g̃uarã. Tahaʼe haʼeháicha, umícha jave ndaijetuʼuiete chupekuéra oiporavo umi mymba iporãnguetéva omeʼẽ hag̃ua. Vyʼápe ojapo hikuái upéva! Koʼág̃a rupi ñande kristianokuéra natekotevẽi ñaikuaveʼẽ umi sakrifísio ojejerurevaʼekue yma umi isrraelítape. Péro ñande jasakrifika ñane tiémpo, mbaʼerepy ha mbaretekue Ñandejára servísiope. Apóstol Pablo heʼi ñameʼẽha sakrifísio ombovyʼáva Ñandejárape ‘ñamombeʼúvo enterovépe pe esperánsa jaguerekóva, jajapóvo iporãva ñande rapicháre ha ñandepojeráramo hendivekuéra’ (Heb. 13:15, 16, NM). Ñanekyreʼỹramo jajapokuévo koʼã mbaʼe, jahechauka mbaʼeichaitépa jaagradese Jehovápe opa mbaʼe ojapóvare ñanderehehápe ha omeʼẽvare ñandéve. Ha ojapo haguéicha umi isrraelíta iñeʼẽrendúva, ñande avei jahechavaʼerã mbaʼéicha ha mbaʼérepa jaserviñaína Ñandejárape.
Óro kuʼi oĩva la Bíbliape
“Chemboʼékena ajapokuaa hag̃ua ne rembipota”
13 David oikuaa porã pe Léi heʼiha ndojeʼuivaʼerãha tuguy, síno oñeñohẽvaʼerãha Jehová renondépe. Avei ontende mbaʼérepa ojeproivi upéva. Pe Léi heʼi: “Opa umi oikovéva rekove niko oĩ huguýpe”. Péro umi kuimbaʼe ningo ndoguerúi tuguy, síno y. ¿Mbaʼére piko upéicharõ haʼe ndoyʼuséi raʼe? Oikuaágui pe léi heʼiha Ñandejárape g̃uarã tuicha mbaʼeha pe tuguy. Ha umi kuimbaʼe ojapeligrákuri ogueru hag̃ua upe y, upévare chupe g̃uarã pe y haʼete huguykuéra. Upéicha rupi David ni mbaʼevéicharõ ndoyʼuséi, oñohẽ uvei yvýpe (Lev. 17:11; Deut. 12:23, 24).
14 David oñehaʼãmbaite ikatu hag̃uáicha Ñandejára léi og̃uahẽ ikorasõme. Upévare opurahéi: “Ajapose ne rembipota, péva chembovyʼáta che Ruete, ha ne rembiapoukapy oĩ che pyʼapýpe” (Sal. 40:8, ÑÑB). Haʼe ohesaʼỹijo porã pe Léi ha ojepyʼamongeta hese. Oikuaáramo jepe oho porãtaha chupe okumplíramo upépe heʼíva, oñehaʼã avei ontende mbaʼépa omboʼe umi léi. Upéicha avei, jastudia jave la Biblia iporã jajepyʼamongeta umi mbaʼe jaleévare ha ñañehaʼã tog̃uahẽ ñane korasõme. Péichamante jaikuaáta mbaʼépa Jehová oguerohory, tahaʼe haʼéva ñane situasión.
1-7 DE AGOSTO
TESÓRO OĨVA ÑANDEJÁRA ÑEʼẼME | 1 REYES 1, 2
“¿Jafalla jeýpa la mísma kósape?”
it-2-S 910 párr. 2
Salomón
Namombyrýi upégui, Guihónpe oñehendu pe músika pu ha umi hénte osapukaiha: “¡Toñevendesi rréi Salomónpe!”. Upémarõ Adonías ha iñirũnguéra oñemondýi ha odiparapa okañy hag̃ua, pórke haʼekuéra oñemoĩ hína pe rréi kóntrape. Salomón ndojapóinte hesekuéra mbaʼeve, pórke ndoipotái igoviérno oñepyrũ vaíma voi. Péicha ohechauka mbaʼéichapa pe puévlo oikóta pyʼaguapýpe ipoguýpe. Provávlemente Salomón opuʼãrire Adonías rehe, ymáma Adonías ojuka vaʼerãmoʼã chupe, péro Salomón ndojapói upéva. Adonías oho kuri okañy Ñandejára rógape, upémarõ rréi Salomón omondo ojegueru hag̃ua chupe hendápe. Salomón heʼi ndojejukamoʼãiha Adoníaspe ikatúramo oñekonfia hese, ha upéi oheja oho jey hógape (1Re 1:41-53).
it-1-S 55
Adonías
Rréi David omano rire, Adonías okonvense ha omboliga Bat-Sébape ojerure hag̃ua Salomónpe tomeʼẽ chupe Abiságpe hembirekorã, ko kuñataĩ ningo oñatende vaʼekue rréi David rehe ituja rire. Adonías heʼi: “Nde ningo reikuaa porã agoverna vaʼerãha kuri, ha Israel kompletoite voi ohaʼarõ kuri oiko chehegui rréi”. Péicha ohechauka oñanduha ojepeʼa hague chugui pe derécho orekóva ogovernávo, orrekonoséramo jepe Jehová onombra hague iñermánope rréiramo (1Re 2:13-21). Yma upe lugárpe oĩ vaʼekue peteĩ kostúmbre heʼíva pe tembireko ha umi tembireko sekundária opyta vaʼerãha pe sigiénte rréipe añoite. Ikatu oime Adonías ojapo raʼe ko pedído oipotáguinte oñemeʼẽ chupe álgo jepe ndorresivíri haguére pe goviérno. Péro amo ipahápe ohechauka nokambiapái hague ha ndojeipái chugui pe envídia (ekompara 2Sa 3:7; 16:21 heʼívare). Salomón ohechakuaa Adonías iñintensión vai hague, upévare upepete omondo Benáyape oho hag̃ua ojuka Adoníaspe, ha haʼe pyaʼe ojapo upéva (1Re 2:22-25).
Óro kuʼi oĩva la Bíbliape
w05-S 1/7 30 párr. 1
Mbaʼe mbaʼépa ñanemboʼe Primero de los Reyes
2:37, 41-46. Tuichaiterei ningo jajavýta ñapensáramo ikatuha ñamboyke Jehová léi heʼíva ha ndojehumoʼãiha ñandéve mbaʼeve. Enterove umi odesidíva ijeheguiete ojeívo pe tape porãgui osẽ vaíta katuete (Mateo 7:14).
8-14 DE AGOSTO
TESÓRO OĨVA ÑANDEJÁRA ÑEʼẼME | 1 REYES 3, 4
“Iporãve ñanearandu jareko rangue heta óro”
Jasegítapa umi mbaʼe porã ojapovaʼekue?
4 Salomón oñepyrũvo ogoverna, Jehová ojechauka chupe iképe ha heʼi ojerure hag̃ua oipotáva guive. Haʼe ohechakuaa imitãha gueteri ha ndoikuaaiha heta mbaʼe, upévare ojerure Ñandejárape omoarandu hag̃ua chupe (elee 1 Reyes 3:5-9). Jehová oguerohoryeterei Salomónpe ndojeruréigui mbaʼeta, pláta ha oñembotuicha hag̃ua. Upévare omeʼẽ chupe “arandu ha akãporã”, ha avei heta mbaʼerepy (1 Rey. 3:10-14). Jesús heʼi haguéicha, pe rréina Sebaygua jepe ohendu mbaʼéichapa herakuã porã, upévare mombyrýgui ou ohecha hag̃ua añetehápepa peichaite peve iñarandu (1 Rey. 10:1, 4-9).
5 Koʼág̃a rupi ndaikatúi ñahaʼarõ Ñandejára ñanemoarandu peteĩ milágro rupive. Péro Salomón heʼivaʼekue Jehová oporomoaranduha ha omombeʼu avei mbaʼépa jajapovaʼerã jahupyty hag̃ua upéva: “Ejapysaka porã arandúre ha eñehaʼã eikokuaa”. Ohechauka avei ñanearandutaha ñañehaʼãramo añoite, upévare oiporu umi ñeʼẽ “reñehaʼã hese” ha “reheka” (Pro. 2:1-6). Jahechaháicha, opavave ikatuhína ñanearandu.
6 Iporã ñañeporandu: “Añehaʼãpa asegi Salomón ehémplo ha ahechauka aipotaha Jehová chemoarandu?”. Koʼág̃a rupi pe pláta ndovalevéi, upévare heta tapicha ombaʼapo jejopy ha oñehaʼã oganave, ha koʼã mbaʼe omomýi chupekuéra odesidi hag̃ua mbaʼépa ostudiáta ha mboy tiémpopa. Mbaʼépa jajapo ñande ha ñande rogayguakuéra? Ojekuaápa umi mbaʼe jadesidívare ñamombaʼe ha ñañehaʼãha jahupyty Ñandejára arandu? Ikatúpa ñakambia umi mbaʼe ñapensáva estúdio ha plátare ha ñañehaʼã ñamotenonde umi mbaʼe ñanepytyvõtava ñanearanduve hag̃ua? Ñanearandúramo, katuete osẽ porãta ñandéve opa mbaʼe. Salomón heʼi: “Upéicharamo reikuaáta pe hustísia, akãguapy reko ha opa mbaʼe hekopeguáva” (Pro. 2:9, ÑÑB).
Óro kuʼi oĩva la Bíbliape
w98-S 1/2 11 párr. 15
Jehová okumpli ipromesakuéra
15 Abrahán familiarégui oikóma kuri peteĩ puévlo tuicháva orekóva léi ojegia hag̃ua, ha Jehová ovendesi chupekuéra opromete haguéicha Abrahánpe. Áño 1473-pe a.C., Josué, haʼéva pe omoakãva pe puévlope Moisés rire, ogia chupekuéra oike hag̃ua Canaánpe. Upe rire, ojedividírõ guare pe yvy oñemeʼẽ hag̃ua umi trívupe, oñekumpli pe promésa Jehová ojapo vaʼekue Abrahánpe ifamiliare orresivitaha pe yvy. Israel iñeʼẽrendu aja, Jehová okumpli ipromésa ha umi israelita ogana iñenemigokuérape ha upéva ojehecha espesiálmente David ogovernaha tiémpope. Ha Salomón ogovernaha tiémpope katu oñekumpli ótra párte pe promésagui: “Umi hénte oikóva Judá ha Israélpe hetaiterei, hetaháicha pe yvykuʼi oĩva mar rembeʼýpe. Haʼekuéra okaru, hoʼu víno ha ovyʼa joa” (1 Reyes 4:20).
15-21 DE AGOSTO
TESÓRO OĨVA ÑANDEJÁRA ÑEʼẼME | 1 REYES 5, 6
“Kyreʼỹme omopuʼã hikuái pe témplo”
w11-S 1/2 15 párr. 5
Jaikuaave hag̃ua
Yma ningo ojepotaiterei vaʼekue umi sédro máta oĩva Líbanope pórke oiko are, iporã ha hyakuã asy, hiʼarive ipire atã rupi umi vícho ndoikepái hese. Ajeve voi ningo rréi Salomón oipuruse koʼãichagua yvyra oñemopuʼã hag̃ua pe témplo. Líbanope ymave oĩ vaʼekue umi kaʼaguy henyhẽhápe umi sédro máta, péro koʼág̃a unos kuánto mátantema oĩ.
it-1-S 451
Sédro
Oñemopuʼãtarõ guare pe témplo, atyraite ojepurúta kuri umi sédro, upéicha rupi oñekotevẽ hetaiterei travahadór. ¿Mbaʼérepa? Pórke ojeity vaʼerã umi yvyramáta ha upéi ojegueraha vaʼerã pe Mar Mediterráneo rehe Tiro térã Sidón peve. Upearã umi rróllo ojejokuapa ojuehe ha oñemondo por mar provávlemente Jope peve, ha upépe oñemboguejy yvy isekohápe ha ojegueraha Jerusalén peve. Entéro koʼã mbaʼe ojejapo asegún la heʼíva pe kontráto ojapóva rréi Hiram ha rréi Salomón (1Re 5:6-18; 2Cr 2:3-10). Ko yvyra osegi vaʼekue ojegueraha hetaiterei Israélpe, upévare ojeʼe vaʼekue Salomón ogovernaha tiémpope oĩ hague “hetaiterei madéra de sédro hetaháicha umi ígo máta” (1Re 10:27; ekompara Is 9:9, 10 heʼívare).
it-2-S 1097 párr. 4
Témplo
Ojejapo porã hag̃ua upe traváho, Salomón ombyaty 30.000 kuimbaʼe Israélgui, ha omondo chupekuéra por túrno pe Líbanope 10.000 káda mes. Ha opyta hikuái un mes upépe ha 2 mése hógape (1Re 5:13, 14). Ombyaty avei 70.000 kuimbaʼe ndahaʼéiva israelita, péro oikóva hendivekuéra ogueroja hag̃ua umi mbaʼe pohýi ha 80.000 kuimbaʼe ojoka hag̃ua ita umi montañaháre (1Re 5:15; 9:20, 21; 2Cr 2:2). Salomón oreko vaʼekue 3.300 ofisiál ha 550 héfe omoakãva umi ofisiálpe (1Re 5:16; 9:22, 23). Koʼãva apytégui provávlemente 250 haʼe vaʼekue israelita ha 3.600 haʼe vaʼekue umi extranhéro oikóva umi israelita apytépe (2Cr 2:17, 18).
Óro kuʼi oĩva la Bíbliape
g-S 5/12 17, rrekuádro
Umi profesía oĩva la Bíbliape oñekumpli. Párte 1
OÑANOTA ARAKAʼETÉPA OIKO UMI MBAʼE IÑIMPORTÁNTEVA
La Bíbliape oñanota arakaʼépa oiko vaʼekue umi mbaʼe iñimportantevéva ha upéva ñamombaʼeterei. Por ehémplo, 1 Reyes 6:1-pe omombeʼu mbaʼe áñopepa Salomón oñepyrũ vaʼekue omopuʼã pe témplo Jerusalénpe. Upépe heʼi: “Ohasárõ guare 480 áño (térã 479 áño kompléto) umi israelita osẽ hague Egíptogui, pe cuarto áño rréi Salomón ogoverna haguépe Israel, pe segundo mes héravape Ziv, Salomón oñepyrũ omopuʼã Jehová róga”.
Asegún la Biblia pe cuarto áño Salomón orreina hague haʼe vaʼekue pe áño 1034 a.C., ha ñamboguevíramo 479 áño kompléto ñag̃uahẽ pe áño 1513-pe a.C., upe áñope umi israelita osẽ vaʼekue Egíptogui.
22-28 DE AGOSTO
TESÓRO OĨVA ÑANDEJÁRA ÑEʼẼME | 1 REYES 7
“Mbaʼépa ñanemboʼe umi mokõi pilár oĩva pe témplope”
“Iserrokuéragui peguenohẽta kóvre”
Rréi Salomón oiporu vaʼekue hetaiterei kóvre ojapo hag̃ua pe témplo Jerusalénpe. Ha enterove lénto umi kóvre oiporúva, omeʼẽ vaʼekue chupe itúva David, ojagarra rire Siria (1 Crónicas 18:6-8). Pe témplo korapýpe oĩ vaʼekue peteĩ y ryru tuichaitereíva ojejapóva kóvregui, ikatu hag̃uáicha umi saserdóte oñemopotĩ upépe. Upe mbaʼyru oñehenóiva “mar”, ipohýi 30.000 kílorupi voi ha ikatu ojekarga pype 66.000 lítro y (1 Reyes 7:23-26, 44-46). Pe témplo entrádape oĩ vaʼekue avei mokõi kolúmna tuichaitereíva. Koʼã kolúmna haʼete peteĩ káño guasu iñanambusúva 7,5 sentímetro, ijerekuévo omedi 1,7 métro, ijyvate 8 métro ha pe ipúntape ijapuʼa guasuve, ha upéva ijyvate 2,2 métro (1 Reyes 7:15, 16; 2 Crónicas 4:17). ¡Ajépa hetaite kóvre ojeporúne raʼe ojejapo hag̃ua koʼã mbaʼe!
it-1-S 361
Boaz, II
Pe témplo porãite oĩ vaʼekue Salomón tiémpope oreko vaʼekue mokõi pilár tuichaitereíva de kóvre pe okẽ entrádape. Peteĩva, pe oĩva nórte gotyo, héra vaʼekue Boaz. Ko téra posívlemente heʼise “mbaretépe”. Ha pe pilár tuichaite opytáva sur gotyo ládo, héra Jakín heʼiséva “[Jehová] okoloka porãta”. Upéicharõ ojeleéramo oñondive koʼã pilár réra, de derécha a iskiérda, ñamañávo éste gotyo heʼise: “[Jehová] okoloka porãta [pe témplo] mbaretépe” (1Re 7:15-21; ehecha CAPITEL).
Óro kuʼi oĩva la Bíbliape
it-1-S 282
Jejahu
Jehová siervokuéra ndaikyʼái vaʼerã, péicharõ iservísio ipotĩta. Ha upéva ojehechauka vaʼekue yma pe tavernákulope, ha upe rire pe témplope. Por ehémplo Aarón ha itaʼyrakuérape oñenombrátarõ guare saserdóte, tekotevẽ vaʼekue ojahu, ha upe rire ae omonde umi ao oipurúva umi saserdóte (Éx 29:4-9; 40:12-15; Le 8:6, 7). Pe tavernákulo tiémpope umi saserdóte tekotevẽ vaʼekue ojepyhéi ha ojepohéi pe palangána de kóvre oĩvape okápe. Ha Salomón ogovernárõ guare, pe témplope ojepuru vaʼekue avei peteĩ Palangána Guasu de kóvre ojejapo hag̃ua upéicha (Éx 30:18-21; 40:30-32; 2Cr 4:2-6). Pe Día Oñeperdonahápe umi Pekádo pe súmo saserdóte ojahu vaʼerã kuri 2 vése (Le 16:4, 23, 24). Pe ogueraháva pe kavara mácho Azazélpe g̃uarã ha umi oguenohẽva pe kampaméntogui umi ofrénda rembyre ha pe vakílla pytã, ojahu vaʼerã avei ha ojohéi vaʼerã ijao oike mboyve pe kampaméntope (Le 16:26-28; Nú 19:2-10).
29 DE AGOSTO AL 4 DE SEPTIEMBRE
TESÓRO OĨVA ÑANDEJÁRA ÑEʼẼME | 1 REYES 8
“Salomón oñemboʼe ipyʼaite guive umi hénte rovake”
Ñahesaʼỹijóramo la Biblia ñañemboʼe porãvéta Jehovápe
9 Ñañemboʼevaʼerã ñande pyʼaite guive jaipotáramo Jehová ohendu ñane ñemboʼe. Primero de los Reyes kapítulo 8 omombeʼu mbaʼéichapa Salomón oñemboʼe ipyʼaite guive oñeinaugurárõ guare Jerusalenpegua témplo. Upéva oikovaʼekue áño 1026-pe Jesucristo ou mboyve. Salomón ningo omombaʼeguasu Ñandejárape peteĩ hénte aty renondépe, oñemoĩ rire pe arca del pacto pe Santísimope. Upérõ avei Jehová arai ojagarrapa pe témplo.
10 Ñahesaʼỹijóvo Salomón ñemboʼe, jahecháta heta hendápe oñeʼẽ hague ñande pyʼapýre. Haʼe heʼivaʼekue voi Jehová añoite ohechakuaaha ñande pyʼapýpe oĩva (1 Rey. 8:38, 39). Heʼivaʼekuére avei jahechakuaa umi hembiapo vaíva ‘ojevýramo Jehová rendápe ipyʼaite guive’, Haʼe operdonataha chupekuéra. Ha umi Israelgua hoʼa mbaʼéramo iñenemígo poguýpe, ikatu ojerovia hikuái Jehová ohendutaha chupekuéra oñemboʼe jave. Upearã ningo haʼekuéra ojeroviavaʼerã hese ipyʼaite guive (1 Rey. 8:48, 58, 61). Péicha jahecha tekotevẽha ñañemboʼe Jehovápe ñande pyʼaite guive.
w99-S 15/1 17 párr. 7, 8
Ñañemboʼékena Ñandejárape
7 Tahaʼe ñañemboʼe jave ñaneañoháme térã ótro rovake, iñimportanteterei jahechauka ñaneumildeha ñañemboʼe jave (2 Crónicas 7:13, 14). Oñeinagurárõ guare Jehová témplo Jerusalénpe, rréi Salomón oñemboʼe entéro umi hénte rovake. Haʼe ningo la oñenkarga vaʼekue oñemopuʼãmba hag̃ua pe témplo, ha upe tiémpo peve ko yvy ape ári noñemopuʼãiva ótro lugár peichaite peve iporãva. Upéicharõ jepe ojekuaa rréi Salomón iñumildeha oñemboʼérõ guare. Haʼe heʼi: “Ñandejára, ¿nde piko reikóne ko yvy ape ári? ¡Pe yvága ijyvatevéva jepe ningo michĩ ndéve g̃uarã, ha mbaʼéicha piko upéicharõ reikóta ko óga amopuʼã vaʼekuépe ndéve g̃uarã!” (1 Reyes 8:27).
8 Tekotevẽ ningo jasegi Salomón ehémplo ha ñaneumílde ñañemboʼe jave ótro rovake. Ndajaikomoʼãi ñañemosanturrón, péro pe ñañeʼẽ lájare ojekuaa vaʼerã ñaneumildeha. Ndajaipurumoʼãi umi palávra iñextráñova, ijetuʼuetereíva ha ndajaikomoʼãi ñandeexaherádo. Ñañemboʼe jave en púvliko ndajaipotái umi persóna oñekonsentra ñanderehe, síno opensa vaʼerã Jehováre, pórke chupe ñañeʼẽ hína (Mateo 6:5). Avei ojekuaáta ñaneumildeha umi mbaʼe jajerurévape. Por ehémplo ndajaikomoʼãi ñamanda Jehovápe la ojapo vaʼerã, síno jajeruréta chupe tojapo umi mbaʼe oĩ porãva ivoluntándi. Pe salmísta oheja ñandéve peteĩ ehémplo iporãitereíva iñemboʼépe. Haʼe heʼi vaʼekue: “Jehová, oresalvamína por favór. Jehová, orepytyvõmína rogana hag̃ua” (Salmo 118:25; Lucas 18:9-14).
Óro kuʼi oĩva la Bíbliape
Jahayhúkena Jehová róga
4 Israélpe ningo Ñandejára róga haʼevaʼekue pe témplo oĩva Jerusalénpe. Péro upéva ndeʼiséi Jehová oiko hague upépe. Haʼe voi ningo heʼivaʼekue: “Yvága cheguapyha ha yvy chepyenda. Mamo piko ikatúta pemopuʼã cherogarã, mamo piko ikatúta pejapo apytuʼu hag̃ua?” (Isa. 66:1). Ojeʼe ningo pe témplo Salomón ojapoukavaʼekue haʼe hague Jehová róga, pórke upépe oñembyatypavaʼekue hikuái omombaʼeguasu ha oñemboʼe hag̃ua Chupe (1 Rey. 8:27-30).