Rreferénsia ojepurútava rreunionhápe Mbaʼéichapa Jaiko ha Japredika vaʼerã
© 2023 Watch Tower Bible and Tract Society of Pennsylvania
1-7 DE ENERO
TESÓRO OĨVA ÑANDEJÁRA ÑEʼẼME | JOB 32, 33
Eipytyvõ umi ojepyʼapyetereívape
it-1-S 796
Elihú
Elihú nosẽi vaʼekue avave favórpe ha ndoikói ombojuruheʼẽ avavépe opyta porã hag̃uánte. Haʼe ohechakuaa pe Todopoderóso haʼeha Ijapohare ha ojapo hague chupe yvýguinte, ojapo haguéicha avei Jóbpe. Elihú ndahaʼéi omondyiséva kuri Jóbpe, síno peteĩ amigoitéicha oñeʼẽ porãnte chupe ha ohenói voi chupe hérarupi. Elifaz, Bildad ha Zofar katu ndojapoiete vaʼekue upéicha (Job 32:21, 22; 33:1, 6).
Ñaipytyvõkena umi ikangývape Jehová ojapoháicha
8 Ikatu ningo ñanembaʼerechakuaave ñanemanduʼáramo heta ñane ermáno ouha ikangy umi provléma káusare, por ehémplo mbaʼasy, depresión térã oĩ rupi hogaygua ndoservíriva Jehovápe. Ñanemanduʼa vaʼerã koʼã mbaʼe ikatuha ojehu avei ñandéve. Umi isrraelíta oike mboyve pe Yvy Oñepromete vaʼekuépe, Jehová omomanduʼa chupekuéra ‘ndaipyʼahatãi vaʼerãha’ iñermanokuéra ndive. Haʼekuéra imboriahu ha ikangy vaʼekue oikórõ guare Egíptope, upévare Ñandejára oipota oipytyvõ umi imboriahúva ha ikangývape (Deut. 15:7, 11, ÑÑB; Lev. 25:35-38).
9 Jaiko rangue jahusga umi ohasa asývape térã ñadeskonfia hesekuéra, ñañehaʼã vaʼerã ñakonsola chupekuéra (Job 33:6, 7; Mat. 7:1). Ñapensamína ko ehémplore. Ñamoĩ chupe peteĩ móto arigua oñaksidentaha ha ojegueraha chupe ospitálpe. ¿Oñepyrũtapa umi doktór oikuaase máva káusarepa oiko pe aksidénte? Nahániri. Ndoikomoʼãi operde rei tiémpo hikuái, síno pyaʼe oñatendéta hese. Péicha avei, peteĩ ermáno oúramo ikangy iprovléma haguére, pyaʼe ñaipytyvõ vaʼerã chupe omombarete hag̃ua ijerovia (elee 1 Tesalonicenses 5:14).
10 Oĩ ermáno ha ermána haʼetévaicha la ijerovia kangýva, péro ñañemoĩramo ñapensa mbaʼe situasiónrepa ohasa hikuái, katuete ñantendevéta chupekuéra. Ñapensamína: ajépa ijetuʼueténe peteĩ ermánape iñeʼẽrendu hag̃ua Jehovápe iména oñemoĩramo hese. Avei ijetuʼúne peteĩ sy ombaʼapo jejopývape omongakuaa hag̃ua haʼeño ifamiliakuérape, ha upéicharõ jepe ndofaltái rreunionhápe. Oĩ avei heta mitãrusu ha mitãkuña osegíva iñeʼẽrendu Jehovápe oĩramo jepe eskuélape térã koléhiope omboligáva chupekuéra ojapo hag̃ua ivaíva. Añetehápe ñapensáramo umi mbaʼe ojapóvare ñane ermanokuéra ikatu hag̃uáicha iñeʼẽrendu Jehovápe, jahecháta ‘ijerovia mbareteha hikuái’, sapyʼánte haʼetéramo jepe ikangyha (Sant. 2:5).
¿Mbaʼéicha javépa ñañeʼẽ térã ñakirirĩ vaʼerã?
17 Pe ótro kuimbaʼe ohóva avei Job rendápe haʼe vaʼekue Elihú, haʼéva Abrahán familiare. Oñeʼẽ aja Job ha umi mbohapy kuimbaʼe, Elihú ojapysakánte hesekuéra. Ojekuaa hese oñatende porã hague la heʼívare hikuái, pórke umi konsého omeʼẽva ohechauka oiporiahuverekoha Jóbpe, péro avei isinséro porã hendive ikatu hag̃uáicha okambia opensa lája (Job 33:1, 6, 17). Elihúpe g̃uarã la iñimportantevéva kuri ombotuicha Jehovápe, ndahaʼéi ombotuichaséva ótrope ni ijupe voi (Job 32:21, 22; 37:23, 24). Iñehémplogui ñaaprende oĩha tiémpo ñakirirĩ hag̃ua ha tiémpo ñahendu hag̃ua (Sant. 1:19). Avei ñaaprende ñameʼẽ jave konsého, pe iñimportantevéva ñandéve g̃uarã haʼe vaʼerã ñambotuicha Jehovápe, ndahaʼéi ñandejupe.
18 Jasegíramo umi konsého bíblico heʼíva mbaʼéicha javépa ñañeʼẽ vaʼerã ha mbaʼéichapa jajapo vaʼerã upéva, jahechaukáta ñamombaʼeha ko rregálo porãite. Pe rréi Salomón iñaranduetéva oskrivi vaʼekue espíritu sánto rupive: “Umi mbaʼe jaʼéva itiempoitépe iporãiterei, haʼete mansána de óro oñemoĩva peteĩ vandéha de plátape” (Prov. 25:11). Jajapysaka porãramo ótro oñeʼẽ jave ha ñapensa ñañeʼẽ mboyve, umi mbaʼe jaʼéva haʼetéta umi mansána de óro: Ivaliosoitereíta ha iporãitereíta. Ha péicha, tahaʼe ñaneñeʼẽngatúrõ térã ñanekirirĩramo, umi mbaʼe jaʼéva omokyreʼỹta ótrope ha Jehová ovyʼáta ñandereheve (Prov. 23:15; Efes. 4:29). Añetehápe ndaipóri ótra kósa iporãvéva ikatúva jajapo jahechauka hag̃ua jaagradeseha Ñandejárape ko rregálo omeʼẽvare ñandéve.
Óro kuʼi oĩva la Bíbliape
Akóinteke ñañemoag̃ui Jehováre
10 Iporãramo jepe jajepyʼapy ñane píntare, ndovaléi jahasa la rrája. Oĩ umi ojapóva opa mbaʼe rei ani hag̃ua ojekuaa hese ijedamaha ohóvo. Péro, ¿mbaʼépa heʼi la Biblia? ‘Akãrague morotĩ ombojegua karaiete ha kuñakarai akã, oĩramo hustísia rapépe’ (Prov. 16:31, ÑÑB). Upéicharõ ndaivaíri ojekuaa ñane akãrague morotĩha ni ñanderovachaʼĩha. Koʼã mbaʼe ikatu ohechauka ñaneakãguapyha, jaikuaamaha heta mbaʼe ha jarekoha heta mbaʼe porã ñande pyʼapýpe. Jehová ñanderecha upéicha ha ñande ñapensavaʼerã avei haʼe opensaháicha (elee 1 Pedro 3:3, 4). ¿Iporãnepa upéicharõ jajeopera térã jajapouka tratamiénto ipeligrósova ñanepínta porãve hag̃uánte? Ñanemanduʼáke, tahaʼe haʼéva ñande eda, ñanderasy térã ñaneresãiramo, la añetehápe ñanemoporãva hína: pe vyʼa oúva Jehovágui (Neh. 8:10). Pe múndo pyahúpe añoite ñanemitã jeýta ha ñaneresãita opa árare (Job 33:25; Is. 33:24). Péro nog̃uahẽi aja upéva, jasegivaʼerã ñanearandu ha jajerovia ikatu hag̃uáicha akóinte ñaime Jehová ykére ha jajapo ikatúva guive iservísiope opa árape (1 Tim. 4:8).
8-14 DE ENERO
TESÓRO OĨVA ÑANDEJÁRA ÑEʼẼME | JOB 34, 35
¿Repensápa oĩha hetaiterei inhustísia?
¿Mbaʼeichagua persónapa Ñandejára?
Ñandejára Todopoderóso ningo siémpre ojapo iporãva, haʼe ni mbaʼevéicharõ ndojapomoʼãi ivaíva (Job 34:10). Jehová siémpre oporohusga hekoitépe. Peteĩ salmísta heʼi vaʼekue: “Nde rehusgáta umi tetãme ha rejapóta hustísia” (Salmo 67:4). Ñandejára ikatu ohecha umi mbaʼe jarekóva ñane korasõme, upéicha rupi avave ndaikatúi ombotavy chupe. Haʼe oikuaapaite la siertogua ha hendaitépe oporohusga (1 Samuel 16:7). Haʼe ohechapaite hína umi inhustísia ha korrupsión oĩva ko múndope ha opromete koʼẽrõitéma ohunditaha ‘umi hénte iñañávape’ (Proverbios 2:22).
¿Mbaʼépa ndaiporimoʼãvéima Ñandejára Rréino ou vove?
5 ¿Mbaʼépa Jehová ojapóta? Koʼág̃a peve, Jehová omeʼẽ gueteri tiémpo umi hénte añáme okambia hag̃ua (Is. 55:7). Jehová heʼíramo jepe ohunditaha ko múndo aña, heta persóna ikatu gueteri ojesalva. Péro ou vove pe jehasa asy guasu, Jehová ohundíta umi nokambiaséivape ha oapojáva ko múndo (elee Salmo 37:10). Koʼág̃arupi oĩ heta oñomikuaáva hembiapo vai, upévare heta vése ndojekastigái chupekuéra (Job 21:7, 9). Péro la Biblia heʼi: “Ñandejára ohechapaite yvyporakuéra ojapóva, ha oikuaa mbaʼe tapépa káda uno osegi. Umi iñañáva ndaikatúi okañy mamove, ni umi lugár iñypytũháme ndaiporihápe ni peteĩ lus” (Job 34:21, 22, TNM). Upéva heʼise avave ndaikatuiha okañy Jehovágui. Haʼe ikatu ohecha opa mbaʼe ojapóva umi iñañáva. Armagedón ohasa rire, ñamañáta oĩ haguépe hikuái, ha ni hendague ndopytamoʼãi. Umi hénte aña oñehundíta pára siémpre (Sal. 37:12-15).
Aníkena jaheja mbaʼeve ñanemoñepysanga ha ñandejoko jasegi hag̃ua Crístope
19 ¿Oikópa avei upéva ñane tiémpope? Si. Koʼág̃arupi oĩ heta oñepysangáva térã ñanderrechasáva ndajaikéi rupi polítikape. Haʼekuéra oipota javota peteĩ kandidátore umi eleksiónpe. Péro ñande jaiporavóramo peteĩ umánope ñanegoverna hag̃ua, ñande jarrechasa hína Jehovápe (1 Sam. 8:4-7). Umi hénte opensa avei ñande ñamopuʼã vaʼerãha umi eskuéla, ospitál, ha jajapo vaʼerãha hetave mbaʼe ñaipytyvõ hag̃ua pe komunidápe. Péro haʼekuéra oñepysanga ha orrechasa pe mensáhe jagueraháva, pórke ñande ñañehaʼãve predikasiónpe ñañehaʼã rangue ñasolusiona umi provléma oĩva ko múndope.
20 ¿Mbaʼépa ikatu jajapo ani hag̃ua ñañepysanga? (Elee Mateo 7:21-23). Ñandéve g̃uarã iñimportanteve vaʼerã jajapo pe traváho Jesús onkarga vaʼekue ñandéve (Mat. 28:19, 20). Ndajaikói vaʼerã ñañehaʼã ñasolusiona umi provléma oĩva ko múndope, pórke osino katuete jajedistraéta. Ñande ningo jahayhu umi héntepe ha ñandepyʼapy umi iprovlemakuéra. Péro jaikuaa ñaipytyvõ porãvetaha la héntepe ñamboʼéramo chupekuéra mbaʼépa hína Ñandejára Rréino, ha ñaipytyvõramo chupekuéra oreko hag̃ua peteĩ amista imbaretéva Ñandejárandi.
Óro kuʼi oĩva la Bíbliape
Kyreʼỹmekena jajeofrese ñambotuicha hag̃ua Jehovápe
3 Peteĩ kuimbaʼe imitãva hérava Elihú ojapysaka hína kuri Job ha umi mbohapy kuimbaʼére. Oñeʼẽmba rire hikuái, Elihú oporandu Jóbpe: “Ha neñeʼẽrendúramo, ¿reimoʼã piko péicha reipytyvõha Ñandejárape, térã upéva ou porãha chupe? (Job 35:7, TNM). ¿Heʼisépa raʼe Elihú umi mbaʼe jajapóva Jehová rehehápe ndovaleiha mbaʼeverã? Nahániri. Jehová ndokorrehíri kuri chupe ojapo haguéicha umi ótro kuimbaʼére. Elihú ontendeka Jehová noikotevẽiha ñamombaʼeguasu chupe. Yvyporakuéra ndaikatúi ojapo mbaʼeve oipytyvõ hag̃ua Jehovápe térã omombareteve hag̃ua chupe. Umi kualida jarekóva ha ñande kapasida ou chugui, ha haʼe ohecha mbaʼéichapa jaipuru.
15-21 DE ENERO
TESÓRO OĨVA ÑANDEJÁRA ÑEʼẼME | JOB 36, 37
¿Mbaʼérepa ikatu jajerovia jaikotaha pára siémpre?
¿Ikatu piko jaikuaa porã Ñandejárape?
MBOY TIÉMPOREMAPA OEXISTI. La Biblia heʼi Ñandejára oexistiha “ymaite guive ha opa ára g̃uarã” (Salmo 90:2, NM). Upéva heʼise avave ndojapói hague Ñandejárape, haʼe ymaite guive oexisti ha núnka nomanomoʼãi. La Biblia heʼi voi: “Avave ndaikatúi okonta mboy áñomapa haʼe oikove” (Job 36:26, NM).
Mbaʼérepa iñimportánte. Ñandejára opromete ikatuha jaiko pára siémpre jaikuaa porãrõ chupe (Juan 17:3). Ha, ¿isentídota piko upéva Ñandejára voi ndaikatúirõ oiko pára siémpre? Nahániri, pe “Rréi opa ára g̃uarã” añoite ikatu okumpli ko promésa (1 Timoteo 1:17).
¿Jaagradesépa umi mbaʼe porã omeʼẽ vaʼekuére ñandéve Ñandejára?
6 Ko yvy oĩ peteĩ distánsia exákta pe kuarahýgui ikatu hag̃uáicha jareko y. Michĩmi hiʼag̃uivérire pe kuarahýgui, pe y hypáta kuri ha ko yvy hakueterei ha isékota, ha ndaiporimoʼãi oikovéva pype. Péro michĩmi mombyryvérire pe kuarahýgui, kompletoite pe y oñekonheláta kuri, ha ko yvy tuichakue ojagarrapáta iélo ha niéve. Jehová omoĩ rupi ko yvy pe lugár tekotevẽhaitépe oĩ, ikatu oĩ y ko yvy ape ári ha ikatu ojeikove. Pe kuarahy ombyaku pe y oĩva umi oséano ha ko yvy ape ári, ha umíva ojeevapora térã ojupi yvate, ha oiko chugui umi arai. Káda áño ningo pe y millones de lítro ojeevapora, ha oiko rire chugui arai opyta upépe 10 díarupi, ha upéi oky térã hoʼa niéveramo. Tiémpo rire pe y ou jey umi oséanope térã umi ótro lugárpe, ha pe y osegi orrepeti upe tape. Jehová ojapo rupi péicha, núnka ndopamoʼãi pe y ko yvy ape ári, ha upéva ohechauka haʼe iñarandu ha ipoderosoha (Job 36:27, 28; Ecl. 1:7).
Aníkena japerde la ñane esperánsa Jehováre
16 Pe esperánsa jaikotaha pára siémpre ningo peteĩ rregálo ijojahaʼỹva Ñandejára ojapóva ñandéve. Ñande ningo ñahaʼarõitereíma og̃uahẽ upe moménto, ha ni michĩmi ndajadudái oikotaha upéva. Pe esperánsa ningo peteĩ ánkla pórke ñanepytyvõ ñambohovái hag̃ua umi pruéva, pe persekusión ha pe ñemano jepe. Avei ojogua peteĩ káskope pórke oprotehe umi mbaʼe ñapensáva, ha ñanepytyvõ ñamboyke hag̃ua pe ivaíva ha jajapo hag̃ua iporãva. Pe esperánsa porãite jatopáva la Bíbliape ñanemoag̃ui Ñandejárare, ñanepytyvõ jaikuaa porãve hag̃ua chupe, ha ohechauka ñandéve mbaʼeichaitépa haʼe ñanderayhu. Añetehápe hetaiterei mbaʼe iporãva ikatu jahupyty imbaretéramo ñane esperánsa Jehováre.
Óro kuʼi oĩva la Bíbliape
¡Ikatu jaiko pára siémpre!
¿Ndévepa ijetuʼu rentende hag̃ua Jehová siémpre oexisti hague ha siémpre oexistitaha? (Is. 40:28). Heta persónape g̃uarã ningo ijetuʼu ontende hag̃ua upéva. Elihú heʼi vaʼekue Ñandejárare: “Avave ndaikatúi okonta mboy áñomapa haʼe oikove” (Job 36:26). Péro ñande nañantendéi haguére peteĩ mbaʼe ndeʼiséi hína ndasiertoiha. Por ehémplo, ñande nañantendeporãiramo jepe mbaʼéichapa ofunsiona pe elektrisida, upéva ndeʼiséi hína ndoexistiriha, ¿ajépa? Upéicha avei ikatu ndaijái ñane akãme la Jehová siémpre oexisti hague ha siémpre oexistitaha, péro upéva ndeʼiséi ndasiertoiha (Rom. 11:33-36). Haʼe ningo oexistíma vaʼekue voi ndaipóri mboyve mbaʼeve ko univérsope, umíva apytépe oexisti mboyve pe kuarahy ha estrellakuéra. Ikatu ningo ñaime segúro Jehová ‘ojapo hague ko yvy ipodér rupive’, ha haʼe oexistíma hague ‘oipyso mboyve pe yvága’ (Jer. 51:15; Hech. 17:24). ¿Mbaʼérepa avei ñaimekuaa segúro ikatuha jaikove pára siémpre?
22-28 DE ENERO
TESÓRO OĨVA ÑANDEJÁRA ÑEʼẼME | JOB 38, 39
¿Ñañemotiémpopa hína jajepyʼamongeta hag̃ua pe kreasiónre?
¿Jasegítapa ñahaʼarõkuaa ha jareko esperánsa Jehováre?
7 La Biblia heʼi Jehová ojapórõ guare ko yvy ‘omoĩ hague umi medída ko yvýpe’, ‘omoĩ isimiénto ha okoloka pe ita prinsipál’ (Job 38:5, 6). Haʼe ningo oñemotiémpo vaʼekue voi ojepyʼamongeta hag̃ua umi mbaʼe ojapo vaʼekuére (Gén. 1:10, 12). Ñapensamína mbaʼéichapa umi ánhel oñeñandúne raʼe ohechárõ guare umi mbaʼe pyahu Jehová ojapóva ohóvo. Oiméne ovyʼaiterei raʼe hikuái, ha upéicha rupi ‘osapukaipa vyʼágui’ (Job 38:7). ¿Mbaʼépa ñanemboʼe upéva? Jehová ningo hetaiterei áñope ojapopa vaʼekue ko yvy, umi estrellakuéra ha opa mbaʼe oikovéva. Péro haʼe ohechárõ guare entéro mbaʼe ojapo vaʼekue mbeguekatúpe, heʼi voi “iporãitereiha” (Gén. 1:31).
Pe rresurreksión ohechauka Jehová ñanderayhu, iñarandu ha ipasiensiaha
2 Ñepyrũrã Jehová ojapo vaʼekue iñajudanterã, Itaʼýra Jesúspe. Ha upéi “ojevale hese ojapo hag̃ua entéro mbaʼe”, umíva apytépe kompletoite umi ánhel (Col. 1:16). Jesús ovyʼaiterei vaʼekue ikatu haguére ombaʼapo Itúandi (Prov. 8:30). Ha umi ánhel ovyʼa vaʼekue avei. Haʼekuéra ohechapaite vaʼekue Jehová ha pe ikonstruktór ivaletereíva Jesús ojapórõ guare yvága ha yvy. ¿Mbaʼéichapa umi ánhel oñeñandu vaʼekue? Haʼekuéra osapukaipa vyʼágui ojejapórõ guare ko yvy, ha katuete osegíne raʼe oguerohory káda uno umi mbaʼe Jehová okrea vaʼekue ohóvo, ha koʼýte ojapórõ guare yvyporakuérape (Job 38:7; Prov. 8:31). Káda uno umi mbaʼe Jehová okrea vaʼekue ohechauka haʼe oporohayhu ha iñaranduha (Sal. 104:24; Rom. 1:20).
Jaikuaa porãve Jehovápe ikreasión rupive
8 Ikatu jajerovia Jehováre. Oñemongetárõ guare Job ndive, Jehová oipytyvõ chupe ojeroviave hag̃ua hese (Job 32:2; 40:6-8). Jehová oñeʼẽ chupe pe kreasiónre, umíva apytépe umi estrélla, arai ha rrájore. Avei oñeʼẽ umi animál rehe, por ehémplo pe tóro salváhe ha pe kavajúre (Job 38:32-35; 39:9, 19, 20). Koʼã ehémplo oipytyvõ Jóbpe ohechakuaa hag̃ua mbaʼeichaitépa Ñandejára ipoderóso, péro ndahaʼéi voi upévante, síno ohechakuaa avei mbaʼeichaitépa iñarandu ha ñanderayhuetereiha. Oiméne Job okonfiavéntema Jehováre ohendupa rire chupe (Job 42:1-6). Péicha avei ñande kásope, jajepyʼamongetávo pe kreasiónre jahechakuaa mbaʼeichaitépa Jehová iñarandu ha ipoderosoiteveha ñandehegui. Haʼe ikatu oipeʼapaite umi provléma jarekóva ha koʼerõitéma ojapóta upéva. Ñapensávo upévare jajeroviavéntema hese.
Óro kuʼi oĩva la Bíbliape
it-2-S 199
Omeʼẽva umi léi
Jehová hína la omeʼẽva umi léi. Jehová añoite hína la omeʼẽva umi léi ojesegíva ko univérsope. Haʼe omoĩ umi léi oĩva pe naturalésape (Job 38:4-38; Sl 104:5-19). Ha haʼe avei omoĩ umi léi osegíva umi animál (Job 39:1-30). Umi persóna haʼe rupi avei Ñandejára rembiapokue ojesegi vaʼerã avei umi léi Ñandejára omoĩ vaʼekuére pe naturalésape. Umi persóna idiferénte umi animálgui pórke ikatu opilla mbaʼépa iporã ha mbaʼépa ivai ha ikatu avei oñemoag̃ui Ñandejárare, upéicharõ jepe lomímonte ojesegi vaʼerã avei umi léi Ñandejára omoĩvare ohechaukáva mbaʼépa iporã ha mbaʼépa ivai (Ro 12:1; 1Co 2:14-16). Umi léi Jehová omoĩva ohupyty avei umi ánhelpe, haʼekuéra okumpli vaʼerã avei umíva (Sl 103:20; 2Pe 2:4, 11).
Umi léi oĩva pe naturalésape si o si ñakumpli vaʼerã, ndaikatúi ñambohasa reínte (Jer 33:20, 21). Umi léi Ñandejára omoĩ vaʼekue núnka nokambiái ha ikatu ojejerovia hese. Upéva oipytyvõ umi sientífikope okalkula porã hag̃ua mbaʼéichapa okuʼe pe jasy, umi planéta ha hetave mbaʼe. Oĩrõ ndorrespetáiva umi léi oĩva pe naturalésape katuete osẽ vai. Ha oĩrõ ndorrespetaséiva umi mbaʼe Ñandejára heʼíva oikuaa hag̃ua mbaʼépa iporã ha mbaʼépa ivai, katuete osẽ vaíta avei. Koʼã léi ningo si o si jarrespeta vaʼerã, pórke ndajarrespetaséirõ jarrespetaháicha umi léi oĩva pe naturalésape, katuete ñasẽ vaíta. “Avave ningo ndaikatúi oñembohory Ñandejárare, pórke entéro mbaʼe oñotỹva peteĩ persóna, upéva avei omonoʼõta” (Gál 6:7; 1Ti 5:24).
29 DE ENERO AL 4 DE FEBRERO
TESÓRO OĨVA ÑANDEJÁRA ÑEʼẼME | JOB 40-42
¿Mbaʼépa ñaaprende la Job ohasa vaʼekuégui?
‘Máva piko oikuaa Jehová pyʼapy?’
4 Jajepyʼamongeta jave Ñandejára ojapovaʼekuére, ñanemanduʼáke haʼe ndahaʼeiha yvypóra ha ndovaleiha jakopi hese ñaimoʼãgui oĩ vaiha peteĩ mbaʼe ojapóva. Jehová oikuaa upéva ikatuha oiko. Haʼe voi heʼivaʼekue Salmo 50:21-pe (ÑÑB): ‘Reimoʼãneraʼe che ndeichagua’. Ojapo 175 áño peteĩ karai arandu ohesaʼỹijóva la Biblia heʼi hague: “Pyʼỹinte ningo yvyporakuéra okopi Ñandejárare, haʼerõguáicha peteĩ yvypóra, ha avei oipota haʼe okumpli umi léi haʼekuéra omoĩva”.
5 Upéicharõ ñañatendevaʼerã ani ñapensa vai Jehováre ndojapói haguére peteĩ mbaʼe ñande jaipotaháicha. Mbaʼérepa iñimportánte upéva? Jastudiávo la Biblia ikatu jajuhu peteĩ mbaʼe Jehová ojapovaʼekue ha haʼetévaicha ñandéve ojavy hague. Péro ñanemanduʼáke ñande ñaneimperfektoha ha ndajaikuaái hetaiterei mbaʼe. Péicha oikovaʼekue umi Israelguáre. Haʼekuéra opensa vai Ñandejárare ha oimoʼã haʼe ndotrataporãiha chupekuéra. Jahechamína mbaʼépa heʼi Jehová: ‘Peẽ pejéne cherehe ndacherekojojaiha. Ehendúna Israel, peẽ piko peimoʼã che ndacherekojojái? Ndahaʼéipa peẽ hína umi penerembiapo vaíva?’ (Eze. 18:25).
6 Mbaʼépa jajapovaʼerã ani hag̃ua ñapensa vai Jehováre? Tekotevẽ ñanemanduʼa ñande yvypóra ndajaikuaaporãiha heta mbaʼe ha manterei jajavyha. Jahechami mbaʼépa oikovaʼekue Job rehe. Umi provléma ojejapetepárõ guare hese, haʼe oñeñandu vaieterei, ha oñepyrũ opensa ijehénte. Oikuaase mbaʼérepa peichaite peve ohasa asy, ha ndohechakuaái oĩha peteĩ mbaʼe iñimportantevéva. Upémarõ Jehová mborayhúpe oñemoñeʼẽ chupe okambia hag̃ua. Oporandu Jóbpe heta mbaʼe, amo 70 rupi, ha haʼe ndaikatúi ombohovái. Upépe ae Job oaprende oĩha hetaiterei mbaʼe haʼe ndoikuaáiva. Upévare oñemomirĩ ha okambia opensa lája (elee Job 42:1-6).
Jajesarekókena pe iñimportantevévare
12 ¿Ikatúpa jaʼe Jehová ndorekói hague enkuénta umi mbaʼe Job ohasa vaʼekue ajeve oñeʼẽ chupe upéicha? Nahániri, pórke Job noñeñanduvaíri upe haguére. Haʼe ontende ha omombaʼe Jehová konsého. Ha heʼi voi katu: “Ambyasyeterei la haʼe vaʼekue ha atĩ apytávo. Koʼág̃a aguapy yvýpe tanimbu apytépe, ahechauka hag̃ua añarrepentiha” (Job 42:1-6, TNM). Upe mboyve, peteĩ kuimbaʼe imitãva hérava Elihú oipytyvõma kuri Jóbpe okambia hag̃ua opensa lája (Job 32:5-10). Job ohendu kuri pe konsého Jehová omeʼẽva chupe mborayhúpe, ha okorrehi la opensáva. Upéi Jehová oikuaauka oguerohoryha Jóbpe ifiél haguére (Job 42:7, 8).
“Ehaʼarõ Jehová tanepytyvõ”
17 Ndahaʼéi Job añónte ohechauka vaʼekue imbarete ha ipyʼaguasuha ohasávo umi mbaʼe ijetuʼúva. Peteĩ kárta oskrivi vaʼekuépe apóstol Pablo umi kristiáno hebréope heʼi oĩ hague heta Jehová siervokuéra imbarete ha ipyʼaguasu vaʼekue avei. Haʼe okompara voi chupekuéra ‘peteĩ arai tuichaitereívare’ (Heb. 12:1). Haʼekuéra ohasáramo jepe heta mbaʼe ijetuʼúva, osegi ifiél Jehovápe (Heb. 11:36-40). ¿Ovalépa raʼe la péna pe aguánte ha jerovia haʼekuéra ohechauka vaʼekue? ¡Si ovale! Añetehápe haʼekuéra ndohechái vaʼekue umi promésa oñekumpli, péro siémpre ojerovia vaʼekue umívare ha Jehováre. Haʼekuéra ningo oikuaa porãiterei vaʼekue Jehová oguerohoryha chupekuéra, upévare ojerovia hikuái ohechataha oñekumplívo umi promésa (Heb. 11:4, 5). Ñapensa jave iñehemplokuérare ñanemokyreʼỹeterei jajerovia ha jareko hag̃ua esperánsa Jehováre.
18 Ko múndo ningo ivaive ohóvo amás día (2 Tim. 3:13). Ha Satanás siémpre omoĩ a pruéva Jehová siervokuérape. Toiko la oikóva, jasegíkena jaservi Jehovápe ñande pyʼaite guive, “pórke jareko esperánsa Ñandejára oikovévare” (1 Tim. 4:10). Ñanemanduʼákena Job ehémplore, amo ipahápe Jehová ohechauka imbaʼeporãiterei ha ivuenoha hendive (Sant. 5:11). Jasegíkena avei ñandefiél Jehovápe ha ñaĩ segúro Jehová “omyengovia porãha umi oñehaʼãvape ipyʼaite guive oadora chupe” (elee Hebreos 11:6).
Óro kuʼi oĩva la Bíbliape
it-1-S 377 párr. 5
Oñembohory
Job osegi vaʼekue ifiél Jehovápe oĩrõ jepe oñembohorýva hese. Péro haʼe ojavy avei kuri la opensa lája ha ojekorrehímante vaʼerã chupe. Elihú heʼi hese: “Ndaiporichéne ótro ndeichagua Job, ndéngo rejagarrapa ndejehe la ojeʼéva ha nde jeýnte la resufríva” (Job 34:7). Job opensaitereíma kuri ijehénte ha ohechaukaseterei ihustoha, upévare nopensavéima Ñandejárare ha heʼíma voi haʼe ihustoveha Ñandejáragui (Job 35:2; 36:24). Oñeʼẽrõ guare chupe umi mbohapy iñamígo guaʼu haʼe ojagarrapa kuri ijehénte la ojeʼéva ha nopensái oñeñeʼẽ vaiha Ñandejárare. Haʼete voi kuri igústova mbaʼe Jóbpe la oñeñeʼẽ vai hese, upévare haʼe ojagarrapa ijehe la ojeʼéva guive ha upéi haʼe jeýnte osufri. Péro upéi opakuetévo lívro de Job Ñandejára oexplika hese voi oñeñeʼẽ vai hague hína (Job 42:7). Upeichaite avei oiko vaʼekue umi israelita ojerurérõ guare Samuélpe peteĩ rréi ogoverna vaʼerã chupekuéra. Upérõ guare Jehová heʼi: “Ndahaʼéi ningo ndéve la nderrechasáva. Che ningo ko puévlo rréi, ha chéve la cherrechasa hikuái” (1Sa 8:7). Ha Jesús katu heʼi vaʼekue idisipulokuérape ojepersegitaha, péro ndahaʼemoʼãi ikausarekuéra síno haʼe heʼi: “Umi hénte opa tetãygua ndaijaʼemoʼãi penderehe peẽ haʼe haguére che disípulo” (Mt 24:9). Ñanemanduʼáramo koʼã mbaʼére ñanepytyvõta ñaaguanta hag̃ua oĩ jave oñeʼẽ vaíva ñanderehe ha katuete jahupytýta heta mbaʼe porã nañañentregái haguére (Lu 6:22, 23).
5-11 DE FEBRERO
TESÓRO OĨVA ÑANDEJÁRA ÑEʼẼME | SALMOS 1-4
Jaapojákena Ñandejára Rréino
“Ambokacháta kompletoite umi tetãnguéra”
8 ¿Mbaʼéichapa orreaksiona la hénte ohendúvo ko mensáhe? La majoríape ndogustái (elee Salmo 2:1-3). Umi nasión ningo ipyʼatarovapa. Haʼekuéra ndoaseptaséi pe governánte Jehová oiporavo vaʼekuépe. Chupekuéra g̃uarã pe mensáhe oñeʼẽva Ñandejára Rréinore ndahaʼéi “notísia porã”. ¡Oĩ voi umi goviérno oproivíva pe predikasión! Heta governánte heʼíramo jepe oserviha Ñandejárape, ndopoiséi hikuái pe podér ha autorida orekóvagui. Oiko haguéicha Jesús tiémpope, koʼág̃arupi umi governánte oñemoĩ avei pe Jehová oiporavo vaʼekuére oatakávo idisipulokuéra ifiélvape (Hech. 4:25-28).
Aníkena ñañentremete ko múndore
11 Jahayhu umi mbaʼerepy. Oiméramo ñandéve g̃uarã iñimportanteterei pe pláta térã umi mbaʼerepy, ijetuʼuvéta ñandéve jasegi hag̃ua ñañemantene neutrál. Por ehémplo, áño 1970 rire heta Testígo oikóva Maláuipe tekotevẽ kuri ohejapaite hóga ha ikosakuéra, pórke ojepersegi chupekuéra ha oñemondo peteĩ kámpo de rrefuhiádope. Peteĩ ermána hérava Ruth imanduʼa pe oiko vaʼekuére upérõ. Haʼe omombeʼu: “Oĩ unos kuánto ermáno ndosufriséiva pe kámpo de rrefuhiádope, upévare odesidi ojeafilia pe partído polítikope ikatu hag̃uáicha oho jey hógape”. Péro la majoría umi ermáno ndojapói upéva. Haʼekuéra odesidi noñentremetéi polítikape, operdepárõ jepe ipláta ha ikosakuéra (Heb. 10:34).
Óro kuʼi oĩva la Bíbliape
it-2-S 1085
Ñana pirukue
Péva haʼe hína la hembýva oñemopotĩ rire pe seváda, trígo térã ótro semílla. Oñemopotĩ aja ojepeʼa chugui pe semílla kuʼikue ha ipirekue. La Bíbliape oñeñeʼẽ jepi pe ñana pirukuére oñekompara hag̃ua ótra kósare, upéicharõ jepe ohechauka porãma mbaʼéichapa oñemopotĩmi yma umi semílla. Umi semílla oñemopotĩ rire, pe ñana pirukue osẽva chugui ndaikatuvéima jaʼu ha ndovalevéima mbaʼeverã. Upévare opyta porãiterei oñekompara hag̃ua chupe umi mbaʼe ndovaléivare, avave ndoipotáivare ha tekotevẽvare oñemombo.
Primerorã ojesepara pe semílla pe hakãnguégui ha ipirekuégui ha upéi oñemboveve ojeipa hag̃ua chugui umi mbaʼe kyʼa, pe semílla kuʼikue ha ipirekue, péicha opyta pe semílla añoiténtema (ehecha AVENTAR). Péva ohechauka porã mbaʼéichapa Jehová oguenohẽ iñorganisasióngui umi apóstatape ha mbaʼéichapa ohundi umi iñañávape ha umi oñemoĩvape hese (Job 21:18; Sl 1:4; 35:5; Is 17:13; 29:5; 41:15; Os 13:3). Ñandejára Rréino omonguʼíta ikontrariokuérape ha ikuʼikuénte opytáta, upévare pe yvytu omombovevéta chupekuéra pe ñana pirukuéicha (Da 2:35).
Pe ñana rakãngue ha mbaʼe kyʼa oñembyatypámi ha ojehapy ani hag̃ua pe yvytu oguerupa jey ha hoʼapa jey umi semílla potĩ ári. Juan el Bautista heʼi vaʼekue voi avei péicha ojejapotaha umi hénte aña oĩvare umi rrelihión japúpe. Jesús voi ombovevéta pe trígo ha ohejáta pe semílla añoiténte péro “umi hakãngue katu ohapýta tata ikatuʼỹvape oñembogue” (Mt 3:7-12; Lu 3:17; ehecha TRILLAR).
12-18 DE FEBRERO
TESÓRO OĨVA ÑANDEJÁRA ÑEʼẼME | SALMOS 5-7
Esegíkena ndefiél Jehovápe tahaʼe haʼéva la ojapóva umi ótro
¿Mbaʼéichapa la Biblia ikatu ñanemombarete ñaaguanta hag̃ua umi provléma?
7 ¿Oĩpa peteĩ ñane amígo térã ñande rogaygua ñanetraisionáma vaʼekue? Oiméramo upéicha, ikatu ñanepytyvõ jastudiáramo umi mbaʼe ojapo vaʼekue rréi David otraisionárõ guare chupe itaʼýra Absalón, ha oñehaʼã oipeʼa chugui igoviérno (2 Sam. 15:5-14, 31; 18:6-14).
8 1) Ñañemboʼe. Jalee mboyve upe rreláto, jaʼe Jehovápe mbaʼéichapa ñañeñandu oĩ haguére ñanetraisionáva. Ñanesinséro vaʼerã ñañemboʼe jave Jehovápe ha jaʼepaite chupe umi mbaʼe ñapensa ha ñañandúva (Sal. 6:6-9). Upéi jajerure chupe tañanepytyvõ jatopa hag̃ua umi konsého ohechaukátava ñandéve mbaʼépa jajapo vaʼerã ñambohovái hag̃ua upe situasión ijetuʼuetéva.
Ñaimékena segúro pe jagueroviáva haʼeha pe añetegua
3 Ñande ningo ndajajeroviái vaʼerã Ñandejárare jahecha rupínte mbaʼéichapa ñande kristianokuéra jajoayhu. ¿Mbaʼérepa? Ñamoĩ chupe peteĩ ñane ermáno térã ermána, ikatu peteĩ ansiáno térã peteĩ prekursór, hoʼa peteĩ pekádo ivaietereívape, ñanembopochy, térã oiko chugui apóstata ha heʼi ñande nañaimeiha pe rrelihión verdadérape. Oikóramo koʼã mbaʼe, ¿ndépa ndepochýta ha ndereservimoʼãvéi Jehovápe? ¿Mbaʼépa ñanemboʼe upéva? Ñande jerovia naimbaretemoʼãi jajeroviáramo Ñandejárare jahecha rupínte umi ótro ojapóva, ha ndahaʼéi jareko rupi peteĩ amista iporãva Jehovándi. Jahayhúramo Jehovápe ha ipuévlope, upéva ñanepytyvõta jajerovia hag̃ua. Péro la iñimportánteva hína jastudia porã la Biblia, ñantende porã umi mbaʼe jaleéva ha ñainvestiga ñaime hag̃ua segúro siertoha umi mbaʼe ñaaprendéva Jehovágui (Rom. 12:2).
4 Jesús heʼi vaʼekue oĩtaha umi “ohendúva pe mensáhe ha pyaʼe voi oguerovia vyʼápe”, péro ijerovia ikangytaha ombohováivo umi provléma (elee Mateo 13:3-6, 20, 21). Ikatu oime ndohechakuaái raʼe hikuái jasegíramo Jesúspe, jahasatanteha voi umi situasión ijetuʼúva (Mat. 16:24). Térã oiméne opensa raʼe peteĩ kristiáno núnka naiprovlemamoʼãiha, ha Ñandejára siémpre ovendesitaha chupe. Péro ko múndope katuete oĩta provléma, ikatu avei oiko ñanderehe peteĩ mbaʼe ñahaʼarõʼỹva ha upéicha rupi jaju ndajavyʼavéi peteĩ tiémpore (Sal. 6:6; Ecl. 9:11).
Óro kuʼi oĩva la Bíbliape
it-2-S 1005
Sepultúra
Romanos 3:13-pe apóstol Pablo imanduʼa hína kuri la heʼívare Salmo 5:9-pe. Upépe oñekompara umi iñañáva juru peteĩ ‘sepultúra ojeavrívare’. Peteĩ sepultúra ojeavríva ningo henyhẽ umi teʼongue ha mbaʼe oñembyaívagui, péicha avei umi iñañáva juru ojeavri jave osẽ chugui umi mbaʼe ikatúva oporojuka ha oporoperhudika (ekompara Mt 15:18-20 heʼívare).
19-25 DE FEBRERO
TESÓRO OĨVA ÑANDEJÁRA ÑEʼẼME | SALMOS 8-10
“Che pyʼaite guive rombotuicháta Jehová”
Ñamombaʼékena pe lugár jarekóva Jehová famíliape
6 Jehová ojapo ñandéve g̃uarã peteĩ lugár iporãitereíva jaiko hag̃ua. Heta tiémpo ojapo mboyve Adánpe, Jehová opreparáma vaʼekue ko yvy yvyporakuérape g̃uarã (Job 38:4-6; Jer. 10:12). Jehová ivuéno ha ipojeraiterei rupi, ojapo hetaiterei mbaʼe ikatu hag̃uáicha jadisfruta (Sal. 104:14, 15, 24). Sapyʼánte haʼe oñemotiémpo vaʼekue opensa hag̃ua umi mbaʼe okrea vaʼekuére, ha “ohecha iporãha upéva” (Gén. 1:10, 12, 31). Jehová ñanemombaʼe avei ‘omoĩvo ñande poguýpe’ entéro umi mbaʼe porãite haʼe ojapo vaʼekue ko yvy ape ári (Sal. 8:6). Ñandejára ningo oipota umi yvypóra perfékto vyʼápe oñangareko pára siémpre koʼã mbaʼe porãite ojapo vaʼekuére. ¿Ñandépa jajepokuaa jaagradese Jehovápe upe esperánsa porãitére?
¿Jaagradesépa umi mbaʼe porã omeʼẽ vaʼekuére ñandéve Ñandejára?
10 ¿Mbaʼéichapa ikatu jahechauka jaagradeseha ikatu haguére ñañeʼẽ? Ñamombaʼe rupi ko rregálo, ikatu ñamombeʼu umi ogueroviávape pe evolusión mbaʼérepa ñande jaguerovia Ñandejára ojapo hague entéro mbaʼe (Sal. 9:1; 1 Ped. 3:15). Umi oapojáva pe evolusión oipota jaguerovia ko yvy ha entéro mbaʼe oikovéva pype oaparesénte hague, ha ndaipóri hague peteĩ ojapo vaʼekue. Jaipurúramo la Biblia ha umi mbaʼe oñeanalisáva ko artíkulope, ikatúta ñadefende ñande Ru yvagapeguápe ha jaexplika umi ñanerendusévape mbaʼérepa ñande jaguerovia Jehová ojapo hague ko yvy ha pe yvága (Sal. 102:25; Is. 40:25, 26).
Eñatendékena siémpre la eñeʼẽ lájare ikatu hag̃uáicha emoĩ ehémplo porã
13 Japurahéi ñande pyʼaite guive. ¿Mbaʼérepa ñande japurahéi umi kántiko? Ñande ningo jajapo upéva ñamombaʼeguasu hag̃ua Jehovápe. Peteĩ ermána hérava Sara heʼi haʼe ndopuraheikuaaiha, péro upéicharõ jepe haʼe omombaʼeguasuse Jehovápe opurahéivo chupe. ¿Ha mbaʼépa ombopyʼaguasu Sárape opurahéi hag̃ua? Haʼe heʼi hógape voi ojepreparaha opurahéi hag̃ua umi kántiko, ojepreparaháicha entéro umi ótra párte orekóva pe rreunión, ha opraktika opurahéi hag̃ua umíva. Ha oñehaʼãmbaite avei ontende mbaʼéichapa la létra orekóva umi kántiko ojogueraha pe téma oñeanalisátavare upe rreuniónpe. Haʼe heʼi: “Entéro koʼã mbaʼe chepytyvõ ikatu hag̃uáicha añekonsentrave pe kántikore, ha ndahaʼéi la chepu lájare”.
Óro kuʼi oĩva la Bíbliape
it-1-S 649
Kuã
Peteĩ komparasióncha ojeʼe Ñandejára oskrivi hague ikuãme umi Diez mandamiénto umi itáre (Éx 31:18, nóta; Dt 9:10, nóta). Ojeʼe avei ojapo hague milágro (Éx 8:18, 19, nóta). Ha okrea hague pe yvága (Sl 8:3, nóta). Upe ikuã Ñandejára oipuru vaʼekue okrea hag̃ua opa mbaʼe haʼe hína pe espíritu sánto, pórke péva haʼe pe fuérsa Ñandejára orekóva, ha Génesis heʼi upe fuérsa (rúaj, “espíritu”) ou ha oho hague hína upérõ opárupi umi y ári (Gé 1:2). Umi Escrituras Griégaspe oñemyesakã porãve mbaʼépa heʼise Ñandejára oipuruha ikuã. Mateo heʼi Jesús omosẽ hague umi demóniope “Ñandejára espíritu rupive”, péro Lucas heʼi Jesús ojapo hague upéva “Ñandejára kuã” rupive (Mt 12:28; Lu 11:20, nóta).
26 DE FEBRERO AL 3 DE MARZO
TESÓRO OĨVA ÑANDEJÁRA ÑEʼẼME | SALMOS 11-15
Ñañeimahinákena ñaimemaha pyʼaguapýpe pe múndo pyahúpe
w06-S 15/5 18 párr. 3
Mbaʼe mbaʼépa ñanemboʼe Salmos
11:3. ¿Mbaʼére ndaiporivéi hustísia ha ndojerrespetavéi umi léi? La hénte koʼág̃a nopenavéima umi léi orekóvare hikuái oiko porã hag̃ua, ojogueraha porã hag̃ua, ani hag̃ua ojejapo sarambi ha oĩ hag̃ua hustísia. Koʼã mbaʼe ndojerrespetavéi vove sarambíma oiko ha ndaiporivéima hustísia. Péicha jave “umi hénte ivuénova” ojeroviámante vaʼerã Ñandejárare (Salmo 11:4-7).
¿Og̃uahẽnepa peteĩ tiémpo ndaiporiveihápe violénsia?
La Biblia opromete koʼẽrõitéma Ñandejára oipeʼataha pe violénsia ko múndogui. Upéva oikóta “og̃uahẽvo pe ára ojehusga ha oñehundi hag̃ua umi hénte añáme” (2 Pedro 3:5-7). Upérõ ndaiporimoʼãvéima umi hénte ivioléntova ha ombohasa asýva hapichápe. Péro, ¿mbaʼéichapa ikatu ñaime segúro Ñandejára ojapotaha upéva?
La Biblia heʼi Jehová ndochaʼeieteha umi ivioléntovare (Salmo 11:5). Ñande Apohare oipotaiterei oĩ pyʼaguapy ha hustísia (Salmo 33:5; 37:28). Koʼã mbaʼe ohechauka porã Ñandejára ndohejamoʼãiha pe violénsia osegi pára siémpre ko yvy ape ári.
¿Ñanepasiénsiapa ñahaʼarõ hag̃ua?
15 ¿Mbaʼérepa David oĩ vaʼekue dispuésto ohaʼarõvo? Haʼe voi orresponde upéva pe Salmo 13-pe, oporandúrõ guare Jehovápe 4 vése voi “¿Arakaʼe peve piko?”. David heʼi: “Nde ningo siémpre nembaʼeporã chendive ha cherayhueterei, upévare ajerovia nderehe. Che korasõ mbytete guive avyʼáta ahechávo mbaʼéichapa nde reporosalva. Che apurahéita Jehovápe, pórke haʼe ivuenoiterei chendive” (Sal. 13:5, 6, TNM). David oikuaa Jehová ohayhuha chupe ha arakaʼeve ndohejamoʼãiha chupe haʼeño. Haʼe imanduʼa mbaʼéichapa Jehová oipytyvõ vaʼekue chupe ymave, ha kyreʼỹme ohaʼarõ haʼe osolusionataha iprovlemakuéra. Jahechaháicha, David oikuaa porã vaʼekue nohaʼarõreimoʼãiha.
Pe Rréino ojapo Ñandejára rembipota ko yvy ape ári
16 Ndaiporimoʼãi pelígro. Pe promésa porãite ñanembopyʼarorýva oĩva Isaías 11:6-9-pe oñekumplíta oparupiete. Entéro kuimbaʼe, kuña ha mitã oikóta kyhyjeʼỹme opa hendápe. Ndoapeligramoʼãvéima chupekuéra mymba ñarõ ni hénte aña. Og̃uahẽta peteĩ día nde reñeñandutaha nde rogapeguáicha entéro lugárpe. Ikatúta reʼyta umi rrío, lágo ha márpe; ikatúta rejupi umi montáñare ha redipara ñúre. Ha pytũ vove ndaiporimoʼãi mbaʼeve nemongyhyjéva. Upérõ oñekumplíta pe profesía heʼíva Ñandejára siervokuéra ‘oiko porãta okyhyjeʼỹre opárupi ha kaʼaguy mbytépe jepe okéta pyʼaguapýpe’ (Ezeq. 34:25, ÑÑB).
Óro kuʼi oĩva la Bíbliape
¿Ñañehaʼãmapa ñakambia?
12 Ñambyasýramo jepe oĩ hetaiterei hénte oñekomportáva Pablo heʼi haguéicha. Umichagua opensa koʼág̃arupi natekotevẽveimaha jasegi umi konsého. Por ehémplo, heta mboʼehára ha tuvakuéra oheja umi mitãme ojapo ojaposéva. Heʼi hikuái avave ndoikuaaiha mbaʼépa añetehápe pe iporãva ha mbaʼépa pe ivaíva, upévare omboʼe voi chupekuéra káda uno orekoha liverta odesidi hag̃ua mbaʼépa ojapóta. Heta oĩ avei heʼíva ojeroviaha Ñandejárare, péro opensa ikatunteha ojapo ojaposéva ha natekotevẽiha iñeʼẽrendu chupe (Sal. 14:1). Upéva ningo ipeligrosoiterei kristianokuérape g̃uarã. Nañañatendéiramo, ikatu ndajasegivéi umi konsého omeʼẽva ñandéve Ñandejára organisasión ha ñañepyrũ jajekeha oimeraẽ mbaʼégui. Ikatu avei ñañeʼẽ vai umi konsého jarresivívare, por ehémplo umi oñeʼẽva vyʼarãre, Internet ha umi estúdio ijyvatevévare.