¿Mbaʼépa ñaaprende Daniel ehémplogui?

1. ¿Mbaʼérepa umi babilonio ohecharamoite proféta Daniélpe?

PROFÉTA Daniel ningo imitã kuri umi babilonio ojagarrárõ guare chupe de prisionéro ha ogueraha mombyry Jerusaléngui. Daniel imitãrõ jepe umi babilonio ohecharamoiterei chupe. Haʼekuéra ‘ojesegi la ohechávarente’ ha ohechakuaa Daniel ‘ndorekoiha mbaʼeve ivaíva ha ipínta porãha’. Avei ohechakuaa hikuái haʼe ouha peteĩ família iñimportántevagui (1 Sam. 16:7). Upévare umi babilonio odesidi ombokatupyry Daniélpe oservi hag̃ua pe rréi palásiope (Dan. 1:3, 4, 6).

2. ¿Mbaʼépa Jehová opensa vaʼekue Daniel rehe? (Ezequiel 14:14).

² Jehová ohayhu vaʼekue Daniélpe péro ndahaʼéi ipínta porã haguére ni ombaʼapo haguére pe palásiope, síno Daniel odesidi haguére ojapo iporãva. Por ehémplo, Jehová omensiona Daniel ihústo hague Noé ha Job ihústo haguéicha. Haʼekuéra heta áñore iñeʼẽrendu vaʼekue, péro Daniel katu upérõ 20 añorupínte orekóne raʼe. Upéicharõ jepe Jehová ohechaukáma vaʼekue ojeroviaha hese (Gén. 5:32; 6:9, 10; Job 42:16, 17; elee Ezequiel 14:14). Oikove aja pukukue Daniel ohechauka ifielha Jehovápe ha Haʼe osegi vaʼekue ohayhueterei chupe (Dan. 10:11, 19).

3. ¿Mbaʼépa jahecháta ko artíkulope?

³ Ko artíkulope jahecháta mokõi kualida Daniel ohechauka vaʼekue ha ogustaitereíva Jehovápe. Primero ñañeʼẽta umi kualidáre ha mbaʼe situasiónpepa Daniel ohechauka vaʼekue. Segundo, jahecháta mbaʼépa oipytyvõ vaʼekue Daniélpe oreko hag̃ua umi kualida. Ha tercero ñaanalisáta mbaʼéichapa ñande ikatu jasegi Daniel ehémplo. Ko artíkulo ojeprepara espesiálmente umi imitãvape g̃uarã, péro enterovéva ikatu ñaaprende hetaiterei mbaʼe Daniel ehémplogui.

ÑANDEPYʼAGUASÚKE DANIEL IPYʼAGUASU HAGUÉICHA

4. ¿Mbaʼéichapa Daniel ohechauka vaʼekue ipyʼaguasuha? Emoĩ peteĩ ehémplo.

⁴ Umi persóna ipyʼaguasúva okyhyje jepi avei, péro ndohejái upéva ojoko chupekuéra ojapo hag̃ua iporãva. Daniel ningo peteĩ mitãrusu ipyʼaguasueterei vaʼekue. Jahechamína mokõi káso ohechauka haguépe upéva. Pe primer situasión oñepresenta kuri 2 añokuérarupi oñehundi haguépe Jerusalén. Upérõ pe rréi Nabucodonosor ohecha kuri iképe peteĩ estátua tuichaitereíva ha la osoña vaʼekue okevrantaiterei chupe. Oamenasa voi entéro umi kuimbaʼe iñarandúvape, umíva apytépe Daniélpe, ojukataha chupekuéra ndaipóriramo álgien omombeʼúva chupe la osoña vaʼekue ha la heʼiséva (Dan. 2:3-5). Daniel ojapo vaʼerã álgo ensegída voi, pórke osino heta hénte omanóta kuri. Upémarõ haʼe “oho pe rréi rendápe ha ojerure chupe tiémpo ikatu hag̃uáicha omombeʼu chupe mbaʼépa heʼise pe osoña vaʼekue” (Dan. 2:16). La ojapóva rupive Daniel ohechauka ojerovia ha ipyʼaguasu hague. ¿Mbaʼérepa jaʼe upéva? Pórke la Biblia ndeʼíri haʼe omombeʼúma hague voi mbaʼépa heʼise umi suéño. Upémarõ Daniel ojerure umi iñamígo Sadrac, Mesac ha Abednégopeb “tojerure Ñandejárape toiporiahuvereko chupekuéra, ha toipytyvõ chupe ontende hag̃ua mbaʼépa osoña pe rréi” (Dan. 2:18). Jehová okontesta chupekuéra ha oipytyvõ Daniélpe omombeʼu hag̃ua mbaʼépa heʼise pe rréi osoña vaʼekue. Upéicha rupi Daniel ha iñamigokuéra nomanói.

5. ¿Mbaʼérõ guarépa tekotevẽ jey kuri Daniel ipyʼaguasu?

⁵ Ohasa rire un tiémpo Daniel omombeʼu hague pe rréipe mbaʼépa heʼise pe estátua tuichaitereíva osoña vaʼekue, oñepresenta jey ótra situasión tekotevẽhápe Daniel ohechauka ipyʼaguasuha. Pe rréi Nabucodonosor osoña jey ótra kósa okevrantaitereíva chupe. Ko vuéltape ohecha peteĩ yvyramáta tuichaitereíva, ha Daniel pyʼaguasúpe omombeʼu pe rréipe mbaʼépa heʼise upéva. Inklúso heʼi chupe itavyraitaha ha un tiémpore nogovernamoʼãiha (Dan. 4:25). Pe rréi ikatu kuri opensa Daniel opuʼãha hese ha omanda ojejuka hag̃ua chupe. Péro Daniel ipyʼaguasu ha omombeʼu porã mbaʼépa heʼise upe osoña vaʼekue.

6. ¿Mbaʼépa oipytyvõne rakaʼe Daniélpe ipyʼaguasu hag̃ua?

⁶ ¿Mbaʼépa oipytyvõne rakaʼe Daniélpe ipyʼaguasu hag̃ua? Katuete ningo imitãrõ guare itúa ha isy omoĩ chupe ehémplo iporãitereíva. Haʼekuéra okumpli la Jehová ojeruréva umi tuakuéra israelítape ha omboʼe ifamíliape mbaʼépa heʼi Ñandejára léi (Deut. 6:6-9). Upéicha rupi Daniel oikuaa vaʼekue umi Diez Mandamiénto. Péro ndahaʼéi upévante, síno oikuaa avei umi detálle omboʼéva pe léi. Por ehémplo ontende vaʼekue mbaʼépa ikatu hoʼu ha mbaʼépa ndovaléi hoʼu peteĩ israelita (Lev. 11:4-8; Dan. 1:8, 11-13).c Daniel oaprende vaʼekue avei mbaʼépa ohasa Ñandejára puévlo ha mbaʼépa oiko hesekuéra naiñeʼẽrendúirõ guare (Dan. 9:10, 11). Avei entéro mbaʼe ohasa vaʼekue oikove aja pukukue oasegura Daniélpe Jehová ha umi hiʼánhel ipoderosoitéva oipytyvõtaha chupe toiko la oikóva (Dan. 2:19-24; 10:12, 18, 19).

7. ¿Mbaʼépa avei oipytyvõ vaʼekue Daniélpe ipyʼaguasu hag̃ua? (Ehecha pe taʼanga).

⁷ Daniel ostudia vaʼekue avei Ñandejára profetakuéra oskrivi vaʼekue, umíva apytépe Jeremías profesía. Upéicha rupi Daniel ohechakuaa vaʼekue umi judío opyta potaitemaha lívre ha osẽtaha Babilóniagui (Dan. 9:2). Upéi Daniel ohecha mbaʼéichapa oñekumpli umi profesía, ha upéva katuete omombareteve ijerovia Jehováre. Ñande avei jajeroviáramo Ñandejárare ñande pyʼaite guive ikatu ñandepyʼaguasu (ekompara Romanos 8:31, 32, 37-39 heʼívare). Ha iñimportanteveha katu Daniel siémpre oñemboʼe vaʼekue Jehovápe (Dan. 6:10). Haʼe okonfesa ipekádo, omombeʼu Jehovápe entéro mbaʼe oñandúva ha ojerure chupe ajúda (Dan. 9:4, 5, 19). Daniel ningo haʼe vaʼekue peteĩ persóna ñandeichaguánte avei, upévare ikatu jaʼe ndaipyʼaguasúi hague onasérema voi síno oñehaʼã vaʼekue upearã. ¿Mbaʼépa oipytyvõ chupe? Ostudia, oñemboʼe ha ojerovia vaʼekue Jehováre.

8. ¿Mbaʼépa ikatu jajapo ñandepyʼaguasu hag̃ua?

⁸ Umi tuakuéra oiméne oipotaiterei ifamiliakuéra ipyʼaguasu, péro upéva ndahaʼéi péicha péichante oñekonsegíva. Umi tuakuéra ipyʼaguasu haguére ndeʼiséi ifamiliakuéra ipyʼaguasutamaha. ¿Mbaʼépa ikatu jajapo ñandepyʼaguasu hag̃ua? Upearã ñamoĩ vaʼerã ñande párte, haʼete ku ñaaprendéva jajapo hag̃ua álgo ipyahúva. Por ehémplo ñaaprende hag̃ua álgo ñamaña porã jepi mbaʼépa ojapo ñande profesór ha upéi ñandehaitéma jajapo. Upéicha avei ñandepyʼaguasu hag̃ua tekotevẽ ñañatende porã mbaʼépa ojapo umi ipyʼaguasúva ha upéi jasegi iñehemplokuéra. Ñapensamíntena, ¿mbaʼépa ñaaprendéma Daniel ehémplogui? Haʼe ojapo haguéicha tekotevẽ jaikuaa porã Ñandejára Ñeʼẽ heʼíva. Ñañemoag̃uive vaʼerã Jehováre ñamombeʼu memévo chupe entéro mbaʼe ñañandúva. Avei tekotevẽ jajerovia Jehováre ha ñaĩ segúro haʼe siémpre ñanepytyvõtaha. Jajapóramo koʼã mbaʼe, pyʼaguasúpe ñambohováita umi situasión ijetuʼúva oñepresentáva.

9. ¿Mbaʼe iporãvapa ikatu jahupyty ñandepyʼaguasúramo?

⁹ Heta mbaʼe porã ningo jahupyty ñandepyʼaguasúramo. Jahechamína Ben ehémplo. Haʼe ningo oike peteĩ koléhio oĩvape Alemániape, upépe enterove lénto ojerovia pe evolusiónre ha heʼi voi hikuái japuha la Biblia heʼíva pe kreasiónre. Peteĩ vuéltape, oñepresenta Bénpe la oportunida oexplika hag̃ua mbaʼérepa haʼe oguerovia Ñandejára okrea hague entéro mbaʼe. Ben pyʼaguasúpe oñemboʼy ikompañerokuéra renondépe ha oñeʼẽ chupekuéra. Upéi haʼe omombeʼu: “Che profesór ojapysaka porã la haʼévare, ofotokopia pe informasión aipurúva aexplika hag̃ua la agueroviáva ha omeʼẽ káda uno che kompañerokuérape”. ¿Mbaʼépa opensa Ben kompañerokuéra? Haʼe heʼi: “Oĩ kuri unos kuánto ohenduséva la che haʼéva ha heʼi voi hikuái ohecharamoitereiha la ajapóva”. Ohechaukaháicha Ben ehémplo, ñandepyʼaguasúramo la hénte ikatu ñandevalora ha ñanderrespetave. Avei ikatu hína ñaipytyvõ ótrope oñemoag̃ui hag̃ua Jehováre. Legálmente iñimportanteterei ñañehaʼã ñandepyʼaguasu.

ÑANDEFIÉLKENA JEHOVÁPE DANIEL IFIÉL HAGUÉICHA

10. ¿Mbaʼéichapa ojehechauka pe mborayhu ifiélva?

¹⁰ La Bíbliape pyʼỹinte jatopa pe palávra hebrea ojetradusíva “mborayhu ifiélva”. Ko palávra ojepuru ojehechauka hag̃ua mbaʼeichaitépa Ñandejára ohayhu isiervokuérape ha ndohejareiriha chupekuéra. Avei ojepuru ojehechauka hag̃ua mbaʼeichaitépa Ñandejára siervokuéra ojoayhu ha ifiél ojupe (2 Samuel 9:6, 7, nóta). Ñande ningo amás día ikatu jahechauka porãve ñandefielha Ñandejárape. Jahechamína mbaʼéichapa ojapo vaʼekue upéva proféta Daniel.

11. ¿Mbaʼéichapa Daniel ohechauka vaʼekue iñeʼẽrenduha Jehovápe ijeda riréma? (Ehecha pe taʼanga oĩva ko rrevísta apére).

¹¹ Oikove aja pukukue Daniel heta vése tekotevẽ vaʼekue ohechauka ifiéltapa Jehovápe térãpa nahániri. Oiko vaʼekue peteĩ mbaʼe ijetuʼuetereíva haʼe orekórõ guare mas de 90 áño. Upe tiémpope umi medo ha persa ojagarráma vaʼekue Babilonia ha ogoverna rréi Darío. Umi ofisiál oservíva pe rréipe ndochaʼéi Daniel rehe ha ndorrespetái pe Dios haʼe oadorávape. Upévare haʼekuéra okalkula mbaʼéichapa ojukáta Daniélpe ha onohẽka pe rréipe peteĩ léi omoĩtava a pruéva Daniélpe. Umi ótro hénteicha avei Daniel ohechaukánte vaʼerã kuri iñeʼẽrenduha pe rréipe ha noñemboʼevéi Jehovápe 30 díare. Péro Daniel nomboykéi Jehovápe, ha upévare oñemombo chupe peteĩ yvykua guasúpe oĩháme umi león. Upéi Jehová ovendesi Daniélpe ifiél haguére ha osalva chupe umi leóngui (Dan. 6:12-15, 20-22). ¿Mbaʼéichapa ñande avei ikatu ñaneñeʼẽrendu Daniel iñeʼẽrendu haguéicha Jehovápe?

12. ¿Mbaʼépa ojapo vaʼekue Daniel iñeʼẽrendu hag̃ua Jehovápe ipyʼaite guive?

¹² Jahecháma haguéicha ñaneñeʼẽrendu hag̃ua Jehovápe tekotevẽ jahayhu chupe ñande pyʼaite guive. Daniel siémpre ifiél vaʼekue Jehovápe, pórke haʼe ohayhu chupe ikorasõ mbytete guive. Katuete ningo Daniel ohayhu péicha Jehovápe, pórke haʼe ohasa vaʼekue tiémpo opensávo umi kualida Jehová orekóvare ha mbaʼéichapa haʼe ohechauka umíva (Dan. 9:4). Avei Daniel opensa meme vaʼekue umi mbaʼe porã Jehová ojapo vaʼekuére hesehápe ha ipuévlo rehehápe ha haʼe omombaʼeterei umíva (Dan. 2:20-23; 9:15, 16).

13. a) ¿Mbaʼeichagua situasión ijetuʼúvapa ombohovái umi imitãva? Emoĩ peteĩ ehémplo. (Ehecha pe taʼanga). b) Jahechaháicha pe vidéope, ¿mbaʼéichapa ikatu erresponde oĩ jave oporandúva oapojápa testígo de Jehová pe omosexualida?

¹³ Daniel rehe oiko haguéicha, umi Testígo imitãva otrata vaʼerã umi persóna ndorrespetáivandi Jehovápe ha noimportáivape mbaʼépa haʼe heʼi umi mbaʼe oĩ porãva ha oĩ vaívare. Umichagua persóna ningo ikatu ndochaʼéi entéro ohayhúvare Jehovápe, oĩ voi umi omaltratáva umi mitãrusu ha mitãkuñáme jahecha nomboykéipa hikuái Jehovápe. Por ehémplo jahechami la oiko vaʼekue peteĩ ermáno imitãva héravare William.d Haʼe ningo oiko Austráliape, ha ikoléhiope ombohovái peteĩ situasión ijetuʼúva. Pe profesóra oporandu iñalumnokuérape mbaʼépa ojapóta hikuái peteĩ iñamigoite heʼíramo chupekuéra haʼeha omosexuál. Pe profesóra heʼi enterove oapojátava pe iñamígo omosexuálpe toñemboʼy peteĩ lugárpe pe klásepe, ha pe ótro ládo toñemboʼy umi ndoapojamoʼãiva. Pe ermáno heʼi: “Che ha peteĩ che kompañéro haʼéva avei Testígo añoite ndorohói roñemboʼy umi oapojátava pe omosexualida ládope”. Upéi la situasión ijetuʼuve ha tekotevẽ kuri William ohechauka ifiéltapa Jehovápe térãpa nahániri. Haʼe omombeʼu la oiko vaʼekue: “Umi ótro che kompañerokuéra ha che profesóra jepe oñembohory orerehe ha oremaltrata. Che añehaʼãmbaite trankílo porãnte adefende la agueroviáva péro haʼekuéra nohenduseiete voi la haʼéva”. ¿Mbaʼéichapa oñeñandu raʼe upéi ko ermáno? Haʼe heʼi: “Ndaigústoi chéve che kompañerokuéra chemaltrata jave, péro avyʼaiterei chefiél haguére Jehovápe ha adefende haguére la agueroviáva”.e

14. ¿Mbaʼépa ikatu jajapo ñaneñeʼẽrendu hag̃ua Jehovápe ñande pyʼaite guive?

¹⁴ Daniel ojapo haguéicha, amáske jahayhu Jehovápe jajedesidíta ñande pyʼaite guive ñaneñeʼẽrendutaha chupe. Ha jahayhuve hag̃ua Jehovápe jasegi vaʼerã jastudia umi kualida haʼe orekóva. Por ehémplo ikatu jastudia umi mbaʼe haʼe okrea vaʼekue (Rom. 1:20). Oiméramo amás día jahayhuseve Jehovápe ha jarrespetaseve chupe ikatu jalee umi artíkulo ndaipukúiva ha videokuéra oĩva pe párte héravape “¿Oĩpa peteĩ Kreadór?”. Ikatu avei jalee pe folléto hérava ¿Es la vida obra de un Creador? ha El origen de la vida. Cinco cuestiones dignas de análisis. Peteĩ ermána imitãva Dinamarcagua hérava Ester heʼi koʼã puvlikasionkuérare: “Igustoiterei ningo mbaʼéichapa ñanemopensa. Koʼã folléto ndeʼíri ñandéve mbaʼépa jaguerovia vaʼerã, oñeʼẽnte umi pruévare ha oheja ñande jadesidi”. Pe ermáno hérava Ben ajeʼi ñañeʼẽ hague heʼi: “Ko informasión omombarete che jerovia. Ohechauka chéve Ñandejára okrea hague entéro mbaʼe”. Upéicharõ, ñande avei jastudia rire ko informasión jaʼéta ko téxto heʼiháicha: ‘Ñandejára Jehová, nde rejapo entéro mbaʼe. Upévare nde remerese enterove nemombaʼe ha nembotuicha, remerese avei rerresivi pe podér’ (Apoc. 4:11).f

15. ¿Mbaʼépa avei ikatu jajapo jareko hag̃ua peteĩ amista imbaretéva Jehovándi?

¹⁵ Ñanepytyvõta avei jahayhuve hag̃ua Jehovápe jastudia porãramo Itaʼýra Jesús rekove. Péicha ojapo vaʼekue peteĩ mitãkuña hérava Samira oikóva Alemániape. Haʼe heʼi: “Che ningo aju kuri aikuaa porãve Jehovápe Jesús rupive”. Ko ermánape ningo imitãvépe ijetuʼu vaʼekue ontende hag̃ua Jehová orekoha sentimiénto ha ikatuha ohayhu chupe, péro si ikatu vaʼekue ontende la Jesús oñandúva. Haʼe heʼi: “Che ahayhu Jesúspe pórke haʼe iñamávle ha ohayhu vaʼekue umi mitãme”. Ko ermána amáske oikuaave Jesúspe oikuaa ha ohayhuve avei Jehovápe. ¿Mbaʼérepa? Haʼe omombeʼu: “Mbeguekatúpe antende Jesús osegi porãitereiha Itúa ehémplo ha ojojoguaitereiha hikuái. Ahechakuaa Jehová oipotaha la hénte oikuaa porãve chupe ha upévare ombou hague Jesúspe” (Juan 14:9). Upéicha rupi, jarekoséramo Jehovápe ñane amigoitéramo, ñañemotiémpota jaikuaa porã hag̃ua Jesúspe, ha péicha jahayhuvéta Jehovápe ha jasegíta ñaneñeʼẽrendu chupe ñande pyʼaite guive.

16. ¿Mbaʼépa jahupytýta ñandefiélramo Jehovápe? (Salmo 18:25; Miqueas 6:8).

¹⁶ Umi oporohayhúva ipyʼaite guive ha ndofalláiva avavéndi pyʼỹinte oreko umi iñamigoite ohayhúva avei chupekuéra (Rut 1:14-17). Ha ñande ñandefiélramo Jehovápe ñaiméta trankílo porã ha javyʼáta. ¿Mbaʼérepa? Pórke Jehová opromete núnka ndohejamoʼãiha umi iñeʼẽrendúvape chupe (elee Salmo 18:25; Miqueas 6:8). Ñapensamíntena, ñande ndahaʼéiramo jepe mbaʼeve ñañekomparátaramo ñande Kreadór ipoderosoitévare, haʼe opromete siémpre ñanderayhutaha. Ha una ves ke jareko Jehovápe ñane amigoitéramo ndaikatumoʼãi ñandepeʼa chugui umi pruéva jahasáva, umi oñemoĩva ñane kóntrape ni ñamanóramo jepe (Dan. 12:13; Luc. 20:37, 38; Rom. 8:38, 39). ¡Ajépa iñimportantete jasegi Daniel ehémplo ha ñandefiél Jehovápe!

JASEGI ÑAAPRENDE DANIEL EHÉMPLOGUI

17, 18. ¿Mbaʼépa avei ñaaprende Daniélgui?

¹⁷ Ko artíkulope ñaanalisa mokõi kualida oreko vaʼekue Daniel, péro hetave mbaʼe ikatu ñaaprende chugui. Por ehémplo Jehová ohechauka vaʼekue Daniélpe heta visión ha ombokatupyry chupe oikuaauka hag̃ua unas kuánta profesía. Koʼãva apytépe oĩ umi profesía oñekumplímava ha oĩ umi omombeʼúva mbaʼépa oikóta amo gotyove ha oafektátava káda persónape ko yvy ape ári.

¹⁸ Pe artíkulo oúvape ñaanalisa porãta mokõi profesía Daniel oskrivi vaʼekue. Ñantende porãramo koʼãva ñanepytyvõta jadesidi porã hag̃ua tahaʼe jepe raʼe ñanemitã térã ñandeedáma. Koʼã profesía ñanepytyvõta avei ñaime hag̃ua preparádo ikatu hag̃uáicha ñambohovái umi mbaʼe koʼẽrõitéma oikótava, pórke tekotevẽta ñandepyʼaguasu ha ñaneñeʼẽrendu Jehovápe ñande pyʼaite guive.