Oñeporandúva jepi
¿Arakaʼe pevépa jasegíta japredika umi notísia porã?
Jesús heʼi vaʼekue: “Umi notísia porã oñeʼẽva Ñandejára Rréinore oñemombeʼúta oparupiete ko yvy ape ári, upe mensáhe ojekuaa hag̃ua entéro tetãrupi, ha upéi og̃uahẽta pe fin” (Mat. 24:14). Ko versíkulope, ha avei versíkulo 6 ha 13-pe ojepuru peteĩ palávra griega haʼéva hína télos, ha upéva ojetradusi “fin”. Ko palávra ojepuru ojeʼe hag̃ua Satanás múndo oñehundietetaha Armagedónpe (Apoc. 16:14, 16). Upéicharõ jasegíta ñamombeʼu umi notísia porã Armagedón og̃uahẽ mboyvemi peve. Kóva ningo peteĩ entendimiénto pyahu okambiaʼimíva umi mbaʼe ñamboʼéva anteve.
Pe jehasa asy guasu oñepyrũta oñehundi vove Babilonia Guasu. Anteve ñapensa vaʼekue nañamombeʼumoʼãveimaha umi notísia porã pe jehasa asy guasu oñepyrũ vove (Apoc. 17:3, 5, 15, 16). Jaguerovia vaʼekue oñepyrũma guive pe jehasa asy guasu, Jehová nomeʼẽmoʼãveimaha oportunida umi héntepe oasepta hag̃ua umi notísia porã (Is. 61:2). Avei ñapensa vaʼekue ojesalvataha umi ohechaukáma vaʼekue ifielha Jehovápe oñepyrũ mboyve pe jehasa asy guasu. Upéva ñakompara vaʼekue la oiko vaʼekuére áño 607-pe oñehundírõ guare Jerusalén. Upérõ oñemarka vaʼekue ojesalva hag̃ua umi judío oadorámava oikóvo Jehovápe ha ndochaʼéiva umi mbaʼe vaíre (Ezeq. 5:11; 9:4). Péro upe komparasión ndohói la Jesús heʼi vaʼekuére Mateo 24:14-pe. Upe téxto ohechauka umi persóna provávlemente orekotaha oportunida oasepta hag̃ua umi notísia porã Satanás múndo oñehundi mboyvemi peve Armagedónpe.
Koʼág̃a ñantende porãve rupi la heʼíva Mateo 24:14, tekotevẽ avei ñakambiaʼimi la ñantende lája Apocalipsis 16:21. Upépe oñeñeʼẽ pe mensáhe ojoguávare ‘amandáu guasúpe’. Oñeanalisa porã rire koʼã mokõi téxto ojetopa mokõivéva oñeʼẽha elmímo témare, ha káda uno ohechaukánte idiferentetaha la hénte opensáva umi notísia porãre. Apóstol Pablo heʼi haguéicha, “umi ojesalvátavape g̃uarã” umi notísia porã “hyakuã porã ha ohechauka chupekuéra oikovetaha”. Péro Ñandejára enemigokuérape g̃uarã pe mensáhe oñeʼẽva Ñandejára Rréinore “hyakuã vai ha ohechauka chupekuéra omanotaha” (2 Cor. 2:15, 16). Koʼã hénte ndochaʼeiro pe mensáhere, pórke ohechauka Satanás ogovernaha pe múndo haʼekuéra ohayhuetéva, henyhẽva ñañágui ha oñehundi potaitéva (Juan 7:7; 1 Juan 2:17; 5:19).
Avei jareko vaʼerã enkuénta Apocalipsis 16:21-pe heʼiha pe amandáu tuichaitereitaha, ha upéicha rupi “ohundi entéro mbaʼe”. ¿Mbaʼépa heʼise upéva? Provávlemente upéva heʼise pe jehasa asy guasu aja umi notísia porã idirektovetaha umi héntepe g̃uarã, upéva heʼise Jehová réra ojekuaauka porãvetantemaha arakaʼeve oikoʼỹ haguéicha (Ezeq. 39:7). Upe tiémpope, ág̃a Babilonia Guasu oñehundi rire, ¿oĩtapa gueteri umi ohenduséva pe mensáhe ‘hyakuã asýgui chupekuéra’? Provávlemente oĩta gueteri. Ikatu hína upépe ae haʼekuéra imanduʼa heta áñore umi testígo de Jehová omboʼe hague entéro rrelihión japu oñehunditaha.
Upéicha lénto oiko vaʼekue yma Egíptope oiko rire umi 10 plága. Jehová ohusga ha okastiga vaʼekue “umi egipcio dioskuérape”, ha upe rire “heta extranhéro” omoirũ vaʼekue Jehová puévlope. Umíva hína umi ndahaʼéiva israelita (Éx. 12:12, 37, 38). Ikatu oime koʼã extranhéro odesidi oñemoĩtaha Jehová ládope ohecha rire oñekumplipaite hague umi 10 plága Moisés heʼi vaʼekue oikotaha.
Ikatu oĩ hína odesidíva oservitaha Jehovápe oñehundi rire Babilonia Guasu. Oimérõ upéicha, koʼã persóna orekóta la oportunida ohechauka hag̃ua oapojaha Cristo ermanokuéra oĩvape gueteri ko yvy ape ári, ha ikatúta ojeʼe hesekuéra ojoguaha umi ovechápe (Mat. 25:34-36, 40). Péro jaikuaaháicha ko oportunida opáta Armagedón og̃uahẽ mboyvemi. Upérõ umi unhído hembýva gueteri ko yvy ape ári ohopáta yvágape.
Ñantende porãve rupi ko téma, jahechakuaa mbaʼeichaite pevépa Jehová ohayhu ha oiporiahuvereko la héntepe. Haʼe ningo “ndoipotái avave oñehundi, síno oipota enterove oñarrepenti” (2 Ped. 3:9).