Cheotĩramo jepe oiko chehegui misionéra

Che anase vaʼekue áño 1951-pe peteĩ siuda héravape Viena oĩva Áustriape. Che tuakuéra ningo katóliko vaʼekue. Cheotĩeterei rupi ijetuʼu vaʼekue chéve añeʼẽ hag̃ua la héntendi, péro Ñandejárape ikatu vaʼekue añemboʼe trankíla pórke ajeroviaiterei hese. Arekópe 9 áño che túa oñepyrũ vaʼekue ostudia la Biblia umi testígo de Jehovándi, ha upe riremínte che sy ostudiáma avei.

Upe riremíntema rohóma peteĩ kongregasión héravape Döbling oĩva Viénape. Che famíliandi rojapómi vaʼekue heta mbaʼe oñondive, por ehémplo rolee ha rostudia la Biblia, roho rreunionhápe ha rombaʼapo de voluntário asambleahápe. Chemichĩ guive che túa chepytyvõ vaʼekue ahayhu hag̃ua Jehovápe che pyʼaite guive. Upévare voi che túa oñemboʼe jave ojerurémi vaʼekue Jehovápe oikomínte hag̃ua che ermánagui ha chehegui prekursóra. Péro upéva ndahaʼéi vaʼekue la che ajaposéva upérõ guare.

AÑEPYRŨ ASERVI DE TIÉMPO KOMPLÉTO

Che ajevautisa vaʼekue áño 1965-pe arekópe 14 áño. Cheotĩetereígui ijetuʼu vaʼekue chéve apredika hag̃ua umi héntepe. Avei apensámi vaʼekue nacheimportanteiha, upévare añehaʼãmbaite vaʼekue ani hag̃ua umi ótro mitãrusu ha mitãkuña cherrechasa. Upéicha rupi ajevautisa riremi añepyrũma ajeheʼa umi ndoservírivare Jehovápe. Igústo vaʼekue chéve aĩ hendivekuéra, péro avei añeñandu vai pórke aikuaa porã ndahasái vaʼerãha heta tiémpo umi ndoservírivandi Jehovápe. Péro ijetuʼu vaʼekue chéve akambia hag̃ua upéva. ¿Mbaʼépa la chepytyvõ vaʼekue upérõ?

Upe tiémpope ova ore kongregasiónpe peteĩ ermána hérava Dorothée orekóva 16 áño. Chéve cheimpresiona mbaʼeichaitépa haʼe ikyreʼỹ vaʼekue predikasiónpe. Haʼe ningo michĩmínte imitãve chehegui, péro che katu saʼi asẽ predikasiónpe. Upévare apensa vaʼekue: “Che tuakuéra ningo Testígo, péro Dorothée katu haʼe añoite Testígo ifamíliape. Hiʼarive okuida vaʼerã isy hasývare, péro siémpre osẽ meme predikasiónpe”. Pe iñehémplo chemomýi vaʼekue ajapove hag̃ua Jehová servísiope. Ndohasái kuri heta tiémpo ha Dorothée ha che roñomoirũma rojapo hag̃ua ore prekursorádo, primero rojapo ore prekursorádo auxiliár ha upe rire rojapóma ore prekursorádo rregulár. Dorothée ningo ikyreʼỹeterei vaʼekue ha upéva ova avei cherehe, haʼe chepytyvõ vaʼekue ajapo hag̃ua pe primer kúrso bíblico areko vaʼekue. Upévare kon el tiémpo chepyʼaguapyvéma apredika hag̃ua la héntepe ogahárupi, kállere térã oimehápe.

Pe primer áño aservi haguépe de prekursóra rregulár ova ore kongregasiónpe peteĩ ermáno austríaco hérava Heinz. Haʼe ningo oñepyrũ vaʼekue ostudia la Biblia Canadápe ohórõ guare ovisita iñermáno haʼévape Testígo. Upéi Héinzpe oñeasigna oservi hag̃ua Viénape ore kongregasiónpe de prekursór espesiál. Che ningo ajegusta vaʼekue hese ahecha ypy guive chupe, péro aikuaa porã vaʼekue haʼe oserviseha de misionéro ha che katu nahániri. Upévare primerorã ndahechaukáinte chupe la añandúva hese. Péro tiémpo rire Heinz ha che roñepyrũma rojokuaa porãve ha romenda. Upéi roservi de prekursór oñondive Áustriape.

AÑEPYRŨMA VAʼEKUE ASERVISE DE MISIONÉRA

Heinz pyʼỹinte heʼími vaʼekue chéve oserviseha de misionéro. Péro haʼe núnka nontendekái vaʼekue chéve aservímante vaʼerãha de misionéra, síno chemopensánte upe métare. Por ehémplo heʼími vaʼekue chéve: “Ñandéko nañanefamíliai, upéicharõ piko, ¿mbaʼére ndajaprovechái ha jajapo hetave mbaʼe Jehová servísiope?”. Che ningo akyhyjeterei vaʼekue aservi hag̃ua de misionéra pórke cheotĩeterei. Siérto, che aservíma vaʼekue de prekursóra, péro haʼete vaʼekue la ijetuʼuetereitaha chéve aservi de misionéra. Upéicharamo jepe Heinz ipasiénsia ha osegi oñeʼẽ chéve pe témare. Haʼe chemokyreʼỹ vaʼekue ani hag̃ua apensaiterei chejehénte, síno apensa hag̃ua umi ermanokuérare. Heinz konsehokuéra tuicha chepytyvõ vaʼekue.

Mbeguekatúpe añepyrũséma vaʼekue aservi de misionéra, upévare rojerure roho hag̃ua Eskuéla de Galaádpe. Péro upérõ pe siérvo de sukursál heʼi vaʼekue chéve añehaʼã hag̃ua añeʼẽ porãve ingléspe, ha upe guive añehaʼãmbaite astudia porãve upe idióma. Péro 3 áño upe rire tuichaiterei roñesorprende vaʼekue roñeasignárõ guare derrepentete roservi hag̃ua Salzburgo Áustriape, peteĩ kongregasión oñeñeʼẽhápe serbocroata. Upépe roservi vaʼekue 7 áñore, ha umíva apytépe un áñore Héinzpe oñeasigna vaʼekue oservi hag̃ua de superintendénte de sirkuíto. Pe idióma serbocroata ningo ijetuʼueterei vaʼekue, péro lomímonte roreko vaʼekue heta kúrso bíblico.

Áño 1979-pe pe sukursál ojerure vaʼekue oréve roho hag̃ua sapyʼaitemi Bulgáriape. Upépe ningo ojeproivi vaʼekue Testigokuéra rembiapo, ha upévare roʼe vaʼerã rohonteha upépe “de vakasión”. Bulgaria kapitál ningo héra Sofía ha upépe oĩ vaʼekue 5 ermána. Oréngo ndorohói vaʼerã kuri ropredika upépe, péro rogueraha vaʼerã kañyháme unas kuánta puvlikasión michĩʼíva umi ermanakuérape g̃uarã. Che akyhyjeterei vaʼekue, péro Jehová chepytyvõ akumpli porã hag̃ua upe asignasión. Umi 5 ermána ipyʼaguasu vaʼekue ha ovyʼa, jepe umi polisía ikatu ogueraha chupekuéra en kualkiér moménto kárselpe. Iñehemplokuéra chembopyʼaguasu vaʼekue ajapo hag̃ua oimeraẽ mbaʼe Jehová organisasión ojeruréva chéve.

Tiémpo rire rojerure jey roho hag̃ua Galaádpe, ha upe vuéltape rojeaseptáma kuri. Ore ropensa vaʼekue rohotaha Estados Unídospe ojejapohápe pe eskuéla ingléspe. Péro noviembre de 1981-pe ñane organisasión oñepyrũ vaʼekue ojapo pe Eskuéla de Galaad Alemániape. Upévare roho vaʼekue upépe ha ifasilve vaʼekue chéve antende hag̃ua, pórke la kúrso ojejapo Alemánpe. ¿Moõpa roñeasigna raʼe upéi?

ROSERVI PETEĨ PAÍS OIKOHÁPE HETA GÉRRA

Roñeasigna vaʼekue roservi hag̃ua Kéniape. Péro upéi pe sukursál de Kenia oporandu oréve ndaikatúipa roho roservi Ugándape, upe país opyta ag̃ui Kéniagui. Upérõ ojapóma kuri mas de 10 áño oiko hague upépe peteĩ gólpe de estádo odirihi vaʼekue pe henerál Idi Amin. Upéi oiko chugui diktadór ha ikáusare hetaiterei héntepe ojejuka ha hetaiterei persóna oiko asy. Áño 1979-pe umi oñemoĩ mbaretéva pe henerál Idi Amin kóntrape opuʼã hese, ha oovliga chupe oheja hag̃ua igoviérno. Entéro koʼã mbaʼére pentendéta mbaʼérepa akyhyje vaʼekue ava hag̃ua peteĩ país oĩ haguépe heta violénsia. Péro pe Eskuéla de Galaad orepytyvõ vaʼekue rojerovia hag̃ua Jehováre, upévare roasepta pe asignasión ha roho.

Upérõ sarambípe ojeiko vaʼekue Ugándape. Pe goviérno nomeʼẽi vaʼekue la héntepe umi mbaʼe oikotevẽva. Por ehémplo ndaipóri vaʼekue y, elektrisida ha la hénte ndaikatúi oñekomunika pórke umi teléfono ndoikói. Oĩ vaʼekue oporojapíva ha omondáva, koʼýte pyharekue. Upévare pytũ jave enterovévante opytánte vaʼekue hógape ha oñemboʼe ani hag̃ua oĩ oikéva omonda térã ojuka chupekuéra. Ijetuʼuetereíramo jepe la situasión Ugándape, umi ermáno osegi vaʼekue ojerovia mbarete.

Áño 1982-pe rog̃uahẽ Kampálape, upéva hína Uganda kapitál. Ñepyrũrã ropyta vaʼekue 5 mésere Sam ha Christina Waiswa ndive. Haʼekuéra oguereko vaʼekue 5 mitã ha hendivekuéra oiko avei 4 ipariénte. Heta vése pe família Waiswa okaru vaʼekue una ves al díante, upévare opokoiterei orerehe rohechávo mbaʼeichaitépa haʼekuéra naiprovlémai okomparti hag̃ua pe orekomíva. Roiko aja upe famíliandi roaprende vaʼekue heta mbaʼe orepytyvõva roservi hag̃ua upépe de misionéro. Por ehémplo roaprende tekotevẽha roipuru saʼimínte pe y rojahu hag̃ua, ha upéi pe y rojahu haguépe ikatuha roipuru jey romonandi hag̃ua pe guáter. Áño 1983-pe rotopa peteĩ óga peteĩ sóna iseguromiévape oĩva Kampálape ha rova upépe.

Igustoiterei vaʼekue ropredika Kampálape, chemanduʼa un méspe rokoloka hague mas de 4.000 rrevísta. Ore rohecha mbaʼéichapa la hénte ohendu porã pe mensáhe, ha upéva la igustove vaʼekue oréve. Umi hénte orrespeta Ñandejárape ha oñeʼẽse voi la Bíbliare. Heinz ha che roreko vaʼekue normálmente éntre 10 ha 15 kúrso bíblico káda uno, ha heta mbaʼe roaprende ore estudiantekuéragui. Por ehémplo haʼekuéra oguata vaʼerã ohóvo káda semána oho hag̃ua rreunionhápe, upéicharamo jepe haʼekuéra ndojeplageái síno vyʼápe ohómi hikuái.

Áño 1985 ha 1986-pe oiko jey vaʼekue mokõi gérra Ugándape. Pyʼỹinte rohechámi vaʼekue umi mitã oservíva soldádoramo orekoha umi árma tuicháva, haʼekuéra oñemoĩ vaʼekue tapére umi puésto de kontrólpe. Upe tiémpope roñemboʼémi vaʼekue Jehovápe oremoarandu hag̃ua pono rojapeligra predikasiónpe ha avei orembopyʼaguapy hag̃ua. Ha Jehová ombohovái ore ñemboʼe, pórke rotopávo umi persóna oikuaasevéva la bíbliagui oreresaráima umi mbaʼe orekevrantávagui.

Avei igustoiterei vaʼekue oréve ropredika umi extranhérope. Por ehémplo ore rostudia vaʼekue peteĩ matrimónio héravandi Murat ha Dilbar Ibatullin. Ko matrimónio ova vaʼekue Rusia sentrálgui (Tartaristán). Murat haʼe vaʼekue doktór, ha mokõivévante ojevautisa vaʼekue ha osegi oservi Jehovápe fiélmente. Tiémpo rire aikuaa vaʼekue peteĩ ucraniana héravape Tatjana Vileyska. Haʼe ningo upe tiémpope ou vaʼekue oñedeprimi ha ojesuisidase, péro upe rire Tatjana ojevautisa ha oho jey Ucrániape. Tiémpo rire haʼe oipytyvõ ojetradusi hag̃ua ñane puvlikasionkuéra ucraniánope.a

PETEĨ ASIGNASIÓN IPYAHÚVA

Áño 1991-pe Heinz ha che roĩ vaʼekue de vakasión Áustriape. Upe aja pe sukursál oskrivi oréve ha heʼi rorekoha peteĩ asignasión ipyahúva, roho vaʼerã Bulgáriape. Heta áñore ojeproivi vaʼekue Testigokuéragui opredika heta paíspe Európape. Péro upéva okambia ha ojehejáma Testigokuérape opredika umi paíspe, umíva apytépe Bulgáriape. Haʼéma haguéicha Heinz ha che rogueraha vaʼekue Bulgáriape umi puvlikasión kañyháme, péro koʼág̃a katu roñemondóma ropredika hag̃ua upépe.

Ojeʼe vaʼekue oréve rohóntema hag̃ua direktoite Bulgáriape. Upévare ndaikatuvéima vaʼekue roho ore rógape Ugándape rojagarra hag̃ua ore kosakuéra, ni rojedespedi hag̃ua ore amigokuéragui. Upéva rangue rohóntema Betel de Alemániape ha upépe rojagarra peteĩ áuto ha rohoitéma Bulgáriape. Roñeasigna vaʼekue peteĩ grúpo oĩháme 20 puvlikadór pe siuda héravape Sofía.

Heta mbaʼe ijetuʼúva rombohovái vaʼekue Bulgáriape. Primero voi, noroñeʼẽi vaʼekue pe idióma. Segundo, oĩ vaʼekue saʼieterei puvlikasión, sólamente oĩ vaʼekue pe lívro hérava La verdad que lleva a vida eterna ha avei Che lívro omombeʼúva istória oĩva Ñandejára Ñeʼẽme. Tercero, ijetuʼueterei vaʼekue oréve romoñepyrũ umi kúrso bíblico. Oñepresentáramo jepe koʼã mbaʼe ijetuʼúva, umi mbovymi ermáno oĩva upe grúpope osegi opredika kyreʼỹme. Pe Iglésia Ortodoxa ohechakuaa vaʼekue upéva, ha upépe ae roñepyrũ vaʼekue ore provléma.

Áño 1994-pe pe goviérno heʼi vaʼekue testígo de Jehová ndahaʼeveimaha peteĩ rrelihión legál. Upévare heta hénte opensa Testigokuéra haʼeha peteĩ grúpo ipeligrósova, ha heta ermánope ojegueraha préso. Téle ha diáriope katu ojeʼe hetaiterei japu. Por ehémplo heʼi Testigokuéra ohejaha umi mitã omano ndoipurúi haguére tuguy, ha avei ñamomýiha umi ótro Testígope ojesuisida hag̃ua. Entéro umi mbaʼére ijetuʼueterei vaʼekue oréve ropredika. Pyʼỹinte umi hénte osapukái oréve, ohenói polisíape ha orejapi hikuái oimeraẽ mbaʼépe. Avei ndaikatúi vaʼekue romoinge puvlikasión upe paíspe, ha ijetuʼueterei vaʼekue oréve roalkila hag̃ua umi Salón rojapo hag̃ua umi rreunión. Peteĩ vuéltape asambleahápe umi polisía oike ha osuspendeka pe asambléa. Heinz ha che ningo ndorojepokuaaiete vaʼekue la hénte péicha oretrata vai. Idiferenteterei vaʼekue ningo Ugándape, upépe ningo la hénte ohenduse voi pe mensáhe ha ikalida hikuái. Péro, ¿mbaʼépa la orepytyvõ vaʼekue ani hag̃ua roñedesanima?

Rojeheʼa meme vaʼekue umi ermáno ha ermanakuérare ha upéva ojapo porãiterei orerehe. Haʼekuéra omombaʼeterei umi enseñánsa oĩva la Bíbliape ha ovyʼa roĩ haguére upépe roipytyvõ hag̃ua chupekuéra. Enterovévante roñopytyvõmba ha roñemoag̃ui ojuehe. Upérõ guare roaprende ikatuha javyʼa oimeraẽ asignasiónpe jahayhúramo ñande rapichápe jaiko rangue jajesareko umi provlémare.

Unos kuánto áño rire ifasilvéma kuri ropredika. Áño 1998-pe pe goviérno heʼi vaʼekue testígo de Jehová haʼeha peteĩ rrelihión legál ha hetaiteve puvlikasión ojetradusi búlgarope. Upéi áño 2004-pe ojededika vaʼekue peteĩ sukursál pyahu. Koʼág̃a oĩ 57 kongregasión Bulgáriape ha 2.953 puvlikadór. Áño 2024-pe oho konmemorasionhápe 6.475 persóna. Peteĩ tiémpore sólamente oĩ vaʼekue 5 ermána pe siuda héravape Sofía, péro koʼág̃a oĩma 9 kongregasión. Rohecha mbaʼéichapa Bulgáriape oñekumpli pe profesía heʼíva: “Pe saʼimi oĩva upéi oĩta 1.000” (Is. 60:22).

ROMBOHOVÁI UMI PROVLÉMA IJETUʼÚVA

Che ningo areko vaʼekue heta provléma de salu. Koʼã áño ohasa vaʼekuépe ojetopa arekoha unos kuánto tumór, umíva apytégui peteĩva areko kuri che akãme. Upearã asegímante vaʼerã kuri umi tratamiénto imbaretetereíva, ha upévare aha Índiape. Upe paíspe peteĩ doktór cheopera onohẽ hag̃ua ikatuha peve pe tumór arekóva, pe operasión ipuku vaʼekue 12 óra. Upéi pe siruhía rire un tiémpore ropyta Betel de Índiape ikatu hag̃uáicha ajerrekupera, ha upe riremi roho jeýma ore asignasiónpe Bulgáriape.

Upe aja Heinz oñepyrũma vaʼekue hasykatu. Haʼe oreko vaʼekue peteĩ mbaʼasy ndojagarráiva heta héntepe hérava Huntington. Pe mbaʼasy káusare ijetuʼu vaʼekue chupe oguata, oñeʼẽ ha odomina hag̃ua ijyva ha hetyma. Upéi haʼe oempeorave ohóvo, ha upévare amás día haʼe odependevéntema cherehe. Sapyʼánte chekaneʼõiterei vaʼekue ha ajepyʼapy ndaikatúirõ g̃uarã asegi añatende hese, péro peteĩ ermáno imitãva hérava Bobi pyʼỹinte oraha vaʼekue Héinzpe opredika hag̃ua hendive. Bobi ndojepyʼapýi vaʼekue la hénte heʼítavare Heinz ndaikatúi haguére oñeʼẽ porã, ni ndaikatúi haguére odomina ijyva ha hetyma okuʼe lája. Bobi siémpre oĩ vaʼekue chepytyvõ hag̃uáicha che ndaikatúirõ guare akuida Heinz rehe. Che ménandi rodesidi vaʼekue ndaorefamiliamoʼãiha ikatu hag̃uáicha rojapove Jehová servísiope, péro ore roñandu Jehová omeʼẽ hague oréve peteĩ ore familiarã, ha upéva hína Bobi (Mar. 10:​29, 30).

Heinz avei oguereko vaʼekue kánser. Ambyasyeterei vaʼekue che menami ahayhuetéva omanórõ guare chehegui áño 2015-pe. Ahechagaʼueterei ningo chupe, haʼe ningo la siémpre chepytyvõ vaʼekue ani hag̃ua aiko ajepyʼapyháre, upévare ni ndaroviaséi la haʼe noĩveimaha che ykére. Péro che siémpre apensa hese, upévare haʼetévaicha chéve la koʼag̃aite peve chemoirũva (Luc. 20:38). Pyʼỹinte aikokuévo chemanduʼa umi mbaʼe haʼe heʼi vaʼekuére chéve, ha umi konsého porã haʼe omeʼẽ vaʼekuére chéve. Avyʼaiterei ikatu haguére roservi oñondive Jehovápe heta áñore.

AAGRADESETEREI JEHOVÁPE CHEPYTYVÕ HAGUÉRE

Ahechakuaa Jehová chepytyvõ hague entéro umi situasión ijetuʼúvape. Cheotĩramo jepe Jehová rupive oiko chehegui peteĩ misionéra ohayhúva umi héntepe (2 Tim. 1:7). Avei aagradeseterei Jehovápe che ermána menór ha che roservi haguére de tiémpo kompléto. Che ermána ména ningo superintendénte de sirkuíto, ha haʼekuéra ovisita umi kongregasión oñeñeʼẽhápe serbio Európape. Jehová okontesta pe ñemboʼe che túa ojapo vaʼekue ore oremitãrõ guare, pórke mokõivéva roservi de tiémpo kompléto.

Astudia jave la Biblia tuicha chepyʼaguapy, ijetuʼu jave aaprendéma añemboʼe vaʼerãha ‘che pyʼaite guive’ Jesús ojapo haguéicha (Luc. 22:44). Jehová ningo ombohovái che ñemboʼe. Por ehémplo ojevale umi ermáno ha ermána oĩvare che kongregasiónpe Sofíape, haʼekuéra cheinvita aĩ hag̃ua hendivekuéra ha heʼi chéve hikuái cherayhuetereiha. Entéro umi mbaʼe chembovyʼaiterei.

Pyʼỹinte ajepyʼamongeta pe rresurreksión rehe, péicha jave haʼetévaicha la ahechapáva che hentekuérape oĩmbávo oñondivepa pe paraísope. Che añeimahina che tuakuéra imitã jeyha, ha iporã asyha hikuái pe día haʼekuéra omenda haguéicha ha oĩha hikuái pe hóga fréntepe. Avei haʼetévaicha la ahechapáva che ermánape oñekosinávo. Avei añeimahinambáma Heinz oñemboʼyha pe ikavaju ykére. Che ningo avyʼaiterei apensa jave koʼã mbaʼére, upéva chepytyvõ aaguanta hag̃ua ha avei chemomýi aagradese hag̃ua Jehovápe.

Che ningo ajepyʼamongeta entéro umi mbaʼe porã Jehová omeʼẽ vaʼekuére chéve aikove aja pukukue, ha avei apensa umi mbaʼe porã Jehová omeʼẽtavare chéve amo gotyove. Péicha jave añeñandu David oñeñandu haguéicha heʼírõ guare la jatopáva Salmo 27:​13, 14-pe. Upépe heʼi: “Che ajerovia Jehová imbaʼeporãtaha chendive aikove aja pukukue, ndaupéichairire, kién sáve mbaʼépa oiko vaʼerãmoʼã chehegui. Ehaʼarõ Jehová tanepytyvõ. Ndepyʼaguasu ha nembaretékena. Ehaʼarõnte Jehová tanepytyvõ”.