¿Umi testígo de Jehová piko peteĩ sékta?
Nahániri, ore testígo de Jehová ndahaʼéi peteĩ sékta. Ore ningo rojerovia Jesús rehe ha roñehaʼãmbaite rosegi iñehémplo ha roiko haʼe omboʼe haguéicha. Ore ndahaʼéi romoñepyrũva peteĩ rrelihión pyahu, síno rosegi umi kristiáno síglo primeropegua ehémplo ha umi mbaʼe omboʼe vaʼekue hikuái, ha umíva oĩmbaite Ñandejára Ñeʼẽme (2 Timoteo 3:16, 17). Ore roguerovia la Biblia ohechaukaha mbaʼéichapa oñemombaʼeguasu vaʼerã Ñandejárape ha rojapo upépe heʼiháicha.
¿Mbaʼépa heʼise sékta?
Káda persóna orresponde de diferénte fórma ko porandu. Oĩ heʼíva sékta haʼeha peteĩ grúpo ifanatikoiterei ha ipeligrósova, ha osegiha peteĩ kuimbaʼépe. ¿Mbaʼérepa roʼekuaa ore testígo de Jehová ndahaʼeiha upéicha? Ore ningo ndorojapói peteĩ kuimbaʼe térã kuña heʼíva ni ndorosegíri chupe. Síno roguereko enkuénta Jesús heʼi vaʼekue hemimboʼekuérape: “Pende Ruvicha ningo peteĩnte, haʼe hína Cristo” (Mateo 23:10).
Ore rrelihión ndahaʼéi ipeligrósova, orepytyvõ katu orerekoporãve hag̃ua ha roipytyvõ hag̃ua ore rapichakuérape. Por ehémplo, roipuru la Biblia romboʼe hag̃ua la héntepe mbaʼépa Ñandejára opensa umi vevída ha drógare, upéicha rupi hetaitereíma oĩ okambiáva ha ohejáva ko vísio vaiete. Avei heta tetãrupi romboʼe la héntepe olee ha oskrivikuaa hag̃ua. Oĩ avei heta mbaʼe rojapóva ore rapichakuéra rehehápe oiko jave yvyryrýi, torménta vai ha umícha. Jesús omboʼe haguéicha, roñehaʼãmbaite rojapo heta mbaʼe porã ore rapichakuéra rehehápe (Mateo 5:13-16).