¿Mbaʼépa pe jehasa asy guasu?

Mbaʼépa heʼi la Biblia

Pe jehasa asy guasu haʼe hína pe tiémpo ijetuʼuvéva jahasátava ko múndope. Ha según la Biblia, upéva oikóta “umi ára pahápe” (2 Timoteo 3:1; Daniel 12:4). La Biblia heʼi avei pe jehasa asy guasúre: “Ñandejára oñepyrũ guive okrea ko múndo koʼág̃a peve, núnka ndoikóiva péicha, ha núnka ndoikomoʼãvéima upe rire” (Marcos 13:19; Daniel 12:1; Mateo 24:21, 22).

Mbaʼe mbaʼépa oikóta pe jehasa guasu aja

• Oñehundíta umi rrelihión japu. Peteĩ tesapirĩme oñehundipaitéta umi rrelihión japu oĩva guive ko múndope (Apocalipsis 17:1, 5; 18:9, 10, 21). Upéva ojapóta hína pe Naciones Unidas, orrepresentáva umi goviérno oĩvape ko múndope. Ha ojapóvo upéva, okumplíta hína hikuái Ñandejára volunta (Apocalipsis 17:3, 15-18).a

• Ojeatakáta pe rrelihión verdadéra. Lívro de Ezequiélpe oñemombeʼu “Gog haʼéva Magog territoriopegua” oatakataha umi oĩvape pe rrelihión verdadérape. Upéva orrepresenta hína peteĩ grúpo de país oñeunítavape ohundi hag̃ua chupekuéra. Péro Ñandejára katuete oprotehéta ipuévlope ha nopermitimoʼãi oñehundi hikuái (Ezequiel 38:1, 2, 9-12, 18-23).

• Ojehusgáta umi héntepe. Jesús ohusgáta entéro persónape ha “oseparáta umi héntepe, pe pastór oseparaháicha umi ovecha, umi kavarágui” (Mateo 25:31-33). Ojehusga hag̃ua chupekuéra, ojerekóta enkuénta haʼekuérapa oapoja térã ndoapojáipa raʼe Jesús ermanokuérape, haʼéva hína umi ohótava yvágape ogoverna hag̃ua hendive (Mateo 25:34-46).

• Oñembyatýta umi ogovernátavape yvágape. Umi persóna ojeporavo vaʼekue oho hag̃ua Crístondi ogoverna yvágape omanóta, ha oñemoingove jeýta chupekuéra amo yvágape (Mateo 24:31; 1 Corintios 15:50-53; 1 Tesalonicenses 4:15-17).

• Armagedón. Upéva haʼe hína peteĩ gérra “oikótava Ñandejára Todopoderóso ára guasúpe” ha oñehenói avei chupe “Jehová día” (Apocalipsis 16:14, 16; Isaías 13:9; 2 Pedro 3:12). Upépe oñehundíta entéro umi persóna Jesús heʼi vaʼekue ojoguaha kavarápe (Sofonías 1:18; 2 Tesalonicenses 1:6-10). Ha oñehundíta avei pe animál salváhe 7 iñakãva, orrepresentáva umi goviérno oĩvape ko múndope (Apocalipsis 19:19-21).

Mbaʼe mbaʼépa oikóta pe jehasa guasu aja

• Oñenkarseláta Satanás ha idemoniokuérape. Peteĩ ánhel ipoderósova omombóta Satanás ha idemoniokuérape peteĩ ‘yvykua pypukúpe’ (Apocalipsis 20:1-3). Upépe haʼekuéra oĩta ku omanorõguáicha, ndaikatumoʼãi ojapo mbaʼevete asy. Upe yvykuápe haʼete ku Satanás oĩva enkarseládo, ha upéicha rupi ndaikatumoʼãvéima operhudika avavépe (Apocalipsis 20:7).

• Jesús ogovernáta 1.000 áñore. Upépe ñaimétama Ñandejára Rréino poguýpe ha upéva oguerúta hetaiterei vendisión enterovévape g̃uarã (Apocalipsis 5:9, 10; 20:4, 6). “Peteĩ aty guasu avave ndaikatúiva okonta” ojesalváta pe jehasa asy guasúpe ha ohecháta ág̃a oñepyrũ vove Jesús goviérno de 1.000 áño (Apocalipsis 7:9, 14; Salmo 37:9-11).