¿MBAʼÉPA IKATU JAJAPO OJUPIPA JAVE UMI PRÉSIO?

Ñañekontenta vaʼerã la jarekóvare

Umi oñekontentáva la orekóvare oiko vyʼápe. Ha okambia jave la situasión katu, haʼekuéra ojadapta oiko hag̃ua la iposivilida omeʼẽháichante.

MBAʼÉREPA IÑIMPORTÁNTE

Peteĩ sikóloga hérava Jessica Koehler ohechakuaa umi persóna oñekontentáva la orekóvare ipositivoveha jepi. Haʼe ohechakuaa avei umichagua menove iñenvidiosoha umi ótrogui. Upévare umi oñekontentáva la orekóvare ovyʼave ha saʼive jepi oñekevranta. Upéicha rupi, la majoría umi ovyʼavéva haʼe hína umi persóna ndorekóiva heta mbaʼe. Ha upéva ningo upéicha hína, koʼýte ohechakuaágui hikuái la iñimportantevéva ndahaʼeiha umi mbaʼe ojejoguáva plátare, síno ohasa tiémpo ifamília ha iñamigokuérandi.

“Jarekóma guive jaʼumi vaʼerã ha ñande aorã, javyʼáma vaʼerã koʼã mbaʼére” (1 Timoteo 6:8).

MBAʼÉPA IKATU JAJAPO

Ani ñañekompara. Ñakomparáramo umi mbaʼe jarekomíva umi orekóvare heta mbaʼerepy, ikatu jaju ñanedeskontentádo térã ñaneenvidióso voi katu. Peichagua komparasión ndohechaukái hína mbaʼéichapa añetehápe la situasión. Ikatu ñapensa umi orekóva heta mbaʼe hepyetereíva irrikoitereiha, péro añetehápe ojahoʼi chupekuéra déuda. Nicole oikóva Senegálpe, heʼi: “Natekotevẽi areko heta mbaʼe avyʼa hag̃ua. Añekontentáramo la arekomívare, ikatúnte avei avyʼa oĩramo jepe umi orekóva hetave mbaʼe chehegui”.

Etanteamína ko mbaʼe: Ani ehecha Internétpe umi propagánda térã umi rred sosiálpe la hénte ohechaukáva mbaʼeichaitépa ipláta heta ha orekoha umi mbaʼe hepy hepýva.

“Peguerekóramo jepe heta mbaʼe, pende rekove nodependéi umi mbaʼe peguerekóva rehe” (Lucas 12:15).

Ñandeagradesído. Umi persóna ijagradesídova ningo oñekontenta jepi la orekóvare ha nopensái haʼekuéra oikotevẽha térã omereseha hetave mbaʼe. Roberton oikóva Haitípe, heʼi: “Añemotiémpo jepi apensa hag̃ua mbaʼeichaitépa umi ótro imbaʼeporã chendive ha che famíliandi. Upéi aagradese chupekuéra la ojapo vaʼekuére orerehehápe. Amboʼe avei che taʼyraʼi de 8 áñope oagradese hag̃ua entéro mbaʼe oñemeʼẽvare chupe”.

Etanteamína ko mbaʼe: Káda día ñaanota mbaʼérepa jaagradese. Ikatu hína ñaneresãi haguére, peteĩ ñane famíliare, umi amígo verdadérore, térã peteĩ kuarahy reike iporãitereívare.

“Pe ipyʼarorýva odisfruta káda día ha ovyʼa” (Proverbios 15:15).

Sapyʼánte ningo ikatu ijetuʼu ñandéve ñañekontenta hag̃ua la jarekomívare. Péro iporã hína ñañehaʼã. Ñañekontentáramo, katuete javyʼáta ha upéva ndaikatumoʼãi jajogua plátare.