Peteĩ Dilúvio guasu

UMI hénte ndoikeivaʼekue pe árkape osegi hekove ymaguareichaite. Ndogueroviái gueteri outaha pe Dilúvio. Hetaitépa oiméne opukarakaʼe hikuái. Péro upe riremínte ndopukavéima hikuái.

Upeichaháguinte oñepyrũ oky. Ocharara yvatégui valdepeguáicha. Oiko pe Noé heʼivaʼekue! Péro ndaikatuvéima avave oike pe árkape, pórke Ñandejára Jehová omboty porã pe okẽ.

Pe y pyaʼe ojahoʼipa umi yvy ikarapeha. Ojogua umi rrío tuichaitereívape. Omyaña umi yvyra máta, omonguʼe umi ita guasu ha tuicha tyapu ojapo. Umi hénte oñemondyipa. Ojupi hikuái umi yvy ijyvatevehápe. Oiméne piko ombyasyete hikuái nopenaihaguére Noé heʼívare ha oike pe árkape oñemboty mboyve pe okẽ! Péro koʼág̃a ndaikatuvéima.

Pe y ojupi ha ojupi. Ára ha pyhare, 40 día aja oky. Ojupi pe montáñare, ha pyaʼe ojahoʼipa umi lugár ijyvatevéva jepe. Ñandejára heʼihaguéicha, umi persóna ha animál opytavaʼekue okápe omanombaite. Péro umi oĩvaʼekue pe árka ryepýpe ojesalva.

Noé ha itaʼyrakuéra ojapo porã vaʼekue pe árka. Pe y omopuʼã pe árka, ha oñepyrũ ovevúi. Upe rire, peteĩ díape opi ha pe kuarahy oñepyrũ omimbi. Emañamíntena! Ýmante ojekuaa opárupi. Ha pe árka añoite ojekuaa ovevuiha pe y ape ári.

Umi higánte ndaiporivéima. Ndaikatuvéima ojapo mbaʼe vai umi héntere. Omanombaite hikuái, isykuéra ha opaichagua hénte aña ndive. Péro mbaʼépa ojehu ituvakuérape?

Umi ituvakuéra ndahaʼeivaʼekue umáno ñandeichagua. Umíva ánhel, oguejyvaʼekue ko Yvy ape ári oiko hag̃ua kuimbaʼéicha. Upévare, oúrõ guare pe Dilúvio, nomanói umi hentekuéra ndive. Oheja hikuái pe hete umáno ojapovaʼekue, ha oiko jey chuguikuéra ánhel, oho jey hag̃ua yvágape. Péro ndojehejavéima chupekuéra oiko Ñandejára anhelkuéra apytépe. Oiko chuguikuéra ánhel oservíva Satanáspe. La Bíbliape oñehenói demónio koʼã ánhelpe.

Koʼág̃a Ñandejára ombou peteĩ yvytu, ha pe y hoʼavaʼekue pe dilúviope oñepyrũ oguejy. Cinco mése haguépe pe árka opyta peteĩ montáña ári. Heta ára ohasa rire, umi oĩvaʼekue ipype omaña oka gotyo ha ohecha umi montáña ruʼã. Pe y oguejy ha oguejy.

Upéi Noé oheja osẽ pe árkagui peteĩ guyra hũ. Kóva oveve sapyʼami ha ou jey jepi ndaikatúigui otopa hendag̃ua. Ojapo jepi upéicha ha ou jey oguejy pe árka ári.

Noé oikuaase oguejypámapa pe y, ha upévare omondo avei peteĩ palóma. Upéva ou jey avei, ndotopáigui opyta hag̃ua. Noé omondo jey pe palóma, ha upépe ogueru ijurúpe peteĩ olívo rogue. Pe y oguejýma. Noé omondo jey pe palóma, ha hasy peve otopa peteĩ lugár ikãva opyta hag̃ua.

Koʼág̃a Ñandejára oñeʼẽ Noépe. Heʼi chupe: ‘Esẽ pe árkagui. Egueraha nendive ne família ha umi animalkuéra’. Oikóma hikuái un áño rasa pe árka ryepýpe. Epensamína mbaʼeichaitépa ovyʼanerakaʼe hikuái oĩ jeývo okápe ha osegi oikove!