Cuatro mitãrusu Babilóniape

PE RRÉI Nabucodonosor ogueraha umi isrraelíta ikatupyryvéva Babilóniape. Upe rire, oiporavo ijapyteguikuéra umi mitãrusu iporã ha iñaranduvévape. Ko taʼangápe ikatu rehecha cuatro mitãrusu. Peteĩ héra Daniel, ha umi mbohapýpe umi Babiloniaygua ombohéra Sadrac, Mesac ha Abednego.

Nabucodonosor omboʼese chupekuéra ombaʼapo hag̃ua ipalásiope. Tres áño omboʼe rire chupekuéra oiporavóta umi ivalevévape oipytyvõ hag̃ua chupe omyatyrõ hag̃ua umi provléma. Oipota umi mitãrusu imbarete, ha upévare heʼi oñemeʼẽ hag̃ua chupekuéra tembiʼu ha víno chupe ha ifamíliape oñemeʼẽva.

Emañami Daniel rehe. Reikuaa piko mbaʼépa heʼihína Aspenázpe, pe Nabucodonosor siérvo prinsipál? Daniel heʼi ndoʼuseiha umi tembiʼu porã pe rréi meságui. Péro Aspenaz ojepyʼapy. ‘Pe rréi heʼíma mbaʼépa peʼúta’, heʼi chupekuéra. ‘Ha ndojekuaáiramo penderehe peneresãiha umi ótro mitãrusúicha, ikatu chejuka.’

Upévare Daniel oñeʼẽ pe guárdia ndive, Azpenaz omoĩvaʼekue oñangareko hag̃ua hese ha umi mbohapy iñamígore. ‘Ejapo orerehe peteĩ pruéva 10 día aja’, heʼi Daniel. ‘Emeʼẽ oréve verdúra rokaru hag̃ua ha y royʼu hag̃ua. Upe rire orembojoja umi ótro mitãrusukuéra hoʼúva pe rréi rembiʼu rehe, ha ehecha mávapa oĩ porãve.’

Pe guárdia ohecha porã upéva. Ha opávo umi 10 día, Daniel ha umi mbohapy iñamigokuéra hesãive enterove mitãrusukuéragui, ha ojeheja chupekuéra hoʼu verdúra hoʼurangue pe rréi rembiʼu.

Ohasa rire tres áño, enterove umi mitãrusukuéra ojegueraha rréi Nabucodonosor rendápe. Oñeʼẽ rire hendivekuéra, pe rréi otopa Daniel ha umi mbohapy iñamigokuéra iñaranduveha enterovégui. Upévare, oguereko chupekuéra hendive ipalásiope oipytyvõ hag̃ua chupe. Ha pe rréi ogueru jave peteĩ mbaʼe oikuaaséva térã peteĩ provléma Daniel, Sadrac, Mesac ha Abednégope, haʼekuéra 10 vése iñaranduve umi saserdóte térã kuimbaʼe arandu pe rréi oguerekóvagui.