Cuatro mitãrusu iñeʼẽrendúva Jehovápe

Nabucodonosor ogueraha Babilóniape umi prínsipe de Judápe, ha omoĩ peteĩ ofisiál palasiopegua héravape Aspenaz oñenkarga hag̃ua hesekuéra. Pe rréi heʼi avei chupe oiporavo hag̃ua umi prínsipe apytégui umi mitãrusu hesãivéva ha iñintelihentevévape. Haʼe oipota oñembostudia porã 3 áñore umi mitãrusu ojeporavo vaʼekuépe, ikatu hag̃uáicha oiko avei chuguikuéra ofisiál iñimportánteva Babilóniape. Babilóniape oñeñeʼẽ vaʼekue idióma acádiope, upévare oñemboʼéta chupekuéra olee, oskrivi ha oñeʼẽ hag̃ua upe idiómape. Koʼã mitãrusúpe ojeservi vaʼerã avei umi tembiʼu hoʼúva pe rréi. Umi mitãrusu ojeporavo vaʼekue apytépe oĩ vaʼekue Daniel, Hananías, Misael ha Azarías. Péro Aspenaz okambia chuguikuéra héra ha omoĩ chupekuéra umi téra babilonio: Beltsasar, Sadrac, Mesac ha Abednego. ¿Ndépa ere umi mitãrusu oñemomombyrytaha Jehovágui oñembostudia rire chupekuéra péicha?

Koʼã mitãrusu osegise vaʼekue iñeʼẽrendu Jehovápe. Haʼekuéra oikuaa porã Jehová Léi oproiviha algúno umi tembiʼu ojeservíva pe palásiope. Upévare ojerure hikuái Aspenázpe anínte hag̃ua oovliga chupekuéra hoʼu hag̃ua umi tembiʼu hoʼúva pe rréi. Péro Aspenaz heʼi chupekuéra: “Ndapekaruporãiramo ikatu hína pendepilaʼi ha penderesaʼyju, ha pe rréi chejukáta penderecháramo upéicha”.

Daniel okalkula mbaʼépa ikatu ojapo hikuái ha heʼi Aspenázpe: “Emeʼẽntena oréve y ha verdúra 10 día aja ha upéi orekompara umi ótro mitãrusúre, umi hoʼúva pe tembiʼu hoʼúva pe rréi”. Ha Aspenaz oasepta la ipropuésta.

Ohasa rire 10 día, ojekuaa Daniel ha umi mbohapy mitãrusu hesãiveha umi ótro mitãrusúgui. Jehová ovyʼaiterei haʼekuéra osegi haguére iñeʼẽrendu chupe. Jehová omoarandu avei Daniélpe ikatu hag̃uáicha ontende ha oexplika umi visión ha suéño.

Tres áño oñembostudia rire umi mitãrusu ojeporavo vaʼekuépe, Aspenaz ogueraha chupekuéra Nabucodonosor rendápe. Pe rréi oñeʼẽ hendivekuéra ha ohechakuaa Daniel, Hananías, Misael ha Azarías iñarandu ha idespiertoveha umi ótro mitãrusúgui. Upévare pe rréi oiporavo chupekuéra ombaʼapo hag̃ua pe palásiope. Upe guive, pe rréi pyʼỹinte ojerure chupekuéra konsého odesidíta jave umi mbaʼe iñimportánteva. Jehová omoaranduve koʼã mitãrusúpe umi karai arandu ha umi ojapóvagui máhia pe rréipe g̃uarã.

Daniel, Hananías, Misael ha Azarías oikóramo jepe mombyry ipaísgui, haʼekuéra siémpre imanduʼa oserviha Jehovápe ha osegi iñeʼẽrendu chupe. Ha nde, ¿nemanduʼátapa siémpre Jehováre nde tuakuéra noĩriramo jepe nendive?