Pe mónte de lós Olívospe

KOʼÁPE jahecha Jesúspe oĩrõ guare mónte de lós Olívospe. Umi cuatro kuimbaʼe oĩva hendive haʼe ijapostolkuéra. Andrés ha Pedro oñoermánova, ha Santiago ha Juan, haʼéva avei oñoermáno. Pe óga guasu ojekuaáva upégui haʼe Ñandejára témplo oĩva Jerusalénpe.

Ohasáma dos día Jesús oikehague Jerusalénpe vúrro ári. Koʼág̃a martes. Ko árape, Jesús ohómakuri pe témplope. Upépe umi saserdotekuéra ojagarrasemoʼã chupe ojuka hag̃ua. Péro okyhyje hikuái, pórke umi hénte ohayhu Jesúspe.

‘Peẽ mbói ha mbói raʼy!’, ohenói Jesús umi líder rrelihiósope. Upémaramo heʼi Ñandejára okastigataha chupekuéra opa umi mbaʼe vai ojapovaʼekuére. Upe rire, Jesús ojupi mónte de lós Olívospe, ha upépe umi cuatro apóstol ombaʼeporandu chupe. Reikuaápa nde mbaʼépa oporandu hikuái?

Umi apostolkuéra oporandu mbaʼépa oikóta tenonderãme. Haʼekuéra oikuaa Jesús oipeʼataha opa mbaʼe vai oĩva ko Yvy ape ári. Péro oikuaase hikuái arakaʼépa oikóta upéva. Arakaʼépa ou jeýta Jesús ogoverna hag̃ua Rréicha?

Jesús oikuaa isegidorkuéra oĩva Yvy ape ári ndohechamoʼãiha chupe ou jey vove. Oĩtagui haʼe yvágape, haʼekuéra ndaikatumoʼãi ohecha chupe. Upévare, Jesús oñeʼẽ ijapostolkuérape umi mbaʼe oikótavagui ko Yvy ape ári haʼe ogoverna vove yvágape. Mbaʼe mbaʼépa oĩ umíva apytépe?

Jesús heʼi oikotaha heta ñorairõ guasu, oĩvaʼerãha heta tapicha hasýva ha iñembyahýiva, oikotaha heta jejuka ha yvy ryrýi tuichaitereíva. Avei heʼi umi notísia porã Ñandejára rréino rehegua ojepredikavaʼerãha opárupi ko Yvy ape ári. Jahechámapa koʼã mbaʼe koʼág̃a rupi? Jahecháma! Upévare ikatu jaʼe añetehápe Jesús ogovernamaha yvágape. Koʼẽrõite oipeʼapáta umi mbaʼe vai oĩva ko Yvy ape ári.