Jesús oho jey yvágape

OHASA heta día, ha Jesús ojehechauka jey jey isegidorkuérape. Peteĩ árape 500 disípulo rupi ohecha chupe. Reikuaápa nde mbaʼérepa oñeʼẽ Jesús chupekuéra upéicha jave? Oñeʼẽ Ñandejára Rréinore. Jehová ombou Jesúspe ko Yvy ape ári omboʼe hag̃ua upe Rréinogui. Ha haʼe osegi ojapo upéva oikove jey rire.

Nemanduʼápa nde mbaʼépa pe Ñandejára Rréino? Haʼe peteĩ goviérno añetegua oguerekóva Ñandejára yvágape, ha Ñandejára oiporavo Jesúspe oiko hag̃ua chugui Rréi. Jahechahaguéicha, Jesús ohechaukavaʼekue mbaʼeichaitépa haʼe ogoverna porãta, pórke omongaru iñembyahýivape, omonguera hasývape, ha omopuʼã jey omanovaʼekuépe!

Upévare, ogoverna vove Jesús yvágape mil áño aja, mbaʼépa oikóta ko Yvy ape ári? Ko Yvy tuichakuégui oikóta peteĩ paraíso neporãva. Ndaiporimoʼãvéima ñorairõ, jejuka, mbaʼasy ni ñemano. Jaikuaa upeichataha pórke Ñandejára ojapovaʼekue ko Yvy oiko hag̃ua chugui peteĩ paraíso hentekuérape g̃uarã. Upévare ojapo pe hardín de Edén. Ha ipahápe Jesús ojapóta upe Ñandejára oipotáva.

Koʼág̃a og̃uahẽ pe tiémpo Jesús oho jey hag̃ua yvágape. Ojehechaukákuri 40 día aja idisipulokuérape, ha upéicha haʼekuéra oikuaa porã haʼe oikove jey hague. Péro oho mboyve heʼi chupekuéra: ‘Pepyta Jerusalénpe oñemeʼẽ meve peẽme espíritu sánto’. Pe espíritu sánto haʼe pe fuérsa oiporúva Ñandejára, pe yvytu oipejuháicha, oipytyvõtava Jesús disipulokuérape ojapo hag̃ua Ñandejára volunta. Upe rire Jesús heʼi: ‘Pepredikavaʼerã chehegui mombyryveha peve ko Yvy ape ári’.

Upéva heʼi rire, oiko peteĩ mbaʼeguasu. Haʼe oñepyrũ ojupi yvágape, rehechaháicha koʼápe. Upéi peteĩ arai omokañy Jesúspe, ha idisipulokuéra ndohechavéi chupe. Jesús oho yvágape, ha amo guive oñepyrũ ogoverna idisipulokuérape ko Yvy ape ári.