Testigos de Jehová: Mbaʼépa oguerovia hikuái?

“Rohenduse ne remiandu, roikuaágui opa rupi oñeñeʼẽ vaiha ko aty pyahúre.” (Hechos 28:22, Sociedad Bíblica Paraguaya.) Umi judiokuéra representante oĩva Rómape primer siglo aja, omoĩ ñandéve peteĩ ejemplo porã. Haʼekuéra ohenduseraẽvaʼekue umi ojecriticávape ojapysaka rangue umi oñeʼẽ vaívare añónte.

Upéicha avei koʼág̃a pyʼỹi oñeñeʼẽ vai testigos de Jehová rehe, ha ndaikatúi ñahaʼarõ oñeʼẽ porã chuguikuéra umi ndaijaʼéiva voi hesekuéra. Upévare, romyesakãse ndéve koʼã creencia principal roguerekóva.

La Biblia, Jesucristo ha Ñandejára

Ore roguerovia ‘opavave Escritura oĩha inspirada Ñandejárare ha iporãha’. (2 Timoteo 3:16.) Oĩramo jepe heʼíva ore ndahaʼeiha cristiano, ndahaʼéi upéicha. Ore roguerovia apóstol Pedro heʼivaʼekue Jesucrístore: “Avei, ndaipóri salvación otro rupive, porque ndaipóri otro téra oñemeʼẽvaʼekue Yvy ape ári kuimbaʼekuéra apytépe jaguereko hag̃ua salvación”. (Hechos 4:12.)

Upéicharõ jepe, Jesús heʼivaʼekue ‘che haʼe Ñandejára Raʼy’ ha ‘che Ru chembouvaʼekue’, upévare ore testigos de Jehová roguerovia Ñandejára tuichaveha Jesúsgui. (Juan 10:36; 6:57.) Jesús jepe oñeʼẽvo Itúvagui ohechakuaa upéva heʼívo: “Haʼe niko tuichave che hegui”. (Juan 14:28, SBP; 8:28.) Upévare ndaikatúi roguerovia Jesús ojojaha Itúva ndive, omboʼeháicha pe doctrina hérava Trinidad. Upéva rangue, roguerovia Ñandejára ojapohague chupe ha oĩha ipoguýpe. (Colosenses 1:15; 1 Corintios 11:3.)

Karaiñeʼẽme Ñandejára réra ojeʼe Jehová. La Biblia heʼi: “Toikuaa hikuái nde réra haʼeha [...] Jehovah, ha neñónte reimeha opavave ári yvy tuichakuére”. (Salmo LXXXII, 19, Torres Amat [83:18, NM].) Ojeʼeháicha koʼápe, Jesús avei omombaʼeguasuʼakue Ñandejára réra, ha ohechauka hemimboʼekuérape mbaʼéicha oñemboʼevaʼerã: “Ore Ru yvágape reiméva, toñemomarangatu nde réra”. Haʼe voi heʼivaʼekue Ñandejárape oñemboʼévo: “Aikuaauka nde réra umi kuimbaʼekuéra chéve remeʼẽvaʼekuépe”. (Mateo 6:9; Juan 17:6.)

Jesús ojapohaguéicha, ore testigos de Jehová roguerovia romombeʼuvaʼerãha opavavépe Ñandejára réra ha ipropósito. Rohaʼãgui Jesúspe, “pe testigo fiel”, roiporu téra testigos de Jehová. (Revelación 1:5; 3:14.) Isaías 43:10, heʼi umi oservíva Ñandejárape: “Peẽ haʼe che testigokuéra –heʼi Jehová–, che rembiguái aiporavoʼakue”.

Ñandejára Reino

Jesús heʼi hemimboʼekuérape ojerure hag̃ua ñemboʼépe: “Tou ne reino”, ha oñeʼẽ pe Réinogui opa oikoha rupi. (Mateo 6:10, Versión Popular; Lucas 4:43.) Testigos de Jehová roguerovia pe Reino haʼeha peteĩ gobierno añetegua oĩva yvágape, ogobernátava ko Yvy ape ári ha Jesucristo haʼéta upépe rey invisible. ‘Ha príncipe sãmbyhy oĩta ijatiʼy ári’, heʼi la Biblia. ‘Isãmbyhy tuichakue ha pyʼaguapy ndopamoʼãi.’ (Isaías 9:6, 7.)

Upéicharõ jepe, Ñandejára gobiérnope Jesucristo ndahaʼemoʼãi rey oisambyhýva haʼeño. Oguerekóta heta ogobernátava hendive yvágape. “Yahasa asykuaa ramo –heʼi apóstol Pablo–, ñareina vaerã avei hendive.” (2 Timoteo 2:12, VP.) La Biblia ohechauka umi tapicha oñemoingove jeýva ogoberna hag̃ua Cristo ndive yvágape ohupytyha “ciento cuarenta y cuatro mil, ojegueraha vaʼekue yvy árigua apytégui”. (Revelación 14:1, 3, Jesucristo Marandu Porã.)

Jaikuaaháicha, opavave gobierno guýpe oĩ tapicha oikóva. Upévare ore testigos de Jehová roguerovia avei oĩtaha hetaiterei tapicha ohupytýtava jeikove opaʼỹva pe gobierno yvagapegua guýpe. Mbeguekatúpe ko Yvýgui ojejapóta peteĩ paraíso, henyhẽtava tapichágui oikóva Ñandejára Reino guýpe. Umíva omerece upéva iñeʼẽrendúgui Crístope ha hendive ogobernávape. Upévare testigos de Jehová roguerovia ko Yvy noñehundimoʼãiha, ha ko promesa oĩva Bíbliape oikotaha: “Umi hekopotĩvape opytáta ko yvy ha oikóta pype opa ára g̃uarã”. (Salmo 37:29; 104:5.)

Pero, mbaʼéichapa oúta Ñandejára Reino? Oñemoĩtapa opa tetãnguéra ijeheguínte Ñandejára gobierno poguýpe? Nahániri, la Biblia ohechauka hekopete pe Reino ou hag̃ua oñekotevẽha Ñandejaraite voi ointerveni ko Yvy ape ári: “Ñandejára yvagapegua omoĩta peteĩ reino arakaʼeve noñehundimoʼãiva. Ha pe reino [...] omonguʼipáta ha ohundipáta koʼã reinokuéra, ha haʼe voi opytáta opa ára guarã”. (Daniel 2:44.)

Arakaʼépa oúta Ñandejára Reino? Rohechágui oñecumpli ohóvo umi profecía Bíbliape oĩva, Testigos de Jehová roguerovia pe Reino hiʼag̃uimaha. Hiʼã oréve rehechami avei koʼã profecía omombeʼúva umi mbaʼe ojehútava ko sistema aña og̃uahẽvo hiʼára pahápe. Ikatu relee Mateo 24:3-14; Lucas 21:7-13, 25-31 ha 2 Timoteo 3:1-5.

Rohayhúgui Ñandejára Jehovápe ‘ore pyʼaite guive, ore alma, mente ha fuerza reheve, ha ore rapichápe rojehayhuháicha ore jupe’, upévare ndaipóri joavy ore apytépe haʼégui otro tetãmegua, raza térã posición social. (Marcos 12:30, 31.) Opa tetã rupi rojekuaa roguerekógui mborayhu ore hermano cristianokuérare. (Juan 13:35; 1 Juan 3:10-12.) Upévare ndorojeheʼái tetãnguéra políticare. Roñehaʼã rojapo Jesucristo remimboʼekuéra ojapohaguéicha iñepyrũme. Chuguikuéra Jesús heʼivaʼekue: “Haʼekuéra ndahaʼéi ko mundo rehegua, che avei ndahaʼeiháicha ko mundo rehegua”. (Juan 17:16.) Oréve g̃uarã ndajajeheʼái ko múndore heʼise ñamboyke pe conducta inmoral ojehecháva opárupi, umíva apytépe oĩ japu, ñemonda, fornicación, ñemoakãratĩ, kuimbaʼe oikóva kuimbaʼéndi, tuguy oiporu vaíva, idolatría ha hetave mbaʼe. (1 Corintios 6:9-11; Efesios 5:3-5; Hechos 15:28, 29.)

Esperanza oĩva tenonderã

Testigos de Jehová roguerovia ñande rekove ag̃agua ndopaiha koʼápe. Roguerovia Jehová ombouhague Jesucrístope ko Yvy ape ári oñohẽ hag̃ua huguy oñemeʼẽvo rescate ramo ñanderehehápe, ikatuhag̃uáicha ñanepotĩ Ñandejára renondépe ha jahupyty tekove opaʼỹva ko Yvy ape ári peteĩ sistema pyahúpe. Jesús apóstol heʼihaguéicha: “Ha koʼãgama katu yayererekómava hekopotĩva ramo huguy rupi”. (Romanos 5:9, VP; Mateo 20:28.) Testigos de Jehová roagradece ore pyʼaite guive Ñandejára ha Itaʼýrape omoĩhaguére pe rescate ikatúva omeʼẽ tekove tenonderãme.

Roguerovia añete oĩtaha jeikove tenonderãme, ha upéva oikóta Ñandejára omoingove jeýtagui umi omanovaʼekue oiko hag̃ua Ñandejára Reino guýpe. Biblia omboʼeháicha, roguerovia avei omano vove peteĩ tapicha opaitemaha hekove, “upe árape añetete opa ipyʼamongeta”. (Salmo 146:3, 4; Ezequiel 18:4; Eclesiastés 9:5.) Umi omanovaʼekue oikove jey hag̃ua odepende oĩre Ñandejára memóriape. (Juan 5:28, 29.)

Upevére, ore testigos de Jehová roguerovia Ñandejára Reino ohundipa vove koʼag̃agua gobiernokuérape, heta tapicha oikóva koʼág̃a nomanomoʼãiha. Ohasahaguéicha Noé ha ifamiliakuéra pe Diluvio, upéicha avei heta tapicha ohasáta omanoʼỹre ha oñemeʼẽta chupekuéra tekove opaʼỹva peteĩ Yvy potĩme. (Mateo 24:36-39; 2 Pedro 3:5-7, 13.) Pero roguerovia ikatutaha jahasa ñamanoʼỹre jajapórõ umi mbaʼe Jehová ojeruréva, Bíbliape heʼiháicha: “Yvypóra reko katu opa ohóvo opa hembipota vai reheve. Upe Túva rembipota ojapóva katu oikove opa árape guarã”. (1 Juan 2:17, SBP; Salmo 37:11; Revelación 7:9, 13-15; 21:1-5.)

Ko kuatiañeʼẽme ndaikatúi romoĩmba testigos de Jehová creencia, pero nde ikatu rejerureve información chupekuéra.

Ñandejára Ñeʼẽ ojeporúva oñerenohẽ Traducción del Nuevo Mundo de las Santas Escritúrasgui. Upeichaʼỹramo oñemombeʼu pe texto bíblico ykére mbaʼe traducciónpa ojeporu.

[Komentário oĩva páhina 4-pe]

Roiporu téra testigos de Jehová Jesús ojapo haguéicha