Párte 2
Peteĩ Yvy ndaiporimoʼãihápe jehasa asy
1, 2. Mbaʼéichapa ojoavy heta tapicha pe opensávape?
UPÉICHARÕ jepe, oparupiete ko Yvy ape ári oĩ hetaiterei tapicha nopensáiva upéicha. Haʼekuéra oikuaa koʼẽrõitéma opa mbaʼe iporãtaha yvyporakuérape g̃uarã. Heʼi hikuái koʼápe, ko yvy ape ári, opaitetaha opa mbaʼe vai ha opaichagua jehasa asy. Ojerovia hikuái koʼẽrõitéma oikotaha upéva ha oñemoĩtaha koʼápe peteĩ múndo ipyahuetéva. Ha heʼi hikuái avei oñemoĩhahína koʼag̃aite voi peteĩ simiénto pe múndo pyahúpe g̃uarã!
2 Haʼekuéra ojerovia pe múndo pyahúpe ndaiporimoʼãveimaha ñorairõ, mbaʼe vai apo, tekojojaʼỹ ni mboriahu. Upéva haʼetaha peteĩ múndo ndaiporimoʼãihápe hasýva, hasẽva térã omanóva. Umi oikóva upépe ohupyty jeytaha perfeksión ha oikotaha vyʼápe opa ára g̃uarã peteĩ paraísope. Upéicha, umi omanovaʼekue jepe opuʼã jeýta ha ikatúta oikove opa ára g̃uarã!
3, 4. Mbaʼérepa umi tapicha ojerovia oikotaha umi mbaʼe ohaʼarõva?
3 Péro ohechántepa hikuái iképe mbaʼe pe múndo pyahu, ohechaségui oikoha umi mbaʼe? Nahániri. Haʼekuéra ojerovia oikuaa porãgui pe Paraíso og̃uahẽtaha katuete (Hebreos 11:1). Ha mbaʼérepa oikuaa porã hikuái? Pórke ko univérso Apohare, ikatúva ojapo opaite mbaʼe, heʼíma ojapotaha upéva.
4 Ñandejára promésare, la Biblia heʼi: “Peẽ katu peikuaa porã pende pyʼaite guive Ñandejára omeʼẽhague peẽme opa umi mbaʼe porã haʼe heʼivaʼekue omeʼẽtaha peẽme. Ndaipóri peteĩ mbaʼe ohejavaʼekue ojapoʼỹ rehe”. Ñandejára ‘ndahaʼéi ñandéicha ijapúva ha ndoguevíri upe heʼivaʼekuégui. Opa mbaʼe heʼíva, haʼe ojapovaʼerã’. “Ñandejára ipuʼakapáva omeʼẽ ijehe iñeʼẽ: ‘Upe haʼevaʼekue oikóta katuete’” (Josué 23:14; Números 23:19; Isaías 14:24).
5. Mbaʼe mbaʼe jaikuaasévapa tekotevẽ oñemyesakã ñandéve?
5 Péro Ñandejára omoĩsérire ko yvy ape ári peteĩ paraíso ndaiporimoʼãihápe jehasa asy, mbaʼére piko ohejarakaʼe oñepyrũ umi mbaʼe vai? Mbaʼére piko ohaʼarõma 6.000 áño omyatyrõ hag̃ua umi mbaʼe? Ohechaukápa umi jehasa asy Ñandejára ndojepyʼapyiha ñanderehe, térã ndaiporiha voi Ñandejára?