Lección 2

Mávapa Ñandejára?

Mávapa haʼe Ñandejára añetéva, ha mbaʼéicha héra? (1, 2)

Mbaʼeichaguápa hete? (3)

Mbaʼe mbaʼe cualidad tuichavévapa oguereko Ñandejára? (4)

Iporãpa jaiporu taʼangakuéra ñameʼẽ hag̃ua chupe adoración ? (5)

Mbaʼe mokõi tapépa oĩ jaikuaa hag̃ua Ñandejárape? (6)

1. Yvypóra omeʼẽ adoración heta mbaʼépe. Upéicharõ jepe, la Biblia heʼi oĩha peteĩnte Ñandejára AÑETÉVA. Haʼe ojapo opa mbaʼe oĩva yvága ha yvýpe, ha omeʼẽ haguére ñandéve ñande rekove, chupe añoite ñameʼẽvaʼerã adoración. (1 Corintios 8:5, 6; Revelación [Apocalipsis] 4:11.)

2. Oguerekórõ jepe Ñandejára heta título, peteĩnte héra; upéva haʼe JEHOVÁ. Heta Bíbliagui ojepeʼa Ñandejára réra ha hekovia ojeporu pe título Señor térã Tupã Ñandejára. Upevére, La Biblia ojehaírõ guare, téra Jehová ojeporuvaʼekue siete mil tenda rupi. (Éxodo 3:15; Salmo 83:18, Nuevo Mundo.)

3. Jehová oguereko avei hete, jepe ndahaʼéi ñanembaʼeichagua. “Tupã niko haʼe Espíritu” heʼi la Biblia. (Juan 4:24, Jesucristo Marandu Porã.) Peteĩ espíritu haʼe peteĩ tekove tuichave ha imbaretevéva ñandehegui. Ndaipóri peteĩ tapicha ohechavaʼekue Ñandejárape arakaʼeve. Oikórõ jepe yvágape, Jehová ohecha opa mbaʼe oikóva. (Salmo 11:4, 5; Juan 1:18.) Ha mbaʼépa pe espíritu santo? Ndahaʼéi peteĩ persona, Ñandejáraicha, sino pe fuerza oiporúva Ñandejára. (Salmo 104:30.)

4. La Biblia omyesakã ñandéve mbaʼéichapa Jehová personalidad. Heʼi umi cualidad tuichavéva haʼeha mborayhu, justicia, arandu ha poder. (Deuteronomio 32:4; Job 12:13; Isaías 40:26; 1 Juan 4:8.) Avei heʼi iporiahuverekoha, ibuenoha, ipojeraha, ipacienciaha ha ikatuha oporoperdona. Taʼyrakuéra iñeʼẽrendúvaicha, ñañehaʼãvaʼerã jajapo Haʼéicha. (Efesios 5:1, 2.)

5. Iporãpa ñañesũ ha ñañemboʼe taʼangakuéra renondépe? Nahániri. (Éxodo 20:4, 5.) Jehová heʼi chupe añoite ñameʼẽvaʼerãha adoración. Haʼe nocompartíri avave ni mbaʼeve ndive adoración oñemeʼẽvaʼerã chupe. Avei, taʼangakuéra ndaikatúi ñanepytyvõ mbaʼevépe. (Salmo 115:4-8; Isaías 42:8.)

6. Mbaʼéichapa ikatu jaikuaa porãve Ñandejárape? Ikatu ñamaña ha ñapensa porã hembiapokuére, jahecha hag̃ua mbaʼépa heʼi umíva chugui. Umi Ñandejára creación ohechauka ñandéve oguerekoha tuicha poder ha arandu. Opa hembiapokuépe jahechakuaa imborayhu. (Salmo 19:2-7 [1-6, NM]; Romanos 1:20.) Ikatu avei jaikuaave Ñandejárape jastudiárõ la Biblia. Upépe omombeʼu ñandéve hetave mbaʼe ohechaukáva mbaʼeichagua Ñandejárapa Haʼe. Oikuaauka avei ñandéve ipropósito ha mbaʼépa oipota jajapo. (Amós 3:7; 2 Timoteo 3:16, 17.)

[Nóta oĩva taʼanga ndive páhina 5]

Ikatu jaikuaa Ñandejárape hembiapokuére ha Biblia rupi.