Lección 7

Mbaʼéicha ikatu ñañemboja Ñandejárare ñemboʼépe

Mbaʼérepa ñañemboʼe pyʼỹi vaʼerã? (1)

Mávapepa ñañemboʼevaʼerã, ha mbaʼéicha? (2, 3)

Mbaʼe mbaʼérepa ikatu ñañemboʼe? (4)

Arakaʼépa reñemboʼevaʼerã? (5, 6)

Ohendúpa Ñandejára opa ñemboʼe ojejapóva? (7)

1. Ñemboʼe heʼise ñañeʼẽ humildemente Ñandejára ndive. Ñañemboʼe pyʼỹi vaʼerã chupe. Jajapórõ upéicha, ñañandúta ñaimeha ijykére peteĩ amigo ñanderayhúvaicha. Tuicha ha imbaretérõ jepe Jehová, ohendu ñane ñemboʼe. Ndépa reñemboʼe pyʼỹi Ñandejárape? (Salmo 65:3 [65:2, NM]; 1 Tesalonicenses 5:17.)

2. Pe ñemboʼe oike avei ñande adoraciónpe. Upévare, Ñandejára Jehová añoitépe ñañemboʼevaʼerã. Oĩrõ guare Jesús ko Yvy ári, oñemboʼe mante itúvape, chupe añoite. Ñande avei jajapovaʼerã upéicha. (Mateo 4:10; 6:9.) Pero ñañemboʼe katuete vaʼerã Jesús rérape. Upéicha jahechauka jarrespetaha Jesúspe ha jaguerekoha fe omano hague ñanderehe. (Juan 14:6; 1 Juan 2:1, 2.)

3. Ñañemboʼévo Ñandejárape, ñañeʼẽvaʼerã chupe ñane korasõite guive. Naiporãi jaiporu umi ñemboʼe jaguerekómava ñane akãme térã ñamoñeʼẽva kuatiágui. (Mateo 6:7, 8.) Ikatu oimeraẽ ára ñañemboʼe, oimehápe ha oimeháicha jahechauka guive respeto Ñandejárape. Ñandejára ohendu ñane ñemboʼe jajapórõ jepe kirirĩháme, ñane korasõme. (1 Samuel 1:12, 13.) Ñañemboʼévo ñandéve g̃uarãnte, iporã ñaime ndaiporihápe ayvu ha ñaneñohápe. (Marcos 1:35.)

4. Mbaʼe mbaʼérepa ikatu reñemboʼe? Ikatu reñemboʼe oimeraẽ mbaʼére ikatuvaʼerã nemoĩ porãve Ñandejárandi. (Filipenses 4:6, 7.) Pe ñemboʼe oñehenóiva padrenuestro ohechauka iporãha ñañemboʼe Jehová réra ha ipropósitore. Ikatu avei jajerure tomeʼẽ ñandéve umi ñaikotevẽva, tomboyke ñande pecado ha tañanepytyvõ ani hag̃ua jaʼa tentaciónpe. (Mateo 6:9-13.) Ñañemboʼévo naiporãi ñande egoísta. Jajerurevaʼerã umi mbaʼe oĩ porãva Ñandejára voluntad ndive. (1 Juan 5:14.)

5. Oimeraẽ ára hiʼã jave ne korasõme ikatu reñemboʼe remeʼẽ hag̃ua agradecimiento térã alabanza Ñandejárape. (1 Crónicas 29:10-13.) Ani reheja ñemboʼe rejejopy vai jave ha rehechárõ ojetyvyro pe fe reguerekóva. (Salmo 55:23 [55:22, NM]; 120:1.) Iporã avei ñañemboʼe jakaru mboyve. (Mateo 14:19.) Jehová heʼi ñandéve: “Peñemboʼe opa ára”. (Efesios 6:18, JMP.)

6. Jaʼáramo peteĩ pecado guasúpe, katuete ñañemboʼe ha jajerurevaʼerã Jehovápe ñande poriahuvereko ha ñaneperdona hag̃ua. Ñandejára ‘oĩ ñane perdona hag̃ua’ ñamombeʼúma guive chupe ñande pecado ha ñañehaʼãmbaitérõ ani hag̃ua jaʼa jey. (Salmo 86:5, NM; Proverbios 28:13.)

7. Jehová ohendu umi hekopotĩva ñemboʼe añoite. Ohendu hag̃ua ne ñemboʼe, reñehaʼãmbaitevaʼerã reiko Ñandejára ley heʼívare. (Proverbios 15:29; 28:9.) Reñemboʼévo, ne humilde vaʼerã. (Lucas 18:9-14.) Ne rembiapo rupi ojehechavaʼerã rejaposeha pe rejeruréva Ñandejárape. Upéicha ojekuaáta reguerekoha fe ha ne sinceroha reñemboʼévo. Upe rire añoite Jehová omeʼẽta ndéve pe rejeruréva. (Hebreos 11:6.)