Lección 9

Ñandejárape oservíva ipotĩvaʼerã

Mbaʼérepa ñanepotĩvaʼerã opaite mbaʼépe? (1)

Mbaʼépa heʼise ñanepotĩ espiritualmente? (2)

Mbaʼéicha ikatu ñanepotĩ moralmente? (3)

Mbaʼéichapa ñanepotĩkuaa mentalmente? (4)

Mbaʼe heʼise ñanepotĩ ñande retépe? (5)

Mbaʼeichagua ñeʼẽ kyʼápa ñamboykevaʼerã? (6)

1. Ñandejára Jehová ipotĩ ha imarangatu. Haʼe ohaʼarõ opavave ohayhu añetéva chupe oñemopotĩ espiritual, moral, mental ha hetépe. (1 Pedro 1:16.) Ñañehaʼã heta vaʼerã jaiko potĩ hag̃ua Ñandejára rovake. Jaiko peteĩ mundo kyʼápe. Avei, ñande pype voi jaguereko deseo ñaneraʼãva mbaʼe vairã. Upéicharõ jepe naiporãi ñañemeʼẽ koʼã mbaʼépe.

2. Teko ipotĩva espiritualmente: Jajaposérõ Jehová heʼíva, ndaikatúi jaiporu mbaʼeveichagua enseñanza térã costumbre oguerekóva umi religión falsa. Jajeivaʼerã umi religión fálsagui ha ani ñameʼẽ apoyo chupe mbaʼevépe. (2 Corintios 6:14-18; Revelación 18:4.) Jaikuaa porã rire Ñandejára heʼíva, jajerekovaʼerã umi japu omboʼévagui. (2 Juan 10, 11.)

3. Teko ipotĩva moralmente: Jehová oipota umi oadoráva chupe oiko opa ára cristiano añeteguáicha. (1 Pedro 2:12.) Haʼe ohechapaite umi jajapóva, jajapórõ jepe kañyhápe. (Hebreos 4:13.) Ñamboykevaʼerã teko vai sexo rehegua ha opaichagua mbaʼe kyʼa ojejapóva ko múndope. (1 Corintios 6:9-11.)

4. Teko ipotĩva mentalmente: Ñamyenyhẽrõ ñane akã umi mbaʼe iporã ha ipotĩvagui, ñande reko avei ipotĩta. (Filipenses 4:8.) Upéicha avei manterei ñapensárõ mbaʼe kyʼáre, katuete jaʼáta mbaʼe vaípe. (Mateo 15:18-20.) Ñamboykevaʼerã umi diversión ikatúva omongyʼa ñane mente. Jastudiárõ Ñandejára Ñeʼẽ, ñamyenyhẽta ñane akã mbaʼe potĩgui.

5. Rete ipotĩva: Ñande cristiano ñarrepresenta Ñandejárape, upévare ñane potĩvaʼerã ñande ao ha ñande retépe. Tekotevẽ jajepohéi ñasẽ rire báñogui, ha avei jakaru ha japoko mboyve tembiʼúre. Ndajarekóirõ ogapýpe ñamondo hag̃ua mbaʼe kyʼa bañopegua, ñañotỹvaʼerã umi mbaʼe. (Deuteronomio 23:12, 13.) Ñañemopotĩrõ ñaneresãive. Cristiano rogakuéra ipotĩvaʼerã ha ndojehechaivaʼerã sarambi okápe térã kotypýpe. Ojekuaavaʼerã opárupi heko potĩha.

6. Ñeʼẽ ipotĩva: Ñandejárape oservíva oñeʼẽvaʼerã pe añetegua opa ára. Umi ijapúva ndoikemoʼãi Ñandejára Réinope. (Efesios 4:25; Revelación 21:8.) Cristianokuéra ndoiporúi ñeʼẽ vai. Nohendúi ha nomombeʼúi mbaʼeveichagua ñeʼẽ tieʼỹ ojeʼéva pukarã. Ojehecha ramo imbaʼapohápe, escuela ha opa oikoha rupi oiporúgui ñeʼẽ potĩ. (Efesios 4:29, 31; 5:3.)

[Nóta oĩva taʼanga ndive páhina 19]

Ñandejárape oservíva ipotĩvaʼerã opa mbaʼépe