Lección 13
Mbaʼéicha ikatu retopa religión añetéva
Oguerohorýpa Ñandejára opaichagua religión, térã peteĩnte? (1)
Mbaʼérepa oĩ hetaiterei religión heʼíva cristianoha? (2)
Mbaʼéichapa ikatu reikuaa mávapa haʼe umi cristiano añetéva? (3-7)
1. Jesús omoñepyrũvaʼekue peteĩnte religión cristiana añetéva. Upévare, koʼág̃a avei oĩvaʼerã peteĩ religiónte omeʼẽva Jehovápe adoración añetegua. (Juan 4:23, 24; Efesios 4:4, 5.) La Biblia omboʼe saʼiha oĩ oguatáva tape poʼíre ogueraháva tekovépe. (Mateo 7:13, 14.)
2. La Biblia heʼivaʼekue umi apostolkuéra omano rire oikevaʼerãha mbeguekatúpe congregación apytépe enseñanza ijapúva ha ojejapovaʼerãha heta mbaʼe ndahaʼéiva cristiánope g̃uarã. Heʼi oĩvaʼerãha kuimbaʼe oporogueraháva hakykuéri ha omboykéva hapichápe Cristo ñeʼẽgui. (Mateo 7:15, 21-23; Hechos 20:29, 30.) Upévare jahecha koʼág̃a hetaiterei religión heʼíva cristianoha. Mbaʼéichapa ikatu jaikuaa umi cristiano añetévape?
3. Pe mbaʼe ojehechavéva cristiano añetegua apytépe haʼe pe mborayhu añete ojoguerekóva. (Juan 13:34, 35.) Chupekuéra noñemboʼéi oñeñandu hag̃ua mbaʼeguasuveha hapichakuéragui ndahaʼéirõ irráza térã ipireichagua. Noñemboʼéi avei chupekuéra ndaijaʼéi hag̃ua hapicha ambue tetãguáre. (Hechos 10:34, 35.) Upévare haʼekuéra noñorairõi mbaʼeveichagua guerrahápe. Cristiano añetéva ojoguereko hermano ha hermánaicha. (1 Juan 4:20, 21.)
4. Religión añeteguápe avei tuichaiterei mbaʼe pe Biblia heʼíva. Chupekuéra g̃uarã haʼe Ñandejára Ñeʼẽ ha oguerovia pe heʼíva. (Juan 17:17; 2 Timoteo 3:16, 17.) Chupekuéra, Ñandejára Ñeʼẽ iñimportanteve oimeraẽ idea ha costumbre ojeguerekóvagui. (Mateo 15:1-3, 7-9.) Oñehaʼã hikuái oguata hese opa árape. Upévare ndahaʼéi ku omboʼéva peteĩ mbaʼe ha upéi ndojapói upéicha. (Tito 1:15, 16.)
5. Religión añetéva omombaʼeguasuvaʼerã avei Ñandejára réra. (Mateo 6:9.) Jesús omombeʼu Ñandejára réra, Jehová, ha cristiano añetegua ojapovaʼerã avei upéicha. (Juan 17:6, 26; Romanos 10:13, 14.) Mávapa haʼe umi omombeʼúva Ñandejára réra nde róga jerére?
6. Cristiano añetéva oñeʼẽvaʼerã Ñandejára Réinogui. Jesús ojapovaʼekue upéicha. Haʼe manterei oñeʼẽmi Ñandejára Réinogui. (Lucas 8:1.) Omondo avei umi hemimboʼekuérape oñeʼẽ hag̃ua upévagui Yvy tuichakuére. (Mateo 24:14; 28:19, 20.) Cristiano añetegua oguerovia Ñandejára Reino añoite ikatuha ogueru pyʼaguapy ha seguridad añetéva ko Yvy ári. (Salmo 146:3-5.)
7. Jesús remimboʼekuéra ndojeheʼái ko mundo aña ndive. (Juan 17:16.) Ndojeheʼái ipolíticape ha ndoikéi umi problema social oĩva ko múndope. Omboyke ijehegui umi conducta ha tembiapo vai ojejapóva ko múndope. (Santiago 1:27; 4:4.) Reikuaápa peteĩ grupo religioso oikóva upéicha nde róga jerére, ohechaukáva haʼeha cristiano añetegua?
[Nóta oĩva taʼanga ndive páhina 27]
Cristiano añetegua ojoayhu, omombaʼeguasu Biblia heʼíva ha oñeʼẽ Ñandejára Réinogui