Epoko umi nerendúva korasõre

ÑANDE ndahaʼéi jaikuaaukánteva umi héntepe mbaʼépa heʼi la Biblia, síno ñañehaʼã ñag̃uahẽ ikorasõme. La Bíbliape pe palávra korasõ orrepresenta jepi umi mbaʼe oñandúva, opensáva ha omomýiva peteĩ persónape ojapo térã heʼi hag̃ua peteĩ mbaʼe. Upépe og̃uahẽ vaʼerã pe añetegua, péicha ikorasõ omomýita chupe oservi hag̃ua Jehovápe (Prov. 3:1; Mat. 13:19; Rom. 6:17).

Ikatu hag̃uáicha upe remboʼéva opoko umi nerendúva korasõre, rehecha vaʼerã koʼã mbaʼe: 1) eñehaʼã entende mbaʼépa oguerovia umi nerendúva, 2) eipytyvõ chupekuéra ohayhu ha okyhyje hag̃ua Ñandejáragui, ha 3) emokyreʼỹ chupekuéra tojepyʼamongeta ohecha hag̃ua mbaʼépa oĩ ikorasõme, ikatu hag̃uáicha Jehová oguerohory chupekuéra.

Eñehaʼã epilla mbaʼépa oreko ikorasõme. Japredika ha jajapo jave estúdio ningo iñimportanteterei jaikuaa mbaʼe mbaʼépa oiméne opensa térã oguerovia umi hénte, ¿mbaʼérepa? Pórke upéicha jaikuaáta noiméipa pe persónape ndogustái peteĩ mbaʼe ñamboʼéva ha tekotevẽ ñaipytyvõ chupekuéra okambia hag̃ua opensa lája, térãpa jahechaukánte vaʼerã chupekuéra mbaʼérepa ikatu oguerovia peteĩ enseñánsa vívlika. Upévare iporã reñeporandu: “¿Ohechakuaápa iñimportanteha oikuaa Ñandejárape ha oñemoag̃ui hese? ¿Mbaʼe mbaʼépa oguerovia? ¿Mbaʼe mbaʼépa ndogueroviái ko persóna? ¿Mbaʼérepa opensa upéicha? ¿Tekotevẽpa oñepytyvõ chupe oheja hag̃ua peteĩ mbaʼe vai ojapóva hína?”.

Sapyʼánte ijetuʼu jepi japilla mbaʼérepa peteĩ persóna oguerovia peteĩ mbaʼe. Proverbios 20:5 heʼi voi: “Umi mbaʼe oĩva peteĩ kuimbaʼe pyʼapýpe haʼete peteĩ póso ipypukúva, péro pe kuimbaʼe orekóva disernimiénto oguenohẽta umíva”. ¿Mbaʼépa heʼise “disernimiénto”? Heʼise ikatuha japilla térã jahechakuaa peteĩ mbaʼe. Upearã tekotevẽ ñantende umi hénte opensa lája ha jajesareko umi detállere.

Ñande rováre ha ñane tóno de vos rehe ikatu avei ojepilla mbaʼépa ñapensa hína. Por ehémplo tuvakuéra pyaʼe opilla ifamília oñepyrũ jave okambia, haʼekuéra oikuaa oimépa ova hína hesekuéra ikompañerokuéra lája. Upéicha avei, nde reñeʼẽ jave ne estudiántendi reñatende vaʼerã oimépa okambiapa la hova térã oñeʼẽ lája, pórke péicha repilláta mbaʼépa haʼe opensa pe témare. Rejesarekóramo koʼã detállere ikatúta reikuaa mbaʼépa oreko ikorasõme ne estudiánte.

Reiporavo porãramo umi porandu ikatúta reikuaa mbaʼépa opensa umi nerendúva. Ikatu reporandu: “¿Mbaʼépa nde repensa pe...? ¿Mbaʼérepa nde reguerovia...? ¿Mbaʼépa rejapóta oikóramo...?”. Péro reñatende vaʼerã ani pe persóna opensa represionaitereimaha chupe. Ñepyrũrã ikatu erénte chupe: “¿Ikatu piko aporandu ndéve peteĩ mbaʼe?”. Upéicharõ jepe, ndahaʼéi peteĩ tesapirĩme ikatútamava jaikuaa mbaʼépa oreko hikuái ikorasõme. Omombeʼu hag̃ua ñandéve mbaʼépa opensa térã oñandu, tekotevẽ okonfia raẽ ñanderehe, ha upearã ohasa vaʼerã tiémpo. Ha okonfiáramo jepe ñanderehe, lomímonte ñañehaʼã vaʼerã jaikekuaa, ani pe persóna opensa ñanentremetidoha (1 Ped. 4:15).

Tekotevẽ avei ñañatende mbaʼéichapa ñarreaksiona. Nemanduʼa vaʼerã tekotevẽha rentende mbaʼépa oguerovia pe persóna, upéicharõmante reikuaáta mbaʼérehepa ikatu reñeʼẽ. Aníkena manterei rekorrehise ne estudiántepe, heʼíramo jepe peteĩ mbaʼe noiporãiva. Upéva rangue eñehaʼã entende mbaʼérepa opensa upéicha, reikuaa hag̃ua mbaʼépa erevéta chupe. Ne estudiánte ohechakuaáramo rentendeha chupe, katuete ohenduséta avei la eréva (Prov. 16:23).

Rejapo jave diskúrso ikatu avei remokyreʼỹ umi nerendúvape osegi hag̃ua umi konsého remeʼẽva. Péro, ¿mbaʼéichapa ikatu reikuaa mbaʼépa opensa hikuái? Tekotevẽ remaña umi nerendúvare, eñatende mbaʼéichapa orreaksiona hikuái ha ejapo umi porandu ojepyʼamongeta hag̃ua. Oimérõ rejapóta peteĩ diskúrso ne kongregasiónpe, repensa vaʼerã mbaʼe situasiónpa ohasa hína hikuái. Ha reñeʼẽta jave peteĩ témare, rereko vaʼerã enkuénta mbaʼépa opensa upévare umi ermanokuéra (Gál. 6:18).

Emokyreʼỹ umi nerendúvape oporohayhu hag̃ua. Repilla rire mbaʼe mbaʼépa oguerovia ne estudiánte ha mbaʼérepa, reikuaátama mbaʼérehepa ikatu reñeʼẽ chupe. Jesús orresusita rire oñemongeta idisipulokuérandi, ha umi mbaʼe heʼíva opokoiterei hesekuéra, pórke Jesús omyesakã chupekuéra mbaʼéichapa oñekumpli hese Ñandejára Ñeʼẽ heʼíva (Luc. 24:32). Nde avei reñehaʼã vaʼerã reguereko enkuénta umi mbaʼe ohasa vaʼekue ne estudiánte, umi mbaʼe ohaʼarõva oñekumpli ha umi mbaʼe oikuaámava la Bíbliagui. Umi mbaʼe eréva og̃uahẽta ikorasõme haʼe ohechakuaa vove upe remboʼéva chupe haʼeha pe añetegua.

Rehechauka jave ne estudiántepe mbaʼeichaitépa Jehová ipyʼaporã, oporohayhu, hekojoja ha imbaʼeporã reipytyvõ hína chupe ohayhu hag̃ua Jehovápe. Ne estudiánte avei oñemoag̃uisevéta Ñandejárare reexplikáramo chupe haʼe ohechaha umi mbaʼe porã ojapóva. Upearã remokyreʼỹ vaʼerã chupe tojepyʼamongeta koʼã téxtore: Salmo 139:1-3, Lucas 21:1-4 ha Juan 6:44, ha taimanduʼa Jehová ohayhuetereiha isiervokuérape (Rom. 8:38, 39). Avei remyesakã vaʼerã Jehová ndojesarekoiha ñande fállare, síno ohecha mbaʼeichaitépa ñañehaʼã jaservi chupe ha mbaʼépa jaheja ha ñakambia jahayhúgui chupe (2 Crón. 19:2, 3; Heb. 6:10). Jehová oikuaa opa mbaʼe ñandehegui, umi detalleʼi jepe, ha orekóta enkuénta upéva omopuʼã vove ‘opavave oĩva pe sepultúrape’ (Juan 5:28, 29; Luc. 12:6, 7). Ñandejára ojapo entéro yvypórape ijoguaháramo, upévare jareko avei sentimiénto ha reñeʼẽramo ne estudiántendi umi mbaʼe porã Jehová ohechaukávare, upéva ikatu hína opoko ikorasõre (Gén. 1:27).

Jehová otrata entéro persónape peteĩchante, haʼe nomañái ñane píntare, ñande pire kolór ni mbaʼe nasionalidápa jareko (Hech. 10:34, 35). Ne estudiánte oaprende vove upéva, ohecháta hapichakuérape Jehová ohechaháicha. Péicha ikatúta ohapoʼo ikorasõgui umi mbaʼe vai oñandu vaʼekue hapicháre, ha upéva oipytyvõta chupe ohayhu ha ojogueraha porã hag̃ua entéro persónandi.

Remboʼe vaʼerã ne estudiántepe tekotevẽha okyhyje Jehovágui ani hag̃ua ojapo mbaʼeve ombopochýtava chupe (Sal. 111:10; Apoc. 14:6, 7). Upéva omomýi ha omombaretéta chupe ojapo hag̃ua umi kámbio ijehegui rei ndaikatumoʼãiva ojapo. Remyesakãramo chupe umi mbaʼe porãita Jehová ohechaukáva ha mbaʼeichaitépa imbaʼeporã ñanendive, upéva ikatu omokyreʼỹ chupe iñeʼẽrendu hag̃ua Jehovápe (Sal. 66:5; Jer. 32:40).

Rentendeka porã vaʼerã chupe Jehovápe oafektaha umi mbaʼe jajapóva, tahaʼe iporãva térã ivaíva. La Biblia ohechauka Jehová orekoha sentimiénto, upévare umi mbaʼe jadesidíva ikatu ombovyʼa térã omoñeñandu vai chupe (Sal. 78:40-42). Ontende porã vaʼerã iñeʼẽrendúramo Jehovápe ohechaukataha Satanás ijapuha (Prov. 27:11).

Reipytyvõ vaʼerã umi nerendúvape ohechakuaa hag̃ua katuete ñasẽ porãtaha ñaneñeʼẽrendúramo Jehovápe (Is. 48:17). Upearã remyesakã vaʼerã ñamboykéramo michĩmi jepe Ñandejára heʼíva ikatuha jajeperhudika ha heta jasufri. Avei rehechauka vaʼerã japekáramo japyta vaitaha Jehová renondépe, ndaikatumoʼãi ñaipytyvõ ótrope oikuaa hag̃ua chupe, ha hiʼarive japerhudikáta ñande rapichápe (1 Tes. 4:6). Emokyreʼỹ umi nerendúvape omombaʼe hag̃ua umi vendisión jahupytýva koʼág̃ama voi ñakumplíramo Jehová léi ha mbaʼéichapa jajei heta akãrasýgui. Haʼekuéra omombaʼe ha oagradeséramo pe enseñánsa jarresivíva Jehovágui ombojeguarúta chupekuéra oimeraẽ mbaʼe ndogustáiva Ñandejárape. Péicha umi léi oĩva la Bíbliape ndahaʼemoʼãi peteĩ kárga chupekuéra g̃uarã, síno ohechakuaáta iñeʼẽrendúramo ohechaukataha ohayhuha Jehovápe (Sal. 119:104).

Eipytyvõ nde rapichápe ojepyʼamongeta hag̃ua. Osegi hag̃ua oprogresa Jehová servísiope, umi ne estudiánte ojepyʼamongeta vaʼerã oikuaa hag̃ua mbaʼépa oreko ikorasõme. Reexplika vaʼerã mbaʼéichapa la Biblia ikatu oipytyvõ chupekuéra upearã.

Reipytyvõ vaʼerã umi nerendúvape ohechakuaa hag̃ua la Biblia ndahaʼeiha peteĩ lívro omombeʼúnteva istória térã profesía, orekóva heta léi ha konsého ñande rekovépe g̃uarã, síno avei ñanepytyvõ jaikuaa hag̃ua mbaʼépa Jehová opensa. Santiago 1:22-25 ombojoja Ñandejára Ñeʼẽ peteĩ espéhore, ¿mbaʼérepa? Pórke jastudiávo la Biblia heʼíva jaikuaa porãve jahávo mbaʼépa Jehová ohaʼarõ ñandehegui, ha umi mbaʼe jadesidívare ojekuaa hína mbaʼépa jareko ñane korasõme. Avei péicha jaikuaa mbaʼépa Jehová opensa ñanderehe, haʼe ‘oipyguara ha ohecha mbaʼépa oĩ ñane korasõme’ (Prov. 17:3). Remokyreʼỹ vaʼerã umi nerendúvape imanduʼa meme hag̃ua upévare. Ere avei iñimportanteha ojepyʼamongeta Jehová ñeʼẽre ha tosegi tohecha mbaʼe kámbiopa tekotevẽ ojapove ombovyʼa hag̃ua Jehovápe. Rentendeka vaʼerã umi nerendúvape tekotevẽha jalee la Biblia jaikuaa hag̃ua mbaʼéichapa Jehová ohecha “umi mbaʼe ñapensáva ha jaipotáva ñane korasõme”. Upéicharõmante haʼekuéra oikuaáta mbaʼe mbaʼépepa tekotevẽ omehora (Heb. 4:12; Rom. 15:4).

Oĩ umi estudiánte ojaposéva umi mbaʼe oaprendéva la Bíbliagui, péro okyhyje mbaʼépa ojeʼéta hese. Ikatu oime ostira chupe umi mbaʼe vai oĩva ko múndope térã oservise Ñandejárape péro oikose avei ko múndope ojeikoháicha. Emyesakã mbaʼérepa ipeligróso ñapensa upéicha (1 Rey. 18:21). Emokyreʼỹ ne estudiántepe tojerure Jehovápe toipytyvõ chupe ohecha hag̃ua mbaʼépa oreko ikorasõme ha okambia hag̃ua opensa lája (Sal. 26:2; 139:23, 24).

Ehechauka ne estudiántepe Jehová oikuaa ha ontendeha mbaʼeichaitépa ijetuʼu chupe okambia hag̃ua, ha la Biblia omombeʼuha avei mbaʼérepa oiko upéva (Rom. 7:22, 23). Ere chupe ndovaleiha oñemeʼẽ umi mbaʼe vai ojaposévape (Prov. 3:5, 6; 28:26; Jer. 17:9, 10).

Emokyreʼỹ umi nerendúvape tojepyʼamongeta ohecha hag̃ua mbaʼépa oreko ikorasõme. Ere chupekuéra odesidi mboyve peteĩ mbaʼe iporãtaha oñeporandu koʼã mbaʼe: “¿Mbaʼérepa ajapose ko mbaʼe? ¿Ahechaukátapa hína Jehovápe aagradeseha opa mbaʼe ojapóva cherehehápe?”. Eñehaʼãkena ehechauka porã umi nerendúvape opa mbaʼégui iñimportanteveha hína ñaime porã Jehová ndive.

Ehechaukákena ne estudiántepe mbaʼépa heʼise ‘jahayhu Jehovápe ñande pyʼaite guive’ (Luc. 10:27). Upéva heʼise oheja vaʼerãha Jehová omoldea opa mbaʼe oñandúva, opensáva ha ojaposéva. Upévare ndahaʼéi ojapónte vaʼerã Jehová heʼíva síno opensa vaʼerã mbaʼérepa oservise chupe (Sal. 37:4). Ne estudiánte ohechakuaávo mbaʼépepa tekotevẽ omehora, remokyreʼỹ vaʼerã chupe tojerure Jehovápe ojapo haguéicha pe salmísta: “Chepytyvõkena amombaʼe hag̃ua nde réra che pyʼaite guive” (Sal. 86:11).

Ne estudiánte oñemoag̃uivévo Jehováre iñeʼẽrendútama chupe ojeroviágui hese, ha ndahaʼéi ndénte erégui chupe. Ha péicha ijehegui reíma ‘oñehaʼãta ohechakuaa mbaʼépa Ñandejára oguerohory’ (Efes. 5:10; Filip. 2:12). Peichagua persónape Jehová omombaʼeterei, pórke iñeʼẽrendu chupe ipyʼaite guive (Prov. 23:15).

Ani nderesarái Jehová ohechaha mbaʼépa oreko ikorasõme umi hénte ha haʼe voi oinvitaha umi ipyʼaporãvape oñemoag̃ui hag̃ua hese (Prov. 21:2; Juan 6:44). Ñande ningo Ñandejára ajudánte (1 Cor. 3:9). Haʼe ‘ojevale ñanderehe jajerure asy hag̃ua umi héntepe’ tokambia ha tojevy hendápe (2 Cor. 5:20; Hech. 16:14). Ñandejára ndoovligái avavépe iñeʼẽrendu hag̃ua chupe, péro jaiporúramo la Biblia hekoitépe, upe jaʼéva rupive Jehová ikatu opoko umi hénte korasõre térã ombohovái chupekuéra iñemboʼe. Nemanduʼákena siémpre ko mbaʼére reporomboʼéta jave, ha ejerure Jehovápe tandedirihi ha tanepytyvõ rejapo porã hag̃ua upéva (1 Crón. 29:18, 19; Efes. 1:16-18).