Javyʼa jaikuaávo peteĩ sekréto

¿Oñemombeʼúmapa ndéve peteĩ sekréto?...a La Bíbliape oñeñeʼẽ peteĩ ‘sekréto marangatúre’. Upe sekréto iporãiterei, ou Ñandejáragui ha heta hénte ndoikuaái noñemombeʼúi rupi chupekuéra. Umi ánhel jepe oikuaaseterei ko sekréto. ¿Reipotápa amombeʼu ndéve?...

Ñandejára ningo ojapo vaʼekue pe primer kuimbaʼe hérava Adán, ha pe kuña hérava Eva. Haʼe omeʼẽ chupekuéra peteĩ hardín neporãva hérava Edén oiko hag̃ua pype. Adán ha Eva ojapórire Ñandejára heʼíva, ikatúta kuri oiko opa árare pe hardín porãitépe. Haʼekuéra ha ifamiliakuéra ombaʼapóta kuri ojapo hag̃ua ko yvy kompletoitégui peteĩ hardín. Péro, ¿reikuaápa mbaʼépa ojapo raʼe hikuái?...

Adán ha Eva naiñeʼẽrendúi Ñandejárape, upéva káusare koʼág̃a ndajaikói peteĩ hardín neporãvape. Péro Ñandejára heʼi ojapo jeytaha ko yvýgui peteĩ hardín, ikatu hag̃uáicha enterovéva jaiko vyʼápe opa árare. ¿Mbaʼéichapa ojapóta upéva? Heta tiémpore avave ndoikuaái. Haʼe vaʼekue peteĩ sekréto.

Jesús oúrõ guare ko yvy ape ári oñeʼẽ umi héntepe ko sekrétore. Heʼi Ñandejára oguerutaha peteĩ Rréino térã goviérno omoporãmba jey hag̃ua ko yvy. Jesús heʼi avei ñañemboʼévo jajerure vaʼerãha tou ko Rréino.

¿Mbaʼéichapa reñeñandu reikuaávo ko sekréto?... Nemanduʼákena umi iñeʼẽrendúva Jehovápe añoite oikotaha pe hardín neporãvape. La Biblia omombeʼu yma heta kuimbaʼe ha kuña ojapo hague Jehová oipotáva. ¿Reipotápa amombeʼu ndéve ijistoriakuéra?... Jahechamína máva mávapa raʼe umíva ha mbaʼéichapa ikatu jajapo haʼekuéra ojapo haguéicha.