Ñaipytyvõ ñane ermanokuéra oikotevẽvape

1, 2. a) ¿Mbaʼépa ohasa raʼe umi ermáno Judeagua? b) ¿Mbaʼéichapa umi ermáno Antioquiagua ohechauka ohayhuha chupekuéra?

ÁÑO 46 rupi después de Cristo, Judéape ofaltapa hiʼupy ha umi hénte iñembyahyipa. Oñevende saʼi mimi trígo ha seváda péro hepyeterei. Cristo disipulokuéra upepegua ndorekói mbaʼevete ha ni guaʼuhápe ndaikatumoʼãi opaga umi hiʼupýre, hepyetereíma chupekuéra g̃uarã. Ivai la isituasionkuéra. Ndahaʼéi voi iñembyahýinteva, síno ikatu voi omano ñembyahýigui. Péro ensegidamínte Jehová oipytyvõma koʼã kristiánope, ojapoʼỹ haguéicha arakaʼeve. ¿Mbaʼépa oiko raʼe upérõ?

² Umi kristiáno hudío ha ótro tetãygua oikóva Antioquía de Síriape oikuaa iñermanokuéra Jerusalén ha Judeagua ohasa asyha. Ha ombyasyetereígui chupekuéra oñepyrũ ombyaty pláta oguerahauka hag̃ua umi oikotevẽvape. Upéi oiporavo hikuái mokõi ermáno de konfiánsa, Bernabé ha Saulo ogueraha hag̃ua pe pláta umi ansiáno Jerusalenguápe (elee Hechos 11:27-30; 12:25). Epensamína mbaʼeichaitépa oñeñandu porãne raʼe umi ermáno Judeagua oikuaávo la ojapóva hesehapekuéra umi ermáno Antioquiagua.

3. a) ¿Mbaʼéichapa jasegi umi Antioquiagua ehémplo? Emombeʼu peteĩ káso. (Ehecha avei pe rrekuádro “Ñañepyrũ ñaipytyvõ ñane ermanokuérape”.) b) ¿Mbaʼe porandúpa jahecháta?

³ Upérõ primera ves la Biblia omombeʼu kristianokuéra oikóva mombyry oguerahauka hague ajúdo iñermanokuéra ohasa asývape. Koʼág̃a jasegi umi ermáno Antioquiagua ehémplo. Ensegída ñaipytyvõ ermanokuérape jaikuaávo peteĩ lugárpe oĩha oikotevẽva pórke oiko gérra térã yvyryrýi.a Ñantende hag̃ua mbaʼérepa peteĩ kristiáno tee oipytyvõmante vaʼerã iñermanokuéra oikotevẽvape, jahechami koʼã mbohapy porandu: ¿Mbaʼérepa ñaipytyvõvo ñane ermanokuérape jaservi Ñadejárape? ¿Mbaʼépa jahupytyse jajapo jave upéva? ¿Mbaʼéichapa ideprovécho ñandéve ñaipytyvõ ótrope?

Ñaipytyvõvo ñane ermanokuérape ‘jaservi Ñandejárape’

4. ¿Mbaʼépa oskrivi apóstol Pablo umi kristiáno Corintoguápe?

⁴ Apóstol Pablo oskrivírõ guare Segunda a los Corintios, oñeʼẽ mokõi mbaʼe tekotevẽvare ojapo peteĩ kristiáno. Pe kárta ojeskrivíramo jepe umi unhídope g̃uarã, lomímonte okumpli vaʼerã “ambue ovechakuéra” (Juan 10:16). Apóstol Pablo heʼi entéro kristiáno orekoha mokõi tembiapo. Primero japredika ha ñaporomboʼe. Péicha ‘ñaipytyvõ ótrope oiko porã jey hag̃ua Ñandejárandi’ (2 Cor. 5:18-20; 1 Tim. 2:3-6). Segundo, ñaipytyvõ ñane ermanokuéra oikotevẽvape. Pablo heʼi péicha ‘ñaipytyvõ ha jaserviha umi imarangatúvape’ (2 Cor. 8:4). Griégope koʼã mokõi téxtope ojeporu pe palávra diakonía. ¿Mbaʼérepa iñimportánte upéva?

5. ¿Mbaʼépa ñanemboʼe apóstol Pablo heʼi vaʼekue?

⁵ Oiporúvo peteĩ palávrante koʼã mokõi hendápe, apóstol Pablo ohechauka umi kristiáno tee oipytyvõ vaʼerãha ótrope, ojapoháicha avei umi ótro tembiapo kongregasionpegua. Upe mboyve Pablo heʼíma voi kuri: “Oĩ diferénte tembiapo ñaipytyvõ hag̃ua ótrope, ha upéicharamo jepe peteĩnte ñande Ruvicha. Pe espíritu sánto ojapouka umi héntepe diferénte tembiapo, péro [...] opa koʼã mbaʼe ojapouka peteĩ espíritunte” (1 Cor. 12:4-6, 11). Pe apóstol heʼi avei jajapóvo umi diferénte tembiapo kongregasiónpe ‘jaserviha Ñandejárape’b (Rom. 12:1, 6-8). Ndareíri apóstol Pablo ovyʼaiterei ikatu haguére oiporu itiémpo ‘oservi hag̃ua ermanokuérape’ (Rom. 15:25, 26).

6. a) ¿Mbaʼérepa ñaipytyvõ jave ñane ermanokuérape jaadora avei Jehovápe? b) Emombeʼumi mbaʼéichapa oñepytyvõ ermanokuérape ko yvy tuichakuére (ehecha pe rrekuádro “Oiko jave sarambi”, páhina 214-pe).

⁶ Pablo oipota vaʼekue umi Corintogua ontende oipytyvõ jave iñermanokuérape oadoraha avei Jehovápe. Upearã heʼi: ‘Peẽ ndahaʼéi peikuaaukánteva umi marandu porã oñeʼẽva Crístore, síno pekumpli avei umíva’ (2 Cor. 9:13). Umi kristiáno ojaposeterei Jesús omboʼe vaʼekue ha upévare oipytyvõ iñermanokuérape. Pablo heʼi umi mbaʼe porã ojapóva hikuái ótro rehehápe ohechaukaha ‘Ñandejára imbaʼeporãitereiha’ (2 Cor. 9:14; 1 Ped. 4:10). Oñeʼẽvo ko témare Ñemañaha de 1 de diciembre de 1975 heʼi porã: “Ani ni mbaʼevéicharõ ñapensa Ñandejára Jehová ha itaʼýra Jesucristo nomombaʼeiha koʼã tembiapo”. Ha añetehápe ningo Jehová omombaʼeterei umi sakrifísio jajapóva ñaipytyvõ hag̃ua ñande rapichakuéra oikotevẽvape (Rom. 12:1, 7; 2 Cor. 8:7; Heb. 13:16).

Mbaʼépa jahupytyse koʼã tembiapo rupive

7, 8. ¿Mbaʼépa primeroite jahupytyse ñaipytyvõ jave ñane ermáno oikotevẽvape? Emyesakã.

⁷ ¿Maʼerãpa ñaipytyvõ ñane ermanokuérape? ¿Mbaʼépa jahupytyse? Pablo oñeʼẽ upévare pe segunda kárta oskrivi vaʼekuépe umi Corintoguápe (elee 2 Corintios 9:11-15). Koʼã versíkulope haʼe oñeʼẽ mbohapy mbaʼe jahupytysévare jajapóvo ko “servísio” ñande rapichakuéra oikotevẽva rehehápe. Jahechami peteĩteĩ.

⁸ Primero, ñaipytyvõvo ñane ermanokuérape ñambotuicha Jehovápe. ¿Rehechakuaápa mboy vése Pablo oñeʼẽ Jehová rehe umi versíkulo jalee vaʼekuépe? Haʼe heʼi versíkulo 11-pe: “Umi hénte oagradeséta Ñandejárape” ha versíkulo 12-pe: “Hetaiterei hénte oagradesetereíta Ñandejárape”. Pe apóstol heʼi umi mbaʼe porã rupive ‘oñembotuichaha Ñandejárape’ ha omombaʼeguasu Jehovápe “imbaʼeporãiterei haguére” (versíkulo 13, 14). Ipahaitépe Pablo heʼi: “Jaagradese Ñandejárape” (versíkulo 15; 1 Ped. 4:11).

9. ¿Mbaʼéichapa umi hénte ohechávo ñañopytyvõha, ikatu okambia opensa lája? Emombeʼu peteĩ ehémplo.

⁹ Ojapo haguéicha apóstol Pablo, ñande jahechakuaa avei koʼág̃a ikatuha ñambotuicha Jehovápe oñeñeʼẽ porã hag̃ua haʼe omboʼévare. Upearã ñaipytyvõ vaʼerã ñane ermanokuéra oikotevẽvape (1 Cor. 10:31; Tito 2:10). Pyʼỹinte umi hénte opensa vaíva testigokuérare, okambia opensa lája ohecha rire mbaʼéichapa ñañopytyvõ. Ñapensamíntena ko ehémplore. Peteĩ kuñakarai oreko vaʼekue hokẽre peteĩ letréro heʼíva: “Testígo de Jehová, aníke peg̃uahẽ koʼápe”. Péro peteĩ urakán ojapo rire sarambi upe oikohápe, haʼe ohecha una partída hénte ombaʼapóva hína oarregla hag̃ua peteĩ ivesíno róga. Heta díare omaña hesekuéra ha ohecha mbaʼéichapa hory hikuái. Upéi oñanima ha oho oporandu chupekuéra mávapa hikuái. Oikuaávo testígo de Jehovaha, ni ndoroviaséi. Ko kuñakarai heʼi: “Tuichaiterei ajavy raʼe”. ¿Mbaʼépa ojapo upéi? Oipeʼa la iletréro hokẽgui.

10, 11. a) ¿Mbaʼe ehémplopa ohechauka ñameʼẽha ñane ermanokuérape oikotevẽva? b) ¿Mbaʼe puvlikasiónpa oreko umi ohóva oporopytyvõ? (Ehecha pe rrekuádro “Peteĩ erramiénta tuichaiterei oipytyvõva”.)

¹⁰ Segundo: ñane ermanokuéra ohupyty umi mbaʼe oikotevẽva (2 Cor. 9:12a). Hiʼãiterei ningo ñandéve ñameʼẽ ñane ermanokuérape oikotevẽva anivéma hag̃ua ohasa asy. ¿Mbaʼére piko? Pórke pe kongregasión ikatu ñakompara “ñande rete” rehe, ha ñaiméramo jepe heta ermáno, enterove “peteĩnte” hína. Upévare “peteĩva ohasa asýramo enterove umi ótro ohasa asy hendive” (1 Cor. 12:20, 26). Ohayhu ha oiporiahuvereko rupi iñermanokuérape, heta testígo oheja oimeraẽ mbaʼe ojapóva, ojagarra iñerramientakuéra ha pyaʼe oho oipytyvõ umi testígo oĩvape oiko haguépe algún sarambi (Sant. 2:15, 16). Por ehémplo, áño 2011-pe Japónpe peteĩ tsunami ojapo sarambi, umi oláda tuichaicháva oguerahapa oĩva guive haperãme. Upérõ pe sukursál Estados Unidosgua omondo peteĩ kárta umi Komite Rrehionál de Konstruksiónpe. Oporandu chupekuéra oĩpa “unos kuánto ermáno ikatupyrýva” ikatu vaʼerã oipytyvõ oñemopuʼã jey hag̃ua umi Salón del Reino hoʼapa vaʼekue. ¿Mbaʼépa heʼi umi ermáno? Unas kuánta semána haguépente oĩma 600 rupi oñekuaveʼẽva oho hag̃ua oipytyvõ ha heʼi voi haʼekuérante opagataha ipasáhe oho hag̃ua Japónpe. Pe sukursál Estados Unidosgua heʼi: “Noroimoʼãiete peichataha”. Peteĩ testígo Japongua oporandu peteĩ ermáno oúvape ótro tetãgui mbaʼérepa ojapo pe viáhe upe peve. Haʼe okontesta: “Peẽ ningo ore ermáno avei. Ha hasy asy oréve peẽ pehasáva”. Heta testígo ohayhuetereígui iñermanokuérape oapeligra hekove jepe hesehapekuérac (1 Juan 3:16).

¹¹ Umi ndahaʼéiva testígo jepe oagradese umi traváho jajapóvare. Por ehémplo áño 2013-pe oiko kuri peteĩ sarambi guasu Arkánsaspe (Estados Unidos). Upérõ peteĩ diário omombeʼu mbaʼéichapa testigokuéra pyaʼe okuʼe ha heʼi: “Umi testígo de Jehová ndahaʼéi ipyaʼénteva síno ombaʼapo porã voi. Añetehápe oikuaa hikuái mbaʼépa ojejapo vaʼerã koʼãichagua situasiónpe”. Upeichaite ningo, heʼi haguéicha apóstol Pablo, ñameʼẽ ñane ermanokuérape umi mbaʼe oikotevẽva.

12-14. a) ¿Mbaʼérepa iñimportantete pe tercer mbaʼe jahupytýva ñaporopytyvõvo? b) ¿Mbaʼéichapa oñeñandu umi ermáno osẽ jeývo opredika?

¹² Tercero: ñaipytyvõvo umi ohasa asývape, pyaʼeve osẽ jey opredika hikuái ha oho rreunionhápe. ¿Mbaʼérepa upéva iñimportánte? Apóstol Pablo heʼi umi hénte ñaipytyvõva ‘oagradesetereitaha Ñandejárape’ (2 Cor. 9:12b). ¿Mbaʼéichapa ohechauka porãvéta oagradeseha hikuái? Ohóvo rreunionhápe ha osẽvo opredika ikatumírentema (Filip. 1:10). Áño 1945-pe Ñemañaha heʼi: “Apóstol Pablo oipota kuri oñembyaty pe pláta pórke péicha umi ermáno oiko asýva saʼivéma oñekevrantáta ha imbaretevéta opredika hag̃ua Jehová Ñeʼẽ”. Ko tiémpope ñande jajapose avei upéva. Jaikuaa umi ermáno osẽvo opredika okonsolaha umi ohasa asývape ha haʼekuéra voi ikyreʼỹve (elee 2 Corintios 1:3, 4).

¹³ Heta ermáno ohechakuaa siertoha upéva. Oñepytyvõ rupi chupekuéra ikatu osẽ jey predikasiónpe ha upéicha rupi ikyreʼỹeterei hikuái. Peteĩ ermáno omombeʼu: “Che ha che família rovyʼaiterei ikatu haguére rosẽ jey ropredika. Roñehaʼãvo rokonsola ore rapichakuérape orepyʼaguapymie hetaite provléma apytépe”. Peteĩ ermána katu heʼi: “Apensa memévo predikasión rehe haʼete cheresaráiva umi desgrásia ha sarambi oĩvagui che jerére. Haʼete ndakyhyjevéimava upe rire”. Ótra ermána omombeʼu: “Heta mbaʼe ningo ndaikatúi rorremedia, péro pe predikasión rupive che ha che família ropensa umi mbaʼe iñimportantevévare. Roñemongetávo la héntendi ore esperánsare, ore voi rojeroviave Ñandejára ombopyahutaha ko yvy”.

¹⁴ Umi ermáno ohasa asýva tekotevẽ avei oho jey rreunionhápe ikatu vovéntema. Ñapensami ohasa vaʼekuére peteĩ ermána hérava Kiyoko ha orekóva 60 áñorupi. Peteĩ tsunami ohundipaite chugui orekomíva ha hemby chupe ijao orekóva ijehe ha isandália. Ojapo vaieterei hese upéva ha opensa ndorekoveimaha esperánsa. Upévo peteĩ ansiáno heʼi chupe ojapotaha peteĩ rreunión, péro hiʼáutope. Pe ermána imanduʼa: “Pe ansiáno, hembireko, ótra ermána ha che roguapy pe áutope. Pe rreunión isensillomínte péro chembyesarái pe tsunámigui. Upérõ tuicha chepyʼaguapy. Upe oiko vaʼekue ohechauka chéve mbaʼeichaitépa iñimportánte umi rreunionkuéra”. Ótra ermána heʼi avei: “Umi rreunión chepytyvõ aaguanta hag̃ua” (Rom. 1:11, 12; 12:12).

Umi mbaʼe porã jahupytýva opyta opa ára g̃uarã

15, 16. a) ¿Mbaʼépa ohupyty umi ermáno Corinto ha ótro tetãygua oporopytyvõ haguére? b) ¿Mbaʼe iporãvapa jahupyty ñane tiémpope?

¹⁵ Pablo heʼírõ guare umi Corintoguápe oñopytyvõ vaʼerãha, omombeʼu avei mbaʼe iporãvapa ojehupytýta upéva rupive. Haʼe heʼi mbaʼépa ojapóta umi kristiáno hudío Jerusalengua: “Haʼekuéra, ojerure asy penderehe Ñandejárape, ha penderayhu Ñandejára imbaʼeporãiterei haguére penendive” (2 Cor. 9:14). Upeichaite, umi Corintogua ipojera haguére, umi hudío oñemboʼe hesekuéra ha péicha ojoayhuve hikuái, tahaʼe hudío térã ótro tetãygua.

¹⁶ ¿Oñekumplípa ñane tiémpope Pablo heʼi vaʼekue? Ñemañaha de 1 de diciembre de 1945 heʼi: “Enterove oñopytyvõramo Ñandejára puévlope, ermanokuéra oñemoag̃uive ojuehe”. Añetehápe upéva oñandu ñane ermanokuéra ohóva oipytyvõ umi oikotevẽvape. Peteĩ ansiáno oho vaʼekue oporopytyvõ oiko haguépe inundasión, heʼi: “Ko traváho chemoag̃uive che ermanokuérare”. Peteĩ ermána orresivi vaʼekue ajúdo katu oagradeseterei ojejapóva hesehápe ha heʼi: “Jareko rupi hetaite ermáno ko yvy tuichakuére haʼete ñaimémava pe paraísope” (elee Proverbios 17:17).

17. a) ¿Mbaʼéichapa oñekumpli Isaías 41:13 heʼíva? b) Emombeʼu ehémplo ohechakáva koʼã tembiapo ombotuichaha Jehovápe, ha ñanemoag̃uiveha ojuehe (ehecha avei pe rrekuádro “Umi voluntário oporopytyvõ ko yvy tuichakuére”.

¹⁷ Umi testígo ohasa asýva ohechávo iñermanokuéra ouha oipytyvõ chupekuéra, oñandu siertoha Ñandejára promésa oĩva Isaías 41:13-pe: “Che Jehová nde Jára, rojagarra nde po deréchagui. Che haʼe ndéve: ‘Ani rekyhyje. Che roipytyvõta’” [NM]. Peteĩ ermána ojesalva vaʼekue oikórõ guare peteĩ sarambi guasu, heʼi: “Ahechávo desástre oikoha, añeñandu cheaño peteĩ. Péro Jehová ombohasa chéve ipo. Ndaikuaái mbaʼéichapa amombeʼúta la añandu vaʼekue umi ermáno chepytyvõrõ guare”. Mokõi ansiáno oikóva peteĩ lugár oiko haguépe yvyryrýi, omombeʼu mbaʼéichapa oñeñandu hikuái oñepytyvõ rire chupekuéra. Haʼekuéra heʼi: “Pe yvyryrýi heta orembohasa asy, péro Jehová ojevale isiervokuérare orepytyvõ hag̃ua. Ore roleémi mbaʼéicha oñepytyvõ ermanokuérape ótro lugárpe. Péro koʼág̃a orete rohecha upéva”.

¿Ikatúpa reipytyvõ?

18. ¿Mbaʼépa rejapokuaa rehóseramo reipytyvõ umi oikotevẽvape? (Ehecha avei pe rrekuádro “Okambiaite la ojaposéva”.)

¹⁸ ¿Mbaʼépa ere chupe? ¿Rehosénepa reipytyvõ oñekotevẽhápe? Oiméramo upéicha, nemanduʼa vaʼerã oñemondoha jepi umi voluntário ombaʼapóva konstruksión de Salón del Réinope. Upévare iporãta rejeruréramo ansianokuéra ne kongregasionguápe peteĩ solisitu. Peteĩ ansiáno heta tiémpore oipytyvõva umi lugár oiko haguépe sarambi omeʼẽ ko konsého: “Ani reho peteĩ lugár oiko haguépe sarambi nanemondóiramo peteĩ Komite de Sokórro”. Péicha umi traváho oñemohenda porãta ha ojejapóta hekopete.

19. ¿Mbaʼépa jahechauka ñaipytyvõvo ñane ermanokuérape?

¹⁹ Ñaipytyvõ jave ñane ermanokuéra oikotevẽvape añetehápe ñakumpli hína ko mandamiénto: “Pejoayhu vaʼerã”. Jajapóvo péicha jahechauka ñande haʼeha kristiáno tee (Juan 13:34, 35). Epensamíntena, hetaiterei testígo oĩ oipytyvõ hag̃uáicha oñekotevẽ jave. Koʼã ermáno ombotuicha Jehovápe oipytyvõ jave entéro umi oñemoĩvape Ñandejára Rréino ládo. ¡Ajéiko javyʼaite upe haguére!