Mbaʼéichapa oñepytyvõ ermanokuérape áño 2023-pe: “Personálmente rohechakuaa mbaʼeichaitépa Jehová orerayhu”

La Biblia oprofetisáma voi oikotaha sarambi ha peteĩ país opuʼãtaha ótro país rehe, pe fin og̃uahẽ potaitévo (Mateo 24:3, 7). Ha ñande jahechakuaa ko profesía oñekumpliha pe áño de servísio de 2023-pe.a Péro oĩramo jepe gérra ha oiko heta desástre naturál haimete 100 paíspe, umi testígo de Jehová ohechauka oporohayhuha Jehová ojapoháicha. ¿Mbaʼérepa jaʼekuaa upéva?

Pe áño de servísio 2023-pe, ñane ermanokuéra osufri mas de 200 desástre naturál káusare ha umi sarambi ojapóva umi ser umáno káusare. Ikatu hag̃uáicha oñepytyvõ chupekuéra, umi testígo de Jehová ogasta mas de 10 millón de dólar, ha umíva oñeguenohẽ umi donasión voluntáriagui oñemeʼẽva pe óvra mundiálpe g̃uarã.b Avei oĩ ermáno ijeheguiete omeʼẽva opa ikatúva oñepytyvõ hag̃ua umi ermáno oikóvape ijerére. Ehechamína mbaʼéichapa ojepuru ne kontrivusión oñepytyvõ hag̃ua umi ermánope koʼã mokõi paíspe.

“Jehová puévlope jajoayhu añete”

Nigériape oĩ sóna pyʼỹinte okyha, ha umícha jave oiko jepi inundasión. Péro octubre de 2022-pe ou kuri peteĩ ama tuichaitereíva, ojapóma 10 áño la peichaite peve ndokýiva. Mas de 676.000 ektárea de plantasión oñehundipaite, ha mas de 2 millón de persóna oheja vaʼerã kuri hóga. Pe sukursál de Nigeria pyaʼe voi ojerure pe Komite de Sokórrope ojapo hag̃ua la tekotevẽva oñepytyvõ hag̃ua umi ermánope, ha avei omokyreʼỹ ha omombarete hag̃ua chupekuéra ijerovia.

Mbaʼéichapa oafekta ñane ermáno ha ermanakuérape

• 7.505 puvlikadór oheja hóga

• 860 óga oñembyai térã oñehundiete voi

• 90 Salón del Reino ha peteĩ Salón de Asambléa oñeinunda

Mbaʼéichapa ojepuru umi kontrivusión

Mas de 250.000 dólar ojepuru oñepytyvõ hag̃ua ermanokuérape koʼã mbaʼépe:

• Arrós, kumanda, fidéo ha umícha

• Kochõ, moskitéro ha hetave mbaʼe

• Oñemyatyrõ térã oñemopuʼã jey umi óga oñembyaipa vaʼekue

¿Mbaʼéichapa ermanokuéra ojasegura ojepuru porãha hína umi kontrivusión? Por ehémplo oanalisa porã káda óga odesidi hag̃ua mavaitévapa la oñemyatyrõtava. Ha ojedesidíramo oñemopuʼã jey vaʼerãha peteĩ óga de seroite, ojehecha mbaʼéichapa ojejapo jepi umi óga pe lugár oñemopuʼãtahápe, ha asegún upéva oipuru pe diséño.

Umi ermáno ha ermána orresivíva la ajúda ovyʼaiterei. Peteĩ ermána heʼi: “Pe inundasión ovolea ipýguio ládo ore rekove. Roperdepaite ore plantasión ha ore róga. ¡Ropyta mbaʼeveʼỹre! Péro tuichaiterei orepyʼaguapy rohecha guive mbaʼéichapa umi ermáno ha ermanakuéra ou orepytyvõ ha omeʼẽ oréve peteĩ lugár isegúro porãva. Rovyʼaiterei rohechárõ guare pe sukursál oguerukaha oréve tembiʼu ha mbaʼe. Legálmente orejurujái ropytávo rohecha rire mbaʼéichapa oñekumpli orerehe Juan 13:34 ha 35. Koʼág̃a rokomprováma ke Jehová puévlope jajoayhu añete. Che família ha che ore pyʼaite guive roagradeseterei umi ermáno ha ermána ou vaʼekuépe orepytyvõ itiempoitépe”.

La ojejapóva osorprende avei umi hénte ndahaʼéivape Testígo oikóva upe sónape. Peteĩ líder Sabagreiagua, oĩva pe estádo de Bayélsape, heʼi: “Oĩ ningo añete hetaiterei organisasión ha iglésia ko múndope, péro umi testígo de Jehová añoite ojapo ãicha mbaʼe. [...] Pene organisasión haʼe peteĩva umi iporãvéva oĩva ko múndope”.

“Personálmente rohechakuaa mbaʼeichaitépa Jehová orerayhu”

Febrero de 2023-pe, mas de 400 inséndio sarambi ojapo Chílepe. Mas de 430.000 ektárea oñehundi, ha umíva apytépe oĩ vaʼekue heta edifísio ha fávrika iñimportánteva. Amo 8.000 persónarupi ohejámante vaʼerã kuri hóga. Oiko riremi upe desástre, pe sukursál pyaʼe voi ohecháma mbaʼéichapa ikatu oñepytyvõ ermanokuérape.

Mbaʼéichapa oafekta ñane ermáno ha ermanakuérape

• 222 puvlikadór oheja hóga

• 20 óga oñehundi

Mbaʼéichapa ojepuru umi kontrivusión

Mas de 200.000 dólar ojepuru oñepytyvõ hag̃ua ermanokuérape koʼã mbaʼépe:

• Tembiʼu ha y

• Kombustívle, prodúkto de limpiésa ha pohãnguéra

• Oñemopuʼã jey umi óga oñehundi vaʼekue

Peteĩ família tuichaiterei oñemondýi ha ndoikuaái anga mbaʼépa ojapóta ohecha rire mbaʼéichapa hóga ha inegósio oñehundipaite. Pe família kompletoite opyta travahoʼỹre ha oñetraumaite anga ohechávo la hóga opyta hague itapere. Péro oñemopuʼã jeývo ohóvo la hogakuéra, mbeguekatúpe oñeñandu porãmiéma hikuái. Ha koʼýte oñeñandu porã ohechakuaávo mbaʼéichapa umi ermáno ohayhu ha oñangareko hesekuéra. La ohasáva ko família opokoiterei hesekuéra, ha upévare omoirũ avei umi ermánope omopuʼã hag̃ua ótro ermáno róga.

Heta ñane ermáno ha ñane ermána oñesorprende ohechávo mbaʼéichapa oñepytyvõ pe kongregasiónpe. Peteĩ ermáno heʼi: “Pe Komite de Sokórro ningo peteĩ rregálo oúva Jehovágui. Al día sigiénte oiko hague pe desástre, haʼekuéra oĩma upépe provísta reheve. Jalee jave oikoha upéva ótro lugárpe, legálmente ñanemokyreʼỹ, péro ñanderehe voi oiko jave, idiferentete. Javalora de ótro voi Jehová organisasión jahechávo mbaʼéichapa umi ermáno osegi Jehová ehémplo ha ojepyʼapy ermanokuérare. Haʼekuéra oĩ upépe omeʼẽ hag̃uáicha umi mbaʼe roikotevẽva oreresãi hag̃ua, imbarete hag̃ua ore jerovia ha rosegi hag̃ua orepositívo. Personálmente rohechakuaa mbaʼeichaitépa Jehová orerayhu”.

Amáske hiʼag̃ui la fin, jahechakuaáta mbaʼéichapa heta hetave ohóvo umi desástre (Lucas 21:10, 11). Péro avei jahecha Jehová organisasiónpe, mbaʼéichapa ñande Rréi ñanderayhuetéva Jesucristo, ‘oĩ ñanendive káda día og̃uahẽ meve pe fin’ (Mateo 28:20). Umi kontrivusión remeʼẽva pe óvra mundiálpe g̃uarã, tahaʼe donate.jw.org rupive térã ótra fórma, tuichaiterei oipytyvõ ojejapo hag̃ua koʼã mbaʼe. Avei ne tiémpo ha enerhía remeʼẽva, ohechauka reapojaha nde pyʼaite guive Ñandejára Rréino ha Irréipe. ¡Grásiamante nembaʼeporã haguére!