Mokõi mensáhe oúva Ñandejáragui

Ikatu jaʼe la Biblia kompletoite haʼeha peteĩ mensáhe oúva Ñandejáragui. Ñande Ru yvagapegua omeʼẽ ñandéve Iñeʼẽ ñanerekomboʼe hag̃ua. Ojapo mas de 2.000 áño, peteĩ ánhel ‘oñemboʼýva Ñandejára renondépe’, hérava Gabriel, ou kuri ko yvy ape ári ogueru hag̃ua mokõi mensáhe iporãitereíva (Lucas 1:19). Jahechamína mbaʼépa oiko vaʼekue ko ánhel oúrõ guare omeʼẽ koʼã notísia.

Upérõ ningo áño 3 a.C., ha Gabriel ontrega pe primer mensáhe peteĩ saserdóte héravape Zacarías. Haʼe ha hembireko Elisabet oreko hóga Judéape peteĩ alturahápe, amalisia namombyrýi Jerusaléngui. Haʼekuéra ijedáma, péro naifamíliai. Peteĩ díape, Zacarías ombaʼapo jave Ñandejára témplope Jerusalénpe, ojeaparese chupe ánhel Gabriel pe altár de insiénso ypýpe.

Zacarías tuichaiterei oñemondýi. Péro pe ánhel otrankilisa chupe, heʼívo: “Ani rekyhyje Zacarías, Ñandejára ohendu ne ñemboʼe. Ne rembireko Elisabet imembýta ha pe mitãme rembohéra vaʼerã Juan”. Upéi Gabriel heʼi pe mitã onasétava ‘tuichataha Jehová renondépe’, ha ‘opreparataha peteĩ tetã Jehovápe g̃uarã’ (Lucas 1:13-17).

Péro Zacarías ndogueroviái pe ánhel heʼíva, pórke haʼe ha hembireko Elisabet ijedáma. Upémarõ Gabriel heʼi chupe: “Ndaikatumoʼãi reñeʼẽ oiko peve koʼã mbaʼe, nderegueroviái haguére che ñeʼẽ” (Lucas 1:20).

Upe aja umi hénte oikuaasejoáma mbaʼérepa Zacarías hiʼaretereíma pe témplo ryepýpe. Upéi hasypeve osẽ, péro iñeʼẽngu opytávo, upévare séñape oñekomunika umi héntendi. Upépe haʼekuéra opilla Zacarías ohecha hague peteĩ visión pe témplope.

Zacarías ojapopa rire hembiapo pe témplope, osẽ oho hógape. Tiémpo riremínte oikóma pe ánhel heʼi vaʼekue chupe. ¡Hembireko Elisabet opyta hyeguasu! Ohaʼarõ aja onase imemby, Elisabet nosẽi hógagui cinco mésere.

Ánhel Gabriel ou jey ogueru hag̃ua ótro mensáhe. ¿Mávapepa? Peteĩ kuñataĩ soltéra héravape María, oikóva siuda de Nazarétpe. Ko siuda opyta Galiléape, nórte gotyo Jerusaléngui. ¿Mbaʼe mensáhepa omeʼẽ chupe? Pe ánhel heʼi: “Ñandejára ningo ndeguerohory. ¡Péina!, nderyeguasúta ha reguerekóta peteĩ mitãkuimbaʼe ha rembohéra vaʼerã Jesús”. Heʼi avei: “Ko mitãʼi tuicháta ha oñehenóita Ñandejára Ijojahaʼỹva Raʼy. [...] Haʼe ogovernáta Jacob rogayguáre opa ára g̃uarã, ha Irréino ndopamoʼãi arakaʼeve” (Lucas 1:30-33).

Oime vaʼerã Gabriel ovyʼaite raʼe omeʼẽ haguére koʼã mokõi mensáhe iporãitéva. Umi kapítulo oúvape jahecháta mbaʼépa ojapo rakaʼe Juan ha Jesús, ha ñantende porãvéta mbaʼérepa iñimportantete koʼã mensáhe ou vaʼekue yvágagui.