“Penemanduʼákena siémpre umi pendegiávare”

APÓSTOL Pablo heʼi ñanemanduʼa vaʼerãha umi ñandegiávare, térã umi odirihívare umi tembiapo Jehová organisasiónpe (Heb. 13:7). Áño 33-pe, oñepyrũmírente pe kongregasión kristiána, Jesús apostolkuéra odirihi vaʼekue pe kongregasión. Haʼekuéra haʼe vaʼekue pe kuérpo governánte ha omeʼẽ gía ha instruksión umi kongregasiónpe (Hech. 6:2-4). Áño 49-perupi pe kuérpo governántepe oike hetave ansiáno ndahaʼéiva apóstol. Por ehémplo oñepresentárõ guare peteĩ káso sirkunsisión rehegua, pe kuérpo governántepe oĩ vaʼekue “apóstol ha ansianokuéra” oĩva Jerusalénpe (Hech. 15:1, 2). Koʼã ermáno oñenkarga vaʼekue osolusiona hag̃ua umi mbaʼe oafektáva umi kongregasiónpe. Haʼekuéra omondo vaʼekue avei kárta ha instruksión umi kongregasiónpe, ha umíva omombarete ha oipytyvõ umi disípulope oiko hag̃ua peteĩ ñeʼẽme ha opensa hag̃ua peteĩchapa. Umi kongregasión osegi vaʼekue umi instruksión omeʼẽva pe kuérpo governánte ha oñemoĩ ipoguýpe. Upéicha rupi Jehová ovendesi umi kongregasiónpe ha okakuaave ohóvo (Hech. 8:1, 14, 15; 15:22-31; 16:4, 5; Heb. 13:17).

² Umi apóstol omanomba rire, pe apostasía opuʼã ha imbareteve (2 Tes. 2:3-12). Jesús omoĩrõ guare pe ehémplo oñeʼẽva pe trígo ha ñanáre, heʼi vaʼekue oñeñotỹtaha ñana (kristiáno fálso) umi trígo apytépe (kristiáno unhído), ha ojehejataha okakuaa oñondive pe kosécha tiémpo peve, térã “umi ára paha” peve (Mat. 13:24-30, 36-43). Péro og̃uahẽ mboyve pe kosécha tiémpo, oĩ vaʼekue kristiáno unhído ha Jesús oñangareko hesekuéra, upéicharõ jepe, ndaipóri vaʼekue ko yvy ape ári peteĩ grúpo Jesús oipurúva odirihi hag̃ua isegidorkuérape (Mat. 28:20). Péro og̃uahẽvo pe kosécha tiémpo okambiaitéta kuri la situasión. ¿Mbaʼérepa jaʼe upéva?

³ Jesús omombeʼu vaʼekue umi ‘señál’ ohechaukátava “pe fin ou potaitemaha”, ha oñepyrũ hag̃ua, oporandu: “¿Mávapa añetehápe pe esklávo de konfiánsa ha iñarandúva?” (Mat. 24:3, 42-47). Jesús heʼi vaʼekue ko esklávo oñenkargataha omeʼẽ “hiʼoraitépe” pe aliménto espirituál Ñandejára siervokuérape. Síglo primérope Jesús ndoipurúi vaʼekue peteĩ kuimbaʼépente odirihi hag̃ua pe kongregasión kristiána, síno peteĩ grúpope. Upeichaite avei koʼã ára pahápe, Jesús ojevale pe esklávo de konfiánsa ha iñarandúvare, ndahaʼéiva peteĩ kuimbaʼénte síno peteĩ grúpo.

MÁVAPA “PE ESKLÁVO DE KONFIÁNSA HA IÑARANDÚVA”

⁴ ¿Mávapepa Jesús oiporavo omeʼẽ hag̃ua aliménto espirituál isegidorkuérape? Ikatu jaʼe Jesús ojevaleha umi kristiáno unhído oĩvare ko yvy ape ári. La Biblia heʼi voi umi unhído haʼeha “peteĩ grúpo de rréi haʼéva saserdóte”. Heʼi avei Ñandejára ‘ohenói hague chupekuéra pytũmbýgui ha orresivi chupekuéra pe ilús ijojahaʼỹvape’. Oñemanda avei chupekuéra omombeʼu hag̃ua “oparupiete Ñandejára imbaʼeporãitereiha” (1 Ped. 2:9; Mal. 2:7; Apoc. 12:17). ¿Heʼisépa upéva entéro umi unhído haʼeha “pe esklávo de konfiánsa”? Nahániri. Ñapensamínte Jesús omongarúrõ guare 5 mil kuimbaʼérupi ha avei kuña ha mitãnguérape. Upérõ Jesús omeʼẽ pe tembiʼu idisipulokuérape, ha haʼekuéra orreparti umi héntepe (Mat. 14:19). Haʼe ojevale mbovymi kuimbaʼére omongaru hag̃ua hetápe, ha upeichaite avei ojapo ñane tiémpope omeʼẽ hag̃ua ñandéve pe aliménto espirituál.

⁵ Upéicharõ pe “esklávo de konfiánsa ha iñarandúva” haʼe hína peteĩ grúpo de unhído, péro mbovymínte oĩ hikuái ko grúpope. Haʼekuéra oprepara ha omeʼẽ aliménto espirituál Cristo presénsia aja, haʼéva umi ára paha. Ko tiémpope koʼã kristiáno unhído haʼéva pe “esklávo de konfiánsa ha iñarandúva” ombaʼapo pe sentrál mundiálpe. Koʼág̃a upe grúpope oñehenói Kuérpo Governánte odirihíva testígo de Jehovápe (Luc. 12:42).

⁶ Cristo oipuru ko grúpope oexplika hag̃ua mbaʼéichapa oñekumpli umi profesía oĩva la Bíbliape ha itiempoitépe heʼi ñandéve mbaʼéichapa jasegi vaʼerã umi konsého omeʼẽva la Biblia. Umi kongregasión rupive pe esklávo ombohasa pe aliménto espirituál (Is. 43:10; Gál. 6:16). Yma ningo pe esklávo de konfiánsa térã majordómo okuida vaʼekue entéro umi oĩvare ipatrón rógape. Upéicha avei pe esklávo de konfiánsa ha iñarandúvape oñenkarga okuida hag̃ua Jehová siervokuérare ñane tiémpope. Haʼekuéra oñatende mbaʼéichapa ojepuru umi mbaʼe orekóva Ñandejára organisasión, omoakã pe predikasión, oprepara umi mbaʼe oñeanalisátava umi asambléape, onombra umi ermáno odirihíva diferénte traváho Jehová organisasiónpe ha ojapo umi puvlikasión bíblica. Entéro koʼã mbaʼe ojapo ‘oñangareko hag̃ua umi ótro siérvore’ (Mat. 24:45).

⁷ ¿Mávapa hína umi ‘ótro siérvo’? Haʼekuéra hína entéro umi orresivíva pe aliménto espirituál. Ñepyrũrã haʼe vaʼekue umi unhído añónte, péro upéi omoirũma avei chupekuéra umi “ótro ovechakuéra” (Juan 10:16). Koʼã mokõi grúpo orresivi pe aliménto espirituál omboúva pe esklávo de konfiánsa.

⁸ Pe jehasa asy guasu aja Jesús oúta ohusga ha ohundi hag̃ua ko múndo aña. Upérõ avei Jesús omoĩta pe esklávo poguýpe “opa mbaʼe orekóva” (Mat. 24:46, 47). Pe esklávo de konfiánsa orresivíta irrekompénsa oho vove yvágape. Haʼekuéra ogovernáta Jesús ha umi ótro unhídondi. Upe rire ko yvy ape ári ndaiporimoʼãvéima peteĩ grúpo hérava “esklávo de konfiánsa”, péro Jehová ha Jesús osegíta odirihi ipuévlope, ha upearã onombráta umi “prínsipe” odirihítava umi oikóvape Igoviérno poguýpe (Sal. 45:16).

MBAʼÉREPA ‘ÑANEMANDUʼA VAʼERÃ UMI ÑANDEGIÁVARE’

⁹ Heta mbaʼére ningo iporã ‘ñanemanduʼa umi ñandegiávare’ ha jahechauka ñakonfiaha hesekuéra. ¿Mbaʼérepa ideprovécho ñandéve jajapo upéva? Apóstol Pablo heʼi: “Haʼekuéra siémpre oñangareko penderehe ha Ñandejára ohusgáta chupekuéra la ojapóvare. Péicha pejapóramo, haʼekuéra vyʼápe ojapóta itraváho ha ndoikomoʼãi oñembyasy, péro ndapejapóiramo upéicha, ivaietereíta peẽme g̃uarã” (Heb. 13:17). Iñimportánte ñaneñeʼẽrendu umi ñandegiávape ha ñañemoĩ ipoguypekuéra jasegívo umi instruksión omeʼẽva ñandéve, pórke haʼekuéra ñanepytyvõ ñaĩ porã hag̃ua Ñandejárandi.

¹⁰ Pablo heʼi avei 1 Corintios 16:14-pe: “Pejapókena entéro mbaʼe mborayhúpe”. Entéro mbaʼe ojedesidíva Ñandejára puévlo rehehápe ojejapo mborayhúpe. Ha 1 Corintios 13:4-8 heʼi: “Pe oporohayhúva ipasiénsia ha imbaʼeporã, naiñenvidiósoi, ndaijejapói ha noñembotuichái. Pe oporohayhúva ningo oñekomporta porã, nopensái ijehénte, ndaipochyreíri ha ndaipyʼarói. Ndovyʼái umi mbaʼe vai ojejapóvare, síno ovyʼa ojekuaaukávo la verda. Pe oporohayhúva oaguanta entéro mbaʼe, osegi oguerovia entéro mbaʼe, siémpre oreko esperánsa ha ni mbaʼevéicharõ noñentregái. Pe mborayhu núnka ndofallái”. Ojedesidi rupi entéro mbaʼe mborayhúpe, ikatu ñaĩ segúro siémpre iporãha jasegi igía. Umi mbaʼe ojedesidíva rupive Jehová ohechauka ñanderayhuha.

¹¹ Síglo primérope Jehová ojevale vaʼekue umáno imperféktore odirihi hag̃ua iñorganisasión ha koʼág̃a ojapo avei upéicha. Ojavýramo jepe hikuái, Jehová ojevale umi kuimbaʼére okumpli hag̃ua ivolunta. Por ehémplo Noé ojapo vaʼekue pe árka, ha oavisa avei umi héntepe outaha pe dilúvio (Gén. 6:13, 14, 22; 2 Ped. 2:5). Moiséspe oñemondo vaʼekue onohẽ hag̃ua Jehová puévlope Egíptogui (Éx. 3:10). Jehová ojevale vaʼekue avei unos kuánto kuimbaʼére oskrivi hag̃ua la Biblia (2 Tim. 3:16; 2 Ped. 1:21). Ko tiémpope avei Jehová oipuru kuimbaʼe imperféktope odirihi hag̃ua pe predikasión ha pe enseñánsa, ha ndahaʼéi upe haguére jadudáva Jehová organisasióngui. Upéva rangue, jajeroviave katu hese pórke jahechakuaa Jehová ndoapojáirire ko organisasión, ndaikatumoʼãi kuri ojehupyty entéro umi mbaʼe ojejapómava. Pe esklávo de konfiánsa ohasáma heta situasión ijetuʼúva ha orekóma heta experiénsia, ha siémpre ohechauka Ñandejára espíritu sánto ogiaha chupekuéra. Upévare ñakonfia vaʼerã Jehová organisasión rehe ha jaapoja ñande pyʼaite guive.

JAHECHAUKA ÑAKONFIAHA JEHOVÁRE HA IÑORGANISASIÓNRE

¹² Umi ermáno orekóva rresponsavilida kongregasiónpe ohechaukáta ojeroviaha Jehováre ha iñorganisasiónre oaseptáramo vyʼápe ha ojapóramo umi mbaʼe oñeasignáva chupekuéra (Hech. 20:28). Entéro ñamombeʼúva pe notísia porã jahechaukáta avei jajeroviaha japredikáramo kyreʼỹme ogahárupi, jajapórõ rrevisíta ha estúdio bíblico (Mat. 24:14; 28:19, 20). Ideprovécho hag̃ua ñandéve pe aliménto oúva pe esklávogui, tekotevẽ jastudia porã rreunionrã ha jaha umi rreunionhápe ha asambleahápe. Umichahápe tuichaiterei ñañomokyreʼỹ ha ñañomombarete pórke jahasa tiémpo ermanokuérandi (Heb. 10:24, 25).

¹³ Ñameʼẽvo ñane kontrivusión jahechauka avei jajeroviaha Jehová organisasiónre (Prov. 3:9, 10). Jahechávo ñane ermanokuéra oikotevẽha ñanderehe pyaʼe voi jaha ñaipytyvõ chupekuéra (Gál. 6:10; 1 Tim. 6:18). Ñande jajapo upéva jahayhúgui chupekuéra, ha jaaprovechase entéro oportunida jahechauka hag̃ua jaagradeseha Jehovápe ha iñorganisasiónpe umi mbaʼe ojapóvare ñanderehehápe (Juan 13:35).

¹⁴ Jahechaukáta avei ñakonfiaha Jehová organisasiónre jaapojávo umi mbaʼe ojedesidíva. Upéva heʼise ñaneumílde vaʼerãha ha jasegi umi instruksión omeʼẽva umi ermáno orekóva rresponsavilida kongregasiónpe, por ehémplo umi superintendénte de sirkuíto ha ansianokuéra. Koʼã ermáno ‘ñandegia’, upévare ñaneñeʼẽrendu vaʼerã ha ñañemoĩ ipoguypekuéra (Heb. 13:7, 17). Ndaikatúiramo jepe ñantendepa mbaʼérepa odesidi hikuái peteĩ mbaʼe, lomímonte jajapo vaʼerã la heʼíva hikuái jaikuaágui upéva iporãveha. Jajapóramo Jehová organisasión ha la Biblia heʼíva, jahechaukáta jarekoha Jesúspe ñande Ruvicháramo, ha Jehová ñanevendesíta ñaneñeʼẽrendu haguére.

¹⁵ Jahechaháicha hetaiterei mbaʼére ikatu jajerovia pe esklávo de konfiánsa ha iñarandúvare. Satanás ningo “ko múndo jára” upévare ojapo opa ikatúva omongyʼa hag̃ua Jehová réra ha oheja vai hag̃ua iñorganisasiónpe (2 Cor. 4:4). Aníkena jaʼa iñuhãme (2 Cor. 2:11). Satanás “oikuaa mbykypaitemaha pe tiémpo hembýva” oñemombo hag̃ua chupe pe yvykua pypukúpe. Upévare hatã oiko hína oaparta hag̃ua la ikatúvape Jehovágui (Apoc. 12:12). Amáske Satanás oñehaʼã ñanemomombyry Jehovágui, ñande ñañemoag̃uive vaʼerã Ñandejárare. Siémprekena jajerovia Jehováre ha umi mbaʼe oipurúvare ogia hag̃ua iñorganisasión. Péicha jajapóramo jaikóta peteĩ ñeʼẽme.