Jefté ojapo peteĩ promésa Jehovápe

Umi israelita hesarái jeýma Jehovágui ha oñepyrũ oadora hikuái umi dios fálsope. Péro umíva ndoprotehéi chupekuéra umi ammonita oataka jave chupekuéra. Umi ammonita heta áñore oataka ha ombohasa asy vaʼekue umi israelítape. Upémarõ umi israelita heʼi Jehovápe: “Ore ningo ropeka ne renondépe. Oresalvamíntena koʼág̃a ore enemigokuéragui”. Upéi umi israelita ohundipaite umi dios fálso raʼanga ha oñepyrũ jey oadora hikuái Jehovápe. Upéicha rupi, haʼe ndohejasevéima chupekuéra osufri.

Upéi umi israelita oiporavo peteĩ soldádo héravape Jefté omoakã hag̃ua ijehersitokuéra oñorairõ hag̃ua umi ammonita kóntrape. Jefté heʼi Jehovápe: “Chepytyvõramo agana hag̃ua umi ammonítape, ameʼẽta ndéve ndeservi hag̃ua pe primeroite osẽva che rógagui cherug̃uaitĩ hag̃ua”. Jehová ohendu Jefté ñemboʼe ha oipytyvõ chupe ogana hag̃ua umi ammonítape.

Jefté og̃uahẽrõ guare hógape gerrahágui, itajýra raẽvete orresivi vaʼekue chupe. Ombopu ipanderéta ha ojeroky oúvo ohug̃uaitĩ hag̃ua itúape. Jefté ningo peteĩmínte ifamília vaʼekue, upévare ohechávo chupe imanduʼa pe opromete vaʼekuére Jehovápe ha heʼi: “¡Anína che rajymi! Che ningo ajapóma peteĩ promésa Jehovápe, ha akumpli hag̃ua romondo vaʼerã Silópe reservi hag̃ua pe tavernákulope”. Itajýra heʼi chupe: “Papa, oiméramo rejapóma peteĩ promésa Jehovápe, rekumpli vaʼerã. Péro peteĩ mbaʼénte ajerurese ndéve, ehejána taha umi serroháre 2 mése che amigakuérandi ha aju rire upégui aháta aservi pe tavernákulope”. Jefté rajy ifiél Jehovápe ha oservi pe tavernákulope oikove aja pukukue. Iñamigakuéra ohómi vaʼerã káda áño ovisita chupe upépe.