Umi visión Juan ohecha vaʼekue

Apóstol Juan oĩrõ guare préso ísla de Pátmospe, Jesús ohechauka chupe 16 visión térã umi mbaʼe oikótava. Umi visiónpe, Juan ohecha mbaʼéichapa oñemopotĩta Jehová réra, mbaʼéichapa ogovernáta Ñandejára Rréino ha mbaʼéichapa ojejapóta Ñandejára volunta yvágape ha ko yvy ape ári.

Peteĩ visiónpe Juan ohecha Jehová oĩha itrónope yvágape ha pe tróno jerére oĩha 24 ansiáno. Haʼekuéra ijao morotĩ ha oreko iñakãre koróna de óro. Pe trónogui osẽ mbaʼerendy ojoguáva rrájope ha oñehendu avei arasunu. Umi 24 ansiáno oñesũ Jehová renondépe ha oadora chupe. Ótra visiónpe katu Juan ohecha peteĩ hénte aty tuichaitereíva oadoraha hína Jehovápe, ijapytepekuéra oĩ hénte opa tetã ha trivugua, ha oñeʼẽva opaichagua idiómape. Pe Ovecha Raʼy haʼéva hína Jesús, ogia umi héntepe ha oraha chupekuéra oĩháme y oporomoingovéva. Upéi, ótra visiónpe ohecha Jesús ha umi 24 ansiáno oñepyrũmaha ogoverna yvágape. Ótra visiónpe katu Juan ohecha Jesús oñorairõha peteĩ dragón ha umi demoniokuérandi. Pe visiónpe Satanás haʼe hína pe dragón. Jesús omosẽ chupekuéra yvágagui ha opoi chupekuéra ko yvy ape ári.

Upéi Juan ohecha peteĩ visión iporãitereíva, ohecha pe Ovecha Raʼy ha umi 144.000 oñemboʼyha hína pe Sérro Sion ári. Ohecha avei peteĩ ánhel ovevéva ko yvy ape ári ha heʼíva: “Pemombaʼe Ñandejárape ha pembotuicha chupe”.

Ótra visiónpe Juan ohecha pe gérra de Armagedón. Ko gérrape, Jesús ha ijehérsito ohundi umi hénte aña oĩvape Satanás poguýpe. Pe última visiónpe Juan ohecha oĩha paz ha trankilida yvágape ha ko yvy ape ári, enterovénte oiko pyʼaguapýpe ha peteĩ ñeʼẽme. Ohecha avei oñehundiha Satanás ha entéro umi omoirũvape chupe. Yvágape ha ko yvy ape ári enterovénte omombaʼeguasu Jehová réra ha oadora chupe añoite.