LEKSIÓN 05
La Biblia ningo peteĩ kárta oúva Ñandejáragui
Jehová omeʼẽ ñandéve peteĩ rregálo iporãitereíva: la Biblia, orekóva pype 66 lívro. Péro oiméne nde reikuaase, ¿mbaʼéichapa og̃uahẽ ñandéve la Biblia? ¿Mávapa oskrivika rakaʼe? Ñakontesta hag̃ua koʼã pregúnta jahecháta mbaʼéichapa Ñandejára mensáhe og̃uahẽ ñane tiémpo peve.
1. Oimérõ kuimbaʼénte oskrivi la Biblia, ¿mbaʼére ojeʼe ouha Ñandejáragui?
La Biblia oskrivi vaʼekue 40 kuimbaʼérupi 1.600 áño pukukuére. Oñepyrũ áño 1513 Jesús ou mboyve ha ojeskrivipa áño 98 rupi. Haʼekuéra oikóramo jepe diferénte épokape ha oreko diferénte edukasión, ni michĩmi ndojoavýi la heʼívape. ¿Mbaʼéicha rupípa ojehupyty upéva? Pórke pe mensáhe oĩva la Bíbliape ou Ñandejáragui (elee 1 Tesalonicenses 2:13). Umi oskrivi vaʼekue la Biblia ningo nomoĩri la haʼekuéra opensávante, síno “pe espíritu sánto ogia umi kuimbaʼépe omombeʼu hag̃ua umi mbaʼe oúva Ñandejáragui” (2 Pedro 1:21).a Ñandejára oipuru ijespíritu ogia térã omomýi hag̃ua umi kuimbaʼépe oskrivi hag̃ua haʼe opensáva (2 Timoteo 3:16).
2. ¿Máva mávapepa ikatu ideprovécho la Biblia heʼíva?
Umi notísia porã oĩva la Bíbliape ikatu ideprovécho “entéro tetã, trívu, puévlo ha umi oñeʼẽvape diferénte idióma” (elee Apocalipsis 14:6). Ñandejára ojapo tekotevẽva guive og̃uahẽ hag̃ua ñandéve la Biblia. Koʼág̃a Ñandejára Ñeʼẽ oĩ hetaiterei idiómape, ndaipóri voi ótro lívro ohupytýva chupe. Haimete opavave persóna ikatu olee térã ohendu Ñandejára mensáhe tahaʼe haʼéva pe lugár oikoha térã pe idióma oñeʼẽva.
3. ¿Mbaʼépa ojapo Jehová omog̃uahẽ hag̃ua la Biblia ñane tiémpo peve?
La Biblia ojeskrivi ypy vaʼekue kuéro ha papírore, ha koʼã materiál ningo ndodurái. Péro heta tiémpore umi ohayhúva Ñandejára Ñeʼẽ okopia a máno umi orihinálpe oĩhaichaite ha upévare ikatu og̃uahẽ ñane tiémpo peve. Oĩ vaʼekue umi hénte ipoderósova oñehaʼãmbaitéva ohundi hag̃ua la Biblia, péro oĩ avei umi oapeligráva hekove jepe oñangareko hag̃ua hese. Jehová ningo ndohejái vaʼekue mbaʼeve ni avave ojoko chupe oñekomunika hag̃ua ñanendive. La Biblia heʼi voi: “Ñandejára ñeʼẽ opyta opa ára g̃uarã” (Isaías 40:8).
EJEPYʼAMONGETAMÍNA
Jahechamína mbaʼéichapa Ñandejára ogia umi kuimbaʼépe oskrivi hag̃ua la Biblia, mbaʼéichapa oñangareko hese og̃uahẽ hag̃ua ñane tiémpo peve ha mbaʼépa ojapo enterove lénto oreko hag̃ua iñidiómape.
4. La Biblia voi ohechauka orekoha Ñandejára mensáhe
Ehecha pe VIDÉO. Upéi elee 2 Timoteo 3:16, ha erresponde koʼã porandu:
Oiméramo kuimbaʼekuéra oskrivi la Biblia, ¿mbaʼére ikatu jaʼe haʼeha Ñandejára Ñeʼẽ?
¿Mbaʼépa nde repensa, añetehápepa ikatu raʼe Ñandejára oikuaauka la haʼe opensáva umi oskrivívape la Biblia?
Peteĩ karai odiktáramo isekretáriope oskrivi hag̃ua peteĩ kárta, pe kárta ndahaʼéi hína pe sekretário mbaʼe, upéicha avei kuimbaʼekuéra oskrivíramo jepe la Biblia pe mensáhe oĩva pype ou Ñandejáragui
5. Heta oĩ vaʼekue ohundiséva la Biblia
Oiméramo la Biblia ou Ñandejáragui ñande ñahaʼarõta voi haʼe oñangareko hese ani hag̃ua oñehundi. Ha upéva voi la ojapóva. Ymaite guive ningo oĩ vaʼekue umi kuimbaʼe orekóva autorida oñehaʼãmbaitéva ohundi hag̃ua la Biblia, ha avei umi líder rrelihióso ndoipotáiva umi hénte ontende pe mensáhe oĩva pype. Péro oĩ vaʼekue avei heta ipyʼaguasúva ha oapeligráva hekove jepe odefende hag̃ua la Biblia. Eikuaa hag̃ua mbaʼépa ojapo vaʼekue peteĩva koʼã kuimbaʼe, ehecha pe VIDÉO, ha upéi erresponde koʼã porandu:
Koʼág̃a reikuaávo hetaite mbaʼe ojehasa hague og̃uahẽ hag̃ua ñandéve la Biblia, ¿nepytyvõpa upéva releese hag̃ua? ¿Mbaʼérepa?
Elee Salmo 119:97, ha upéi erresponde ko porandu:
¿Mbaʼépa omomýi vaʼekue hetápe oapeligra hag̃ua hekove jepe ikatu hag̃uáicha ojetradusi ha oñemog̃uahẽ ñandéve la Biblia?
6. La Biblia peteĩ lívro enterovépe g̃uarã
La Biblia ningo haʼe pe lívro ojetradusivéva ha oñemog̃uahẽva hetave lugárpe ko múndope, ndaipóri voi ótro lívro ohupytýva chupe. Elee Hechos 10:34, 35, ha upéi erresponde koʼã porandu:
¿Mbaʼérepa Ñandejára oipota la Biblia ojetradusi hetaiterei idiómape ha oñemog̃uahẽ oparupiete?
¿Mbaʼépa ndéve ndegustave la Bíbliagui?
Haimete el
100%
umi oikóva ko múndope
ikatu olee la Biblia peteĩ idióma ontendévape
Ojetradusíma mas de
3.000
idiómape,
tahaʼe kompléto térã en párte
5 mil millón
de Bíbliarupi oñeimprimi térã ojejapo,
ndaipóri ótro lívro ohupytýva chupe
OĨRAMO HEʼÍVA: “La Biblia ningo peteĩ lívro tuja kuimbaʼekuérante oskrivi vaʼekue”.
¿Mbaʼépa nde repensa upévare?
¿Mbaʼérepa nde reĩ segúro la Biblia haʼeha Ñandejára Ñeʼẽ?
RRESÚMEN
La Biblia ningo Ñandejára Ñeʼẽ ha haʼe ojapo tekotevẽva guive og̃uahẽ hag̃ua oparupiete ko múndope.
Rrepáso
¿Mbaʼépa heʼise Ñandejára ogia térã omomýi hague kuimbaʼekuérape oskrivi hag̃ua la Biblia?
Umi mbaʼe jahecha vaʼekue la Bíbliagui, ¿mbaʼépa ndéve nesorprendeve?
¿Mbaʼéichapa reñeñandu reikuaávo Ñandejára ojapo hague ikatúva entéro oñekomunika hag̃ua nendive?
EINVESTIGA HAG̃UA
Ehecha mbaʼéichapa og̃uahẽ ñandéve la Biblia umi manuskríto orihinál guive ko ñane tiémpo peve.
“¿Mbaʼéichapa og̃uahẽ ñandéve la Biblia?” (¡Despertad! Noviembre de 2007)
Ehecha mbaʼéichapa la Biblia ohasa 3 pruéva ijetuʼuetereívare.
“Mbaʼeve ni avave ndaikatúi ohundi la Biblia” (Ñemañaha número 4 de 2016)
Ehecha mbaʼéichapa heta persóna oarriesga hekove otradusi hag̃ua la Biblia.
La Biblia ningo ojekopia ha ojetradusíma hetaiterei vése, ¿mbaʼéichapa ikatu ñaime segúro pe mensáhe orihinál noñekambiái hague?
“¿Siértopa oñekambiapa hague heʼíva la Bíbliape?” (Artíkulo oĩva jw-pe)