3 SARA
Haʼe nopensái umi mbaʼe oheja vaʼekuére
SARA ha iména ohayhuetéva oiko vaʼekue Úrpe. Upe siuda opyta vaʼekue Sinárpe, pe rrío guasu Éufrates ypýpe. Ijerére oĩ vaʼekue umi murálla tuichaicháva ha hetaiterei hénte oiko upépe. Umi hénte upepegua oadora vaʼekue umi dios guaʼúpe, péro Abrahán ndahaʼeiete upéicha. Haʼe oadora vaʼekue Ñandejára teete Jehovápe ha Sara ojerovia vaʼekue avei hese. Peteĩ vuéltape, Sara ohaʼarõʼỹve jave, oñepresentami chupe peteĩ situasión ijetuʼúva. ¿Ikatútapa ohechauka ojerovia ha ipyʼaguasuha?
Peteĩ día Abrahán ou heʼi Sárape Jehová oñeʼẽ hague chupe. Katuete oiméne Sara ovyʼaiterei ha oñesorprende voi. Péro la Jehová ojerure vaʼekue Abrahánpe ndahaʼeiete kuri la ifasilpáva. Haʼekuéra tekotevẽta oheja hóga ha ihentekuéra oĩva Úrpe oho hag̃ua oiko mombyry upégui. Upe viáhe ipukúta kuri. Oviaha vaʼerã hikuái isiervokuéra ha ikamellokuéra reheve ha opyta pytáta ohóvo tapére óga kárpape. Koʼág̃a Sara ndoikomoʼãvéima peteĩ siuda guasu imurallapávape ni peteĩ óga porãme, oĩháme y ha hetave komodida. ¡Ni pe merkádope ndaikatumoʼãvéima oho! La ñapensárõ hese, heta mbaʼe ijetuʼúta Sárape. Upéicharõ jepe heʼi Abrahánpe ohotaha hendive. Haʼe ojerovia Jehováre, okarga karga la ikosakuéra, ojedespedi ihentekuéra ha iñamigokuéragui ha osẽ oho Abrahándi, ndoikuaáirõ jepe ni moõpa oho hína.
Sara ndojopýi vaʼekue Abrahánpe ojevy jey hag̃ua Úrpe, síno oapoja chupe oho hag̃ua hikuái Jehová heʼihápe
¿Mbaʼépa ojapo vaʼekue avei Sara ohechauka hag̃ua ipyʼaguasuha? Haʼe odesidi nopensamoʼãiha umi mbaʼe oheja vaʼekuére. Sara ikatu vaʼerãmoʼã opensa pe hogami oheja vaʼekuére Úrpe ha pe trankilida oreko vaʼekuére oĩ tiémpope upépe. Apóstol Pablo oñeʼẽvo Sara ha Abrahánre heʼi vaʼekue: “Haʼekuéra osegírire opensa pe lugár oheja vaʼekuére, otopáta kuri algúna oportunida oho jey hag̃ua” (Heb. 11:15). Péro haʼe ojedesidi nopensamoʼãiha umi mbaʼe oheja vaʼekuére, síno pyʼaguasúpe opensa umi mbaʼe ohaʼarõvare chupekuéra.
Upéi hasypeve og̃uahẽ hikuái Canaánpe. Sara pyaʼe voi opilláma upépe ndaiporiha hína peteĩ rrío guasu pe Éufrateschagua. Upéva heʼise ndaiporimoʼãiha avave oguerúva hiʼupy ha hetave mbaʼe ikatu vaʼerã ojogua hikuái. Upévare Canaánpe ofaltapárõ guare la hiʼupy, ndaiporiguasúi kuri la ojapo vaʼerã hikuái ha tekotevẽmante ova upégui. Sara ndoaprovechái kuri upe situasión ijetuʼúva ojopy hag̃ua iménape ojevy jey hag̃ua hikuái Úrpe. Upéva rangue, haʼe naiprovlemaiete oho hag̃ua iménandi pe sur gotyo og̃uahẽ meve Egíptope.
Sara iporãiterei vaʼekue, ndaiporiguasúi vaʼekue voi la haʼeichagua. Upévare Abrahán okyhyje vaʼekue voi oĩrõ g̃uarã ojukaséva chupe oipeʼa hag̃ua chugui hembireko. Upémarõ Abrahán heʼi Sárape teʼi haʼekuéra oñoermanonteha. Haʼekuéra okalkulámarõ jepe mbaʼépa ojapóta, upéva noipytyvõi kuri chupekuéra oñemombeʼúrõ guare faraónpe Sara iporãitereiha. Faraón oikuaárõ guare upéva, omondo isiervokuérape oho hag̃ua ogueru Sárape ipalásiope. Katuete ningo igustovéta chupe oiko pe palásiope, oiko rangue ova ápe ha pépe óga kárpape. Hiʼarive pe palásio oiméne iporã, isegúro ha oreko heta komodida. ¿Mbaʼépa ojapóta Sara? ¿Ohejátapa Abrahánpe oho hag̃ua oiko faraóndi ipalásio iporãitévape? ¡Nahániri! Haʼe ohechauka ipyʼaguasuha ha omboykepaiténte entéro umi mbaʼe. Avei odesidi ndohejamoʼãiha iménape. Upévare Jehová osalva chupe. Upe riremínte haʼe oĩ jeýma iména ohayhuetévandi.a
Jehová opromete kuri Abrahánpe chugui osẽtaha peteĩ nasión tuicháva. Péro Sara ndaikatúiti imemby ha upéva omoñeñandu vaieterei anga chupe. Oiko rire hikuái heta áñoma Canaánpe, Jehová opremia Sárape. Haʼe orekóramo jepe 90 áñorupi, Jehová omeʼẽmi chupe la aretéma oipota vaʼekue ha hasypeve opyta hyeguasu. Jehová heʼi Abrahánpe ombohéra hag̃ua upe mitãme Isaac. Upe téra heʼise “opukáva”. Ha upéva opyta porãiterei, pórke Abrahán ha Sara oikuaárõ guare ifamiliataha opuka ha ovyʼaiterei kuri. Sara oĩ vaʼekue avei segúra umi hénte ovyʼataha hendive oikuaávo pe milágro tuichaite Jehová ojapo vaʼekue hesehápe.
Sara ikatu vaʼekue omongakuaa imembýpe ha ohecha mbaʼéichapa okakuaapa rire haʼe ohayhu avei Jehovápe. Sara ipyʼaguasúmante vaʼerã kuri oprotehe hag̃ua imembýpe oĩrõ guare oñembohorýva hese ha otrata vaíva chupe. Sara ojedesidi vaʼekue nopensamoʼãiha umi mbaʼe oheja vaʼekuére ha osegi upéicha omano meve. Haʼe noñesentrái umi mbaʼe oheja vaʼekuére síno opensa meme vaʼekue henonderãre, umi mbaʼe porãite ohaʼarõvare chupe. Sara ha ifamília ndohechapaitéi vaʼekue Jehová promesakuéra oñekumpliha, péro ñaĩ segúro umíva koʼẽrõitéma oñekumplipataha.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Sara ipyʼaguasu hague?
Einvestigamína
1. Sara ha Abrahán ningo oñoermáno vaʼekue itúaguio ládo. ¿Ndaivaíri piko raʼe la omenda hikuái ojuehe? (wp17.3 12 párr. 5, nóta).
2. Emombeʼu mbaʼe mbaʼépa posívlemente Sara tekotevẽ vaʼekue oheja osẽ hag̃ua Úrgui (wp17.3 13 párr. 3–14 párr. 2). A
Photograph taken by courtesy of the British Museum
Taʼanga A: Peteĩ joya oñenohẽva yvyguýgui pe lugár yma oĩ haguépe Ur
3. ¿Mbaʼérepa jaʼekuaa Abrahán iñarandu hague nomombeʼúivo unos kuántope Sara haʼeha hembireko? (wp17.3 14 párr. 6–15 párr. 1).
4. Sara siémpre oñemoĩ vaʼekue iména poguýpe, ¿heʼisépa upéva haʼe núnka ndeʼíri hague Abrahánpe umi mbaʼe ndogustáiva chupe? Emyesakã (g 1/08 29 párr. 4, 5-wcgr). B
Taʼanga B
Ejepyʼamongetamína ndejehe
Epensamína Sara ha Lot rembirekóre.
¿Mbaʼe mbaʼépe ojojogua vaʼekue hikuái? (Gén. 12:1; 13:5-7; 19:12, 15).
¿Mbaʼe mbaʼépe idiferénte vaʼekue hikuái? (Gén. 19:17, 26; Luc. 17:28-32).
¿Mbaʼéicha osẽ káda únape la odesidíva ha mbaʼe ñaaprendekuaa upévagui?
Sara iporãiterei vaʼekue ha iména katu irríko. ¿Mbaʼéichapa iñehémplo ñanepytyvõkuaa oimérõ ñande jareko avei koʼã mbaʼe? (Prov. 31:30; 1 Tim. 6:17-19).
¿Mbaʼéichapa ikatu ndepyʼaguasu Sara ipyʼaguasu haguéicha? C
Taʼanga C
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Sárape Jehová omoingove jey vove chupe?
Reikuaave hag̃ua
¿Tembirekokuérante piko ikatu oaprende Sáragui? ¿Mbaʼépa menakuéra ikatu avei oaprende chugui?
Ehechamína mbaʼépa ojapo vaʼekue Abrahán ha Sara ohechauka hag̃ua ojorrespetaha.
Aníkena ogue pe mborayhu oúva Jehovágui (w23.05 24, 25 párr. 15-17).
a Tiémpo rire Sara ohasa jey kuri peteĩ situasión peichagua rréi Abimélec orahárõ guare chupe. Upérõ haʼe ohechauka jey vaʼekue ipyʼaguasuha ha ojapopaite la Abrahán heʼi vaʼekue chupe, upévare Jehová osalva chupe.