10 MOISÉS
Haʼe ojedesidíma kuri
MOISÉSPE nombohérai vaʼekue ituakuéra hebreo, síno pe prinsésa egipcia omongakuaa vaʼekue chupe. Haʼe ombohéra chupe Moisés pórke upe téra heʼise “ojesalva vaʼekue ýgui”, ha haʼe upéicha osalva kuri chupe. Pe prinsésa oipotáne raʼe Moisés okakuaa rire oiko chugui peteĩ kuimbaʼe iñimportánteva faraón famíliape. Haʼe oipotáne avei raʼe Moisés ijestúdio porã. La Biblia heʼi voi: “Moiséspe oñemeʼẽ vaʼekue pe edukasión iporãvéva oĩva Egíptope”.
Moisés ikariaʼy rire ojeguerohoryeterei vaʼekue chupe. La Biblia heʼi voi: “Haʼe ivaleterei vaʼekue umi mbaʼe heʼi ha ojapóvape”. Moisés ikatu kuri irríko ha omanda guasu. Avei ikatu kuri oelehi odisfrutatanteha entéro umi mbaʼe oĩva Egíptope. Péro Moisés oikuaa ohejámante vaʼerãha Jehovápe ohupyty hag̃ua koʼã mbaʼe. Upéicharõ, ¿mbaʼépa odesidíta raʼe Moisés? ¿Mbaʼépa ojapóta hekovégui?
Haʼe orekórõ guare 40 áño, ojekuaa porãma mbaʼépa odesidi. La Biblia heʼi: “Ojerovia rupi, Moisés okakuaa rire ndoipotái vaʼekue ojeʼe hese haʼeha faraón niéto. Odesidi ikuentaveha ojetrata vai chupe Ñandejára puévlondi, oiko rangue ovyʼa sapyʼami opeka aja”. Moisés odesidi porã kuri ha péicha ohechauka ojerovia ha ipyʼaguasuha. Péro la ojapo vaʼekue upéi ndahaʼéi la iporãmbáva.
Moiséspe g̃uarã umi israelita haʼe vaʼekue iñermáno, upévare haʼe oipytyvõseterei umi oñemaltratávape ijapytepekuéra. Peteĩ día, haʼe oho ohecha mbaʼeichaitépa ohasa asy hína hikuái. Upépe ohechami peteĩ egipcio, posívlemente peteĩ kapatás, oinupãha hína peteĩ esklávo hebréope. ¿Heʼípa raʼe Moisés upe egípciope anivéma hag̃ua ojapo upéicha? Upéva ndajaikuaái. Péro tahaʼe haʼéva la oiko vaʼekue, la Biblia heʼi Moisés ojere hague “omaña ijerére”. Posívlemente haʼe ojapo upéicha ohecha hag̃ua ndoúipa álgien oipytyvõ pe esklávope. Péro ndohechái avavépe. Upémarõ Moisés odesidi haʼete voi oprotehetaha pe esklávope, péro ojapohápe upéva ojukami pe egípciope. ¿Haʼe piko ojukase voi raʼe chupe? ¿Térãpa orrenegaitereínte raʼe ha hatãiterei oinupã pe kuimbaʼépe ha ojukaite voi chupe? La Biblia nomombeʼúi upéva. Tahaʼe haʼeháicha, Moisés oikuaa tuichaiterei ojapeligraha koʼág̃a, upévare ojatypaite yvykuʼípe pe egipcio retekue ani hag̃ua ojetopa hese.
Al día sigiénte haʼe osẽ jey orrekorre. Upeichahárupi ohecha mokõi esklávo hebreo oñorairõva hína ha oñehaʼã ojoko chupekuéra. Upépe pe esklávo oinupãva hína hapichápe ojere heʼi chupe: “¿Máva piko nemoĩ raʼe ndéve ore prínsipe ha ore huésramo? ¿Ndéiko chejukase mbaʼe avei rejuka haguéicha pe egípciope?”. Ohendúvo upéva Moisés tuichaiterei oñemondýi. Koʼág̃a haʼe oikuaa ojepilláma hague la ojapo vaʼekue. Okyhyjéma avei ojejukárõ g̃uarã chupe.
Mbaʼeve ndoikói Moisés okalkula haguéicha. ¿Mbaʼe haʼe la opensa vaʼekue oikotaha? La Biblia heʼi: “Haʼe oimoʼã iñermanokuéra ontendetaha Ñandejára osalvaha chupekuéra haʼe rupive, péro haʼekuéra ndohechakuaái upéva”. Por lo vísto, Moisés oguerovia vaʼekue Jehová oelehi hague chupe olivera hag̃ua umi israelitakuérape Egíptogui. Péro Moisés ndohechakuaái kuri peteĩ mbaʼe: Neʼĩraha og̃uahẽ pe tiémpo Jehová oguenohẽ hag̃ua chupekuéra upégui. Ha hiʼarive haʼe nohaʼarõi kuri iñermanokuéra orreaksionataha upéicha. Haʼekuérapy ndojeroviái peteĩ hebreo okakuaa vaʼekuére umi egipcio apytépe pe palásiope.
¿Oñehaʼãtapa Moisés irríko ha omanda guasu térãpa oñehaʼãta oipytyvõ Jehová puévlope?
Moisés ndohechakuaái kuri hetáiti ofaltaha chupe oguenohẽ hag̃ua umi israelitakuérape Egíptogui. Jehová omboʼe raẽ vaʼerã chupe heta mbaʼe omoakã porã hag̃ua ipuévlope. Legálmente haʼe ipyʼaguasu, imbarete ha ivaléma voi umi mbaʼe heʼívape. Péro ofaltáiti kuri chupe peteĩ mbaʼe Jehová omombaʼetereíva: Ofalta kuri chupe ivuenove. Upéicha rupínte derrepentete ojuka peteĩ egípciope. Ha sapyʼaitérõ g̃uarã faraón oikuaáma la oiko vaʼekue.
Upepete faraón omanda ojejuka hag̃ua Moiséspe. Ni nomeʼẽi chupe oportunida oñeʼẽ hag̃ua. Upéicha rupi Moisés osẽ okañy Egíptogui ha ohejapaite tapykuépe umi rrikésa, komodida ha autorida oreko vaʼekue. Koʼág̃a ndoikuaái ni mbaʼépa oikóta chugui. Upémarõ Moisés oñembopyʼaguasúmante ha oviaha mombyry porã og̃uahẽ meve Madiánpe. Ko lugár isekoitévape haʼe oikóta kuri hetaiterei áñore peteĩ extranhéroicha. Péro, ¿ipyʼaguasútapa avei ikatu hag̃uáicha okambia ha oiko chugui pe kuimbaʼe ivuenoitéva Jehová oikotevẽva? Pe kapítulo oúvape jahecháta upéva.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Moisés ipyʼaguasu hague ko kásope?
Einvestigamína
1. La Biblia heʼi umi israelita oiko hague esklávoramo Egíptope. ¿Mbaʼérepa jaʼekuaa upéva siertoha? (w20.03 30). A
Courtesy Brooklyn Museum, gift of Theodora Wilbour
Taʼanga A: Peteĩ papíro egipcio rembyrére ojetopa peteĩ lísta oĩháme mas de 40 esklávo hebreo réra. Upéva ohechauka Egíptope oĩ hague esklávo israelita
2. ¿Mbaʼépa oiméne Moisés oaprende raʼe ituakuéragui ha mbaʼépa oaprende orresivírõ guare pe “edukasión iporãvéva oĩva Egíptope”? (Hech. 7:22; w02 15/6 10 párr. 2-5-wcgr).
3. ¿Mbaʼéichapa ojepokuaami umi egipcio oñotỹ umi omanóvape? ¿Mbaʼépa oiméne opensa raʼe hikuái oikuaa rire Moisés ojatýnte hague pe egipcio retekue pe yvykuʼípe? (it “Egipto, egipcio” párr. 28-wcgr). B
Taʼanga B: Mómia Egiptopegua
4. Moisés oho vaʼekue Madiánpe okañy hag̃ua. ¿Mbaʼépepa ojojogua vaʼekue umi madianita ha umi israelita? (it “Madián, madianita” Núm. 2 párr. 1, 2-wcgr).
Ejepyʼamongetamína ndejehe
¿Mbaʼéichapa Moisés ehémplo ikatu nepytyvõ ndepochy jave?
¿Mbaʼéichapa umi imitãva ikatu osegi Moisés ehémplo odesidíta jave mbaʼépa ojapóta hekovégui? C
Taʼanga C
¿Mbaʼéichapa ikatu ndepyʼaguasu Moisés ipyʼaguasu haguéicha ko kásope?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
Alee rire la ohasa vaʼekue Moisés Egíptope ha Madiánpe, ¿mbaʼépa aporandúne chupe Jehová omoingove jey vove chupe?
Reikuaave hag̃ua
¿Mbaʼe mbaʼépa osakrifika vaʼekue Moisés ha mbaʼéichapa ikatu resegi iñehémplo? Ehechamína upéva ko vidéope.
Jajoguákena umi ojeroviávape, ani umi ndojeroviáivape: Moiséspe, ani faraónpe (2:27).
Moisés oheja vaʼekue umi rrikésa oservi hag̃ua Jehovápe, ¿upévapa ymavénte ikatu vaʼekue jajapo térãpa ikatúiti avei koʼág̃a?