11 MOISÉS
“Tereho faraón rendápe”
MOISÉS tuichaiterei okambia osẽ rire Egíptogui. Oiko tiémpope upépe, haʼe opensa vaʼekue ikatutaha olivera umi israelítape Egipto poguýgui. Péro ova rire Madiánpe nopensavéima upéicha, haʼetévaicha voi aréma nopensavéi hague oikóvo upéva rehe. Madiánpe haʼe ou vaʼekue omenda ha upéi orekópe 80 áñorupi mokõima itaʼýra. Upépe amo 40 áñorupi haʼe ojapo vaʼekue peteĩ traváho iñumildetereíva. Chupe otoka vaʼekue oñangareko isuégro ovechakuérare, peteĩ lugár haku ha isekoitereihápe.
Jehová avei ohechakuaa vaʼekue Moisésre okambiaitéma hague. Peteĩ díape Moisés oĩ aja Horébpe (Sinaí) ohecha sapyʼa peteĩ yvyramataʼi hendýva, ojajáiva voi, ha omaña porãvo hese ohechakuaa pe yvyramataʼi ndokairiha. Oñembojávo ohecha porã hag̃ua la oikóva, Jehová oñeʼẽ chupe peteĩ ánhel rupive pe tatarendy guive. Jehová heʼi Moiséspe oho jey hag̃ua Egíptope ha togia umi israelítape osẽ hag̃ua upégui. Upérõ guare, Jehová ombopyʼaguasu vaʼekue Moiséspe omyesakã porãvévo chupe mbaʼépa heʼise Héra. Jehová heʼi chupe: “Chehegui oikóta che aipotáva”. Péicha Jehová ontendeka haʼe ikatuha ojapo oimeraẽ mbaʼe tekotevẽva osalva hag̃ua ipuévlo osufrietévape ha ojapo chuguikuéra peteĩ nasión imbaretetereíva.
Upéicharõ jepe Moisés oduda gueteri. Haʼe noñandúi oĩha kapasitádo oñeʼẽ hag̃ua faraón renondépe. Upévare Jehová okorrehi chupe, péro ojapo avei peteĩ mbaʼe omombarete hag̃ua isiérvo jerovia. Jehová omeʼẽ Moiséspe pe podér ojapo hag̃ua milágro. ¡Upéva impresionánte kuri! Moisés haʼe vaʼekue pe primer kuimbaʼe oñemombeʼúva la Bíbliape ikatuha ojapo milágro. Hiʼarive Jehová heʼi Moiséspe iñermáno Aarón ikatuha oñeʼẽ ivése faraónpe. Jehová heʼi ha ojapóramo jepe koʼã mbaʼe, lomímonte Moisés ndahaʼéi la ohosepáva. Upéicharõ jepe, Moisés oasepta pe asignasión ha oiko chugui pe kuimbaʼe Jehová oelehi vaʼekue osalva hag̃ua ipuévlope (Heb. 11:26).
Moisés ha Aarón og̃uahẽvo Egíptope oñepresenta faraón renondépe, péro chupe ndogustaiete la heʼíva hikuái. Faraón ou ipochyeterei ha omombaʼapo pohyive umi israelitakuérape opoi rangue chuguikuéra. Upévare Jehová omondo jey Moiséspe faraón rendápe heʼika hag̃ua chupe okastigataha Egíptope. Upérõ Jehová okonverti tuguýpe pe y osyrýva Rrío Nílope. Oikóramo jepe upéva, lomímonte faraón oñemohatã Jehovágui. Jehová diferénte hendáicha okastiga vaʼekue Egíptope, péro ojapo mboyve upéva siémpre omondo raẽ Moiséspe oavisa hag̃ua chupekuéra. Jehová heʼívo: “Tereho faraón rendápe”, Moisés pyʼaguasúpe iñeʼẽrendu. Péro faraón ndoikuaaséi mbaʼeve. Upéi, Jehová ombou guive pe kuárto kastígo, haʼe oñepyrũma oprotehe ipuévlope ha umi egipciokuérante osufri.
Káda kastígo Jehová ombou vaʼekue ohechauka umi egipcio dioskuéra, umi saserdóte ojapóva máhia ha faraón jepe ndahaʼeiha mbaʼevete Jehová rovake. Péro ndajaroviaséiramo jepe, lomímonte pe faraón ndopoiséi umi israelitakuéragui, oñemborretovádo haʼe. Jehová omboúrõ guare pe kastígo nueveha opyta iñypytũete umi egipciokuéra oikoha, péro oikohápe umi israelitakuéra napytũi. Upépe faraón oñentrega sapyʼami, péro upéi pyaʼe okambia jey opensa lája. Heʼi voi Moiséspe ojukataha chupe la ou jeýramo hendápe.
Pe governánte ipoderosovéva ipochýramo jepe, Moisés oñepresenta henondépe heta vése
Upéicharõ jepe, Moisés oho jeýta kuri faraón rendápe. Jehová omboúrõ guare pe décimo kastígo, entéro taʼýra ypykue oĩva Egíptope omano ha upéva ohupyty umi animálpe entéro. Faraón ohechárõ guare la itaʼýra omanoha hasypeve oñentregaite. Péicha oñemotĩ rire ohenoika Moiséspe ha heʼi chupe opoitaha umi israelitakuéragui, péro ojerure avei toñevendesimi chupe. Israel osẽ Egipto poguýgui hústo 430 áño Abrahán oike rire pe Tiérra Prometídape. Péro umi israelitakuéra nosẽi haʼeño, “oho avei hendivekuéra heta extranhéro”, posívlemente heta egipcio ijapytepekuéra. Péro upéi pe faraón okambia jey opensa lája. Ombyaty peteĩ ehérsito tuichaitereíva ha osẽ oho umi israelitakuéra rapykuéri.
Moisés ha umi israelita og̃uahẽvo pe Mar Rojo rembeʼýpe, ohecha ndaiporiveimaha moõ gotyopa ohóta hikuái, haʼete la ndaikatumoʼãvéimava osegi. Umi israelita okyhyjepa, oryrýi osusũ voi. Moisés katu oñepyrũ ojerure Jehovápe toipytyvõmi ipuévlope ha Jehová ndohejareíri chupekuéra. Upévare ojapo peteĩva umi milágro tuichavéva oñemombeʼúva la Bíbliape. Haʼe oavri pe Mar Rojo ha pe yvy oĩva ipaʼũme opyta iséko. Upéicha umi israelita okrusa yvýrupi. Faraón ohechárõ guare upéva osẽ oho hapykuerikuéra ijehérsito reheve. Péro umi israelitakuéra okrusapamírente, Jehová opoi pe y ojoko vaʼekuégui ha ojehykuavo dególpe umi egipciokuéra ári, ombojahogapaite chupekuéra. Upéicha pe ehérsito imbaretevéva oĩ vaʼekue oñehundiete.
Moisés núnka ndahesaráiri koʼã mbaʼe oiko vaʼekuégui. Upéi opyta ojeroviavéntema Jehováre. Upe guive haʼe osegi ogia Jehová puévlope 40 áñore, omano meve orekópe 120 áño. Ha ojapokuévo upéva, siémpre ohechauka vaʼekue ojeroviaha, oporohayhuha ha ipyʼaguasuha.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Moisés ipyʼaguasu hague ko kásope?
Einvestigamína
1. Ndajaikuaái mbaʼéichapa héra pe faraón oĩ vaʼekue upe tiémpope, ndojetopái avei umi egipciokuéra oskrivi hague umi israelita osẽ hague Egíptogui. Upéicharõ, ¿mbaʼérepa ikatu jaguerovia la Biblia heʼíva? (g04 8/4 7-9-wcgr).
2. ¿Mbaʼérepa umi hénte okyhyjete vaʼekue faraóngui? (w14 15/4 8 párr. 1). A
PRISMA ARCHIVO/Alamy Stock Photo
Taʼanga A: Peteĩ faraón ogoverna vaʼekue upe rire
3. ¿Mbaʼérepa umi diez kastígo Jehová ombou vaʼekue omotĩ umi egipcio dioskuérape? (it “Umi dios ha diosa” párr. 24-26-wcgr).
4. ¿Mbaʼérepa jaʼekuaa Jehová tuicha oavri hague pe Mar Rojo ha mboy israelítapa oiméne okrusa raʼe upérupi? (it “Éxodo” párr. 46-51-wcgr). B
Taʼanga B: Mar Rojo, ojehecháva Sinaí guive. Posívlemente umi israelitakuéra okrusa vaʼekue koʼárupi
Ejepyʼamongetamína ndejehe
¿Mbaʼéichapa Moisés ehémplo ikatu ñanemokyreʼỹ ñapensáramo ndaikatumoʼãiha ñakumpli porã peteĩ asignasión? (Éx. 4:10; 7:6, 7).
Aarón oipytyvõ haguéicha Moiséspe ipyʼaguasu hag̃ua iñasignasiónpe, ¿mbaʼéichapa ñande avei ñaipytyvõkuaa ñane ermáno ha ermanakuérape? (Éx. 4:14-16). C
Taʼanga C
¿Mbaʼéichapa ikatu ndepyʼaguasu Moisés ipyʼaguasu haguéicha ko kásope?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
Alee rire ko rrelátope la ohasa vaʼekue Moisés, ¿mbaʼépa aporandúne chupe Jehová omoingove jey vove chupe?
Reikuaave hag̃ua
¿Mbaʼéichapa ikatu oipytyvõ umi mitãme oikuaáramo mbaʼépa heʼise Jehová réra?
¿Mbaʼéichapa umi mbaʼe Moisés ohasa vaʼekue oipytyvõ chupe oikuaa porãve hag̃ua Jehovápe?