14 RAHAB
Omotenonde Jehovápe ha ombotapykue ivalleguápe
YMAVE, Jericó murálla kostádope, oiko vaʼekue peteĩ kuña rekovai hérava Rahab. Ohóvo omaña pe iventánape, Rahab ikatu vaʼekue ohecha umi mbaʼe porã oĩva pe siuda jerére. Por ehémplo, umi palméra vérde asýva ha pe kuarahy ojope vevyimíva. La Biblia heʼi voi ko siuda haʼe hague “pe siuda de las palméras” (Deut. 34:3). Péro oguatávo ohóvo pe siudáre, ñembyasy ha kyhyjémante ohecha umi hénte rováre. Haʼekuéra oikuaa vaʼekue Jehová ohundipataha chupekuéra ha omeʼẽtaha Israélpe pe yvy haʼekuéra oikoha.
Cuarenta áño umi israelita oho mboyve ojekoloka Jericó ypýpe, Jehová osalváma voi kuri chupekuéra faraón ehérsitogui. Upérõ guare Jehová ombojahogapaite vaʼekue umi egípciope pe Mar Rójope. Ha og̃uahẽ mboyvemi hikuái Jericó ypýpe, Jehová oipytyvõ avei ipuévlope ipuʼaka hag̃ua mokõi rréi amorreo ipoderosoitereívare, hérava Sehón ha Og. Hiʼarive umi israelita ndahaʼéi vaʼekue peteĩ nasión oñorairõkuaáva. Upéicharõ jepe umi israelita oĩma oike hag̃uáicha Jericópe. Péicha Jehová okastigáta kuri umi hénte upepeguápe hembiapo vaiete haguére. ¡Koʼã hénte omerese voi kuri upéva!
Rahab ohechakuaa vaʼekue umi hénte oikóva ijerére iñaña ha hembiapo vaietereiha. Haʼe voínte avei oiméne otĩ raʼe la itraváhore pórke naiporãi vaʼekue la ojapóva. Oime vaʼerãngo okambiase asy la oiko lája, pórke haʼéngo prostitúta kuri. Péro oikuaárõ guare la Jehová ojapómava ipuévlo rehehápe, upéva nomongyhyjéi chupe síno omeʼẽ chupe esperánsa. Jehová haʼe vaʼekue peteĩ Dios oprotehéva isiervokuérape ha omombaʼéva chupekuéra, ndahaʼeiete umi dios guaʼu Canaanpeguáicha. Rahab ohechakuaa vaʼekue Jehová ojapoha iporãva, ipotĩ ha okuidaha umi isiérvo ohayhúvare. Upéva ogustaiterei vaʼekue chupe.
Peteĩ pyharépe mokõi kuimbaʼe og̃uahẽ Rahab rógape ha ojerure chupe opytami hag̃ua oke upépe. Rahab ensegída voi opilla haʼekuéra haʼeha israelita oúva ovichea pe siuda, péro ndahaʼéi haʼénte la opilla vaʼekue upéva. Pe rréi de Jericó omondo la oheka vaʼerã koʼã israelítape Rahab rógape. Haʼekuéra heʼi Rahábpe onohẽ hag̃ua chupekuéra hógagui. ¿Mávapepa omotenondéta raʼe Rahab upe situasiónpe? ¿Jehovápe térãpa umi Jericoguápe? Ijetuʼu la isituasión, pórke la odesidívante okambiaitéta chugui la hekove.
Rahab ipyʼaguasu ha odesidi oapojataha Jehovápe. Haʼe omokañy umi mokõi israelítape itécho ári ha ótro ladoite omondo umi kuimbaʼe Jericoguápe. Koʼã kuimbaʼe oho rire, Rahab ojupi pe hóga técho ári ha omombeʼu umi israelítape mbaʼérepa osalva chupekuéra. Haʼe heʼi: “Che aikuaa Jehová omeʼẽtaha peẽme ko yvy”. Péicha ojekuaa kuri haʼe ojeroviamaha umi israelita Járare. Haʼe heʼi avei umi kuimbaʼépe peteĩ mbaʼe omokyreʼỹva chupekuéra: Umi kuimbaʼe Jericogua ikangypamaha pórke okyhyjeterei chuguikuéra. Upéi Rahab ojerure umi israelítape oprotehemínte hag̃ua chupe ha ifamíliape ág̃a Jehová ohundi vove Jericó.
¿Mbaʼépa la ombopyʼaguasu vaʼekue peteĩ kuña rekovaípe ombotapykue hag̃ua ivalleguápe ha okambiaite hag̃ua?
Rahab osalva koʼã mokõi israelítape ha ohechaukáma avei oapojaha Jehovápe. Upévare haʼekuéra oasepta la Rahab ojeruréva ha heʼi ndojehumoʼãiha mbaʼevete chupe ha ihentekuérape. Upérõ Rahab ndojaguái vaʼerã kuri koʼã kuimbaʼére, omoĩ vaʼerã iventánare peteĩ pióla pytã ha opyta vaʼerã hógape ihentekuérandi umi israelita oataka aja pe siuda. Ojapopaitéramo koʼã mbaʼe, haʼe ha umi hogaygua ojesalváta.
Rahab oipytyvõ kuri koʼã kuimbaʼépe kañyhaitépe osẽ hag̃ua pe siudágui. Upearã onohẽ chupekuéra iventánarupi peteĩ piólare. Upéi Rahab ojapo koʼã kuimbaʼe heʼi hagueichaite chupe. Haʼe oñapytĩ peteĩ pióla pytã pe iventánare ha nomombeʼúi avavetépe haʼekuéra ou hague ovichea pe yvy. Umi kuimbaʼe Jericogua oikuaárire la Rahab ojapóva, ojukaite veráta kuri chupe. Péro haʼe ojapo la ojeruréva chupe umi israelita. Haʼe oguerupaite ihentekuérape hógape ha opyta hikuái upépe. Rahab koʼytevéntema oiméne opensa raʼe odesidi porã hague oikuaárõ guare Jehová ojokoha pe Rrío Jordán umi israelita okrusa hag̃ua. Káda día, umi siete díare, Israel ehérsito oho ojere pe siudáre. Ha káda ke haʼekuéra ojapo upéva umi Jericogua okyhyjeterei. Og̃uahẽrõ guare pe día sieteha, Rahab ha ihentekuéra oĩmbáma hína kuri hógape. Upeichaháguinte oñehendu sapyʼa oĩha ombopúva umi turu ha hetaiterei osapukáiva. ¡Upépe pe murálla ou yvýpe!
Oikopa rire koʼã mbaʼe, umi mokõi kuimbaʼe oho vaʼekue ovichea pe yvy, oho onohẽ Rahab ha ihentekuérape hógagui. Hóga oĩrõ jepe pe murálla kostaitére, upe párte pe murálla ndoʼái. Josué omanda haguéicha, avave ndojapói kuri mbaʼeve Rahab ha ihentekuérare. Tiémpo rire, Rahábpe oaseptáma avei hikuái haʼeramoguáicha peteĩ israelita. Upéi haʼe omenda peteĩ israelítare ha imemby. Hetaiterei áño upe rire, Rahab familiarégui onase kuri pe kuimbaʼe ipyʼaguasuvéva oiko vaʼekue ko yvy ape ári. Upe ifamiliare haʼe Jesucristo (Mat. 1:5, 16). ¡Ajépa tuichaite Jehová ovendesi Rahábpe ojerovia ha ipyʼaguasu haguére!
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Rahab ipyʼaguasu hague?
Einvestigamína
1. ¿Mbaʼéichapa vaʼekue Rahab rekove Jericópe? (w13 1/11 12, 13).
2. ¿Mbaʼérepa jaʼekuaa umi mokõi israelita ndohói hague Rahab rógape hekovai hag̃ua? (it “Prostitúta” párr. 16-wcgr).
3. ¿Mbaʼérepa Rahab oreko raʼe líno rakãngue itécho ári ha mbaʼépe upéva ojepurúmi vaʼekue? (it “Líno” párr. 2-4-wcgr). A
Thanks for your interest in my photos/Moment Open via Getty Images
Taʼanga A: Linoty
4. ¿Mbaʼérepa ndaivaíri la Rahab ojapo vaʼekue omondórõ guare ótro ladoite umi kuimbaʼe Jericoguápe? (w04 1/12 9 párr. 1-wcgr). B
Taʼanga B
Ejepyʼamongetamína ndejehe
¿Mbaʼérepa Rahab ipyʼaguasúmante vaʼerã kuri okambia hag̃ua la oiko lája ha oservi hag̃ua Jehovápe umi israelítandi? ¿Mbaʼépa ikatu oaprende chugui umi estudiánte?
La Biblia heʼi ndovaleiha ñandejapu, péro sapyʼánte umi ñandepersegíva mbaretépe oporandu ñandéve umi mbaʼe ndovaléiva oikuaa ñane ermanokuéragui. Péicha jave, ¿mbaʼéichapa Rahab ehémplo ikatu ñanepytyvõ? (Prov. 11:13; Ecl. 3:7; Efes. 4:25). C
Taʼanga C
Taʼanga C
¿Mbaʼéichapa ikatu ndepyʼaguasu Rahab ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Rahábpe Jehová omoingove jey vove chupe?
Reikuaave hag̃ua
Jahecha haguéicha Rahab kásope, ¿mbaʼépa tekotevẽ jajapo jajesalva hag̃ua Jehová árape?
¿Moõpa ñaime vaʼerã oñehundíta vove ko múndo aña? (w09 15/5 6-8).
Eipurumína ko istória bíblica ilustráda eipytyvõ hag̃ua ne famíliape oñeimahinamba hag̃ua la oiko vaʼekue.