21 SAMUEL
Peteĩ mitãʼi oñeʼẽ Jehová rérape
SAMUEL ojogua vaʼekue Jefté rajýpe ha Sansónpe. ¿Mbaʼérepa? Pórke umi mbaʼe ojapo vaʼekue ituakuéra tuichaiterei oipytyvõ vaʼekue chupekuéra. Jefté rajýicha, Samuélpe ojegueraha vaʼekue pe tavernákulope oservi hag̃ua Jehovápe oikove aja pukukue (1 Sam. 2:11). Sansóncha, Samuel haʼe vaʼekue peteĩ nazareo onase guive (Juec. 13:7). Ha Sansón ha Jefté rajýicha, Samuel tekotevẽ vaʼekue ipyʼaguasu.
Samuel opoʼo riremi, posívlemente orekórõ guare 3 áñorupi, isy hérava Ana ogueraha chupe pe tavernákulope Silópe. Péicha Ana okumpli ipromésa Jehovápe, péro káda áño oho ovisita imembýpe ha ogueraha chupe ijao pyahurã oipuru vaʼerã pe tavernákulope. Samuel okakuaa vaʼekue upépe pe súmo saserdóte Elí ndive, ijedámava upe tiémpope g̃uarã. Ikatu voi oime unos kuánto kuña upepegua okuida avei raʼe Samuel rehe.
Upe tiémpope umi oservíva pe tavernákulope ndoadoraporãvéi vaʼekue Jehovápe. Koʼã mbaʼe ndoikói Elí káusarente, péro haʼe ndojapoguasúi avei mbaʼeve ojoko hag̃ua chupekuéra. Umi mokõi itaʼýra, hérava Hofní ha Finehás, desastrete vaʼekue. Haʼekuéra hekovai unos kuánto kuña oservívandi pe tavernákulope, ha ivaive hag̃ua ndorrespetái hikuái umi sakrifísio oñemeʼẽva Jehovápe. Posívlemente haʼekuéra omandámi hembiguaikuérape otrata vai hag̃ua umi héntepe. Avei oipeʼapa umi héntegui umi soʼo pedáso iporãvéva oñemeʼẽ rangue Jehovápe sakrifísioramo. Elí oikuaa kuri la itaʼyrakuéra ojapóva oikóvo. Ha ojagarra rangue okorrehi porã chupekuéra, oñemoñeʼẽnte chupekuéra. Péro Hofní ha Finehás nopenái hese. Ivaietereíramo jepe la ambiénte, Samuel okakuaa porã ha Ñandejára ha umi hénte oguerohory chupe. Og̃uahẽrõ guare pe tiémpo Jehová okorrehi hag̃ua pe situasión, ojevale Samuel rehe oñeʼẽ hag̃ua hérape, imitãitirõ jepe.
Peteĩ pyharépe, Samuel opáy ohendúgui peteĩ oñeʼẽva chupe. Tárdemarõ jepe, Samuel odipara oho Elí rendápe oporandu hag̃ua chupe mbaʼépa oikotevẽ. Upérõ ningo Elí itujáma ha ndohechavéima. Haʼe ohendu Samuélpe péro omondo jeýnte chupe hupápe pórke ndahaʼéi haʼe la ohenóiva chupe. Upéicha oiko jey dos vése, péro pe tres vesehápe Elí opilláma Jehovaha la oñeʼẽva hína Samuélpe. Haʼe heʼi Samuélpe oho jeýnte hag̃ua oñeno ha ohendu jeýramo la oñeʼẽva, heʼi chupe orresponde hag̃ua péicha: “Jehová, eñeʼẽ katu por favór, che ajapysaka hína nderehe”. Samuel ojapo ojeʼe hagueichaite chupe.
Upéi Jehová cuatro veseha oñeʼẽ ha heʼi: “Samuel, Samuel”. Upépe pe mitãʼi orresponde ha heʼi: “Eñeʼẽ katu por favór, che ajapysaka hína nderehe”. Upe rire Jehová oñepyrũ oñeʼẽ chupe. Haʼe heʼi Samuélpe okorrehitaha umi mbaʼe vai ojejapóva oikóvo Silópe ha heʼi okastigataha Elípe ndokorrehíri haguére itaʼyrakuérape. Péro ndahaʼéi upévante. Jehová heʼi avei okastigataha entéro Elí rogayguápe, ijapytepekuéra umi mokõi itaʼýra. Entéro koʼã mbaʼe Samuel omombeʼu vaʼerã kuri Elípe.
Upéi Samuel oñeno jey, péro la Biblia ndeʼíri ikatúpa raʼe oke jey. Koʼẽmba rire, haʼe opuʼã oho hag̃ua oavri Jehová róga rokẽ. Haʼe oikuaáma la ojapo vaʼerã, péro “okyhyjeterei heʼi hag̃ua Elípe la ohecha vaʼekue”. Elí ohenói Samuélpe ha oporandu chupe mbaʼépa Ñandejára heʼi raʼe. Ikatu voi oime ohechakuaa raʼe Samuel rehe okyhyjeha, upévare heʼi avei chupe: “Aníke remokañy mbaʼevete chehegui”.
Imitãitiramo jepe, Samuel omombeʼu vaʼerã pe súmo saserdóte Elípe peteĩ mensáhe ipohýiva
Oiméne ijetuʼuete raʼe Samuélpe. Ndareíri la okyhyje pórke Elí haʼe vaʼekue pe súmo saserdóte Israélpe, hiʼarive oime vaʼerã Samuel orrespetaiterei Elípe ijavuélo teéicha. Upéicharõ jepe, Samuel oñanima ha “omombeʼupaite chupe” la Jehová heʼi vaʼekue. Péicha Elí oikuaa umi mbaʼe vai ohaʼarõva chupekuéra. ¿Omomýipa raʼe chupe upéva okorrehi hag̃ua umi mokõi itaʼýrape? La Biblia ndeʼíri upéva.
Jehová tuichaiterei ovendesi Samuélpe peichaite peve ipyʼaguasu haguére. La Biblia heʼi voi: “Jehová siémpre oĩ hendive”. Ha ndahaʼéi voi upevánte. Upe guive Ñandejára oñepyrũ ojevale hese oñeʼẽ hag̃ua hérape ha “oñenkarga oñekumplipaite hag̃ua Samuel heʼi vaʼekue”. Por ehémplo, oñekumplipaite kuri la haʼe heʼi vaʼekue oikotaha Elí ha itaʼyrakuérare. Kon el tiémpo, Samuel oñepyrũma ogia umi israelitakuérape oservi porã hag̃ua Jehovápe. Heta áñore haʼe oservi vaʼekue proféta ha huésramo. Imitãite guive Jehová oipytyvõma vaʼekue chupe ipyʼaguasu hag̃ua. Ha okakuaapa rire haʼe osegi vaʼekue ipyʼaguasu ipahaite peve.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Samuel ipyʼaguasu hague?
Einvestigamína
1. Pe tavernákulo oĩ vaʼekue Silópe. ¿Mbaʼéichapa rakaʼe upe sóna? (w92 1/11 8, 9-wcgr). A
Todd Bolen/BiblePlaces.com
Taʼanga A: Koʼápe opyta vaʼekue Siló
2. ¿Mbaʼe mbaʼépa ohasa vaʼekue Samuel oservi rupi pe tavernákulope? (ia 70, 71 párr. 9-13). B
Taʼanga B
3. ¿Mbaʼépa heʼise ‘Samuel ndoikuaaporãi gueteri hague Jehovápe’? (1 Sam. 3:7; w02 15/12 8 párr. 5, 6-wcgr).
4. ¿Mbaʼéichapa oñekumpli vaʼekue pe profesía oñeʼẽva Elí familiakuérare? (it “Elí, I” párr. 5-7-wcgr).
Ejepyʼamongetamína ndejehe
¿Mbaʼéichapa Samuel ehémplo ikatu oipytyvõ peteĩ imitãvape ohechakuaa hag̃ua iñimportanteha...
… ikyreʼỹ iñeʼẽrendu hag̃ua? (1 Sam. 3:5).
… ijedukádo ha opororrespeta? (1 Sam. 3:6-10).
… irresponsávle? (1 Sam. 3:15). C
Taʼanga C
¿Mbaʼéicha javépa peteĩ imitãva tekotevẽta ipyʼaguasu oñeʼẽ hag̃ua ha mbaʼéichapa Samuel ehémplo ikatu oipytyvõ chupe?
¿Mbaʼéicha javépa ikatu avei rehechauka ndepyʼaguasuha Samuel ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Samuélpe Jehová omoingove jey vove chupe?
Reikuaave hag̃ua
¿Mbaʼéicha javépa umi imitãva ha umi okakuaapámava tekotevẽta ipyʼaguasu ojapo hag̃ua iporãva?
Samuel ojapo vaʼekue iporãva, umi hénte oĩva ijerére ndorrespetáiramo jepe Jehovápe.
Samuel odesidi oservitaha Jehovápe (ijwis artíkulo 15-wcgr).