20 SANSÓN
Haʼe ipyʼaguasu ikangýrõ guare
SANSÓN ndohechái mbaʼevete, péro si ohendu porã mbaʼeichaitépa umi filisteo oñembohory ha otalla hese. ¿Mbaʼéreiko haʼe oĩ upe situasiónpe? Pórke omombeʼu umi oikuaaʼỹ vaʼerãme mbaʼérepa Ñandejára omombaretete chupe. Vyresaite la ojapóva. Upépe umi filisteo oaprovecha ojagarra hag̃ua chupe. Haʼekuéra oñapytĩ, ohesaʼo, oraha préso ha omombaʼapo pohýi chupe. Koʼág̃a umi filisteo opukapa hese ha katuete Jehováre avei. Péro Sansón oikuaa oĩha upe situasiónpe haʼe voi ojavy haguére. Haʼe ningo ndahaʼéi vaʼekue peteĩ kuimbaʼe ipyʼamirĩva, péro ko situasión oipurupaite hína chupe arakaʼeve oikoʼỹ haguéicha hese. ¿Ikatútapa lomímonte ohechauka jey ipyʼaguasuha?
Sansón oservi vaʼekue huésramo Israélpe 20 áñorupi, péro haʼe idiferentete vaʼekue umi ótrogui. Umi hués oĩ vaʼekue haʼe mboyve, por ehémplo Barac, Gedeón ha Jefté, oreko vaʼekue peteĩ ehérsito oñorairõ hag̃ua Jehová enemigokuéra kóntrape. Péro Sansón nahániri. Haʼe haʼeñoiténte ohómi vaʼerã chupekuéra ha sarambi ojapo chuguikuéra, orekoramoguáicha avei peteĩ ehérsito. Heta vése Jehová ojevale hese ojuka hag̃ua hetaiterei filistéope. Péro ¿moõgui osẽ raʼe ko kuimbaʼe imbaretetéva?
Jehová omanda rupi, Sansónpe oñemongakuaa vaʼekue peteĩ nazaréoicha. Jehová oipota vaʼekue voi haʼe oservi upéicha oikove aja pukukue. Upévare haʼe núnka noikytĩri vaʼekue iñakãrangue. Sansón oservi porã aja de nazareo, Jehová omombaretéta kuri chupe. ¡Peteĩ jey haʼe ojagarra voi peteĩ león ha ombojaʼo mbytetépe ipópente! Haʼe oipuru vaʼekue upe podér Jehová omeʼẽva chupe oñemoĩ hag̃ua umi filistéore, oreko asyetéva upe tiémpope umi israelita irreveldetévape.
Peteĩ jey katu, umi israelitakueraite voi okyhyjetereígui ojagarra oñapytĩ Sansónpe ha ontrega umi filistéope. Péro Sansón omondoho umi pióla haʼeramoguáicha ílo de líno ha upéi peteĩ vúrro rañykãnguépe ojuka 1.000 filistéope voi. Tiémpo rire, Sansón oĩ aja hína Gázape, iñenemigokuéra opeska hese pe siuda entrádape ikatu hag̃uáicha ojuka chupe koʼẽmba rire. Péro upe pyharépe, las 12-rupi, Sansón opuʼã, oho oipeʼa pe siuda rokẽ itránka entéro reheve ha umi póste guasu ojokóva pe okẽ. Haʼe ojagarra ohupi ilómore ko okẽ guasu ha omboarriva 60 kilómetrorupi og̃uahẽ meve peteĩ montáña ári oĩva Hebrón rovái.
Heta vése Sansón ohechauka vaʼekue ndaiporiha ipuʼakáva hese. Haʼe ohechauka vaʼekue umi filisteo dioskuéra, por ehémplo Dagón, ndahaʼeiha mbaʼevete, koʼýte oñemoĩsérõ peteĩ Jehová siérvo ifiélvare. Upe rire, umi filisteo otopa sapyʼa la ipuʼaka vaʼerã Sansónre: upéva haʼe Dalila.
Sansón ou oñenamoraite voi hese, péro ko kuña hovamokõi ha itraisionéra. Umi filisteo oofrese Dalílape pláta oporandu hag̃ua Sansónpe mbaʼépa la omombaretetéva chupe, ha Dalila oasepta. Haʼe oiko Sansón rapykuéri ha tódo el día oporandu jey jey chupe mbaʼépa la isekréto. Amo ipahápe, Sansón ikueráima chugui ha omombeʼu chupe la oikuaase vaʼekue. Sansón heʼi oñekytĩramo chugui iñakãrangue ikangytamaha avei oimeraẽ ótro kuimbaʼéicha. Upémarõ Dalila ohaʼarõ Sansón opyta peve oke, upéi ohenói peteĩ kuimbaʼépe oikytĩ hag̃ua chugui iñakãrangue. Upépe umi filisteo pyaʼe ou, oñapytĩ ha ohesaʼo Sansónpe. Upe guive ojekuaa “Jehová ohejáma hague chupe” ha naimbaretevéima yma guaréicha.
Umi filisteo ojagarra omombaʼapo pohýi Sansónpe ha omoĩ chupe omolina hag̃ua semílla. Haʼekuéra ovyʼa syry, pórke koʼág̃a Sansón haʼe peteĩ esklávontema oñeñapytĩva kadénape. Upéi oorganisa hikuái peteĩ fiésta Dagón rérape ha hetaiterei hénte ijaty itemplopekuéra. Pe terrásapente voi oĩ kuri amo 3.000 persónarupi. Upéi umi filisteo omanda tojegueru Sansónpe ojediverti hag̃ua hikuái hese. Sansón ou ha oñemoĩ chupe oĩháme umi mokõi kolúmna guasu. Upérõ g̃uarã, Sansón oñarrepentíma kuri ha la iñakãrangue okakuaa jeýma avei chupe.
Sansón ojegueraha préso pórke tuichaiterei ojavy. Péro, ¿oaprovechátapa pe última oportunida ojapo hag̃ua iporãva?
Sansón ojeko rire umi mokõi kolúmna rehe, ojerure Jehovápe omeʼẽmi jeýnte hag̃ua chupe pe fuérsa oreko vaʼekue ymave. Haʼe heʼi Ñandejárape: “Nemanduʼamína cherehe ha chemombarete jey, ko última ves ikatúramo”. Ha upéi osapukái: “¡Eheja tamano umi filistéondi!”. Eñeimahinamína upe oiko vaʼekue. Sansón oñepyrũ omyaña umi kolúmna pe ifuérsa omeʼẽha peve chupe, oñehaʼãmbaite hese ivenasẽmba peve. Upéi umi kolúmna oñepyrũma okuʼe. Umi filisteo ndaikatuvéima ojapo mbaʼeve ojoko hag̃ua chupe. Umi kolúmna guasu osẽ hendágui ha pe témplo ou yvýpe. Upérõ guare, Sansón última ves oipuru la ifuérsa. Peteĩ sapyʼaitépe ojuka hetaitereive filisteo umi ojuka vaʼekuégui oikove aja entéro.
Hetaiterei áño upe rire, Pablo oñeʼẽrõ guare umi kuimbaʼe ojeroviaitévare, imanduʼa vaʼekue avei Sansón rehe. Ha oiméne hese la imanduʼa raʼe heʼírõ guare oĩ hague Jehová siérvo ‘ikangýva péro upéi imbarete jeýva’ (Heb. 11:32-34).
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Sansón ipyʼaguasu hague?
Einvestigamína
1. ¿Mbaʼérepa Sansón ikatu vaʼekue osegi oservi de nazareo opokóramo jepe teʼonguére? (w05 15/1 30, 31-wcgr).
2. ¿Mbaʼérepa jaʼekuaa Sansón oikotevẽ hague espíritu sánto oraha hag̃ua pe okẽ guasu Gaza guive Hebrón peve? (w04 15/10 15 párr. 7, 8-wcgr). A
Taʼanga A
3. ¿Mbaʼépa ohechauka Dalila haʼéne hague israelita? (w05 15/3 28 párr. 3-wcgr).
4. ¿Mbaʼérepa Sansón heʼi raʼe oñevengaseha ‘peteĩ hesáre jepe’? (Juec. 16:28; it “Sansón” párr. 10-wcgr).
Ejepyʼamongetamína ndejehe
Dalila ojopyetereírõ guare Sansónpe, haʼe omombeʼu chupe peteĩ mbaʼe ndovaléiva ojekuaa. ¿Mbaʼépa ansianokuéra ha hembirekokuéra ikatu oaprende upévagui? B
Taʼanga B
Sansón ojavýramo jepe tuichaiterei, upéi Jehová ojevale jey vaʼekue hese. Peteĩ ermáno ojavýramo, ¿mbaʼéichapa Sansón ehémplo ikatu oipytyvõ chupe ani hag̃ua oñentrega?
¿Mbaʼéichapa ikatu ndepyʼaguasu Sansón ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Sansónpe Jehová omoingove jey vove chupe?
Reikuaave hag̃ua
Ehechaukamína ne famíliape mbaʼérepa Sansón haʼe vaʼekue peteĩva umi kuimbaʼe imbaretevéva.
Pe espíritu sánto omombarete Sansónpe (ijwis artíkulo 14-wcgr).
¿Mbaʼe mbaʼépa ikatu ñaaprendeve Sansóngui?