19 JEFTÉ HA ITAJÝRA
Haʼekuéra okumpli peteĩ promésa ijetuʼúramo jepe
IVAIPAITE la situasión Israélpe pórke umi israelitakuéra ohejapa jeýma Jehovápe. Upéicha rupi Jehová opermiti ohasa asy hikuái umi ammonita poguýpe 18 áñorupi (Juec. 10:8). Upe rire, Ñandejára puévlo orrekonose opeka hague, oipeʼa ijapyteguikuéra umi dios guaʼu ha oñemoag̃ui jey Jehováre. Péro ojapopa riremi koʼã mbaʼe, umi ammonitakuéra oñembyaty Galaádpe oataka hag̃ua chupekuéra.
Umi kuimbaʼe omoakãva Galaad ojerure Jeftépe oipytyvõ hag̃ua chupekuéra. Haʼekuéra oipota ko kuimbaʼe omoakã chupekuéra pe gerrarã. ¿Oipytyvõsétapa Jefté koʼã kuimbaʼépe, koʼýte oikuaávo ijapytepekuéra oĩha iñermanokuéra? Ymave ningo Jefté oiko vaʼekue Galaádpe, péro okañy vaʼekue upégui pórke iñermanokuéra otrata vaieterei chupe. ¿Opytápa raʼe ojepicha hendivekuéra ha ipyʼaro? Nahániri. Jefté odesidi ohotaha oipytyvõ chupekuéra. Péro oho mboyve oñorairõ, haʼe oñehaʼã raẽ pyʼaguapýpente osolusiona pe situasión. Upearã omondo mensahéro pe rréi ammonita rendápe, oexplika hag̃ua mbaʼérepa nokorrespondéi chupe ojagarra umi israelitakuéra yvy. Ojekuaa Jefté oikuaa porã hague mbaʼéichapa Jehová oipytyvõ vaʼekue ipuévlope ipuʼaka hag̃ua iñenemigokuérare ha ojagarra hag̃ua pe Tiérra Prometída. Jefté oñehaʼãramo jepe, pe rréi ammonita ndoikuaaséi mbaʼeve. ¡Haʼe oñorairõse katuete!
Jefté ojeprepara aja pe gerrarã, Jehová omeʼẽ chupe ijespíritu sánto. Upéi Jefté ojapo peteĩ promésa Jehovápe ha heʼi: “Chepytyvõramo agana hag̃ua umi ammonítape, upéicharõ oimeraẽ osẽva primeroite che rógagui cherug̃uaitĩ hag̃ua, ág̃a aju jey vove agana rire umi ammonítape, upévape che ameʼẽta ndéve Jehová, peteĩ ofrénda ojehapývaramo”. ¿Jefté piko ojapo ko promésa ipyʼa apurádoguinte térã opensa porãʼỹre? Nahániri. Upérõ Jehová espíritu oĩ hendive ha upéva oipytyvõta kuri chupe ani hag̃ua ojapo vyrorei.
¿Jefté piko ohapýta raʼe peteĩ persónape okumpli hag̃ua ipromésa? Nahániri. Jehovápe ndogustái vaʼekue upéva ha oproiviete voi (Deut. 18:10, 12). La Jefté heʼise vaʼekue omeʼẽtaha Jehovápe oimeraẽ persóna osẽva ohug̃uaitĩ chupe hógagui. Upe persóna haʼéta kuri Jehová mbaʼe ha oikovéta chupéntema oservi hag̃ua, posívlemente pe tavernákulope, oĩva Silópe. Jefté oikuaa vaʼekue hasyetereitaha chupe okumpli hag̃ua ko promésa pórke haʼe ningo peteĩnte itajýra vaʼekue, pévante la ifamília. Ha haʼe la posívlemente osẽta vaʼekue ohug̃uaitĩ chupe ou rire gerrahágui.
Tahaʼe haʼéva la oikótava, koʼág̃a Jefté oho vaʼerã oñorairõ. Haʼe pyʼaguasúpe ogia isoldadokuérape pe gérra aja. ¡Ha Jehová oipytyvõ chupekuéra ogana hag̃ua! Jefté ha isoldadokuéra ohundi 20 siuda oĩva umi ammonita poguýpe ha “ojuka hetaitereípe”.
Jefté vyʼápe ojevy jey la hógape. Oime vaʼerã hiʼãiterei raʼe chupe peteĩ isirviéntente tosẽ tohug̃uaitĩ chupe. Oime rire opensa upéicha, ohechávo pe primera persóna oúva hendápe oime vaʼerã ombyasyeterei raʼe. ¡Pe itajýra peteĩmi la osẽva ohug̃uaitĩ chupe! Haʼe ojeroky ha ombopu oúvo pe panderéta. Upepete Jefté omondoro ijao ha heʼi: “¡Anína che rajymi! Peichaite peve piko chemokorasõ rasy vaʼerã, ndéve ningo romondo vaʼerã mombyry koʼágui. Che ningo ajapóma peteĩ promésa Jehovápe, ha ndaikatumoʼãi apyrũ che ñeʼẽre”.
Jefté ha itajýra okumpli vaʼerã peteĩ promésa péro ojesakrifika vaʼerã upearã
Jefté rajy ontende porã kuri mbaʼépa haʼe ojapo vaʼerã okumpli hag̃ua pe promésa itúa ojapo vaʼekue. Koʼág̃a guive haʼe oipurúta hekove oservi hag̃ua Jehovápentema. Upéva heʼise haʼe núnka nomendamoʼãiha ha naimembymoʼãiha. Hiʼarive upe tiémpope umi kuña israelítape g̃uarã upéva ivaieterei kuri. Upéicharõ jepe, ko mitãkuña pyʼaguasúpe osẽ heʼi itúape: “Oiméramo rejapóma peteĩ promésa Jehovápe, ejapo cherehe repromete haguéicha”. Upéi haʼe heʼi itúape peteĩ mbaʼénte ojeruretaha chupe. Haʼe ohose iñamigakuérandi peteĩ tiémpore hasẽ hag̃ua ndaikatumoʼãi haguére omenda ha imemby.
Jefté rajy haʼe vaʼekue peteĩ kuña ipyʼaguasúva ha nopensáiva ijehénte. Upéicha rupi, káda áño umi mitãkuña Israelgua ohómi vaʼerã ovisita chupe 4 díare, ikatu hag̃uáicha okonsola ha omokyreʼỹ chupe. Ha katuete ohupytýne raʼe heta mbaʼe porã oservi haguére pe tavernákulope. Posívlemente upe tiémporupi, ojegueraha vaʼekue Samuélpe oiko hag̃ua upépe. ¿Noiméipa Jefté rajy ohekomboʼe ha omokyreʼỹ raʼe chupe okakuaa aja ohóvo? Upéva ndajaikuaái. Péro oime rire ojapo upéicha, upéva ombovyʼaitereíta kuri chupe, pórke haʼe ndaikatumoʼãi kuri imemby. Péro si jaikuaa upe tiémpope oĩ hague hekovaíva oservíva pe tavernákulope (1 Sam. 2:22). ¿Jefté rajýpa hekovai avei raʼe haʼekuéraicha? Nahániri. Pórke la Biblia heʼi hese: “Jefté rajy núnka ndorekói vaʼekue rrelasión sexuál peteĩ kuimbaʼéndi”.
Apóstol Pablo oñeʼẽ vaʼekue Jefté rehe imanduʼárõ guare umi kuimbaʼe ha kuña ojeroviaitévare (Heb. 11:32). Ñañeʼẽtaramo la pyʼaguasúre, Jefté ha itajýra oheja ñandéve ehémplo iporãitereíva. Jefté oñorairõ vaʼekue oipytyvõ hag̃ua Jehová puévlope ha itajýra oapoja chupe ipyʼaite guive. Upéicha mokõivévante okumpli vaʼekue peteĩ promésa ijetuʼuetereíva.
¿Moõpa oñeñeʼẽ hesekuéra la Bíbliape?
¿Mbaʼépa ere chupe?
¿Mbaʼérepa jaʼekuaa Jefté ha itajýra ipyʼaguasu hague?
Einvestigamína
1. Umi ammonita oñorairõ vaʼekue umi israelita kóntrape, ndahaʼéi voi oipeʼa hag̃uánte chuguikuéra ijyvy, síno avei pono oadora hikuái Jehovápe. ¿Mbaʼérepa jaʼekuaa upéva siertoha? (it “Jefté” párr. 6-wcgr). A
Taʼanga A: “Haʼekuéra oipeʼa ijapyteguikuéra umi dios oadoráva umi extranhéro ha oadora jey Jehovápe” (Juec. 10:16)
2. ¿Mbaʼérepa jaʼekuaa Jefté ojogua hague Jacóbpe ojapórõ guare pe promésa Jehovápe? (it “Jefté” párr. 11-wcgr).
3. ¿Mbaʼérepa jaʼekuaa Jefté ojapo hague peteĩ sakrifísio tuichaitereíva okumpli hag̃ua ipromésa? (w17.04 4 párr. 6).
4. Proféta Samuel onase vaʼekue áño 1180-rupi a.C. ¿Mbaʼérepa jaʼekuaa haʼe ha Jefté rajy oservíne hague oñondive pe tavernákulope? (it “Jefté” párr. 2-wcgr; ehecha “Enoc tiémpo guive Samuel tiémpo peve”).
Ejepyʼamongetamína ndejehe
Tuakuéra ipyʼaguasúramo Jefté ipyʼaguasu haguéicha, ¿mbaʼéichapa upéva oipytyvõta ifamiliakuérape?
Umi mitãkuña Israelgua ohómi ovisita Jefté rajýpe omokyreʼỹ ha oipytyvõ hag̃ua chupe osegi hag̃ua ipyʼaguasu. ¿Mbaʼéichapa kristianokuéra ikatu osegi iñehemplokuéra? B
Taʼanga B
¿Mbaʼéichapa ikatu ndepyʼaguasu Jefté ha itajýra ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Jeftépe ha itajýrape Jehová omoingove jey vove chupekuéra?
Reikuaave hag̃ua
¿Mbaʼéichapa Jefté rajy ehémplo ikatu oipytyvõ umi soltéro ha soltérape?
¿Mbaʼéichapa Jefté ha itajýra ehémplo ikatu ñanepytyvõ jajerovia hag̃ua Jehováre?