18 GEDEÓN
Haʼe ipyʼaguasu péro oñatende porã
PE AÑETEHÁPE ipyʼaguasúva oñatende porã la ojapótavare, pórke noñatendéiramo heʼise ipyʼatarovanteha. Gedeón ipyʼaguasu vaʼekue péro oñatende porã avei la ojapótavare. Haʼe oikoha tiémpope umi israelita ohejapa jeýma Jehovápe. Upévare Jehová opermiti umi madianita oike Israel territóriope ha hetaiterei voi ou hikuái. Haʼekuéra ombohasa asy pe puévlope ha ombyaipaite chuguikuéra umi mbaʼe oñotỹva guive. Upéi umi israelita oñarrepenti ha ojerure asy Jehovápe oipytyvõ hag̃ua chupekuéra. Ha peteĩ proféta rupive Jehová heʼi umi israelítape mbaʼérepa haʼe oheja chupekuéra. Peteĩ jey Gedeón oñembopyʼaguasúmante ha oho ohaʼỹiʼo trígo omongaru hag̃ua ihentekuérape, péro oñatende porã avei ojapóvo upéva. Upearã oho oike pe lugár ojejapohápe víno, oĩva peteĩ itakuápe, ani hag̃ua ojehechaiterei chupe.
Upéi Jehová omondo peteĩ ánhelpe heʼi hag̃ua Gedeónpe olivera hag̃ua ipuévlope. Péro Gedeón ojerure pe ánhelpe peteĩ señál oasegura hag̃ua upévapa la Jehová oipotáva. Haʼe ojapo la Gedeón ojeruréva chupe ha peteĩ milágro rupive ohapypaite pe sakrifísio Gedeón oprepara vaʼekue. Upe rire pe ánhel odesaparesete. Upe pyharépe Jehová oñeʼẽ Gedeónpe ha heʼi chupe oitypa hag̃ua pe altár oĩva Baálpe g̃uarã ha pe póste sagrádo oĩva ijykére. Hendaguépe katu omopuʼã vaʼerã peteĩ altár Jehovápe g̃uarã ha ojapo chupe peteĩ sakrifísio. Gedeón okyhyje kuri pórke ndoikuaái mbaʼépa ojapóta hese itúa térã umi ótro kuimbaʼe oĩva pe siudápe. Upéicharõ jepe, lomímonte ojapo la Jehová ojeruréva chupe, péro ojapo upéva pyharekue ani hag̃ua ojehecha chupe.
Oikopa rire koʼã mbaʼe, umi madianita, umi amalequita ha umi oikóva pe éste gotyo oñomoirũ ou hag̃ua oñorairõ Israel kóntrape. Ojagarrapaite ningo hikuái Jezreel Ñu, tukúicha voi heta hikuái. Koʼág̃a Gedeón oikotevẽta kuimbaʼe omoirũ vaʼerã chupe oñemoĩ hag̃ua hesekuéra. Jehová espíritu omomýi Gedeónpe ohenoika hag̃ua umi kuimbaʼe oĩva trívu de Manasés, Aser, Zabulón ha Neftalípe. Péro oho mboyve oñorairõ, Gedeón oasegurase raẽ Jehová oipytyvõtaha chupekuéra. Upearã ojerure mokõi señál ha Jehová ojapónte avei la haʼe ojeruréva chupe. ¡Ajépa ipasiensiaite Jehová! Upe pyharépe Gedeón oheja ovecha lána pe lugár oñemopotĩháme semílla ha Jehová omboykuepaite ysapýpe pe ovecha lána, péro ijerére oheja séko vera. Pe ótro pyhare katu Jehová oheja séko vera pe lána ha ijerére omboykuepaite ysapýpe.
Gedeón ehérsito michĩma voi, péro Jehová heʼi chupe omomichĩve hag̃ua
Koʼã señál tuichaiterei ombopyʼaguasu Gedeónpe. Upémarõ ogia umi 32.000 soldádo orekóva oho hag̃ua oñemoĩ umi 135.000 oúvare ikontrapekuéra. ¡Tuichaiterei la diferénsia! Umi israelita oĩ aja Harod Ykua Yvu ypýpe, Jehová heʼi Gedeónpe tuichaitereimaha la ijehérsito. Upémarõ Gedeón heʼi isoldadokuérape umi okyhyjéva guive ikatuha ohopa jeýnte hógape. Upépe 10.000 kuimbaʼéntema opyta chupe. Péro Jehová opensa hetaitiha. Upémarõ heʼi Gedeónpe omaña hag̃ua isoldadokuérare mbaʼéichapa hoyʼu. Umi oñesũva ha oñakãityetéva voi hoyʼu hag̃ua, oñemondopa jey hógape. Péro oĩ kuri hoyʼúva ipóguinte oñatende porã hag̃ua la oikóvare ijerére. Upévare koʼãva la opytáva Gedeón ehérsitope. Péicha 300 kuimbaʼéntema opyta chupe.
Michĩramo jepe la ijehérsito, Gedeón pyʼaguasúpe ojeprepara oataka hag̃ua. Jehová katu omeʼẽ jey Gedeónpe ótra señál. Haʼe heʼi Gedeónpe kañyhaitépe oho hag̃ua peteĩ pyhare iñenemigokuéra kampaméntope. Gedeón oho ha ohendu peteĩ soldádo omombeʼuha hína isósiope la osoña vaʼekue. Upe suéño ohechauka kuri Israel oganataha. Jehová rupive, Gedeón ipyʼaguasuvéntema koʼág̃a. Upepete Gedeón oho heʼi isoldadokuérape mbaʼépa ojapo vaʼerã ogana hag̃ua. Pyhare aja gueteri, haʼekuéra oho orrodea iñenemigokuéra kampaménto. Haʼekuéra oraha kambuchi, antórcha ha turu. Upéi Gedeón oavisa chupekuéra ombopu hag̃ua umi turu ha ojoka hag̃ua ikambuchi. Derrepentete hesakãmbaite ha tyapu oiko. Umi soldádo katu osapukái: “¡Jehová ha Gedeón espáda!”. Iñenemigokuéra tuichaiterei oñemondýi ha ni nontendéi la oikopáva. Haʼekuéra oimoʼãma voi oñemongorapa ha ojeatakamaha chupekuéra. Jehová omoñorairõmba oñondive umi oĩvape pe kampaméntope ha haʼekuéra voi ojojukapa. Koʼãvagui 15.000 kuimbaʼérupinte nomanói ha osẽ okañy upégui.
Gedeón ha ijehérsito oho hapykuerikuéra ha amo ipahápe ogana. Ohundipaite hikuái umi ótro ehérsito ha iliderkuérape. Okastiga avei umi israelita noipytyvõséi vaʼekuépe chupekuéra, hiʼarive Jehová rehehápe la oñorairõ hína kuri hikuái. Koʼã mbaʼe oikopa rire, umi hénte omoĩse voi Gedeónpe irréiramo. Péro Gedeón iñumílde ha heʼi chupekuéra: “Jehová hína pe opytátava pene governanterã”. Ñandejára opremia Gedeónpe pórke haʼe ipyʼaguasu ha siémpre oñatende porã la ojapótavare. Upéi Gedeón osegi oservi huésramo Israélpe ha oikóma trankílo ipahaite peve. Apóstol Pablo jepe oñeʼẽ jey vaʼekue hese imanduʼárõ guare umi kuña ha kuimbaʼe ojeroviaitévare (Heb. 11:32).
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Gedeón ipyʼaguasu hague?
Einvestigamína
1. Peteĩ soldádo ohecha kuri iképe peteĩ “pan apuʼa” de seváda. ¿Mbaʼérepa upéva orrepresenta porãite raʼe Gedeón ehérsitope? (Juec. 7:13; it “Seváda” párr. 7-wcgr).
2. ¿Mbaʼérepa umi madianita oñemondýi vaipaite raʼe ohendúvo oñembopuha umi 300 turu? (it “Animál ratĩ” párr. 3-wcgr). A
Taʼanga A: Ymave, umi israelita ombopúmi pe turu oporoavisa hag̃ua
3. ¿Mbaʼépa Gedeón ha ijehérsito tekotevẽ raʼe ojapo ipuʼaka hag̃ua umi madianítare? (w04 15/10 16 párr. 9, 10-wcgr). B
Taʼanga B: Gedeón omuña umi madianítape 80 kilómetrorupi Jogbehá peve. (Ndojekuaaporãi moõitérupipa ohasa)
4. ¿Mbaʼérepa jaʼekuaa umi mbaʼe oñemombeʼúva ko rrelátope ndahaʼeiha kuénto reínte? (w05 15/4 32-wcgr).
Ejepyʼamongetamína ndejehe
Gedeón oipytyvõ Jehová puévlope ogana hag̃ua, péro haʼe osegi iñumílde ha pyʼaguapýpe porãnte oñeʼẽ hapichápe (Juec. 8:1-3). Oĩ jave ipochýva térã oñeñandu vaíva odesidi vai haguére, ¿mbaʼéichapa umi omoakãva hogapy ha umi ansianokuéra ikatu osegi Gedeón ehémplo?
¿Mbaʼeichagua situasiónpepa tekotevẽta ehechauka ndepyʼaguasuha péro avei eñatende porãha? C
Taʼanga C
¿Mbaʼéichapa ikatu ndepyʼaguasu Gedeón ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Gedeónpe Jehová omoingove jey vove chupe?
Reikuaave hag̃ua
¿Mbaʼéichapa ikatu esegi Gedeón ehémplo erresivíramo peteĩ asignasión Jehová servísiope?
Eipurumína ko puvlikasión eipytyvõ hag̃ua ne famíliape ojerovia hag̃ua Jehováre.