26 NATÁN
Haʼe okorrehi pe rréipe
“¿MBAʼÉICHA piko peteĩ kuimbaʼe ivuenoitéva oúta ojapo koʼã mbaʼe vaiete?”. Péicha oime vaʼerã Natán ojepyʼamongeta raʼe tapére ohokuévo iñamígo rendápe pe palásiope. Oiko mboyve koʼã mbaʼe, Jehová ojevale kuri Natán rehe omombeʼu hag̃ua Davídpe peteĩ mbaʼe iporãitereíva. Haʼe heʼi Davídpe pe Mesías outaha ifamiliarégui (2 Sam. 7:4, 12, 13). Péro ko vuéltape, Jehová ojevale hína hese okorrehi hag̃ua Davídpe pórke haʼe opeka vaieterei.
David kañyhápente ojapo ko mbaʼe vai, péro Jehová ohechapaite hína kuri chupe ha katuete upéi omombeʼu Natánpe. ¿Mbaʼépa la oiko vaʼekue? Peteĩ kaʼaruete David osẽ oguata pe ipalásio terrásare. Upeichaháguinte, upe guive ohecha peteĩ kuña iporãitereíva ojahúva hína. David omanda ojegueru hag̃ua chupe upe kuña. Haʼe oikuaa kuri ko kuña hérava Bat-Seba omendamaha ha iména Urías haʼeha peteĩ soldádo hitita ifiélva chupe. Upéicharamo jepe, David oñeno ko kuñándi. Upéi Bat-Seba omombeʼu Davídpe opyta hague hyeguasu. ¿Mbaʼépa ojapo David? Oñehaʼã omokañy la ojapo vaʼekue. Haʼe ohenoika Uríaspe pe ehérsitogui ha oipota katuete oho upe pyharépe hembireko rendápe (ekompara 1 Samuel 21:5 heʼívare). Péro haʼe ndohejareiséi pe gérra oho hag̃uánte hembireko rendápe. Upémarõ David omanda oñemoĩ hag̃ua Uríaspe hendyvehápe pe ñorairõ ikatu hag̃uáicha omano. Urías omano rire, David omenda Bat-Sébare.
La Biblia heʼi: “Jehovápe g̃uarã ivaieterei la ojapo vaʼekue David”. Ñandejára omanda Natánpe oho hag̃ua okorrehi Davídpe ha heʼi hag̃ua chupe tuichaiterei ojavy hague. ¿Mbaʼépa opensa raʼe Natán ohokuévo pe rréi rendápe? ¿Oipyʼapýpa raʼe chupe mbaʼéichapa David orreaksionáta? David ojukaukáramo Uríaspe jepe, ¿mbaʼépa upéicharõ ojapóta hese okorrehise haguére chupe? Oho mboyve hendápe, katuete Natán heta oiméne oñemboʼe raʼe. Haʼe oipota kuri David ontende mbaʼeichaitépa ivai la ojapo vaʼekue. Ha opensa rire peteĩ ehémplore oho oñepresenta pe rréi renondépe.
Natán heʼi Davídpe peteĩ siudápe oĩ hague mokõi kuimbaʼe. Peteĩva irrikoiterei ha oreko heta ovecha, vaka ha tóro. Pe ótro katu imboriahu ha peteĩ ovechamínte oreko. Haʼe ohayhueterei upe ovechápe ha imaskótaicha voi oreko chupe. Peteĩ vuéltape, pe karai irríkova rógape og̃uahẽ peteĩ persóna oavisaʼỹre chupe. Ko karai omongaruse la ivisítape, péro okarnea rangue peteĩva umi ijovecha, oho oipeʼa “pe karai imboriahúvagui ijovecha peteĩmi”. Haʼe ojagarra upe ovecha ha okosina omongaru hag̃ua la ivisítape. Natán omombeʼupávo ohóvo ko istória, David ipochyeterei ha heʼi: “Ñandejára Jehová oikovévare ahura ndéve, pe kuimbaʼe ojapóva upéva omano vaʼerã”. David orrenegaiterei kuri pórke pe karai irríkova “nombyasýi ni michĩmi hapichápe”.
Natán oakonseha ha okorrehi mbarete vaʼerã peteĩ rréi ohayhu ha orrespetávape
Oikoite pe ehémplo Natán oipuru vaʼekue. David ningo haʼe vaʼekue pastór ha ndogustaietereími chupe la inhustísia. Upémarõ Natán pyʼaguasúpe osẽ heʼi chupe: “¡Nde hína upe kuimbaʼe!”. Oime vaʼerã omondýi raʼe Davídpe la ohendúva. Upéi Natán oñepyrũ heʼipaite chupe mbaʼe mbaʼépa la ojapo vaʼekue. Jehová ohechapaite kuri chupe. Upéi Natán omombeʼu Davídpe mbaʼépa oikóta hese. Jehová heʼi koʼág̃a guive David heta ohasa asytaha ha iprovlemataha hogapýpe. ¿Mbaʼépa David osẽ heʼi Natánpe?
Haʼe heʼi chupe: “Apeka Jehová kóntrape”. David oñeñandu vaieterei kuri ha ombyasy ipyʼaite guive la ojapo vaʼekue. Upéi Natán heʼi Davídpe Jehová oiporiahuverekotaha chupe ha heʼi: “Jehová neperdona ha upévare neremanomoʼãi”. Katuete oiméne vyʼápe Natán heʼi chupe koʼã mbaʼe. Jehová operdonáramo jepe chupe, David lomímonte ohasa vaʼekue hetaiterei mbaʼe ijetuʼúva opeka haguére Bat-Sébandi. Por ehémplo, pe primer ifamília oreko vaʼekue Bat-Sébandi omano kuri chugui. Upe rire heta áñore, David oreko vaʼekue hogapýpe oiko vaíva oñondive ha otraisionáva chupe. Koʼã mbaʼe oreko asyeterei vaʼekue Davídpe.
David ohasárõ jepe entéro koʼã mbaʼe, núnka ndohejái vaʼekue Jehovápe. Espíritu sánto rupive, haʼe oskrivi vaʼekue voi umi Sálmope mbaʼeichaitépa Jehová operdonakuaa umi oñarrepentívape (Salmo 32 ha 51). Péicha David oñemoĩ porã jey kuri Jehovándi ha Jehová oguerohory chupe. David omombaʼeterei vaʼekue pe konsého omeʼẽva chupe Natán ha siémpre opensa upévare omano meve. David ifiél vaʼekue Jehovápe ipahaite peve (1 Rey. 9:4). Oime vaʼerã Natán ovyʼaite raʼe ipyʼaguasu haguére ha oipytyvõ pe rréipe okambia hag̃ua.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Natán ipyʼaguasu hague?
Einvestigamína
1. Heta mbaʼe Natán oskrivi vaʼekue opyta la Bíbliape, péro chugui ndajaikuaái mbaʼeve ni mávapa rakaʼe ituakuéra. ¿Mbaʼépa ñanemboʼe upéva? (w12 15/2 25 párr. 2, 3).
2. Urías haʼe vaʼekue hitita. ¿Mbaʼérepa upéicharõ oĩ vaʼekue David ehérsitope? (w24.04 31).
3. Natán heʼi vaʼekue David orekotaha heta provléma hogapýpe. ¿Mbaʼéichapa oñekumpli vaʼekue upe profesía? (it “David” párr 29-wcgr).
4. ¿Mbaʼéichapa Natán ohechauka vaʼekue ipyʼaguasuha David ijeda riréma? (w12 15/2 25 párr. 1). A
Taʼanga A
Ejepyʼamongetamína ndejehe
¿Mbaʼéichapa Natán ehémplo ikatu ideprovécho ñandéve ñaipytyvõse jave peteĩ ñane amígo opeka vai vaʼekuépe?
¿Mbaʼéichapa jasegikuaa Natán ehémplo japoko hag̃ua peteĩ persóna korasõre? B
Taʼanga B
¿Mbaʼéichapa ikatu ndepyʼaguasu Natán ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Natánpe Jehová omoingove jey vove chupe?
Reikuaave hag̃ua
¿Mbaʼéichapa la David ojapo vaʼekue ombohasa asy chupe voi, iñamigokuérape, ifamiliakuérape ha Jehovápe?
Ani ñanderesarái pe oporohayhúva nopensaiha ijehénte (1:14).
¿Mbaʼérepa jaʼekuaa la Natán heʼi vaʼekue Davídpe oikoite hague?
Neumíldekena ha easepta pe disiplína (Artíkulo oĩva jw-pe-wcgr).