27 MEFIBÓSET
Haʼe noñamargái ohasa asýramo jepe
MEFIBÓSET família iñimportánte vaʼekue. Ijavuélo haʼe vaʼekue peteĩ rréi omanda guasúva ha itúa katu peteĩ gerréro ipyʼaguasu ha ifiélva Jehovápe. Péro Mefibóset orekópe 5 áñonte ou kuri okambiaite hekove. Ijavuélo Saúlpe oñelastima vaieterei gerrahápe ha upéi ojesuisida. Upe díape avei ojejuka itúape, hérava Jonatán. Pe kuñakarai oñangarekóva Mefibóset rehe oikuaárõ guare la oikóva tuichaiterei oñemondýi. Upémarõ ohupi Mefibósetpe ha osẽ odipara, péro upéi pe mitã hoʼa chugui ha olastima vai ipy. Upe guive Mefibóset opytáma ndoguataporãvéi.
Oikórõ jepe entéro koʼã mbaʼe Mefibóset noñamargái vaʼekue. Peteĩ israelita hérava Makir oraha vaʼekue oreko chupe hógape. Tiémpo rire, rréi David imanduʼa opromete hague iñamígo Jonatánpe haʼe okuidataha chupe hogayguáre (1 Sam. 20:14-17). Upéi pe rréi ohenoika Mefibósetpe.
Haʼe okyhyjeterei pórke ijavuélo haʼe vaʼekue pe rréi Saúl iñañaitéva, hetaite opersegi vaʼekue Davídpe. Mefibóset ikatu oime okyhyje raʼe David ojukasérõ g̃uarã chupe. Upéicharõ jepe haʼe osẽ oho pe rréi rendápe. Og̃uahẽvo upépe David trankílo porãnte oñeʼẽ chupe, omeʼẽmba jey chupe umi yvy haʼe vaʼekue ijavuélo Saúl mbaʼe ha heʼi: “Nde reguapýta chendive mesápe ha rekarúta koʼápe orendive”. Mefibóset oagradeseterei la ojapóva hesehápe David ha oñandu nomereseiha ojetrata chupe upéicha. Oñekompara voi ijupe peteĩ jagua reʼonguére.
Mefibóset ihénte mano, oñetraisiona chupe ha ohasa inhustísia, hiʼarive anga ndoguataporãi imitãite guive
Tiémpo riremi pe situasión ivaipaite jey Mefibósetpe g̃uarã. Absalón opuʼã itúare ha upévare David tekotevẽmante okañy Jerusaléngui. Mefibóset ndaikatúi kuri osẽ Jerusaléngui pórke isiérvo Zibá oheja rei chupe oho hag̃ua oipytyvõ Davídpe. Upéicharõ jepe otopa la fórma ohechauka hag̃ua oñembyasyha ha oapojaha Davídpe. Haʼe oheja okakuaa ivárva ha noñatendevéi hese, ojapoháicha jepi umi kuimbaʼe oĩva de duélo. Upéi opa jey la Absalón omoñepyrũ vaʼekue ha David ou jey trankiloite Jerusalénpe. Upéicharõ jepe David ndahaʼéi la ovyʼapáva pórke oñedesepsionaite Mefibósetgui. ¿Mbaʼérepa?
Zibá ijapu kuri Davídpe ikatu hag̃uáicha oheja vai Mefibósetpe. Haʼe ohórõ guare oipytyvõ Davídpe heʼi chupe Mefibóset haʼeha peteĩ traidór ha opytaha Jerusalénpe pórke oipota oiko chugui rréi. ¡Eñeimahinamína mbaʼéichapa oiméne oñeñandu raʼe David! Ramoiténte itaʼýra voi otraisiona chupe ha avei Ahitofel, pe iñamígo de konfiánsa ha ikonsehéro. Koʼã mbaʼe jepe oikóramo, ¿mbaʼéicha voi piko David ndogueroviamoʼãi Mefibóset avei otraisiona hague chupe? Upévare David odesidi omeʼẽmbaitetaha Zibápe pe erénsia Saúl oheja vaʼekue Mefibósetpe.
Mefibóset oikuaa rire Zibá oñeʼẽ vaipa hague hese, oho kuri oñeʼẽ David ndive omombeʼu porã hag̃ua chupe la oiko vaʼekue. David oikuaase mbaʼérepa Mefibóset nosẽi raʼe Jerusaléngui ha oho hendive. Upépe Mefibóset oexplika chupe haʼe ndaikatúi hague oho pórke ‘ndaikatúi oguata porã’. Upévare haʼe ohaʼarõ hína kuri isiérvo Zibá oipytyvõtaha chupe, péro haʼe osẽ oho ha oheja rei chupe. David oiméne ohechakuaa raʼe Mefibóset oheja hague okakuaa ivárva ha ndokuidaveiha hese. Péicha haʼe ohechauka ombyasy hague la ojehúva pe rréipe. Haʼe ojapóramo upéva, ¿isentído piko la ojeʼe hese opyta hague Jerusalénpe oiko hag̃ua chugui rréi? Upérõ guare David ipochy la oiko vaʼekuére ha heʼi Mefibósetpe okirirĩntema hag̃ua. Upéi David okambiaʼimi jey la odesidi vaʼekue ha heʼi Mefibósetpe okomparti vaʼerãha Zibándi la iñerénsia.
Mefibóset ikatu kuri ipochy la oikóvare pórke haʼe ndorekói la kúlpa isiérvo ombotavy haguére chupe ha koʼág̃a okomparti vaʼerã hendive la iñerénsia. Jahasa jave inhustísia ndahasyiete hína ñañamarga ha japyta hag̃ua ñandepyʼaro (Deut. 19:18, 19). Péicha jave ñandepyʼaguasúmante vaʼerã ani hag̃ua japyta ñañembyasyeterei ni ñambotuichaiterei la ojapóva ñanderehe umi ótro. Jahechakuaa vaʼerã iñimportanteveha jaikónte pyʼaguapýpe hendivekuéra. ¿Ha mbaʼépa ojapo raʼe Mefibóset?
Haʼe pyʼaguapýpe porãnte osẽ heʼi pe rréipe: “Che ruvicha, topytapánte Zibápe g̃uarã pe yvy. Pórke che avyʼáma nde reju jey haguére nde rógape”. Ko kuimbaʼe iñumildetéva ojepyʼapy kuri ipyʼaite guive pe rréi Jehová oelehi vaʼekuére. Oĩrõ jepe oñeʼẽ vaíva hese ha oipeʼáva chugui la okorrespondéva chupe, haʼe osegi ovyʼa ha oservi Jehovápe. Mefibóset ningo ndahaʼéi vaʼekue peteĩ kuimbaʼe oipurukuaáva espáda ni ndohóiva oñorairõ gerrahápe, péro saʼi oĩne raʼe la soldádo haʼéicha ipyʼaguasúva.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Mefibóset ipyʼaguasu hague?
Einvestigamína
1. Mefibóset oho mboyve David rendápe oiko vaʼekue “Makir rógape”. ¿Mbaʼe mbaʼépa Makir ojapove vaʼekue ohechaukáva ifiél ha imbaʼeporãha? (2 Sam. 9:3, 4; it “Makir” Núm. 2-wcgr).
2. ¿Mbaʼérepa Mefibóset heʼi vaʼekue ijehe haʼeha “peteĩ jagua reʼonguemínte”? (2 Sam. 9:8; it “Jagua” párr. 5-wcgr). A
PhotoStock-Israel/Photodisc via Getty Images
Taʼanga A: Umi israelítape g̃uarã umi jagua haʼe vaʼekue animál oporombojeguarúva hoʼúva oimeraẽ mbaʼe
3. ¿Mbaʼérepa jaʼekuaa Mefibóset nohaʼarõi hague voi oñenombra chupe rréi? (w02 15/2 14 párr. 11, nóta-wcgr). B
Taʼanga B: Katuete oiméne Jonatán omombeʼu itaʼýrape mávapepa Jehová oelehi rreirã
4. Oikopa rire umi mbaʼe oñemombeʼúva ko rrelátope, ¿mbaʼéichapa Jehová ovendesi jey raʼe Mefibósetpe? (it “Mefibóset” Núm. 2 párr. 3-wcgr).
Ejepyʼamongetamína ndejehe
Oĩ ningo orekóva depresión térã ohasáva ótra situasión ijetuʼúva ermanokuéra ndaikatúiva ontendepa. ¿Mbaʼéichapa Mefibóset ehémplo ikatu omokyreʼỹ koʼãichagua ermánope?
David ohendupamírente la ojeʼéva chupe omeʼẽma ótrope Mefibóset yvy. ¿Mbaʼérepa naiporãi pyaʼeterei jadesidi jaikuaa porãʼỹre la oiko vaʼekue? C
Taʼanga C
¿Mbaʼéichapa ikatu ndepyʼaguasu Mefibóset ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Mefibósetpe Jehová omoingove jey vove chupe?
Reikuaave hag̃ua
¿Mbaʼéichapa Mefibóset ehémplo nepytyvõkuaa epensárõ ehasa hague peteĩ inhustísia?
¿Máva mávapa umi omonoʼõ vaʼekue pyʼaguapy? Mefibóset (3:25).
Peteĩ mitã oñandúramo avave ndojeheʼaseiha hese, ¿mbaʼéichapa ituakuéra ikatu oipuru Mefibóset ehémplo oipytyvõ hag̃ua chupe?