Haʼe ipyʼaguasu oñeʼẽ hag̃ua Ñandejárare

RRÉI Jehoram omandaha tiémpope Israélpe, oiko vaʼekue peteĩ mitãkuñaʼi ipyʼaguasúva. Ndajaikuaái mbaʼéichapa héra, péro si jaikuaa peteĩ mbaʼe iñimportánteva ojapo vaʼekue. Haʼe oikoha tiémpope, pe rréi ha pe puévlo naiñeʼẽrendúi vaʼekue Jehovápe, upévare Ñandejára opermiti umi sirio ou oataka chupekuéra. Peteĩ vuéltape umi sirio ou Israélpe ha upekuévo ogueraha ko mitãkuñaʼípe Síriape.

Eñeimahinamína mbaʼeichaitépa oiméne okyhyje raʼe ko mitãkuñaʼi umi extráño apytépe. Ituakuéra katu oiméne opyta oñembyasyeterei raʼe. Ko mitãkuñaʼi oho opyta peteĩ militár omanda guasúva rógape, hérava Naamán. Ha upépe oñepyrũ ombaʼapo Naamán rembirekópe g̃uarã. Upe guive tuichaiterei okambia la hekove. Hetaite oiméne oñehaʼã raʼe ikatu hag̃uáicha ojadapta. Haʼe oiméne ohechakuaa raʼe enterovévante Naamán rógape oñembyasyha, pórke ko kuimbaʼe oreko kuri peteĩ mbaʼasy ivaietereíva hérava lépra. Ko mbaʼasy odesfigura umi héntepe ha sapyʼánte ndaikatuvéima okuera.

Ko mitãkuñaʼi ivuenaiterei vaʼekue. Haʼe oikuaáramo jepe Naamán haʼeha Israel enemígo, lomímonte ombyasy chupe ha hembirekópe. Haʼe oikuaa vaʼekue Naamán ikatuha okuera. Ikatu oime ituakuéra omombeʼu raʼe chupe umi milagroita Jehová ojapo vaʼekue iproféta Eliseo rupive. Péro haʼe ndoikuaái kuri Eliséopa omongueráma vaʼekue peteĩ persóna orekóvape peichagua mbaʼasy. Upéicharõ jepe, ko mitãkuñaʼi oikuaa porã vaʼekue Ijára Jehová ikatuha oipuru iprofétape ojapo hag̃ua oimeraẽ mbaʼe oñekotevẽva.

¿Iporãta piko omombeʼúramo la oikuaáva Jehovágui? Upéva ikatu kuri ipeligróso. Naamán ojerovia vaʼekue peteĩ dios héravare Rimón, ha pyʼỹinte ohómi vaʼekue pe rréi de Síriandi upe dios témplope oadora hag̃ua chupe. Umi sirio opensa vaʼekue Rimón haʼeha peteĩ dios imbaretetereíva, oprodusíva ama ha arasunu. Upéicharõ, ¿mbaʼéichapa Naamán orreaksionáta pe mitãkuñaʼi israelita oñeʼẽvo chupe Jehováre? ¿Ipochýtapa oñentendeka haguére chupe Jehová ikatuha ojapo peteĩ mbaʼe Rimón ndaikatúiva? Ko mitãkuñaʼi oiméne oñemboʼe raʼe Jehovápe ikatu hag̃uáicha ipyʼaguasu. Upe rire haʼe oñeʼẽ Naamán rembirekópe ha heʼi chupe: “¡Che patrón ohóramo ovisita pe proféta oĩvape Samáriape, haʼe katuete omongueráne chupe ilépragui!”.

Upevamínte jatopa la Bíbliape heʼi hague ko mitãkuñaʼi. Haʼete la isimpletereíva, péro la ojehupytýva upéva rupive tuichaiterei mbaʼe. Upe rire jahecháma Naamán ohoha pe rréi de Siria Ben-Hadad rendápe, omombeʼu hag̃ua chupe la heʼi vaʼekue pe mitãkuñaʼi. Upéi ko rréi omondo Naamánpe Israélpe ha peteĩ kárta rupive ojerure rréi Jehorámpe omonguerami hag̃ua Naamánpe ilépragui.

Naamán osẽ rire, ihentekuéra ha isiervokuéra opytámante ohaʼarõ. Oime vaʼerã oikuaasetereíma raʼe hikuái okuerátapa Naamán térãpa nahániri. Pe mitãkuñaʼi katu oiméne oñemboʼe jey jey raʼe, ikatu hag̃uáicha Jehová ohechauka Naamánpe Haʼe añoite haʼeha Ñandejára tee. Naamán oho rire, ohasáne raʼe heta día térã heta semána voi, péro upéi Naamán ou jey. Eñeimahinamína mbaʼeichaitépa oiméne ovyʼa raʼe hogayguakuéra, ohechárõ guare Naamánpe pe viáhe rire. Ipire ningo oñembyaipáma kuri pe mbaʼasy káusare, péro koʼág̃a ipyahu asy jey peteĩ mitãraʼy piréicha. ¡Okueráma hasypeve!

Pe mitãkuñaʼi oiméne oñatende porã raʼe Naamán rehe omombeʼúvo la ohasa vaʼekue. Péicha oikuaáne raʼe Eliseo nosẽi hague orresivi Naamánpe. Upéva rangue haʼe omondónte hague isiérvope heʼi hag̃ua chupe la ojapo vaʼerã, upévare Naamán ipochy. Ojekuaa hese tekotevẽ hague iñumildeve. Upéi Naamánpe heʼi isiervokuéra ojapónte hag̃ua la Eliseo heʼíva. Upémarõ haʼe oho oñapymi 7 vése rrío Jordánpe ha osẽvo upégui opytáma ipotĩ asy ha okueraite. Pe mitãkuñaʼi oime vaʼerã ovyʼaiterei raʼe ohendúvo koʼã mbaʼe. Péro ndahaʼéi upéva la ombovyʼavéva chupe. Upe tiémpo guive Naamán oñepyrũma avei oservi Jehovápe hendive.

Entéro koʼã mbaʼe oiko pórke peteĩ mitãkuñaʼi ipyʼaguasu oñeʼẽ hag̃ua Jehováre ha iprofétare. Ndajaikuaái ningo mbaʼéichapa héra ko mitãkuñaʼi, péro Jehová si oikuaa. Ñandepyʼaguasúramo haʼéicha, ikatúta jahecha ág̃a Jehová omoingove jey vove chupe. Ajépa javyʼaitéta jajotopa vove hendive, jaikuaa la héra ha mbaʼe mbaʼépa ohasa vaʼekue oikove aja.

¿Moõpa oñeñeʼẽ hese la Bíbliape?

• 2 Reyes 5:​1-19

¿Mbaʼépa ere chupe?

¿Mbaʼérepa jaʼekuaa pe mitãkuñaʼi israelita ipyʼaguasu hague?

Einvestigamína

1. 1. ¿Mbaʼérepa jaʼekuaa pe mitãkuñaʼi israelita okyhyjéne hague umi síriogui ha iñextráño hague chupe la ojapóva hikuái? (w96 15/5 8 párr. 3-wcgr). A

   Rrespuésta

   

   Courtesy of Musée du Louvre, Paris

2. 2. ¿Mbaʼeichaite pevépa pe lépra ikatu vaʼekue ombyai peteĩ persónape? (it “Lépra” párr. 3-5-wcgr).

   Rrespuésta

3. 3. ¿Mbaʼérepa Eliseo ndojagarrái vaʼekue Naamán rregalokuéra? (w05 1/8 9 párr. 2-wcgr).

   Rrespuésta

4. 4. ¿Mbaʼérepa Eliseo opensa vaʼekue Jehová operdonataha Naamánpe oñesũ haguére Rimón renondépe? (2 Rey. 5:​18, 19; w05 1/8 9 párr. 3-wcgr). B

   Rrespuésta

   

Ejepyʼamongetamína ndejehe

• Naamán omoakã vaʼekue pe ehérsito sirio oatakáva Israélpe, upéicharõ jepe Jehová omonguera chupe. ¿Mbaʼéichapa upéva ohechauka ndéve Jehová oporoporiahuverekoha ha otrataha enterovépe peteĩchante? C

  Rrespuésta

  

• ¿Mbaʼéichapa pe mitãkuñaʼi ehémplo nemokyreʼỹ epredika hag̃ua rekyhyjéramo jepe?

  Rrespuésta

• ¿Mbaʼéicha javépa ikatu avei rehechauka ndepyʼaguasuha pe mitãkuñaʼi israelita ipyʼaguasu haguéicha?

  Rrespuésta

Ejepyʼamongetamína Jehováre

• Alee rire ko rreláto, ¿mbaʼépa aaprendeve Jehovágui?

  Rrespuésta

• Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?

  Rrespuésta

• ¿Mbaʼépa aporandúne pe mitãkuñaʼi israelítape Jehová omoingove jey vove chupe?a

  Rrespuésta

Reikuaave hag̃ua

Pe mitãkuñaʼi israelita réra ndaipóri la Bíbliape. ¿Upévapa heʼise haʼe naiñimportántei hague Jehovápe g̃uarã?

¿Mbaʼérepa oĩ kuimbaʼe ha kuña réra noñemoĩriva la Bíbliape? (w13 1/8 10).

¿Mbaʼéichapa umi imitãva ikatu avei ipyʼaguasu pe mitãkuñaʼi israelítaicha?

Jehová nepytyvõta ani hag̃ua rekyhyje (11:59).