Oipytyvõ umi héntepe oservi jey hag̃ua Jehovápe

JOSÍAS oreko vaʼekue 6 áñonte rréi Manasés omanórõ guare. Manasés haʼe vaʼekue ijavuélo, upévare Josías oikuaáne raʼe ijavuélo tuichaiterei okambia hague oñepyrũ hag̃ua oservi Jehovápe. Oime vaʼerã opytaite raʼe Josías akãme mbaʼeichaitépa ijavuélo oñehaʼã vaʼekue okambia hag̃ua ha ojapo iporãva. Péro Manasés omano rire, itaʼýra Amón oñepyrũ ogoverna. Haʼe iñañaiterei ha oraha vaipaite jey umi héntepe. Upévare haʼekuéra oñepyrũ ojapo jey heta mbaʼe vai ha ndoadoravéi Jehovápe síno umi dios guaʼúpe. Rréi Amón ogoverna 2 áñorente ha upéi omano, upévare itaʼýra Josías oñepyrũma ogoverna orekópe 8 áñonte.

Josías oikoha tiémpope, oiko vaʼekue avei proféta Sofonías, proféta Jeremías, profetísa Huldá ha pe súmo saserdóte Hilquías. Ikatu oime haʼekuéra oipytyvõ raʼe Josíaspe oservi porã hag̃ua Jehovápe. La Biblia heʼi voi hese: “Josías oñepyrũ oservi itúa ypykue David Járape, upérõ haʼe imitã gueteri” (orekóne raʼe 16 áñorupi). Tiémpo rire, orekópe 20 áñorupi, haʼe oñepyrũ okambia heta mbaʼe Judápe umi hénte oadora jey hag̃ua Jehovápe. Péicha Jehová ojevale ko rréi imitãva ha ipyʼaguasúvare anivéma hag̃ua ojeadora umi dios guaʼúpe ni ojejapo hetave mbaʼe vai.

Rréi Josías oho jepe voi pe nórte gotyo ohecha hag̃ua mbaʼéichapa oĩ pe lugár ymave oĩ haguépe umi 10 trívu de Israel. La majoría umi israelita oiko vaʼekue upépe ojeguerahapa kuri ótro tetãme, upévare umi koʼág̃a oikóva upépe extranhéro meme lénto kuri. Upéicharõ jepe, Josías oho upe lugárpe ha ohundipaite avei umi altár oĩ vaʼekue umi dios guaʼúpe g̃uarã ha la haʼangakuéra.

Unos kuánto áño upe rire Josías orresivi peteĩ vendisión osorprendéva chupe. Haʼe omanda kuri oñemyatyrõ hag̃ua pe témplo. Ha oñembaʼapo aja hína upépe, pe súmo saserdóte Hilquías otopami peteĩ mbaʼe iñimportantetereíva. Haʼe otopa pe lívro ojeskrivi haguépe pe léi Jehová omeʼẽ vaʼekue Moiséspe. Posívlemente upe lívro haʼe pe Moisés voi oskrivi vaʼekue. Upémarõ pyaʼe oraha hikuái ko lívro Josíaspe ha haʼe ojapysaka porã hese ojelee aja chupe. Umi mbaʼe ohendúva oheja yvýre rréi Josíaspe. Koʼág̃a ae haʼe ohechakuaa mbaʼeichaite pevémapa umi hénte oñemomombyry hína raʼe Jehovágui. Péva ohechauka avei chupe mbaʼeichaite pevépa Jehová ipochýma hína raʼe ipuévlondi. Péro, ¿okuʼétapa Josías ohendu rire koʼã mbaʼe?

Josías pyaʼe voi omondóma 5 kuimbaʼépe oporanduka hag̃ua Jehovápe mbaʼépa Haʼe ojapóta. Haʼekuéra oho profetísa Huldá rendápe. Ko profetísa heʼi chupekuéra Jehová ipochyetereiha ipuévlo kóntrape pórke haʼekuéra are guivéma ojapo oikóvo ivaíva, upévare Jehová heʼi Judá ha Jerusalén oñehunditaha. Upéicharõ jepe, Jehová heʼi ohechaha avei mbaʼeichaitépa Josías ipyʼaporã ha pyʼaguasúpe oipytyvõ umi héntepe oadora jey hag̃ua chupe. Upévare Jehová heʼi nohundimoʼãiha umi siuda Josías oikove aja.

Upe rire, Josías osegi oipytyvõ umi héntepe oadora jey hag̃ua Jehovápe. Pe rréi ha umi hénte ojapo voi peteĩ kompromíso Jehovándi okumplipaite hag̃ua imandamientokuéra. Ha omokyreʼỹ hag̃ua umi héntepe oadora hag̃ua Jehovápe, Josías oorganisa ojejapo hag̃ua pe Páskua tuichaháicha. Upérõ guare, haʼe ha umi iprinsipekuéra omeʼẽ voi hetaiterei animál ojesakrifika hag̃ua Jehovápe g̃uarã. Oĩ avei heta opurahéiva omombaʼeguasu hag̃ua Jehovápe. Péva haʼe voi peteĩva umi Páskua tuichavéva ojapo vaʼekue Jehová siervokuéra.

Upéi Josías osegi vaʼekue ohechauka ojeroviaha. Haʼe pyʼaguasúpe opersegi umi oadorávape umi dios guaʼúpe. Peteĩ vuéltape okumpli voi peteĩ profesía orekómava 300 áñorupi. ¿Mbaʼéichapa? Haʼe oho peteĩ lugár oĩháme peteĩ altár ojepurúva pe adorasión fálsape, upe rire ohapy umi hénte kanguekue hiʼári ha upéi ohundiete (1 Rey. 13:2). Josías ohundi avei entéro umi altár ha taʼanga umi hénte oipuru vaʼekue oikóvo rréi Salomón oheja guive Jehovápe. Péro ojapo rire entéro koʼã mbaʼe, Josías ou kuri odesidi vai peteĩ mbaʼe. Haʼe osẽ oho oñorairõ faraón Nekó kóntrape. Nekó oavisa porã Josíaspe ani hag̃ua ojapo upéva pórke Jehová voi heʼi upéicha. Upéi la Biblia nomombeʼuiete Josías oho hague oporandu umi profétape oikuaa hag̃ua añetépa Jehová heʼi raʼe upéicha faraónpe. Upéva rangue Josías ojepreparántema ha oho ikóntrape. Jaʼéta voi ningo Josías rehe ipyʼaguasu hague ojapóvo péicha, péro legálmente ojapeligra rei kuri ha ohechauka ivyroha. Amo ipahápe Josías omano upe ñorairõme orekópe 39 áñonte.

¿Serápa Jehová omarkaitéma raʼe Josíaspe ha hesarái entéro mbaʼe porã ojapo vaʼekuégui? ¡Ni mbaʼevéicharõ! Josías omanórõ guare, proféta Jeremías oskrivi voi peteĩ músika jaheʼo ohechauka hag̃ua mbaʼeichaitépa oñembyasy. Ha según umi mbaʼe la Biblia omombeʼúva, umi israelita osegi vaʼekue opurahéi upe músika jaheʼo heta áñore. Ág̃a Josías orresusita vove ikatúta olee entéro umi mbaʼe la Biblia heʼíva hese. Ha upérõ ág̃a oikuaáta avei Jeremías ojapo hague peteĩ purahéi omombaʼe hag̃ua chupe. Ojekuaa porã Jehová ohayhueterei hague Josíaspe ha haʼe núnka ndahesaráiri mbaʼeichaitépa Josías ojerovia ha ipyʼaguasu vaʼekue.

¿Moõpa oñeñeʼẽ hese la Bíbliape?

• 2 Reyes 22:1–23:30

• 2 Crónicas 33:21–35:27

¿Mbaʼépa ere chupe?

¿Mbaʼérepa jaʼekuaa Josías ipyʼaguasu hague?

StockStudio/Alamy Stock Photo

1. 4. Profetísa Huldá heʼi vaʼekue Josíaspe oñeñotỹtaha pyʼaguapýpe, péro haʼe omano vaʼekue gerrahápe. ¿Oñekumplípa raʼe upéicharõ upe profesía? (2 Rey. 22:20; w00 15/9 30 párr. 2, 3-wcgr).

   Rrespuésta

Ejepyʼamongetamína ndejehe

• Josías ohasáne raʼe heta mbaʼe ijetuʼúva imitãme itúa haʼe rupi apóstata. ¿Mbaʼépa umi kristiáno koʼag̃agua ikatu oaprende chugui oimérõ ohasa raʼe avei heta mbaʼe ijetuʼúva imitãme?

  Rrespuésta

• Josías oñehaʼãmbaite vaʼekue ontende porã hag̃ua Ñandejára ñeʼẽ (2 Crón. 34:21). ¿Mbaʼéichapa ikatu jasegi iñehémplo? B

  Rrespuésta

  

• ¿Mbaʼéicha javépa ikatu avei ndepyʼaguasu Josías ipyʼaguasu haguéicha?

  Rrespuésta

Ejepyʼamongetamína Jehováre

• Alee rire ko rreláto, ¿mbaʼépa aaprendeve Jehovágui?

  Rrespuésta

• Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?

  Rrespuésta

• ¿Mbaʼépa aporandúne Josíaspe Jehová omoingove jey vove chupe?

  Rrespuésta

Reikuaave hag̃ua

Ehechamína mbaʼéichapa odesidi vaʼekue Josías ha otro mokõi rréi imitãva.

Mitãrusukuéra: ¿Mbaʼéichapa ikatu pesẽ porã? (w23.09 8-13).

¿Josías piko haʼeñónte oipytyvõ raʼe umi héntepe oadora jey hag̃ua Jehovápe? Ehechamína upéva ko vidéope.

Rréi Josías istória: jahayhu vaʼerã Jehovápe ha ndajachaʼéi vaʼerã umi mbaʼe vaíre (párte 2, vidéo mbykyvéva) (3:43).