54 APÓSTOL JUAN
Ipyʼaguasu haʼetéramo jepe ndaiporivéimava esperánsa
“ÑAIMÉMA hína pe última órape”, heʼi vaʼekue apóstol Juan. Jesús ha apóstol Pablo heʼi vaʼekue umi apóstata oiketaha kongregasiónpe, omboʼetaha heta japu ha oraha vaitaha ermanokuérape. Upéva oñepyrũrõ guare oiko, umi apóstol ojoko kuri umi apóstatape pono omboʼe ermanokuérape enseñánsa japu (Mat. 7:15; Hech. 20:29, 30; 2 Tes. 2:6, 7). Péro mbeguekatúpe umi apostolkuéra omano ohóvo, ha amo ipahápe Juántema hemby. Upévare haʼe heʼi vaʼekue: “Ñaiméma hína pe última órape”. Apóstol Juan ohechakuaa vaʼekue umi mbaʼe omboʼéva koʼã apóstata ojagarrapaitemaha ohóvo umi kongregasión. Haʼete vaʼekue voi koʼẽrõitéma ndaiporimoʼãveimaha ni peteĩ kristiáno tee. Péro Juan ndoperdéi la esperánsa ha osegi ipyʼaguasu.
Umi apóstata ojagarrapa ohóvo umi kongregasión ha Juánpe katu ojepersegi ha ojeapresa Pátmospe. ¿Mbaʼépa oipytyvõ chupe oaguanta hag̃ua?
Orekórõ guare 90 áñorupi, apóstol Juan iguápoiti vaʼekue predikasiónpe. Upévare oñemondo chupe prisionéroramo Pátmospe, haʼéva peteĩ ísla ndaiporihápe mbaʼeve ha opytáva Mar Egéope. Juan heʼi vaʼekue voi: “Che aĩ kuri ísla Pátmospe añeʼẽ haguére Ñandejárare ha amombeʼu haguére la verda Jesúsgui”. ¿Mbaʼépa oipytyvõ vaʼekue apóstol Juánpe ani hag̃ua oñedesanima upe tiémpope? Katuete oiméne imanduʼa raʼe Jesús heʼi hague: “Penemanduʼáke, che aĩta penendive káda día, og̃uahẽ meve pe fin” (Mat. 28:20).
Ohasa rire 60 áñorupi Jesús heʼi hague upéva, Juan ohecha ha ohendu jey Jesúspe peteĩ visiónpe. ¡Mbaʼeichaitépa oiméne ombovyʼa raʼe chupe upéva! Jesús ohechauka Juánpe peteĩ visión ndaijojaháiva oúva Ñandejáragui. Upe visiónpe Juan ohecha umi kristiáno oadora porã jeytaha Jehovápe “ñande Ruvicha díape”. Péro ndahaʼéi upévante, haʼe ohecha avei Jesús oipytyvõtaha isegidorkuérape oaguanta hag̃ua la Satanás ojapóva ikontrapekuéra.
¿Juan piko ontendepa raʼe mbaʼépa orrepresenta umi mbaʼe ohecháva pe visiónpe? Oiméne nontendepái raʼe, péro katuete ontendéne raʼe peteĩ mbaʼe iñimportánteva. Umi apóstata ojagarrapáramo jepe ohóvo umi kongregasión, upéva ndeʼiséi Jehová ha Jesús ndaipuʼakaveimaha hesekuéra. Haʼe ohecha vaʼekue amo gotyove “ñande Ruvicha díape”, Ñandejára puévlo oho jeytaha tape porãre ha oadora jeytaha Jehovápe haʼe oipotaháicha. Satanáspe katu oñemosẽta yvágagui, oñemombóta ko yvy ape ári ha katuete oñehundíta. Apóstol Juan oskrivipaite “entéro mbaʼe ohecha vaʼekue”. ¡Mbaʼeichaitépa oiméne omokyreʼỹ raʼe chupe ko visión!
Katuete oiméne ijetuʼu raʼe Juándi oĩrõ guare préso Pátmospe, péro ni upeichavérõ haʼe ndoúi oñedesanima ni oñentrega. Upe tiémpope, pe emperadór rrománo Domiciano opersegi vaipaite hína kuri umi kristiánope. Péro por lo vísto haʼe omano rire, ojepoi jey Juángui. Osẽ rire Pátmosgui, haʼe posívlemente oho oiko Éfesope. Péro Juan orekórõ guare 100 áñorupi, oñemeʼẽ jey chupe peteĩ asignasión iñimportantetereíva.
Jehová ojevale vaʼekue Juan rehe oskrivi hag̃ua pe cuarto lívro oñeʼẽva Jesús rekovére. Juan oiméne oikuaa raʼe ko lívro pyaʼeterei isarambitaha umi kristianokuéra apytépe ha oipytyvõtaha chupekuéra ipyʼaguasu ha ojeroviave hag̃ua. Ojapo rire upéva, umi oñemoĩ vaʼekue oikóvo kristianokuérare koʼytevéntema ndochaʼemoʼãi kuri hese. Péro upéva ndojokói Juánpe.
Upérõ guare ohasáma 70 áñorupi Jesús omano hague. Upéicharõ jepe apóstol Juan imanduʼa porã umi mbaʼe Jesús heʼi ha ojapo vaʼekuére, pórke pe espíritu sánto oipytyvõ chupe. Apóstol Juan oskrivi vaʼekue peteĩ lívro iporãitereíva ha opokóva ñane korasõre. La majoría umi mbaʼe haʼe heʼi vaʼekue noñemombeʼúi lívro de Mateo, Marcos ha Lúcaspe. Por ehémplo, Juan añoite omombeʼu Jesús omoingove jey hague Lázarope, ha upéi umi líder rrelihióso ojukase hague chupe (Juan 11:1-46; 12:10). Juan omombeʼu porã avei umi mbaʼe Jesús heʼi vaʼekue idisipulokuérape ha pe ñemboʼe ojapo vaʼekue hesehapekuéra pe pyhare omano mboyve. ¡Ajépa iporãite entéro kristiánope g̃uarã ko Juan oskrivi vaʼekue!
Upe tiémporupi avei, Jehová ojevale Juan rehe oskrivi hag̃ua mbohapy kárta iñermanokuérape. Koʼã kártape haʼe pyʼaguasúpe heʼi umi apóstata oikemaha kongregasiónpe. Haʼe heʼi avei umi kristiánope ani hag̃ua ojeheʼa hesekuéra ni osaluda chupekuéra. Koʼã kárta rupive haʼe omeʼẽ avei esperánsa ha heta vése oñeʼẽ pe mborayhúre. Por ehémplo, Juan heʼi vaʼekue ‘Ñandejára haʼeha mborayhu’. Ha haʼe voi ohechauka upe mborayhu oporomokyreʼỹ ha oporoakonsehárõ guare. Haʼe heʼi avei ovyʼaitereiha ohecha haguére itaʼyrakuéra “osegiha oiko pe añetegua rapére”. Heta oleéva ikárta, katuete oiméne osegi raʼe ojapo upéicha.
Koʼág̃arupi ndajahasamoʼãvéima enteroite mbaʼe Juan ohasa vaʼekue. Oĩ añete la apóstata, péro ndaikatumoʼãi ombyai hikuái pe kongregasión kompletoite, oiko haguéicha apóstol Juan omano rire (Is. 54:17; Hech. 3:21). Upéicharõ jepe, ikatu hína jajepersegi térã ñañeenkarsela oiko haguéicha Juan rehe. Upéicha javékena jasegi iñehémplo. Jajedesidi toiko la oikóva, ¡ñande jasegitaha jaguata pyʼaguasúpe Ñandejára rapére!
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Juan ipyʼaguasu hague?
Einvestigamína
1. ¿Mbaʼérepa jaʼekuaa Juan ikarákter mbareteʼi hague ñepyrũrã? (bt 37, rrekuádro párr. 3, 4).
2. ¿Mbaʼérepa ojeʼe vaʼekue Juan rehe “ilápi mbykyha ha avave nomombaʼeiha” chupe? (Hech. 4:13; w08 1/5 29 párr. 6).
3. ¿Mbaʼépa Jesús ontendekase vaʼekue Juan 21:22-pe? (nóta de estúdio oĩva Juan 21:22-pe, nwtsty-wcgr).
4. ¿Mbaʼérepa jaʼekuaa Juan oskrivi hague pe cuarto lívro oñeʼẽva Jesús rehe? (bsi08-1 11, 12 párr. 3, 4). A
Fondation Martin Bodmer, Cologny (Genève)
Taʼanga A: Manuskríto áño 200-pe guare, orekóva peteĩ título heʼíva: “Notísia porã oskrivi vaʼekue Juan”
Ejepyʼamongetamína ndejehe
Juan oñeʼẽ vaʼekue mas de 100 vése Jesús sakrifísiore ha umi mbaʼe porã jahupytývare upéva rupive. ¿Mbaʼéichapa ñande avei ikatu jahechauka ñamombaʼetereiha Jesús sakrifísio?
Apóstol Juan orekórõ guare haimete 100 áñorupi, Jehová ojevale hese oskrivi hag̃ua mokõi lívro ha mbohapy kárta oĩva la Bíbliape. ¿Mbaʼéichapa upéva ñanepytyvõ jaikuaa hag̃ua mbaʼépa Jehová opensa umi ijedávare? B
Taʼanga B
¿Mbaʼéichapa ikatu ndepyʼaguasu Juan ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼérepa reagradese Jehovápe oiporavo haguére Juánpe ogoverna hag̃ua Jesúsndi yvágape?
Reikuaave hag̃ua
¿Ikatúpa umi ermáno ha ermána ijedáva ipyʼaguasu Juan ipyʼaguasu haguéicha?
Juan heta vése oñeʼẽ vaʼekue pe mborayhúre. Ehechamína mbaʼépa ikatu reaprende iñehémplogui ha la oskrivi vaʼekuégui.
¿Mbaʼépa ñanemboʼe “pe disípulo Jesús ohayhúva”? (w21.01 8-13).