“Ani jakyhyje”

1. Ñaanalisa rire ko lívro, ¿jarekovéitipa la jaʼe vaʼerã pe pyʼaguasúre?

JALEEPA rire umi kapítulo orekóva ko lívro, ¿jarekovéitipa la jaʼe vaʼerã pe pyʼaguasúre? Si, pórke peteĩ lívropente ndaikatumoʼãi ñaanalisapa entéro mbaʼe la Biblia heʼíva pe pyʼaguasúre. Ha oĩ avei peteĩ mbaʼe iñimportánteva ñanepytyvõtava ñandepyʼaguasu hag̃ua ñaaprende haguéicha ko lívrope. ¿Mbaʼépa hína upéva? Jahechamína.

2. Apárte umi jahecha vaʼekuégui ko lívrope, ¿oĩvépa ótro ipyʼaguasu vaʼekue avei?

² Ko lívrope jahecha oĩ hague heta kuimbaʼe ha kuña ipyʼaguasúva. ¿Péro ikatúpa nemanduʼa ótro personáhe nañañeʼẽi vaʼekuére ko lívrope? Ikatu ou ndéve ne akãme umi proféta yma guare. Por ehémplo Isaías, Jeremías, Jonás térã Malaquías. Haʼekuéra oiméne ohasa raʼe umi mbaʼe Pablo heʼi vaʼekue Hebreos kapítulo 11-pe. Upépe Pablo heʼi oĩ hague ohasa asýva “oĩgui oñembohorýva hesekuéra ha oinupãva chupekuéra harreadórpe, ha ndahaʼéi voi upévante, algúnope oñeenkadena ha oñemoinge kárselpe”. Pablo heʼi avei oĩ hague ‘ohasáva nesesida, osufri ha oñemaltratáva’. Oĩ vaʼekue voi ojejukáva (Heb. 11:​36, 37). Ijetuʼuetereíramo jepe hendivekuéra, haʼekuéra pyʼaguasúpe osegi vaʼekue oservi Jehovápe.

3, 4. ¿Mbaʼéichapa mokõi kuña oipytyvõ vaʼekue rréi Davídpe ijetuʼúrõ guare la situasión?

³ Oĩ heta kuimbaʼe ha kuña ipyʼaguasu vaʼekue noñemombeʼúiva la héra la Bíbliape. Jahechamína la ojapo vaʼekue mokõi kuña David tiémpope guare. Haʼekuéra oipytyvõ vaʼekue chupe itaʼýra Absalón opuʼãrõ guare hese. Absalón iñaña ha ijejapoiterei vaʼekue. Haʼe oñehaʼã voi ojuka itúa Davídpe ikatu hag̃uáicha ogoverna hendaguépe Israélpe. Upévare David osẽmante Jerusaléngui. David ojerure pe saserdóte Sadócpe oho jeýnte hag̃ua pe siudápe ikatu hag̃uáicha omombeʼu chupe mbaʼépa Absalón oplanea hína ojapo. Sadoc oikuaárõ guare la Absalón ojaposéva, omondo ‘peteĩ siérvape’ omombeʼu hag̃ua upéva Davídpe. Ko mitãkuña ikatúramo jepe omano, pyʼaguasúpe oho omombeʼu mokõi David siérvope la Sadoc heʼikáva chupe. Koʼã mokõi kuimbaʼe ohokuévo David rendápe, peteĩ mitãrusu ohecha chupekuéra ha oho ojagua hesekuéra Absalónpe. Upémarõ koʼã mokõi kuimbaʼe oike okañy peteĩ pósope. Pe póso jára rembireko pyaʼe porã otapa pe póso juru peteĩ télape ha omoĩ hiʼári trígo rakãngue. Upéi Absalón siervokuéra oúrõ guare oheka koʼã kuimbaʼépe, pe kuñakarai omondo chupekuéra ótro ladoite. ¿Mbaʼéichapa héra vaʼekue koʼã mokõi kuña? La Biblia nomombeʼúi. Péro haʼekuéra ipyʼaguasu rupi, oprotehe kuri pe rréi Jehová omoĩ vaʼekuépe (2 Sam. 15:​23-37; 17:​8-22).

⁴ Ojekuaa porã la Bíbliape ikatuha jatopa heta kuimbaʼe ha kuña ipyʼaguasúva istória. Oĩ vaʼekue iplátava ha imboriahúva, orekóva heta rresponsavilida ha nahaniriguasúiva, algúno oñemombeʼu la héra ha ótro katu nahániri. Péro tahaʼe haʼeháicha, enterovévante pyʼaguasúpe oservi vaʼekue Jehovápe. Iñehemplokuéra ikatu ñanepytyvõ koʼag̃aite peve.

Iñimportanteterei ñañemboʼe

5-7. ¿Mbaʼépa oipytyvõ vaʼekue Páblope ipyʼaguasu hag̃ua ombohováiramo jepe heta mbaʼe ijetuʼúva?

⁵ ¿Mbaʼéichapa ikatu ñandepyʼaguasu umi kuimbaʼe ha kuña yma guaréicha? Ñanemanduʼa vaʼerã haʼekuéra ndahaʼéi hague ipyʼaguasúva ijehegui reínte. ¿Mbaʼépa upéicharõ oipytyvõ vaʼekue chupekuéra oservi hag̃ua pyʼaguasúpe Ñandejárape?

⁶ Ñanemanduʼamína apóstol Páblore. Haʼe ha Silas ohórõ guare Filípospe, peteĩ hénte aty oataka chupekuéra. Koʼã hénte omondoro chuguikuéra ijao ha oinupã chupekuéra garrótepe. Upéi omondo chupekuéra peteĩ kalavósope ha ojopy chuguikuéra ipy sépope (Hech. 16:​12, 19-24). ¿Mbaʼéichapa oñeñandu Pablo ojepoi rire chuguikuéra? ¿Opytápa raʼe okyhyje? Ndahasýi kuri la upéva oiko hag̃ua. Péro Pablo oreko kuri peteĩ asignasión oúva Jehovágui ha oikuaa oho vaʼerãha Tesalónicape opredika hag̃ua. ¿Mbaʼe la ombopyʼaguasu vaʼekue chupe ikatu hag̃uáicha oho upépe?

⁷ Tiémpo rire haʼe heʼi vaʼekue: “Peẽ peikuaaháicha primerorã heta rohasa asy Filípospe ha rojetrata vai. Ha upe rire Ñandejára orembopyʼaguasu romombeʼu hag̃ua peẽme umi notísia porã, rombohováiramo jepe heta mbaʼe ijetuʼúva” (1 Tes. 2:2). Pablo oikuaa vaʼekue ipyʼaguasu vaʼerãha ojapo hag̃ua la Ñandejára omandáva chupe. ¿Péro haʼe piko ijehegui reínte voi ipyʼaguasu vaʼekue? ¿Térãpa oĩ la oipytyvõva chupe? Pablo heʼi ‘Ñandejára ombopyʼaguasu’ hague chupe. Haʼe umíldemente ojerure Jehovápe ombopyʼaguasu hag̃ua chupe ha Jehová omeʼẽ chupe la oikotevẽva.

8. ¿Mbaʼéichapa ikatu jasegi Pablo ehémplo ñandepyʼaguasu hag̃ua?

⁸ Ani rejepyʼapy repenságui nekangyha térã ndepyʼaguasu vaʼerãha ndejehegui reínte. Upéva rangue eñemboʼe Jehovápe ojapo haguéicha Pablo ha ejerure chupe pe pyʼaguasu reikotevẽva (Hech. 4:29).

9. ¿Mbaʼérepa iporãta jajeruréramo Ñandejárape jajeroviave hag̃ua?

⁹ Ikatu avei ejerure Jehovápe ejeroviave hag̃ua. Pe jerovia ou Jehová espíritu sántogui ha ojogua peteĩ eskúdo ñandeprotehévape Satanásgui (Gál. 5:​22, 23; Efes. 6:16). Pe jerovia ikatu ñanemombarete ñandepuʼaka hag̃uáicha voi ko múndore (1 Juan 5:4). Ñandepyʼaguasu hag̃ua jajeroviámante vaʼerã Jehováre. Jagueroviáramo Jehová ñanepytyvõtaha ñaikotevẽ jave, tuichaiterei ñandepyʼaguasuvéta. Upévare ojapo haguéicha umi apóstol, iporãta entéro kristiáno heʼíramo Ñandejárape: “Orepytyvõna rojeroviave hag̃ua” (Luc. 17:5).

“¡Pendepyʼaguasúkena!”

10, 11. ¿Mbaʼérepa Pablo heʼi vaʼekue umi kristiáno oikóvape Jerusalénpe ha ijerére tekotevẽha ipyʼaguasu?

¹⁰ Jesús oprofetisa vaʼekue Jerusalén oñehunditaha. Unos kuánto áño oiko mboyvemi upéva, Pablo oskrivi vaʼekue umi ermáno oikóvape Jerusalénpe ha ijerére. ¿Maʼerãpa? Ikatu hag̃uáicha ojeprepara hikuái oaguanta hag̃ua umi mbaʼe oikótava koʼẽrõite (Luc. 19:​41-44; 21:​20-24). ¿Mbaʼéichapa Pablo oipytyvõ chupekuéra ipyʼaguasu hag̃ua? Jahechami jeýna la haʼe heʼi vaʼekue. Upéva ñaanalisáma kuri pe introduksiónpe ko lívrope. Haʼe omomanduʼa chupekuéra Jehová heʼi hague: “Núnka ndorohejamoʼãi ha núnka nderepytamoʼãi neaño”. ¿Mbaʼéichapa upe promésa oipytyvõ chupekuéra? Pablo upéi heʼive: “Ani jakyhyje, síno jaʼe vaʼerã: ‘Jehová chepytyvõ hína, ndakyhyjemoʼãi asy, ¿mbaʼe piko ojapóta cherehe peteĩ persóna cheichagua?’” (Heb. 13:​5, 6).

¹¹ La Biblia nomombeʼúi mbaʼépa la oiko vaʼekue umi rrománo ohundírõ guare Jerusalén áño 70-pe. Péro ikatu ñaĩ segúro umi kristiáno oreko hague enkuénta la Pablo heʼi vaʼekue. Upéicha rupi ipyʼaguasu hikuái oho hag̃ua “umi montáñare” omanda haguéicha Jesús. ¡Hiʼoraitépe ojapo hikuái upéva! (Luc. 21:​20, 21).

12. (a) ¿Mbaʼépa nepytyvõta ndepyʼaguasu hag̃ua ijetuʼu jave? (b) ¿Mbaʼéichapa unos kuánto ermáno ohechauka vaʼekue ipyʼaguasuetereiha ha mbaʼépa nde rejedesidíma rejapotaha? (Ehecha pe rrekuádro “¡Ndepyʼaguasúkena haʼekuéraicha!”).

¹² Jehová ikatu avei nembopyʼaguasu ndéve reikotevẽha óra, tahaʼe koʼág̃a térã amo gotyove (Ezeq. 38:​1, 2, 10-12; Mat. 24:21). Aníkena nderesarái Jehová voi oprometéma hague ndeprotehetaha (Ezeq. 38:​19-23; 2 Tes. 3:3). Rehayhúramo Jehovápe ha rejerovia hese, Haʼe núnka nanderejamoʼãi. Heʼi haguéicha Josuépe, Jehová heʼi avei ndéve: “Ndepyʼaguasu ha nembaretékena” (Jos. 1:​7, 9, 18). Ha siémprekena nemanduʼa Jesús heʼi hague: “¡Pendepyʼaguasúkena!”. Jesús katuete okumplíta ipromésa omeʼẽvo ndéve Jehová espíritu sánto. Péicha ikatúta ndepyʼaguasu rembohovái hag̃ua oimehaichagua situasión (Juan 14:26; 15:​26, 27; 16:33). Jahecha rire entéro koʼã mbaʼe, ¡mbaʼéicha voi piko ndajaʼesemoʼãi ojupe: “Ani jakyhyje”!

13. ¿Mbaʼépa nemokyreʼỹ resegi hag̃ua ndepyʼaguasu?

¹³ Eñeimahinamíma mbaʼeichaitépa jaiko porãta oĩ vove pyʼaguapy ko múndo kompletoitépe. Jehová orekóma iñakãme máva mávapepa omoingove jeýta. Eñeimahinamína erresiviha umi kuña ha kuimbaʼe ipyʼaguasuetévape, ñañeʼẽ hague ko lívrope. ¡Haʼekuéra oikovepa jeýta ha hetave ótro avei! Upe tiémpope, ¿ndépa ere haʼekuéra ombyasytaha odesidi haguére ifieltaha Jehovápe ko Satanás múndope? ¿Ombyasýtapa hikuái odesidi haguére pyʼaguasúpe oservi Ñandejárape, ojejukátaramo jepe chupekuéra? Nahaniriete voi. ¿Ha nde? Ág̃a rembaʼapo vove hendivekuéra pejapo hag̃ua ko yvýgui peteĩ paraíso, ¿rembyasýtapa redesidi haguére rehayhutaha Jehovápe ha pyʼaguasúpe reservi chupe koʼã ára pahápe? ¡Ni mbaʼevéicharõ! Upéicharõ, ejedesidíkena esegitaha ndepyʼaguasu ipahaite peve, péicha núnka nerembyasymoʼãi la redesidi vaʼekue ha ikatúta reiko vyʼápe pára siémpre.