“¿Mbaʼére Ñandejára ndojapói mbaʼeve?”

OIKO JAVE PETEĨ MBAʼE IVAIETEREÍVA IKATU EÑEPORANDU: ¿MBAʼÉRE ÑANDEJÁRA NDOJAPÓI MBAʼEVE?, TÉRÃ NDE VOI EHASÁRÕ PETEĨ MBAʼE IJETUʼUETEREÍVA IKATU EPENSA: ¿OJEPYʼAPÝPA ÑANDEJÁRA CHEREHE?

Ikatu oime eñeñandu Sheila oñeñandu haguéicha, haʼe oiko Estados Unídospe. Sheila okakuaa vaʼekue peteĩ família irrelihiosoitereívape ha haʼe heʼi: “Chemitã guive añemoag̃uise Ñandejárare pórke haʼe ñande Apohare, upéicharõ jepe añandu aĩha mombyry chugui. Apensa haʼe omañaha cherehe péro mombyry guivénte. Ndahaʼéi la ndacherayhúiva, péro ndagueroviái haʼe ojepyʼapyha cherehe”. ¿Mbaʼérepa Sheila oñeñandu péicha? Haʼe heʼi: “Che família ningo ohasa hetaiterei mbaʼe ijetuʼúva ojoapykueripa ha ndahechaiete Ñandejára orepytyvõha”.

Sheila ojapo haguéicha ikatu reĩ segúro Ñandejára Todopoderóso oexistiha. Péro ikatu oime eñeporandu jepi: ¿añetehápepa ojepyʼapy cherehe Ñandejára? Peteĩ kuimbaʼe ihústova hérava Job ojerovia vaʼekue ñande Apohare ipoderóso ha iñaranduha, upéicharõ jepe haʼe oikuaase vaʼekue avei upéva (Job 2:3; 9:4). Job ohasa rire hetaiterei mbaʼe ivaíva ojoapykueripa oporandu vaʼekue Ñandejárape: “¿Mbaʼére piko reñemolómo chehegui? ¿Mbaʼére piko repensa che haʼeha ne kontrário?” (Job 13:24).

¿Mbaʼépa heʼi la Biblia? ¿Ñandejára káusare piko oiko umi mbaʼe vai? ¿Oĩpa pruéva ohechaukáva Ñandejára ojepyʼapyha la héntere ha avei káda únore? ¿Ikatúpa jaikuaa añetehápepa haʼe oñeinteresa ñanderehe ha ñanentende? ¿Oikuaapa haʼe mbaʼéichapa ñañeñandu? ¿Ñanepytyvõpa ñaneprovléma jave?

Umi artíkulo oúvape, jahecháta mbaʼéichapa Ñandejára rembiapokue ha Iñeʼẽ ohechauka haʼe ojepyʼapyha ñanderehe (Romanos 1:20). Amáske reikuaa porã chupe, reimevéta segúro haʼe ojepyʼapyha nderehe (1 Juan 2:3; 1 Pedro 5:7).