¿Mávapa Ñandejára?
Heta hénte heʼi ojeroviaha Ñandejárare, péro oñeporandúvo chupekuéra mbaʼeichagua persónapa Ñandejára, naentéroi orresponde peteĩcha. Algúno opensa Ñandejára haʼeha peteĩ hués ipyʼahatãitereíva ha okastigasenteha voi umi ofallávape. Ótro katu heʼi Ñandejára ñanderayhuetereiha, ha tahaʼe haʼéva umi mbaʼe vai jajapóva haʼe ñaneperdonatanteha voi. Oĩ avei heʼíva Ñandejára oĩha mombyry ñandehegui ha noñeinteresaiha ñanderehe. Ojeʼe rupi heta mbaʼe Ñandejárare, ikatu oĩ opensáva ndaikatuiha jaikuaa porã chupe.
¿Iñimportántepa reikuaa Ñandejárape? Si iñimportánte. Reikuaa porãramo Ñandejárape isentidovéta la nde rekove (Hechos 17:26-28). Amáske eñemoag̃ui Ñandejárare, haʼe nderayhuvéta ha nepytyvõvéta (Santiago 4:8). Añetehápe, reikuaa porãramo Ñandejárape, ikatu voi hína reikove pára siémpre (Juan 17:3).
¿Mbaʼéichapa ikatu reikuaa Ñandejárape? Epensamíntena peteĩ ne amigoitére. ¿Mbaʼéicha rupípa oiko chugui ne amígo? Katuete ñepyrũrã oiméne reikuaa raʼe héra, upéi mbaʼeichagua persónapa haʼe, mbaʼépa ogusta térã ndogustái chupe, reikuaa avei umi mbaʼe ojapo vaʼekue ha umi mbaʼe ojaposéva hína. Reikuaa porã rupi chupe, oiko chugui ne amígo.
Upéicha avei ikatu jaikuaa Ñandejárape ñarrespondévo koʼã porandu:
¿MBAʼÉICHAPA HÉRA ÑANDEJÁRA?
¿MBAʼEICHAGUA PERSÓNAPA ÑANDEJÁRA?
¿MBAʼE MBAʼÉPA OJAPO VAʼEKUE ÑANDEJÁRA?
¿MBAʼÉPA OJAPÓTA ÑANDEJÁRA AMO GOTYOVE?
¿MBAʼÉICHAPA NEPYTYVÕTA REIKUAÁRAMO ÑANDEJÁRAPE?
La Biblia rupive ko rrevísta orresponde koʼã pregúnta. Koʼã artíkulo nepytyvõta reikuaa hag̃ua mávapa Ñandejára ha mbaʼéichapa ideprovéchota ndéve reikóramo iñamígoramo.