Jasegíkena Jesús ehémplo ñandepyʼaguapy hag̃ua

1, 2. ¿Mbaʼérepa Jesús ojepyʼapyeterei vaʼekue?

JESÚS omano mbotávo ojepyʼapyeterei kuri. Haʼe oikuaa saʼíma ofaltaha iñenemigokuéra otortura ha ojuka hag̃ua chupe. Péro ndahaʼéi upéva la oipyʼapyvéva Jesúspe. Haʼe ohayhueterei Itúape ha siémpre ojapose hembipota, ha oikuaa porã oaguantáramo umi pruéva ijetuʼuetéva ikatutaha oipytyvõ oñemopotĩ hag̃ua Jehová réra. Jesús ohayhu avei umi héntepe, ha oikuaa iñeʼẽrendu vaʼerãha ipahaite peve ikatu hag̃uáicha entéro yvypóra oikove opa ára g̃uarã.

² Jesús ojepyʼapyetereíramo jepe ipyʼaguapy vaʼekue. Haʼe heʼi ijapostolkuérape: “Ameʼẽ peẽme che pyʼaguapy” (Juan 14:27). Jesús oreko vaʼekue “Ñandejára pyʼaguapy”, upéva heʼise oreko hague pe trankilida ohupytýva umi persóna oĩ porãva Jehovándi. Upe pyʼaguapy otrankilisa kuri Jesúspe ha oipytyvõ chupe ani hag̃ua ojedesespera (Filip. 4:6, 7).

3. ¿Mbaʼépa jahecháta ko artíkulope?

³ Ndaipóri ñande apytépe tekotevẽtava ohasa umi mbaʼe ijetuʼuetéva Jesús ohasa vaʼekue. Péro entéro ñamoirũva chupe, jahasátante voi heta mbaʼe ijetuʼúva (Mat. 16:24, 25; Juan 15:20). Sapyʼánte umichagua situasión ñanekevrantáta avei Jesúspe okevranta haguéicha. ¿Mbaʼépa jajapo vaʼerã ani hag̃ua jajepyʼapyeterei ha upéva káusare nañandepyʼaguapyvéi? Jahechamína mbohapy mbaʼe Jesús ojapo vaʼekue oĩrõ guare ko yvy ape ári, ha avei mbaʼéichapa ñande ikatu jasegi iñehémplo ñambohovái jave umi pruéva ijetuʼuetéva.

JESÚS OÑEMBOʼE MEME VAʼEKUE

4. Emombeʼu unos kuánto ehémplo ohechaukáva Jesús ojapo hague la heʼíva 1 Tesalonicenses 5:17 pe día omano haguépe.

⁴ (Elee 1 Tesalonicenses 5:17). Jesús heta vése oñemboʼe vaʼekue pe día omano haguépe. Por ehémplo, omoñepyrũrõ guare pe Konmemorasión oñemboʼe kuri pe pan ha pe vínore (1 Cor. 11:23-25). Upéi, osẽ mboyve pe lugár ogueromanduʼa haguépe pe Páskua, oñemboʼe jey idisipulokuérandi (Juan 17:1-26). Ha og̃uahẽ rire hikuái pe lugár héravape Getsemaní, Jesús oñemboʼe jey heta vése upe pyhare (Mat. 26:36-39, 42, 44). Hiʼarive umi última palávra heʼi vaʼekue omano mboyvemi, heʼi kuri peteĩ ñemboʼe rupive (Luc. 23:46). Jahechaháicha, Jesús imanduʼa Jehováre entéro umi mbaʼe iñimportánteva ohasa vaʼekuépe omano mboyve upe díape.

5. ¿Mbaʼérepa umi apóstol ou kuri ndaipyʼaguasuvéi?

⁵ Jesús oaguanta kuri umi mbaʼe ohasáva oñemboʼe meme rupi Itúape ojerure hag̃ua chupe ajúda. Umi apóstol katu ndojapói upéva upe pyhare, ha upévare ndaipyʼaguasúi hikuái tekotevẽramo guare ohasa peteĩ pruéva (Mat. 26:40, 41, 43, 45, 56). ¿Mbaʼépa ñaaprende la oiko vaʼekuégui? Tekotevẽha ñañemboʼe meme Jesús ojapo haguéicha ikatu hag̃uáicha jasegi ñandefiél Jehovápe. ¿Péro mbaʼépa ikatu jajerure ñañemboʼe jave?

6. ¿Mbaʼéichapa ñande jerovia ikatu ñanepytyvõ jasegi hag̃ua ñandepyʼaguapy?

⁶ Ikatu jajerure Jehovápe tañanepytyvõ imbareteve hag̃ua ñande jerovia (Luc. 17:5; Juan 14:1). Upéva tekotevẽterei pórke Satanás oñehaʼãmbaitéta ñandereity hag̃ua (Luc. 22:31). ¿Mbaʼéichapa ñande jerovia ikatu ñanepytyvõ jasegi hag̃ua ñandepyʼaguapy ojoʼapáramo jepe ñandehegui umi provléma? Jajapopa rire la ikatumíva ñasolusiona hag̃ua umi provléma, jahejátama Jehová pópe upe situasión pórke jajerovia hese. Ñande ñaime segúro haʼe oikuaa porãveha mbaʼéichapa ikatu ñanepytyvõ, ha upéva katuete ñanetrankilisa ha ñanembopyʼaguapy (1 Ped. 5:6, 7).

7. ¿Mbaʼépa ñanemboʼe Robert ohasa vaʼekue?

⁷ Tahaʼe haʼéva pe situasión jahasáva, katuete ñandepyʼaguapýta ñañemboʼéramo Jehovápe. Jahechamína mbaʼépa heʼi Robert, peteĩ ansiáno koʼág̃a orekómava 80 áño rasa. Haʼe omombeʼu: “Pe konsého oĩva Filipenses 4:6, 7-pe hetáma chepytyvõ ikatu hag̃uáicha ambohovái porã heta mbaʼe ahasa vaʼekue. Por ehémplo, peteĩ tiémpore ijetuʼu kuri chendive pórke chesogue, ha avei aperde kuri che priviléhio de ansiáno”. ¿Mbaʼépa oipytyvõ raʼe Róbertpe osegi hag̃ua ipyʼaguapy ha ani hag̃ua ojedesespera umi situasiónpe? Haʼe heʼive: “Añandu jave añepyrũha ajepyʼapy peteĩ mbaʼére, añepyrũma avei añemboʼe Jehovápe. Ahechakuaa amáske añemboʼe, chetrankiloveha”.

JESÚS KYREʼỸME OPREDIKA VAʼEKUE

8. Ohechaukaháicha Juan 8:29, ¿mbaʼérepa Jesús ipyʼaguapy vaʼekue avei?

⁸ (Elee Juan 8:29). Jesúspe ojepersegíramo jepe lomímonte ipyʼaguapy vaʼekue, pórke oikuaa ombovyʼaha Itúape. Haʼe osegi kuri iñeʼẽrendu ijetuʼúramo jepe la situasión. Ohayhu Itúape ha umi mbaʼe ojapóva hesehápe haʼe vaʼekue la iñimportantevéva chupe g̃uarã. Ou mboyve ko yvy ape ári, ombaʼapo vaʼekue Ñandejárandi “peteĩ konstruktór ivaletereívaicha” (Prov. 8:30). Ha oĩ aja ko yvy ape ári katu, kyreʼỹme omboʼe heta mbaʼe Itúagui (Mat. 6:9; Juan 5:17). Upéva ombovyʼaiterei kuri Jesúspe (Juan 4:34-36).

9. ¿Mbaʼéichapa pe predikasión ikatu ñanepytyvõ ñandepyʼaguapy hag̃ua?

⁹ Ñande ningo jasegi Jesús ehémplo ñaneñeʼẽrendu jave Jehovápe ha siémpre ñanerembiapo heta jave “ñande Ruvicha servísiope” (1 Cor. 15:58). ‘Ñañemeʼẽmbaitérõ japredika hag̃ua’, umi provléma jahasáva nañandedesesperái (Hech. 18:5). Por ehémplo, umi persóna jaikuaáva predikasiónpe pyʼỹinte ijetuʼuve la isituasión. Péro oñepyrũvo ohayhu Jehovápe ha osegi ikonsého, oho porãve chupekuéra ha ovyʼave. Káda ke jahecha oikoha upéva, jajeroviave Jehová oñangarekotaha ñanderehe, ha upéva ñanepytyvõ ñandepyʼaguapy hag̃ua. Peteĩ ermána orekóva depresión ha pyʼỹinte opensáva ndovaleiha mbaʼeverã, heʼi: “Ahasa jave heta tiémpo predikasiónpe, añeñandu porãve ha avyʼave. Chéverõ g̃uarã añeñandu péicha pórke aĩ jave predikasiónpe añemoag̃uive Jehováre”.

10. ¿Mbaʼépa ñaaprende Brenda ehémplogui?

¹⁰ Ñañeʼẽmína koʼág̃a peteĩ ermána héravare Brenda. Haʼe ha imembykuña ningo oreko peteĩ mbaʼasy oreko asyetereíva chupekuéra. Brenda oiko sílla de rruédape ha siémpre ipilaʼieterei. Upéicharõ jepe, haʼe opredika ogahárupi káda ke ija chupe, péro hetave vése opredika jepi por kárta. Haʼe heʼi: “Aasepta rire ndakueramoʼãiha ko múndo aña oĩ aja entéro, añetrankilisamie ha añekonsentrave pe predikasiónre. Péicha nachetiémpoi apensaiterei hag̃ua che mbaʼasýre. Upéva rangue, añehaʼã aipytyvõ umi hénte oĩvape ore territóriope, ha upéva pyʼỹinte chemomanduʼa pe esperánsa arekóvare”.

JESÚS OHEJA OIPYTYVÕ CHUPE IÑAMIGOKUÉRA

11-13. a) ¿Mbaʼéichapa umi apóstol ha ambue disipulokuéra ohechauka vaʼekue haʼeha Jesús amigoite? b) ¿Mbaʼéichapa oipytyvõ Jesúspe iñamigokuéra?

¹¹ Jesús opredika tiémpope ko yvy ape ári, ijapostolkuéra ifiélva oĩ vaʼekue ijykére ojapoháicha umi amígo teete. Jesús omombaʼeterei iñamigokuérape pórke ojapo hikuái la heʼíva Proverbios 18:24: “Oĩ amígo nderayhuvéva ne ermánogui”. Haʼe opredika tiémpope, iñermanokuéra tee ndojeroviái kuri hese (Juan 7:3-5). Peteĩ vuéltape ihentekuéra oimoʼã voi haʼe operdéma hague ihuísio (Mar. 3:21). Péro umi apóstol idiferentete chuguikuéra. Upévare, pe pyhare omano mboyve, Jesús heʼi chupekuéra: “Peẽ akóinte peime che ykére pe ijetuʼuve jave” (Luc. 22:28).

¹² Sapyʼánte umi apóstol osẽ jepi heʼi térã ojapo peteĩ mbaʼe Jesús nohaʼarõietéva, upéicharõ jepe haʼe ndaipochýi hendivekuéra, síno oreko enkuénta haʼekuéra ojeroviaha hese (Mat. 26:40; Mar. 10:13, 14; Juan 6:66-69). Pe pyhare ojejuka mboyve chupe, Jesús heʼi koʼã kuimbaʼe ifieletévape: “Che koʼág̃a poguereko che amígoramo, aikuaaukágui peẽme opa mbaʼe che Ru heʼi vaʼekue chéve” (Juan 15:15). Jahechaháicha, Jesús amigokuéra omokyreʼỹeterei vaʼekue chupe. Haʼekuéra oipytyvõ Jesúspe opredikárõ guare ko yvy ape ári, ha upéva ombovyʼaiterei kuri chupe (Luc. 10:17, 21).

¹³ Péro Jesús ningo oreko vaʼekue hetave amígo ha amíga, umíva apytépe oĩ oipytyvõva chupe predikasiónpe ha ambue hendáicha. Por ehémplo oĩ oinvitáva chupe hógape okaru hag̃ua (Luc. 10:38-42; Juan 12:1, 2). Ótro katu omoirũ chupe iviáhepe ha okomparti hendive umi mbaʼe orekóva (Luc. 8:3). ¿Mbaʼérepa Jesús amigokuéra ohayhuete vaʼekue chupe? Pórke haʼe ikalidaiterei hendivekuéra. Jesús ojapo vaʼekue heta mbaʼe porã hesehapekuéra, ha avei ndoikói ojopyeterei hendivekuéra ojapo hag̃ua álgo ndaikatumoʼãiva ojapo hikuái. Jesús haʼéramo jepe perfékto, omombaʼe iñamigokuéra imperfékto ojapóva hesehápe. Katuete ningo umi mbaʼe ojapóva hikuái oipytyvõne raʼe Jesúspe ipyʼaguapy hag̃ua.

14, 15. ¿Mbaʼéichapa ñakonsegikuaa amígo teete, ha mbaʼéichapa ñanepytyvõ hikuái?

¹⁴ Umi amígo teete ñanepytyvõ ñandefiél hag̃ua Jehovápe. ¿Mbaʼéichapa ñakonsegikuaa peichagua amígo? Ñande voi ñandekalida vaʼerã ñande rapichakuérandi (Mat. 7:12). Por ehémplo, la Biblia ñanemokyreʼỹ jajapo hag̃ua iporãva ótro rehehápe, prinsipálmente ‘umi oikotevẽva’ rehehápe (Efes. 4:28). ¿Oĩpa ne kongregasiónpe peteĩ ermáno térã ermána oikotevẽva ajúda? ¿Ikatúpa reho rembaʼejogua peteĩ ndaikatúivape osẽ hógagui? ¿Ikatúpa reprepara álgo ojeʼu hag̃ua ha rekonvida peteĩ família oikotevẽvape? Oiméramo reipurukuaa ñande sítio jw.org^® ha pe aplikasión JW Library^®, iporãta reipytyvõramo umi oĩvape ne kongregasiónpe oipurukuaa hag̃ua avei, péicha oñevenefisiáta avei hikuái umi mbaʼe porãitégui oĩva pype. Ñañehaʼãmbaitéramo ñaipytyvõ ótrope, jarekovéta oportunida javyʼa hag̃ua (Hech. 20:35).

¹⁵ Ñane amigokuéra oĩta ñande ykére jahasa jave umi situasión ijetuʼúva, ha ñanepytyvõta jasegi hag̃ua ñandepyʼaguapy. Elihú ningo ohendu vaʼekue Jóbpe omombeʼúrõ guare chupe umi provlemaita ohasáva. Péicha avei ñane amigokuéra ojapysaka porã ñanderehe ñamombeʼu jave chupekuéra mbaʼéichapa ñañeñandu (Job 32:4). Ñande ningo nañahaʼarõi vaʼerã ñane amigokuéra odesidi ñanderehe, péro iporãta ñahendúramo umi konsého omeʼẽva ñandéve la Biblia rupive (Prov. 15:22). Rréi David iñumílde rupi oasepta vaʼekue iñamigokuéra oipytyvõséramo guare chupe. Ñande avei ndovaléi ñandeorgullóso ha jaasepta vaʼerã ñane amigokuéra ñanepytyvõséramo ñaikotevẽ jave (2 Sam. 17:27-29). Peichagua amígo ningo haʼe peteĩ rregálo oúva Jehovágui (Sant. 1:17).

¿MBAʼÉICHAPA IKATU ÑANDEPYʼAGUAPY?

16. Heʼiháicha Filipenses 4:6, 7, ¿mbaʼéicha ikatu jahupyty pe pyʼaguapy teete? Emyesakã.

¹⁶ (Elee Filipenses 4:6, 7). ¿Mbaʼérepa Jehová heʼi “Cristo Jesús rupive” ikatutaha jareko pe pyʼaguapy haʼe omeʼẽva? Pórke ñantende vaʼerã mbaʼéichapa Jesús oipytyvõ oñekumpli hag̃ua Ñandejára rembipota ha jajerovia vaʼerã hese. Péicha añoite ikatúta jahupyty pe pyʼaguapy teete. Por ehémplo, Jesús sakrifísio rupive ikatu oñeperdona entéro ñande pekadokuéra. ¡Ajépa tuichaite ñanekonsola upéva! (1 Juan 2:12). Jesús ningo ogoverna Ñandejára Rréino, ha osolusionambaitéta umi mbaʼe Satanás ha imúndo aña ojapóva ha ñandeperhudikáva. ¡Ajépa ñanemokyreʼỹete pe esperánsa jarekóva! (Is. 65:17; 1 Juan 3:8; Apoc. 21:3, 4). Jesús omanda ñandéve jajapo hag̃ua peteĩ tembiapo ijetuʼúva, péro haʼe oĩ ñanendive ha ñanepytyvõ ñakumpli porã hag̃ua upe asignasión koʼã ára pahápe. ¡Ajépa ñandepyʼaguasuve jaikuaávo upéva! (Mat. 28:19, 20). Añetehápe pe konsuélo, esperánsa ha pyʼaguasu tuichaiterei ñanepytyvõ ñandepyʼaguapy hag̃ua.

17. a) ¿Mbaʼéichapa peteĩ kristiáno ikatu osegi ipyʼaguapy? b) Heʼiháicha Juan 16:33, ¿mbaʼépa ikatúta jajapo?

¹⁷ Upéicharõ, ¿mbaʼépa jajapo vaʼerã jasegi hag̃ua ñandepyʼaguapy jahasáramo jepe umi situasión ijetuʼuetereíva? Jasegi vaʼerã Jesús ehémplo. Primero, ñañemboʼe meme. Segundo, ñaneñeʼẽrendu Jehovápe ha kyreʼỹme japredika, ijetuʼúramo jepe ñane situasión. Ha tercero, jaheja ñane amigokuéra ñanepytyvõ ijetuʼu jave ñanendive. Péicha Ñandejára pyʼaguapy oñangarekóta ñane korasõre ha umi mbaʼe ñapensávare, ha ñandepuʼakáta oimehaichagua pruévare, Jesús ojapo haguéicha (elee Juan 16:33).