Jajapo rrúta de rrevísta ñamongakuaa hag̃ua pe interés
1. Mbaʼéichapa peteĩ rrúta de rrevísta rupive ikatu ñamongakuaa pe interés?
1 Heta tapicha ñande rerohory ñag̃uahẽ jave hógape japredika hag̃ua, ha vyʼápe ojagarra ñande literatúra. Upéicharõ jepe ipyʼamokõi ostudia hag̃ua la Biblia. Upeichahápe, ñamongakuaa hag̃ua pe interés oguerekóva, ikatu jajapo upévagui peteĩ rrúta de rrevísta. Remohenda vove ñande rrevísta, remoĩvaʼerã nde rrehístrope pe óga jára réra, hóga kálle, arakaʼépa reg̃uahẽ, mbaʼe rrevístapa reheja ha mbaʼe téysto vívliko rehépa peñemongeta, ha avei oimeraẽ mbaʼe ohechaukáva pe interés oguerekóva. Og̃uahẽ vove rrevísta pyahu, ehecha mbaʼe mbaʼépa oleeséne nde rrutakuéra ha eñeʼẽ umívagui chupekuéra (1 Cor. 9:19-23). Ohasávo pe tiémpo, ikatu olee hikuái ñande rrevístape peteĩ mbaʼe omomýiva chupekuéra oikuaaseve hag̃ua.
2. Mbaʼérepa tekotevẽterei ñande rapichakuéra oheka Jehovápe koʼág̃a, ha mbaʼépa ikatu jajapove ñaipytyvõ hag̃ua chupekuéra?
2 Ñande jaikuaa heta tapicha ndoservimoʼãiha Jehovápe oleehaguére ijeheguínte ñande rrevísta. Koʼág̃a tekotevẽtereíma umi tapicha oheka Jehovápe. Upévare, mbaʼépa ikatu jajapove ñaipytyvõ hag̃ua chupekuéra? (Sof. 2:2, 3; Rev. 14:6, 7). Ñamongakuaa hag̃ua pe interés oguerekóva ikatu jaiporavo mbegue katu porã umi téysto vívliko jaiporútava jagueraha vove chupekuéra ñande rrevísta.
3. (a) Mbaʼéichapa ikatu japrepara umi téysto jaiporu hag̃uáicha peteĩ káda visítape? (b) Mbaʼe mbaʼe rehépa ikatu oñemongetase tapichakuéra nde territóriope?
3 Jaiporu peteĩ téysto vívliko ñañemongeta hag̃ua. Ejepyʼamongeta umi rrúta de rrevísta reguerekóvare ha eprepara, káda uno oikotevẽháicha, umi téysto vívliko ou porãtava chupekuéra, reiporu hag̃uáicha peteĩ téysto káda visítape (Fili. 2:4). Ñamoĩ chupe peteĩ nde rrúta de rrevístagui omanoramoha peteĩ tapicha haʼe ohayhúva. Upeichahápe, ikatu reprepara umi téysto vívliko ohechaukáva mbaʼépa heʼi Ñandejára Ñeʼẽ umi omanovaʼekuére, mbaʼéichapa oĩ hikuái ha pe esperánsa oĩva oikove jeytaha. Ikatu reiporu peteĩ téysto káda visíta rejapóvape. Pe lívro Razonamiento-pe oĩ umi téma “Muerte” ha “Resurrección” ikatúva reiporu reprepara hag̃ua umi téysto. Peñemongeta rire umi mbaʼe rehe, ndahasymoʼãi remombeʼu hag̃ua avei chupe mbaʼéichapa opáta mbaʼasy, tuja ha ñemano. Ñañehaʼãvaʼerã jatopa peteĩ mbaʼe oikuaaséva pe óga jára, ha mbegue mbeguépe jahechauka chupe mbaʼépa heʼi la Biblia upévare.
4. Mbaʼérepa iñimportánte ñaipytyvõ ñande rapichápe ontende hag̃ua umi téysto jaiporúva, ha mbaʼéichapa ikatu jajapo upéva?
4 Eipytyvõ nde rapichápe ontende hag̃ua. Ñañemongeta jave, ñañehaʼãvaʼerã ndahasýi pe jaʼéva, ha iporãve ñañeʼẽ mbykymínte. Upéicharõ jepe, ndajahái jalee hag̃uánte peteĩ téysto. Satanás omoypytũ tapichakuéra apytuʼũ ani hag̃ua ontende pe marandu porã (2 Cor. 4:3, 4). Umi oikuaáva la Biblia jepe oikotevẽ peteĩ oipytyvõva chupekuéra ontende hag̃ua Ñandejára Ñeʼẽ (Hech. 8:30, 31). Upévare, peñemongetavaʼerã ikatu hag̃uáicha rehesaʼỹijo porã pe téysto ha reiporu umi ehémplo reikotevẽva, rejaporõguáicha peteĩ asignasión pe Eskuéla dél Ministério Teokrátikope (Hech. 17:3). Rehechavaʼerã pe tapicha ontendeha mbaʼéichapa Ñandejára Ñeʼẽ ikatu oipytyvõ chupe hekovépe.
5. Mbaʼéichapa peteĩ rrúta de rrevístagui ikatu oiko peteĩ estúdio vívliko?
5 Pe tapicha oguerohorýramo umi mbaʼe oikuaaramóva, mbegue mbeguépe eñemongeta pukuve hendive ha eiporu mokõi térã mbohapy téysto reho jey jave. Ehecha mbaʼéichapa ikatu reiporu ñepyrũ pe folléto Mbaʼépa ojerure térã pe lívro Conocimiento. Upéicha rejapóramo, peteĩ rrúta de rrevístagui mbegue mbeguépe ikatu oiko peteĩ estúdio vívliko.