Ñamoñepyrũkena estúdio vívliko umi ohejávandi ñandehegui káda mes ñande rrevistakuéra
1. ¿Mbaʼérepa Jehová organisasión ñanemokyreʼỹ jagueraha hag̃ua jepi ñande rrevistakuéra umi oleesévape?
1 Heta hénte ningo oleese ñande rrevistakuéra, péro ndoipotái ñambostudia chupekuéra la Biblia. Upévare, ymaite guive Jehová organisasión ñanemokyreʼỹ jagueraha hag̃ua jepi ñande rrevistakuéra koʼãichagua héntepe. ¿Mbaʼérepa upéva? Olee meméramo umi rrevísta ikatu hína mbeguekatúpe oaprendeseve Ñandejára Ñeʼẽgui (1 Ped. 2:2). Ha jaikuaaháicha, oĩ oñepyrũva ostudia la Biblia opokógui ikorasõre peteĩ téma olee vaʼekue ñande rrevístape.
2. ¿Mbaʼéichapa ikatu ñaipytyvõ umi hénte jarahávape jepi ñande rrevistakuéra oikuaaseve hag̃ua la Biblia omboʼéva?
2 Jarregákena umi semílla ñañotỹ vaʼekue. Jaha jave jagueraha ñande rrevistakuéra umi héntepe, ñañemongeta vaʼerã hendivekuéra ha ani jahejánte umi puvlikasión ha jaha jeýma. Péicha jaikuaa porãvéta mbaʼépa oipyʼapy chupekuéra ha mbaʼépa oguerovia, upéva ñanepytyvõta jaikuaa hag̃ua mbaʼe témarepa ñañeʼẽta jaha jey vove (Prov. 16:23). Péro jaikuaaháicha, upearã jajeprepara porã vaʼerã. Jahekakuaa pe rrevístape peteĩ téma ointeresátava chupe ha peteĩ téxto ikatúva jalee. Péicha jajapóramo jarrega hína pe semílla ñañotỹ vaʼekue pe persóna korasõme (1 Cor. 3:6). Aníkena ñanderesarái ñaanota hag̃ua arakaʼépa jaha raʼe, mbaʼe puvlikasiónpa jagueraha chupe, avei umi téxto ha pe téma ñahesaʼỹijo vaʼekue.
3. ¿Mboy tiémpo haguépepa ikatu jaha jey javisita umi ohejávape jepi ñandehegui ñande rrevistakuéra?
3 Mboy tiémpo haguépepa jaha jey vaʼerã. Jagueraha hag̃ua umi rrevísta umi héntepe jaha vaʼerã káda mes. Péro jahakuaa pyʼỹive jahecháramo pe persóna oñeinteresa ha ikatutaha oñatende ñanderehe. Por ehémplo, una térã dos semána haguépe ikatu jaha jey ha jaʼe: “Pe rrevísta aheja vaʼekuépe ndéve akokuehe alee peteĩ mbaʼe iñinteresantetereíva, ha ahechaukasemi ndéve upéva”. Péicha jajapóramo ikatu hína oikuaase mbaʼépa heʼi umi ótro artíkulope. Péro oĩramo heʼíva ñandéve oleéma hague, ikatu ñaporandu chupe mbaʼépa opensa upe témare ha ñañemongetaʼimi hendive. Ha umi ogustaitereívape ñande rrevistakuéra katu, ñapresentakuaa umi tratádo, folléto térã lívro ñaikuaveʼẽva hína upe méspe.
4. ¿Mbaʼépa ikatu jajapo ñamoñepyrũ hag̃ua estúdio vívliko umi ohejávandi jepi ñande rrevistakuéra?
4 Nañahaʼarõi vaʼerã umi hénte ojerure raẽ ñandéve ñambostudia hag̃ua chupekuéra la Biblia, ñande voi ñañehaʼã vaʼerã ñambohape jajapo hag̃ua upéva. Ñepyrũrã ningo ikatu ndostudiaséi, upéicharõ jepe ikatu ñahesaʼỹijo hendivekuéra pe párte hérava: “La Biblia ombohovái koʼã porandu”, oĩva ñande rrevísta Ñemañaháme. Péicha mbeguekatúpe ikatu hína ñamoñepyrũ hendivekuéra peteĩ estúdio vívliko. Péro nañakonsegíriramo jepe upéva, ¡ani ñanekaneʼõ! Lomímonte jagueraha vaʼerã chupekuéra umi rrevísta, péicha oñeinteresavéta ohóvo hikuái umi mbaʼe omboʼévare la Biblia.