Japredika jaiporiahuverekógui ñande rapichakuérape
1 Heta tapicha ou Jesús rendápe ohendu hag̃ua chupe. Haʼe “ohechakuaa haʼekuéra ikaneʼõ ha ikangypaha ku ovecha herekuaʼỹvaicha” (Mat. 9:36). Upévare, mborayhúpe okonsola ha omboʼe umi mbaʼe Ñandejára ojeruréva ha omeʼẽ chupekuéra oikotevẽva espiritualménte. Jajepyʼamongetáramo Jesús rembiapokuére, ñapensa ha ñañandúta haʼéicha avei, ha japredika jave jahechaukáta avei japoroporiahuverekoha.
2 Jesús rendápe ou umi oikotevẽtereíva hese. Jahechamína koʼág̃a mbaʼéichapa oñatende hesekuéra (Luc. 5:12, 13; 8:43-48). Imbaʼerechakuaa umi oikotevẽvéva ndive (Mar. 7:31-35). Ohechakuaa mbaʼépa oñandu umi tapicha ha ojepyʼapy hesekuéra. Avei, Jesús nomañái pe ojekuaávarente, síno ohecha mbaʼépa oĩ ipyʼapýpe (Luc. 7:36-40). Péicha jahecha Jesús oporoporiahuverekohague Ñandejaraichaite.
3 “Oiporiahuvereko chupekuéra”. Jesúspe g̃uarã pe predikasión ndahaʼéi peteĩ mbaʼe ojejapovaʼerãnte. Haʼe ohecha mbaʼéichapa oĩ umi tapicha ha “oiporiahuvereko” chupekuéra (Mar. 6:34). Upéicha avei koʼág̃a, ñande ndahaʼéi japredikánteva, síno ñañehaʼã jasalva ñande rapichakuérape. Jaikuaasevaʼerã mbaʼérepa pe tapicha oñeʼẽ ñandéve upéicha. Mbaʼépa oipyʼapy chupekuéra? Oimépa ombotavy chupekuéra umi omoakãva irrelihión ha noñangarekói hesekuéra? Ohechakuaáramo jajepyʼapyha ñande pyʼaite guive hesekuéra, ikatu ohenduse pe marandu porã (2 Cor. 6:4, 6).
4 Jaiporiahuverekóramo ñande rapichápe, ikatu ñag̃uahẽ ikorasõme. Jahechamína peteĩ mbaʼe oikovaʼekue. Peteĩ kuñakarai ohasa asyeterei omanohaguére imembykuñaʼi orekóva tres mése. Ohórõ guare mokõi Testígo hógape, haʼe oheja oike odiskutiségui chupekuéra mbaʼérepa Ñandejára oheja jahasa asy. Upéi pe kuñakarai heʼi: “Añeñandu porãve ahechávo cheporiahuverekoha hikuái ha mbaʼéichapa cherendu. Upévare, ohokuévo haʼe chupekuéra ou jeykuaaha chevisita”. Ñañehaʼãpa avei jaiporiahuvereko opavavépe japredika jave?
5 Japoroporiahuverekóramo ikatúta ñakonsola ñande rapichápe. Ha péicha ñamombaʼe Jehovápe, pe “ñande Ru oporoporiahuverekóva” (2 Cor. 1:3, Versión Popular, VP).