Ñaipytyvõ ñande rapichápe oguerohory hag̃ua Jehovápe
1 Japredika jave ndahaʼéi ñamboʼénteva ñande rapichápe umi mbaʼe iñimportantevéva la Bíbliagui. Ñaipytyvõ avei oikuaa hag̃ua Jehovápe ha oguerohory hag̃ua chupe. Umi tapicha ipyʼaporãva oikuaávo pe añetegua Ñandejáragui, oñepyrũ imbarete okambia hag̃ua hekove. Péicha hekove “oguerohorýta Ñandejárape” (Col. 1:9, 10; 3:9, 10, JMP).
2 Lívro pyahu jastudiátava tapichakuérandi. Iñepyrũ guive Mbaʼépa omboʼe la Biblia? ohechauka mbaʼeichaguápa Jehová. Primer kapítulope oñembohovái koʼã porandu: añetehápepa ojepyʼapy Ñandejára ñanderehe?, mbaʼeichaguápa Ñandejára? ha, ikatúpa ñañemoag̃ui Ñandejárare? Avei ohechauka mbaʼeichaitépa Jehová imarangatu (párr. 10); ñanembyasy ha ohayhu hustísia (párr. 11); ñanderayhu (párr. 13); ipuʼakapa (párr. 16), iporiahuvereko, imbaʼeporã, oĩmbaite operdona hag̃uáicha, ipasiénsia ha ileál (párr. 19). Upévare, párrafo 20 heʼi: “Reaprendevévo Jehovágui reikuaavéta chupe, ha upéicha rehayhuvéta ha avei reñemoag̃uivéta hese”.
3 Mbaʼéichapa jaiporukuaa pe lívro Mbaʼépa omboʼe la Biblia? ñane estudiánte oñemoag̃uive hag̃ua Jehováre? Jahecha rire peteĩ párrafo oñeʼẽva Jehováre ikatu ñaporandu chupe: “Mbaʼéichapa ko heʼíva koʼápe ohechauka ndéve mbaʼeichaguápa Jehová?”, térã “Mbaʼéichapa ohechauka Ñandejára ojepyʼapyha nderehe?”. Upéicha ñaporandúramo estúdio aja, ñaipytyvõta chupe ojepyʼamongeta hag̃ua oaprendévare. Avei ñaipytyvõta oguerohory hag̃ua Jehovápe.
4 Peiporu rrekuádro pehecha jey hag̃ua umi iñimportantevéva. Opávo káda kapítulo, ejerure ne estudiántepe oiporu hag̃ua rrekuádro “Mbaʼépa omboʼe la Biblia” ombohovái hag̃ua iñeʼẽme umi mbaʼe oñeporandúva. Peiporu umi téysto oñemoĩva. Rehecha hag̃ua mbaʼépa opensa pe ostudiávagui ikatu reporandu jepi: “Mbaʼépa repensa ko mbaʼére?”. Péicha remyesakãta umi mbaʼe iñimportantevéva pe kapítulope ha avei rehupytýta peteĩ mbaʼe iporãvéva: reikuaáta mbaʼépa oguerovia ne estudiánte. Upéicha oñepyrũta oñemoag̃ui Jehováre.